Si Naida Ani Bi Gaani Bangiriba Na Kikiipaha
“Mbori moi apa boro ni ba sa sa ti kpotoboro a wa si angba ti ko.”—1 KOR. 12:18.
1, 2. (a) Ginipai nayugo gupai nga, agu aboro du rogo dungurati rengbe arengba kadu na gayó abangiriba i kini bihe na nyanyakipaha? (b) Gini asanahe ani ka wisigoho rogo gi papara kekepai re?
NATONA bakuru kusayo ti rago aYisaraere, dungurati ningia gu ba Yekova naariga gako aboro rogoho rogo toro yo na kini fu arugute fuyó. Nikpiapai, fuo aYisaraere dibe gu bakporo nangia Ai, Yosua ‘agedi agu apai nga ga rugute dunduko, gu nga ga maku na gu nga ga motiwa, a wa duhe nikekehe rogo kitabu arugute yo ku bangiri gu dungurati nga ga aYisaraere.’—Yos. 8:34, 35.
2 Rogo bambata sa kama agarã F.B.K., gu mokedi nangia Pauro aya fu gu bakumba nangia Timoteo wee gu dungurati nga ga aKristano, si nga “ga Mbori bambu” na kidu a nga “songodi rengo na nduhe.” (1 Tim. 3:15) “Ga Mbori bambu” areme nga agu awirina nga ndikidi aKristano du rogo zegino dunduko. Rogo gu bambata waraga Pauro akehe fu aKorindo, ko aringbisi dungurati kuti kpoto boro rogo kapita 12. Ko ayawee wa vura duhe nga agu apapara kpoto boro re na gaha asunge nibakiakia, si dunduko na nyanyakipaha. Ko akepai ki yaa: “Mbori moi apa boro ni ba sa sa ti kpotoboro a wa si angba ti ko” na ki ya berewe wee “agu apa boro ani niya ti ni re irisa ti ni gbe te, ani namaa irisa ti gere susi.” (1 Kor. 12:18, 23) Sidu, gu sunge boro amangaha rogo ga Mbori bambu, paha akiongo kisusi ga kurani Kristano watadu paha kusende ti ga kurani te. Si gbua nga asunge nibakiakia ti akuraha. Wai tie rengbe ani ka inopai tipa gaani abangiriba rogo gi mbakadapai nga ga Mbori re na kini bihe na nyanyakipaha watadu ka bandaha? Gini apai rengbe ka manga ariapai tipa gaani abangiriba rogo dungurati? Wai rengbe gaani ‘susa na apai kadu niyuguyuguhe fu aboro dũ’?—1 Tim. 4:15.
Wai Rengbe Ani ka Bi Gaani Abangiriba na Kikiipaha?
3. Gine nga gene sa dagba agu akuraha rengbe ani ngbaha ka bi gaani abangiriba rogo dungurati na kini yugu gupai nga ani nabihe na nyanyakipaha?
3 Gene sa dagba agu akuraha ani ayugo gupai ngbaha nga ani ima gbia gaani abangiriba rogo dungurati na ani nabihe na nyanyakipaha nga kaa mangapai kina kubanisa na gu riko nga ga ‘ruru kangara moyambu’ kodihe na Riigbu Bipasunge nga agu abaakumba namangasunge kubayo. (Oni gedi Matayo 24:45-47.) Si naida ani wisigi tirani ka bi wai ani akaragapai kuti agu arugute gu riko re afuhe. Nikpiapai, ani aima digo nigbia arugute be gu moyambu re riipa sino vorokoo na mbakadatise, riipa agu ambaro ani angihe, na tipa iraira mangasunge na Internet. Ya mo ani naairisa gi wene arugute re tipa kadu nibandabanda rani rogo toro yo? Ginipai tigaha ani namangihe tipa gu rugute fuuyó ho furani tipa ani sigira mbakadapai tipa gu irisombori nga ga gaani aborokporo? Ya mo ani ima dia gu rugute re kugume ki kpara nyemu tipa gu irisombori re? Ka singia ani nga abakuparanga watadu adevurukporo, ani nadia regbo tipa kaa wisigo Ziazia Kekeapai? Ka ani amanga agu arugute ruru kangara moyambu afuhe, ani agbia maku agbia be Yekova.
