Tipagine Si Aida Ti Ni Oni Kpara Gaoni Raka Fu Yekova?

‘Ga gu Mbori maraika du mi nga gako boro, mi naamanga pako, ko niru pati re nigi yuru re.’—AMO. 27:23.

1. Ginipai agu aboro naida ka zio bapatiza nimangihe mbata fu i sanahe tipa bapatiza, na gini asanahe si akusaha?

“RIIMBURU ga Yesu Kristo motumo tumorii, oni ima sa berã ti gaoni ingaapai na ki kpara gaoni raka fu Yekova tipa ka manga gupai ko akpinyemuhe?” Si nga sanahe sa dagba agu asanahe nidu ue i naasana agu aboro nani naida ka zio bapatiza ho gu gumbapai nga ga bapatiza ambeda ni ka digo. Tipagine si aida ti ni aKristano kpara gayó raka fu Yekova? Gini undo rengbe ani ka gbiaha fuo kpara ani gaani raka fu Mbori? Tipagine duhe ti ni nga, Mbori arengbanga ka idapa ga boro irisombori te ka ní akparanga gani raka fuko ya? Tipa ani rengbe ka giarogo agu akaragapai du tipa agi asanahe re, si naida ani ini guhe nga kparatise fu Mbori.

2. Pa kpara boro tiní fu Yekova nakoda gini apai?

² Pa kpara boro tiní fu Mbori nakoda gini apai? Ani kparianga wai gu mokedi nangia Pauro aringbisipa gako pagume na Mbori. Ho ko aduni rogo gu kurungba nagburuwa, ko afura fu aboro ki yawee ‘ko nga ga Yekova boro.’ (Oni gedi Amokedi 27:22-​24.) Ndikidi aKristano dunduko nga ga Yekova aboro. Aboro zegino tigayo ‘nizogozogo yó be gbegberẽ ko.’ (1 Yo. 5:19) AKristano nida niga Yekova aboro ho i amangapai ni ringbisihe kuti gu gayó kparatise i agumbaha fu Mbori rogo kpee yo. Gu kparatise re nga mozunga boro amangaha na ki zi bapatiza tingbafuoho.

3. Gine ga Yesu bapatiza aayugopaha, na wai rengbe apefuoko ka wirika gako kpiapai?

³ Yesu amoi kpiapai furani ho ko aguari ni tipa ka tona manga gupai Mbori akpinyemuhe. Mbiko wa si adu nga i abatikako ku dagba gu rikaaboro naima kpara gayó raka fu Mbori, ko aima du nigu boro nakpara tiní fu Mbori. Ono ti regbo gako bapatiza, ko amangi gu kurapai naadunga rogo ga Moize ndiko ya. Ho ko azi bapatiza ni, si adu wa ka i yawee ko nayaa: “Ako Mbori, mo ngére, mi ye, ka manga sangbaro.” (Eb. 10:7; Ruka 3:21) Sidu, ga Yesu bapatiza ayugupa fuuko tiko fu Bako ka manga gupai ko akpinyemuhe. Sidu, apefuoko napefuo gako kpiapai ho i afu tiyo ni ka zio bapatiza. Ono tipa yó tigayo, gu bapatiza i azioho rogo ime re, si nayugopa gupai nga, i aima kpara gayó raka fu Mbori rogo kpee yo.

Gu Gene Kparatise Aundo Rani Ngbaha

4. Gine gu pabakure nadu dagba aDavide na Yonatana ayugoho furani tipa futise tipa pai?

⁴ Gu kparatise aKristano amangaha fu Mbori, si na nyanyakipaha. Anga si gbua nga ida boro pa pai te. Ono wai pa kpara ani tirani fu Mbori aundo rani? Ani ringbisinga ha na gu kura apai aboro afu tiyo ka mangaha na agu aundo i agbiaha behe. Kpiapai sa tipaha nga pabakure. Tipa boro gbia ngbarago be sino bakure, si niidi ní naamanga agu apai amanga bakureani aidaha beni. Gu bakure paha nagbarii akuraha peyo paha rogo Ziazia Kekeapai, si nga gu nadu dagba aDavide na Yonatana. I amangi mozunga nga ga bakure dagbayó. (Oni gedi 1 Samuere 17:57; 18:​1, 3.) Wa vura duhe nga aboro aziongo bakure wa gu nadu dagba agu akumba re te, ono dungu aboro nanye ni abakure ho i abihe ni nga si nirurupai fuyó i naamanga agu apai bakureayo aidaha beyo.​—Snz. 17:17; 18:24.

