“Ragoho” Ima Mbeda Kada

WAKINA gu nebi nangia Abakuku, ga Yesu abawiriki aduna nyemu ka bi arungo si nadigi. Fuo i rugutiyo na gupai nga, ga Mbori Kindo nika ye ka mbakada agu apai gberẽ auru kpotosende, i asanako ki yaa: “Ni gini rago agi apai ka manga re? gine i ka ina pa ga ye ti ni [na gu ome nga ga Kindo], na pa digida rago?” (Matayo 24:3) Yesu akaragapai fuyó ki yawee kina Yekova sa ini gu regbo gu Kindo re nika tona zogarago ti ni auru kpotosende rogo apai dunduko. (Matayo 24:36; Marako 13:32) Wa si avura duwo, Yesu gbiati kura abawiriki aima fura tipa apai kumbatayo nga gu si adu nga si nika yugopa mbeda gu regbo re​—Oni bi sanduki.

Ya mo oni aidanga kuti gupai nga, agi apai i afura tipaha re, si namanga areme rogo arago dunduko tee? Yesu aima fura a tipa gu sunge-yugopai apefuoko amangaha rogo zegino dunduko. Ko ayaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Matayo 24:14.

Si nga kina boro gupai namanga areme. ADezire Yekova bangeyo nasusi amirioni saba namanga gu sunge re. I namangaha rogo aringara bangehe nasusi 236 kini fura tipa gupai ga Mbori Kindo nika mangaha na kini undo aboro i naaraka ringbisihe kuti agu apai Mbori aidaha, nga gu boro nakpinyemu ka digiso arungo gbiati aima. Gupai si aidaha beroni nga oni susi kumbatayo kaa wirikapai tipa ga Mbori Kindo tipa wa ka oni ruho ka gbia nyenye unga rogo gu zegino arungo gbiati aima nika dunga ni ya.

[Gu kpiahe du ti kpewaraga 8]

Agu Averesi Nafura Tipa Yangara Arame

MATAYO 24:​6, 7; YUGOTI 6:4

• Agu avura wirinaha aamanganga mbata ya.

MATAYO 24:7; MARAKO 13:8

• Abazigizo.

• Angbongi.

RUKA 21:11; YUGOTI 6:8

• Riri akaza.

MATAYO 24:12

• Maapai nga ga Kuondiko.

• Zera nyemuse.

YUGOTI 11:18

• Gbarasa kpotosende.

2 TIMOTEO 3:2

• Kere nyemu marã.

• Pa zanga gia agude sangba avunguyo.

• Kpinyemutise bakere gbe.

2 TIMOTEO 3:3

• Zera gu nyemuse du dagba agume.

• Zanga giatise riipa apai.

• Zanga du aboro na rugatise.

• Aboro zanga nyemu rurupai.

2 TIMOTEO 3:4

• Kpinyemu ngbarago susi nyemu Mbori.

2 TIMOTEO 3:5

• Aboro nabiriko ya i nga aKristano.

MATAYO 24:​5, 11; MARAKO 13:6

• Dungu zire anebi tingba sunge.

MATAYO 24:9; RUKA 21:12

• Rungosi aKristano.

MATAYO 24:39

• Zanga maa aboro berã yó fuo gu zahe Ziazia Kekeapai afuhe.

[Gu kpiahe du ti kpewaraga 8]

ADezire Yekova rogo zegino dunduko nayugopai fu aboro tipa ga Mbori Kindo