4. Ginipai si aida ani wisigihe ho ani amanga siapai ni?
4 Gu kura aKristano rengbe ka berãha tigayó nga, agu apai duwa aũngbarago, vorokoo, na mbakadatise, si nga ga boro diaberã nitiní. Ono tipa gu Kristano naima kpara gani raka fu Mbori, na kini bi gani bangiriba rogo dungurati na nyanyakipaha, ní abingo pa sia pa agu apai nabi kina ní na nyanyakipaha te. Si naida ní bi gu ga Yekova bipai du rogo Fugoko yo nga Ziazia Kekeapai na nyanyakipaha. Gaha pangbanga nga ‘baro tipa nduni, nga imarago ngba gani gene.’ (Tam. 119:105) Si naida ani duna tatamana nibi agu asiapai ani amangaha tipa tirani, mbiko si rengbe arengba ka manga ariapai rogo gaani sunge tungusapai na ka mangaha a na kura aboro rogo dungurati gbiati aguyo adunga rogo dungurati ya.—Oni gedi 2 AKorindo 6:3, 4.
5. Tipagine si aida ti ni ani bandatirani ti gu toro nga ga ranirii zanga arugute?
5 “Gu toro namanga pai awere rogo agu awiri yo nakeretu,” si ima rengba rogo arago yasika wakina gu wege ani agbidaha ku horani yo. (Ef. 2:2) Gu toro re rengbe ka sa rani ani bi gupai nga, si aidanga ani gbata arugute be ga Yekova riigbu te. Si aidanga ani duwa Dioturepe te nga gu kumba ‘nanaadianga gu mokedi nangia Yoane kugume ya’ watadu nanaadianga arugute beko ya. (3 Yo. 9, 10) Si naida ani bandatirani ti gu sino nga ga ranirii zanga dia arugute be kura aboro. Singia rogo fugoyo watadu rogo mangaapai yo, ka ani ya bisiranga pa gu mbakadapai Yekova namangihe tipa kaa fu arugute furani ngbaha areme ya. (Geda 16:1-3) Kuba gure, si naida ani bi gu momu du berani nga kaa mangapai kina kubanisa na gu riko re na nyanyakipaha. Ya mo si aidanga ani mangi asadatise kadu na giasangbaa na ka ra fu agu awirina nangbembatayo rogo apai rogo dungurati tee?—Oni gedi AEbere 13:7, 17.
6. Tipagine si aida ti ni ani wisigi agu apai du tipa rani?
6 Gu kura gene ani ayugo gupai ngbaha nga ani ima bi gaani abangiriba rogo dungurati na ani nabihe na nyanyakipaha nga ka wisigo agu apai du tipa rani na kini mangi agu apai dunduko rengbe na omerani tipa ka ‘taasapa gu gaani mangaapai’ nga tungusapai tipa si ye na taarimo fu Yekova. (Rom. 11:13) Kura aboro rengbe arengba ka mangasunge ni abazakigene. Gu kurayo namanga sunge Kindo ti aregbo dũ rogo agu angbatungaha duwa tungusapai ni amokedi, mangasunge ni agu ababiapai ninaata ata, na mangasunge Betere yo. Dungu awirina namanga Sunge Dudua ABambu Kindo. Bakere bange ga Yekova aboro namanga asadatise kakaka kaa ngerafuo gayó aborokporo rogo toro yo na kini tungusipai a wenengai rogo aposo. (Oni gedi AKorosaio 3:23, 24.) Ani rengbe kadu naa kido nga, ka ani fu tirani tipa ga Mbori sunge na kini mangihe na mbisimorani dũ, ani du adu na bangiriba berani rogo ga Mbori riigbu.