5. Wai kanga anirengbe ka gbia undo nyeanye kindi be bairani?

⁵ Agu aNdiko Mbori afuhe fu aYisaraere, si afura tipa gu kura kodatise aboro anaagbia undo behe ho i anifu tiyo ni tipa ka mangapai. Kangia kanga aniidi ka sungo na bairani nyeanye kindi, ní anirengbe arengba ka mangaha wo nimanga ní mozunga na gu baira ní re. Gu Ndiko re ayaa: “Ka kanga ya nzunzu, ‘Mi nakpi nyemu bairare, [gbiati] diare, na awire; mi aga nga ni rire te,’ bairani ki ye na ni [tie] koyo du Mbori ni, ki ye na ni ku ngbadimo, watadu ku pati ngua ngbadimo bairani ki koro tuni na kofodi; ni ki du ni gako kanga nye anye kindi.”—Gate 21:5, 6.

6, 7. (a) Wai aboro agbia undo be kekepa gu giatise mangiyo ho? (b) Ginipai gupai re ayugoho tipa gaani pagume na Yekova?

⁶ Rogatise nga gupai boro afu tiní tipaha ka manga dungu nyanyakipa apai. Si nga boro nafu tiní ka ndusunge kurani angianga ka fu tiní tipa gu mozunga ní amangihe ya. Gu kumba na dee naraka sa angianga ni arogotise ya, ngbakingo bayo te; na ngbakingo ba awiriyo a te. Ono tipa agu aboro naima manga mozunga ki rogo tiyo ngba iriiri gene, Ziazia Kekeapai naundo yó i mbakadi gu kpakarapai ka kuru dagbayó.​—Mt. 19:​5, 6; 1 Kor. 13:​7, 8; Eb. 13:4.

⁷ Ti agu aregbo i aakeka Ziazia Kekeapai ti ni, aboro anaaneka akpakarapai nikekayo pa agu ahe i anaangbekaha watadu bagaha watadu pa agu asunge i agi tiyo riipa mangaha. (Mt. 20:​1, 2, 8) Kina gu bangisapai re namanga areme. Si nafu undo furani ho ani akepa gu giatise ni mangi ani he riipa gu sunge ani andu ka tonaha watadu ho ani aida ka tona mangasunge ni fu boro watadu rogo ba sunge nga ga riigbu. Boro nagbia undo agbia ho ní afu tiní ni tipa ka zio bakure na kurani, ka manga rogatise, na ho ni afu tiní ni tipa sunge. Kina gu bangisapai re a namanga ho ni afu tiní ni fu Mbori ka manga gupai ko akpinyemuhe. Awere tie, ani wisigingo pai tipa agu aboro nagbia undo bakuru kusayo wa i afu tiyo fu Yekova Mbori na ani ki bi gu kura apai a si akodihe.

AYisaraere Agbia Undo be Kpara Yó Tiyo fu Mbori

8. Pa kpara aYisaraere tiyo fu Mbori akodi gini apai?

⁸ Gu rikaaboro nangia aYisaraere naabayo dunduko akparatiyo fu Yekova ho i amangi mozunga ni fuko. Yekova adungura yó ku pavuru Bagangara Sinai yo ki ya fuyó: “Ka oni gí sangbare ni rengo, ki nika kuti gi zungahe, oni adú ni gimi wene ũkumuko dagba kura rika aboro zegino dunduko; bambiko kpotosende dunduko gimi nga ha, oni ki du ni ga bakindo aboromotumo tipa re, ni kparakpara ziazia rikaaboro.” Aboro dunduko akaragapai ki yaa: ‘Agu apai dunduko Yekova nagumbaha, ani amangaha amanga.’ (Gate 19:4-8) Pa kpara aYisaraere tiyo fu Mbori akodi kura apai kupati gu mozunga i amangihe re. Agu apai si akodihe nga i adu niga Yekova aboro na ko kini bi yó nigako “wene ũkumuko.”

