Rungo Ima Mbeda ka Nyasa!

WENE ZOGARAGO

“Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisihe dunduko, si ki nye anye kindi.”​—Daniere 2:44.

Ga Mbori Kindo nga gu zogarago du ngbangbaturũ yo. Gaha Bazogo nga Yesu Kristo, ko nika dia gu zogarago nga ga aboro dunduko kusayo na ki sa gupai Mbori akpinyemuhe mangi ngbangbaturũ yo na auru kpotosende. (Matayo 6:9, 10) Boro ho nika dia gi zogarago re te bambiko si nga “gu nyenye ngbi nga ga gaani Gbia, nga Batasirani Yesu Kristo.” Zereda nika du nyeanye kindi.​—2 Petero 1:11.

ZIREE PAMBORI ADUNGA BEREWE TE

“Satana nambakada tiko ni maraika imarago. Anga bakerepai tie, ka gako amoyambu mbakadi tiyo a ni amoyambu rurupai; digidayo nika rengba na gayo apai.”​—2 AKorindo 11:14, 15.

Agu aziree yugopai nga ga ziree pambori nika du ni yuguyuguhe ho i nika gbarasa Bakitingbanga ni na gako mangaapai kusayo auru kpotosende. I nika dia agu asogote gbiati gu ukaga-kure ziree pambori aye na ni kusayo. Gipai re nika mbugene fu agu aboro nakpinyemu “unga Mbori nga irarengo” i niˈirisi ko rogo “idapase sa” na “ni toro na rengo.” Nairiwo gu zereda na kodatise nika ngiaha re!​—1 ATesaroniko 1:9; AEfeso 4:5; Yoane 4:23.

INGAPAI ADUNGA TI ABORO BEREWE TE

“Mbori anyé na yo tigako, ki du ni gayo Mbori. Ko awéga aume ti bangiriyo kusayo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”​—Yugoti 21:3, 4.

Yekova Mbori nika manga agi apai rogo Wiriko nga Yesu, nga gu boro naafu gako raka tipa aboro. (Yoane 3:16) Ga Yesu zogarago nika dia ingapai ti aboro kusayo. Rungo adunga berewe te bambiko “Mbori anyé na yo tigako” na ki wege “aume ti bangiriyo kusayo.” Ingapai na rungo nika da barambeda ni agu apai naima susa; “ruru aboro adía kumbo ringara, ki nyeanye kindi.”​—Atambuahe 37:29.

GBEGBERẼ ATORO ADUNGA BEREWE TE

“Ko [Yesu Kristo] ki zi daragona, nga gu bakuru wo, nga Bakitingbanga, nga Satana, ki vo ko tipa agarã 1000. Ki ba ko kurogo gu due zanga mburuhe, ki kisi he, ki dika ha ku auru ko, ka ko ananga nga arikaaboro berewe wa sa ya.”​—Yugoti 20:2, 3.

Gu maapai du Satana na adaimona na ni kurii aboro, si nika go kusayo ti gu regbo i nika vo yó ki bayo kurogo “gu due zanga mburuhe,” nga gu ba i nika dunga na ome rogoho berewe ya. I adunga berewe na ome kurii ga aboro mangaapai te. Nairiwo gu ngbarago nika ngiaha re ka raka rogo gu zegino Satana na adaimona nika dunga maapai kurii aboro rogo ho ya!

“KUSA ARAGO” NIKA DIGO ADIGO

“Kusa arago” nika digo ti regbo gu “bakere gberãngbi” Yesu afura tipaha. Ko aya: “Ni gu rago re bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.”​—Matayo 24:21.

Gu gberãngbi re nika du ni bakerehe rogo gu gene nga si aamanganga wo mbata te. Si nika digo ti regbo “gu vura nga ga gu bakere rago nga ga Mbori, nga gu ko du na tandu apai dũ,” nga “Aramegido.”​—Yugoti 16:14, 16.

Agu aboro nakpinyemu rurupai na maabangiriyo ka bi digido gi zegino re. Mo bingo bete agu amaku napido yó rogo ga Mbori Kindo.

MBORI NIKA MANGA DUNGU APAI!

“Bakere rimbasa aboro” nika bata kurogo zezeredi vovo zegino: Fugo Mbori naya “bakere rimbasa aboro” nika ‘kura rogo bakere gberãngbi’ na i nika bata kurogo ruru vovo zegino. (Yugoti 7:9, 10, 14; 2 Petero 3:13) Gayo bata nika ye be Yesu Kristo nga “gu Wiri kandoro nga ga Mbori ru, nadia gu ingapai nga ga zegino kusayo.”​—Yoane 1:29.

Aboro nika gbia undo be gu wirikapai naye be Mbori: Rogo vovo zegino, “kpotosende ahí be inapa Yekova.” (Yesaya 11:9) Gi wirikapai re nika koda gu rugute du tipa wai ka raka rogo zereda na aboro dunduko ringbisihe kuti wai sino raka nika du yo. Mbori na kidohe nga: “Mi nga Yekova ga Mbori, nayugo pai foro sa u, nga gu ko nangbe kumbatayo foro ngba gu gene mo ka ndu ngbaha.”​—Yesaya 48:17.

Kpikpi aboro azinga bekpio: Ho Yesu adu ni auru kpotosende, ko azingisi bakureako nangia Razaro. (Yoane 11:1, 5, 38-44) Rogo gi gene re, ko ayugu gu bakerepai ko nika mangaha rogo ga Mbori Kindo.​—Yoane 5:28, 29.

Rurupai na zereda nika du kpaima nyeanye kindi: Rogo ga Yesu zogarago, kuoandiko adunga berewe te. Ani na ino gipai re wai? Wa duhe nga Yesu ima ino gupai du ku kpotoboroyo, ko nika manga sunge na gu tandu re tipa ka sapangbanga ruru aboro na gbegberẽ yó. Agu aboro aidanga ka mbu gbegberẽ apai ya, ko ambunga yó i rimi kurogo ga Mbori vovo zegino te.​—Atambuahe 37:9, 10; Yesaya 11:3, 4; 65:20; Matayo 9:4.

Agu apai wisigi ani he re nga bete gu dungu sangbaanebi du rogo Ziazia Kekeapai nayugo gu wene apai du ku mbatayo. Ho ga Mbori Kindo nika tona zogarago ni auru kpotosende, “gu wenepia du kpaima” nika nyeanye kindi. (Atambuahe 37:11, 29) I nika dia agu apai dunduko naye na rungo kuti aboro kusayo. Ani naakido kuti gipai re mbiko Fugo Mbori naya: ‘Oni ngére, mi nambakada ahe dunduko ni vovoho. Agi apai re nga ruruhe nga rengo a.’​—Yugoti 21:5.