Agu Apai Namanga Ariapai Rogo Gaani Abangiriba
7. Oni sakinga rogo wai rengbe agu apai du tipa rani ka manga ariapai na gaani abangiriba rogo dungurati.
7 Si ninyanyakipa pai ka ani wisigi tirani, mbiko padu ani rogo dungurati watadu pa zanga du ani rogoho naruriipa agu apai ani amangaha watadu rengbe ani ka mangaha. Nikpiapai, gu bangiriba nga ga wirina rogo dungurati, si kia ti gu nga ga gu wirina nga dee. Garã rani, auwa-kpoto rani, gbiati gu kura apai, si namanga ariapai amanga ti gu sunge ani amangaha fu Yekova. Asanza 20:29 nayaa: “Ga aparanga taarimo nga gayo ome, ono ngbanya gbinza aboro nga gayo nvue riyo yo.” Agu aparanga du rogo dungurati rengbe ka manga dungu apai mbiko i na ome tiyó, ono sosono aboro tigayo nafu undo fu dungurati na gu tatamana du beyo gbiati inohe. Si naida ani tingidi gupai berewe nga, agu apai rengbe ani ka mangaha rogo ga Yekova riigbu, si mbiko gako weneringise arẽnga aboro tipaha ya.—Amo. 14:26; Rom. 12:6-8.
8. Gine gu nyemupai du tirani amangaha na gaani abangiriba rogo dungurati?
8 Gupai namangi tipa awiri vuse sa nayugopa gupai namanga nibipa gaani abangiriba rogo dungurati. Agu awiri-vuse-sa du ue re, i dunduko nanyasi bakere sukuru. Agu apai nadu tipa yó adu kina sa. Avunguyo angarasiyó tipa i tona sunge ni abazakigene fuo nyasa yó na sukuru. Fuo nyasa yó na sukuru, guri sa atona tungusapai ti aregbo dũ, gu kura ri ki zi sunge-marã tigari kaa mangaha ti aregbo dũ. Ginipai si amangi ti ni wo? Gupai nangba tiyó i aguari ka mangaha. Anga kinawo duhe tipa dungu rani tee? Si naida ani berẽ nyanyakii tipa agu apai ani aida ka mangaha rogo ga Mbori sunge. Ya mo ani rengbe ka kiiso gaani sunge tungusapai ka si vura ida gupai berani nga ani aria agu apai aʹaria du tipa rani?—2 Kor. 9:7.
9, 10. Ginipai si aida ani mangihe ka ani bi gupai nga nyemu kiiso gaani sunge fu Yekova tirani te?
9 Ginipai ka ani mangihe ka si du nga nyemu kiiso gaani sunge fu Yekova tirani te, ono ani naida kaa manga kina gu du tooni gbua rogo dungurati? Rogo gu waraga Pauro akehe fu aFiripoio, ko ayaa: “Mbori nga gu ko namanga pai rogo roni yo, sa ida pai na manga ha mbiko wene sangbako.” Ii, Yekova rengbe arengba ka mangasunge rogo rani yo ki sa rani ani kpinyemu gupai ani akpinga nyemuhe ya.—Frp. 2:13; 4:13.
10 Ya mo si aidanga ani sana Yekova tipa ko moi nyemu manga gupai ku ngbaduraniyo ko akpinyemuhe tee? Si nga gupai Bakindo Davide amangihe. Ko akparikpee fu Mbori ki yaa: “Ako Yekova, mo yúgu gamo apai fere; mo yúgu pa gamo agene fere. Mo ngbé fere ku mbata yo rogo ga rengo, ki yugu pai fere, bambiko mo nga Mbori gi bata; mi nasunguda ro na uru pitipiti.” (Tam. 25:4, 5) Si naida ani mangi kina gupai re nga ka kpara fu Yekova ko sa rani ani mangi gupai nika fu ngbarago fuko. Ho ani aberã ni tipa wai Yekova Mbori gbiati Wiriko abi gu sunge ani amangaha fuyó, si nasa rani ani du na ngbarago. (Mt. 26:6-10; Rk. 21:1-4) Gu ngbarago du ani nani re nafõngbaduraniyo ani sana Yekova ko sa rani ani sono rogo toro yo. Gu nebi nangia Yesaya amoi kpiapai tipa gu berã si aida ani du nani. Ho ko agi Yekova ni ko kini sanahe niyaa: “Mi akéda da, da nikandu tipa rani?” gu nebi re akaragapai ki yaa: “Mi du re! Mo kédi re.”—Yes. 6:8.