9. Wai aYisaraere agbia undo wa i akparatiyo fu Mbori?

⁹ AYisaraere agbia undo be gupai nga i angia ga Yekova aboro. Ko adu niruruko fuyó na kini ngerefuo yó wa gu baagude naangera fuo awirini. Mbori aya fu aYisaraere wee: “Ka bangiri de go ti gari gude ngbamai, ya ka nunga gu wiriri nga ga rukumburi du nga ti ri ya? Ii, bangiri agi yo re rengbe [arengba] na go, ono bangire nga Gbia agó nga ti ro te.” (Yes. 49:15) Yekova afu arugute fuyó si naaruga yo, na anebi i naangarasa yó, na amaraika kini banda yó. Bake apapara Atambuahe akepai ki yaa: “Ko ata manga nga wo mbata fu gu kura rikaaboro te; i aina nga pa gako asarangbanga te.” (Tam. 147:19, 20; Oni gedi 34:7, 19; 48:14.) A wa Yekova anaangera fuo gu rikaaboro nangia aYisaraere, kinawo a ko nikaa ngerafuo agu aboro kparatiyo awere fuko.

Ndu Gupai Si Aida ti ni Ani Kpara Tirani fu Mbori

10, 11. Ya mo i abatika rani ku dagba ga Mbori aborokporo? Oni sakingo rogoyo.

¹⁰ Kura aboro rengbe ka sana tiyo ho i aberãpa kparatiyo ni ki zi bapatiza. I rengbe ka sana tiyo ki yaa: ‘Ya mo mi arengbanga kaa irisombori zanga mi kpara tire akpara fuko tee?’ Ndu gupai si aida ani mangihe ti ni wo nada ziazia ho ani akpariapa agu apai ni du tipa rani wa gu Mbori abihe. Ani tingidi gupai nga, mbiko gu ingapai nga ga Adamu, ani dagba ga Mbori aborokporo te. (Rom. 3:​23; 5:12) Pa kpara ani tirani fu Mbori nasa gupai nga ko di rani ku dagba awiriko. Ani bingo nduhe.

¹¹ Anga barani ho narengbe ka batika rani nirengberengbe aboro te. (1 Tim. 6:​19) I avunganga rani ni awiri Mbori te mbiko bambata avungurani aima manga ingapai si kini kpara rani kusayo ti gu Barani nga Bakusirani nga boro nyemuse. (Oni ringbisinga ha na Pa Fu Rugute ni Ue he 32:5.) Tona ti gu regbo re kaa ndu kumbatayo, aboro naadunga dagba ga Yekova aborokporo te, mbiko i aima kparatiyo kusayo tiko.

12. (a) Ginipai rengbe kpakpa aboro ka mangaha tipa Mbori di yó ku dagba awiriko? (b) Gini apai si aida ani mangihe mbata fu zio bapatiza?