Oni Sono Kumbatayo
11. (a) Ya mo ndupai ho tipa awirina mangi asadatise ka rẽ tipa asunge rogo ga Yekova riigbu? (b) Ginipai rengbe wirina ka mangaha tipa ka rẽ tipa asunge rogo dungurati?
11 Wa duhe nga aboro wa 289,678 nazi bapatiza rogo gu garã nangia 2008, si ziazia nga, si naida kura awirina nga aguyo nikaa ngbembatayo rogo apai rogo dungurati. Ginipai si aida wirina mangihe tipa gipai re? Si naida ní mangi asadatise ka rẽ tipa gu sunge nga ga moundo bakumba na ga abaakumba a wa ringbisiyo paha rogo Ziazia Kekeapai. (1 Tim. 3:1-10, 12, 13; Tito 1:5-9) Ginipai rengbe wirina ka mangaha ka rẽ tipa agi asunge nga ga dungurati re? Si naida ní naamanga agu asunge zanga nyomoro i afuhe funi rogo dungurati, nimbakadi ngbanya gani karagapai ti regbo adunguratise. Na si naida ní ngia gu wirina nakpinyemu akurani rogo dungurati. Ka ní aamangaha were, si nika sa gupai nga ní naabi gani bangiriba rogo dungurati na nyanyakipaha.
12. Wai rengbe aparanga ka yugo gayó kakaka nyemuse tipa rengo?
12 Ginipai agu awirina tona agarãyo ti bawe-na-biata kuti bawe-na-ribua narengbe ka mangaha tipa ka sona rogo dungurati? Si naida i mangi asadatise ka sona rogo “gu tatamana nga ga Ziazia Toro na rugatise.” Wai si aida i mangihe? Niwirika yó Ziazia Kekeapai. (Koro. 1:9) Ka i aawirika Fugo Mbori zanga nyomoro na kini karagapai zaaza ti regbo adunguratise, si nika undoyó i mangihe. Paranga akumba rengbe arengba a ka manga asadatise ka rẽ na asunge tipa ka rimo gu ‘bakere ngbadimo du nizazaha tipa bakere sunge,’ nga agu asunge duna angbatungaha nibakiakia. (1 Kor. 16:9) Mangasunge fu Yekova nga gu sunge nafu ngbarago fu boro nirengo na si naye na dungu amaku funi.—Oni gedi Batungusipai 12:1.
13, 14. Rogo gini agene agu awirinarani nga adee narengbe ka yugo gupai nga, i nabi gayó abangiriba rogo dungurati na kikiipaha?
13 Agu awirinarani nga adee rengbe arengba ka yugo gupai nga i nabi gayó abangiriba na nyanyakipaha nimangayó gupai du rogo Atambuahe 68:11. Si nayaa: “Gbia arugu pai; agu ade nataka pande pa ha i ni bakere rimbasa aboro[vura].” Gene sa dagba agu akuraha agu awirinarani nga adee ayugo gupai ngbaha nga i nabi gayó abangiriba rogo dungurati na nyanyakipaha nga kaa manga sunge sa aboro ni abawiriki. (Mt. 28:19, 20) Sidu, ho i atungusapai ni wenengai na kini mbupa kura gayó apai tipa kaa manga gu sunge re, i nayugo gupai nani nga i nabi gayó sunge rogo dungurati na nyanyakipaha.
14 Pauro akepai fu Tito ki yaa: “[Si naida] sosono ade . . . du na zee. . . . I du ni ayugu gu pai ngba angba; ya i rugu paranga ade i nikpi nyemu akumbayo, ki nikpi nyemu awiriyo. I du ni airarugatise, ni ruru ade, ni amangi sunge kporo yo, ni weneringi yo, nira fu kina akumbayo, ya ka aboro gbere nga ngbayo yo fu ga Mbori pai ya.” (Tito 2:3-5) Nangbaa gu weneapai rengbe agu awirinarani nga adee ka mangaha re! Ho i afu irisa ni fu agu awirina nangbembatayo rogo apai rogo dungurati na ho i amanga agu adiaberã ni nga ga tatamana nibipa agu apai du rogo gayó raka wa vorokoo, mbakadatise na agu aũmbaro i amangasunge nani, gure nga i namaa wene kpiapai fu kura aboro na kini yugu gupai nani nga i nabi gayó abangiriba rogo dungurati na kikiipaha.
15. Ginipai rengbe gu wirina nga devurukporo ka mangaha ka diabe gu gberarago naye furi mbiko boro ho ka ri aafura na ní te?
15 Ti kura aregbo, si rengbe kadu nikpakarapai fu gu wirinarani nga dee ri inipa gari bangiriba rogo dungurati. Wirinarani sa nga guri gipai re amangi tipa ri ayaa: “Ho boro araka ni nisani ka kurani adunga ho ka ní aafura na ní ya, si nafu kina gberarago funi.” Ho i asana ri ni tipa ri gumba gupai ri naamangaha ka diabe gu gberarago re, ri ayaa: “Kparakpee gbiati wisigopai naundo re mi inipai tipa gimi bangiriba berewe. Mi nawisigopai ka ino wai Yekova abi re. Fuo gure, mi ki guari ka undo agu aboro du rogo dungurati. Si naundo re mi di berãre kusayo ti berã kina pa tire.” Ringbisihe kuti Atambuahe 32:8, Yekova aya fu Davide wee: “Mi arúga ro ni maa [mi] bangire ti ro.” Ga Yekova amoyambu dunduko du nyemu yó tiko kodi agu awirinarani nga adee adunga na abadiarogatise beyo ya, na ko aundoyó aundo dunduko i inipa gayó abangiriba rogo dungurati.
Oni Banda Gaoni Abangiriba
16, 17. (a) Tipagine duhe ti ni nga pa ida ani na gu yamba rani Yekova nayambu rani nani nga wene diaberã kisusi? (b) Ginipai ka ani mangihe ki nye rogo gaani abangiriba rogo ga Yekova riigbu?
16 Yekova aye na gako amoyambu kurogo pagume naako ninyemuse. Yesu ayaa: “A nga boro sa ka ye kono du mi ni gbua te, kina Buba nakedi re ka gbe ni.” (Yo. 6:44) Yekova asia rani asia wa du ani nibasasa dagba gu bazagino aboro du rogo zegino tipa ani ye kadu rogo gako riigbu areme. Wene diaberã du ani amangihe ka idapa gi yamba rani re. Si sa gupai nga gaani raka du na rogoyo ti ni. Nairiwo gu ngbarago du ani nani mbiko ani na abangiriba berani rogo dungurati!
17 Bake apapara Atambuahe ayaa: “Ako Yekova, mi nakpi nyemu vuru ga bambu yo.” Ko abibia berewe ki yaa: “Ndure naru ti kpasakpasa rago; mi asámbua Yekova dagba arika rimbasa aboro yo.” (Tam. 26:8, 12) Ndikidi Mbori na abangiriba beko rogo gako riigbu tipa rani wa du ani nibasasa. Ka ani aamanga agu arugute ko afuhe na kini mangi gako sunge kakaka, ani nyeanye rogo gaani abangiriba rogo gako riigbu.
Oni Natingidaha?
• Tipagine daha ada ti ni ani yawee aKristano dunduko duna abangiriba beyo rogo dungurati?
• Wai ani ayugo gupai nga ani nabi gaani abangiriba rogo dungurati na nyanyakipaha?
• Gini apai rengbe ka manga ariapai tipa gaani abangiriba rogo dungurati?
• Wai agu aKristano nga aparanga na sosono aboro narengbe ka yugo gupai nga i nabi gayó abangiriba rogo dungurati na nyanyakipa?
[Gu kpiahe du ti kpewaraga 21]
Ginipai rengbe awirina ka mangaha ka rẽ tipa asunge rogo dungurati?
[Gu kpiahe du ti kpewaraga 22]
Wai agu awirinarani nga adee narengbe ka yugo gupai nga i nabi gayó abangiriba rogo dungurati na nyanyakipaha?