¹² Wa vura duhe nga ani dagba ga Mbori aborokporo te, ani rengbe arengba ka sanako wa du ani nibasasa tipa ko di rani ku dagba gu gako amoyambu ko naidi na gayó apai.a Wai rengbe aboro-ingapai wa ani were ka manga gupai re? Gu mokedi nangia Pauro akepai tipaha ki yaa: “Ho . . . ani adu ni ni avura [Mbori], ka ani azeredi na Mbori mbiko kpio Wiriko, gu susi, si nga, wa ani nazeredi ani abáta abata mbiko ungako.” (Rom. 5:10) Ti regbo bapatiza, ani nasana Mbori tipa kadu na wene sangbakpotoraniyo tipa ko di rani kugume. (1 Pet. 3:​21) Ono tie, mbata fu zio ani bapatiza, apai kinaho si aida ani mangihe. Si naida ani ini Mbori, ki wiriki wai ka kido kutiko, ki sa berã rani, na ki aria gaani agene. (Yo. 17:3; Amo. 3:​19; Eb. 11:6) Gu kurapai kinaho berewe si aida ani mangihe tipa Mbori di rani ku dagba awiriko. Ginipai du ngaha?

13. Tipagine daha ada ti ni fu boro ní mangi mozunga amanga nga ga kparatise fu Mbori tipa ko di ní ku dagba awiriko?

¹³ Mbata fu gu boro adunga pagume dagbani na Mbori ya ye ka zio pagume naako, si naida ní mangi kidohe fuko. Ani yugungo ho na kpiapai. Ani ya baagude duho naida ka dia wirinyaure kaa ngerafuo ru. Gu baagude re nga wene sino kumba. Wa vura duhe wo, ko naida gupai be gu gude re nga u kidohe fuko mbata. Gu kumba re nayaa, “Mbata fu mi di ro niwire kaa ngerafuo ro, mi naida ka ino singia mo nika kpinyemure na kini irisi re nibamu watadu mo aidanga nani te.” Ka gu gude re aidanga ka manga gu kidohe re ya, gu kumba re dinga ru ka ngerafuo ru te. Ya mo runga gupai re tee? Wakina gure a, Yekova nadia kina agu aboro naida ka manga mokido ka kpara gayó raka fuko. Ziazia Kekeapai nayaa: “Oni fú tironi ni unga ũmotumo, ni ziazia ha, si ngba fu Mbori, si nga boro gaoni mangapai.”—Rom. 12:1.

Gu Mangaapai Nga ga Nyemuse

14. Wai du kparatise fu Mbori nga yuguyugupai tipa nyemuse tipa ko?

¹⁴ Ho ani amanga mozunga ni fu Mbori tipa ka kpara gaani raka fuko, si nayugopa gaani nyemuse tipa ko. Si nawira kina gu mozunga aboro naamangaha ti regbo rogatise. Ti gu regbo re, gu kumba nga Kristano nimangi mozunga ka nye niruruko fu diako ka kina gini apai vura kaa manga vurũ. Si nga ngbaanga boro amangaha fu kurani angianga kungbo kidohe ya. Ko ima ino gupai nga, ka ko amanganga gu mozunga re ya, ko dunga na momu ka raka na gu dee re te. Rogo gu gene du wakina gure, ani arengbanga ka gbia ngbarago be pagume na Yekova zanga ani mangi gu mozunga nga ga kparatise fuko te. Wa du ani nga kpakpa aboro, ani nakpara gaani raka fu Mbori mbiko ani naida kadu nga gako aboro na ka nye niruru rani fuko ka kina gini apai vura kaa manga vurũ.​—Mt. 22:37.

15. Wai du kparatise fu Mbori nigu mangaapai nayugopa idapase?

¹⁵ Ho ani akpara gaani raka ni fu Mbori, gure nga ani nayugopa gaani idapase rogo mangaapai. Tipagine duhe ti ni wo? Gaani idapase kuti Yekova nasa rani ani du na gu kido nga, pa mbeda ani naako nga wenepai tipa rani. (Tam. 73:28) Ani ima ino gupai nga si taata dedede ani naata na Mbori “dagba iraira rika aboro nga airanyakari” te, ono ani naa kido nga Mbori aundo rani aundo. (Frp. 2:15; 4:13) Ani ima ino gupai nga, kpakpa aboro nga ani, ono ani naa kido nga Yekova nambupai ambu furani zavura ho ani naamanga irairaapai ni. (Oni gedi Atambuahe 103:13, 14; ARomo 7:​21-​25.) Ani ima ida kuti gupai nga, Yekova nika undo rani aundo ani kakuti gaani ruru mangaapai.​—Eyo. 27:5.

Kparatise fu Mbori Naye na Ngbarago

16, 17. Tipagine duhe ti ni nga pa kpara ani tirani fu Mbori naye na ngbarago furani?

¹⁶ Pa kpara ani tirani fu Yekova naye na ngbarago furani mbiko si nasa gupai nga ani fu tirani ka undo kura aboro. Yesu agumbaha ngba gi gene re nga: “Fu he ngba ti dia ha.” (Amo. 20:35) Ko aima duna ngbarago be agu ahe ko anaagamaha ti regbo gako sunge auru kpotosende. Ho si anida ada ni fuko ko mangihe wo, ko aninye kuti undo aboro ki zanga ongoda na ki zanga riahe tipa wa ka i ruho ka maa nduyo ngbagene unga. (Yo. 4:34) Yesu anaagbia ngbarago ti sa ngbarago ti Bako. Ko ayaa: “Mi namanga kina agu apai ngba ti ko waragoagira.”—Yo. 8:29; Snz. 27:11.

¹⁷ Si atadu were, Yesu kini yugu gu gene raka ngbaa fu apefuoko. Ko ayaa: “Gu ni ka akpi nyemu peka re, ni mbú gani apai, ki di gani wagiwagi ngua, ki nipeke re.” (Mt. 16:24) Pa manga ani he wo nambedisa rani koyo du Yekova ni. Ya mo kura boro kinaho rengbe ka ngerafuo rani kisusi gere?

18. Tipagine duhe ti ni nga pa raka ani kuti gaani kparatise fu Mbori naye na ngbarago susi gu ka ani akpara tirani tipa kungbopai watadu tipa kura boro?

¹⁸ Pa kpara ani tirani fu Yekova na kini raki ringbisihe kuti agu arugute du tipa gu kparatise re naye na ngbarago furani susi gu ka ani kpara tirani tipa kurapai watadu fu kura boro kia. Nikpiapai, dungu aboro nakpara gayó raka tipa kaa orafuo aũzegino. Wa i amanga gipai re, i gbianga ndikidi ngbarago te na i arengbanga a be agu ahe i aorafuoho re te. Ono tipa agu aboro nakpara gayó raka fu Yekova, i nga agu aboro nagbia nyenye ngbarago. (Mt. 6:​24) Gupai Mbori namangihe fuyó nga ka sa yó nigako “abadiasunge,” si nga gupai nafu ngbarago fuyó. Wa vura duhe were, i aakparanga tiyo tipa sunge te, ono i akparatiyo fu gayó Mbori. (1 Kor. 3:9) Anga boro ho duna tambuahe bakere gbe tipa gu sunge i amangaha re kisusi gayó Mbori te. Ko nika sa gako ruru aboro asa i du ni aparanga tipa i naagbia aundo beko nyeanye kindi.—Eyo. 33:25; oni gedi AEbere 6:10.

19. Gini momu agu aboro kpara gayó raka fu Yekova agbia ngbarago behe?

¹⁹ Pa kpara ani tirani fu Yekova nasa gupai nga ani zi pagume naako. Ziazia Kekeapai nayaa: “Oni mbédi na Mbori, ko ki mbedi na oni.” (Yak. 4:8; Tam. 25:14) Rogo gu papara kekepai naye fuo gere, ani nika wisigo ndu gupai rengbe ani ti ni kadu naa kido nga ruhe aru furani ani sia Yekova nibairarani.

[Gu rukutu kekeapai du bandu kpewaraga yo]

Gaoni Karagapai Nga Gine?

• Gine nga pa kpara boro tiní fu Mbori?

• Tipagine si aida ti ni boro kpara gani raka fu Mbori?

• Wai pa kpara ani tirani fu Mbori aundo rani?

[Gu kpiahe du ti kpewaraga 12]

Pa raka ani ringbisihe kuti gaani kparatise naye na ngbarago furani