Ani Yugu Tirani Nindikidi Apefuo Kristo

“Wene ngua nazu wene rinde; ono gbegberẽ ngua nazu gbegberẽ rinde.”​—MAT. 7:​17.

1, 2. Wai du ndikidi apefuo Kristo nikparakpara yó ti zire abayugupai, gbe, ti gi digido regbo re?

YESU ayawee agu aboro namanga tiyo nga i namangasunge fuko, i kia ti ndikidi apefuoko watadu i naino yó ti zuzu yó, watadu ti gayo yugopai gbiati asinoyo. (Mt. 7:15-17, 20) Nirengo, agu apai aboro agiaha watadu i amaaha ku ngbaduyó yo, si namanga ariapai amanga rogo asinoyo. (Mt. 15:18, 19) Agu aboro nagia ziree, i “nazu gbegberẽ rinde,” ono agu aboro nayugo agu apai nga rengo, i nazu “wene rinde.”

² Gu zuzu angua ue re aima yugotihe ti gi yangara aregbo re. (Oni gedi Daniere 12:​3, 10.) Zire aKristano nayugo kina ziree tipa Mbori na i naka kina kuti kpia sinombori gbua nibiriki, ono tanduhe beyo te. Ono tipa agu aboro duna gu inohe nga ga toro, i nairisombori “ni toro na rengo.” (Yo. 4:24; 2 Tim. 3:1-5) I namanga ome tipa kadu na agu asino duwa ga Kristo. Ono ginipai du tipa rani tigaani? Wa ani kaa wisigo agu apai naye du bisue nga gu i aino ndikidi aKristano ti ni, si naida ani sana tirani nga: ‘Ya mo asinore na gupai mi ayugoho fu aboro, si nzunzu na ngbanya kuti fugo Mbori? Ya mo mi naaba nyemu rengo ti agu aboro naida ka inoho?’

Raka Ringbisihe Kuti Fugo Mbori

3. Gini apai nasa ngbarago ti Yekova, na si nakoda ginipai tipa ndikidi aKristano?

³ Yesu ayawee “agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.” (Mt. 7:21) Nirengo, anga pa ya ani gbua wee ani nga aKristano nafu ngbarago fu Mbori te, ono pa manga ani agu apai si aida aKristano naamangaha nafu ngbarago fuko. Tipa ndikidi apefuo Kristo, gipai re nakoda gayó gene raka naabaha, kodihe na gu bipai du yó nani tipa marã, tipa sunge-mara, tipa aũwasa, tipa agu asino nga ga zegino gbiati agu aʹuru aboro airisoho, tipa rogatise, na tipa wai i araka na kura aboro. Ono tipa zire aKristano tigayo, i namanga agu pai du rogo zegino nga gu nagberã kina kumbatayo.​—Tam. 92:7.

4, 5. Wai rengbe ani ka mangasunge na gu fugo Yekova du rogo Maraki 3:18. rogo gaani raka yo?

⁴ Gu nebi nangia Maraki akepai ki yaa: “Oni ayéga berewe ka kparaka dagba rurupai na gbegberẽpai, na dagba gu boro namanga pa Mbori na gu boro amanga nga pa ko ya.” (Mara. 3:18) Wa oni kaa berãkurii agi afugo re, oni sana tironi na gu sanahe nga: ‘Ya mo mi wa agu aboro du rogo gi zagino re, watadu mi nikparakpara re tiyo? Mi namanga asadatise kadu wakina agu akuare du mi naayó sukuru yo watadu basunge yo, watadu mi nairisa gu bangua arugute nga ga Ziazia kekeapai na kini songodihe a ho si aidaha ni wo?’ (Oni gedi 1 Petero 3:​16.) Rengo ngaha nga, si aidanga ani mangi tirani nga ani nga ruru aboro te, ono si naida ani du nikparakpara rani ti agu aboro akpingo nyemu Yekova na kini irisiko ya.

⁵ Ka pai duho si aida oni mangi ariapai rogoho, oni mangihe amanga zanga kpa. Oni kpari tipa gupai re, na kini wisigi Ziazia kekeapai dedede, kini ndu kupati adunguratise yo. A wa oni kaa mangasunge na fugo Mbori, kinawo a oni kaa zu “wene rinde,” kodihe na gu “zuzuhe nga ga ngbarani nakusa pa rimoko [Mbori].”​—Eb. 13:15.

Tungusapa ga Mbori Kindo

6, 7. Ringbisihe kuti gu pangbanga nga ga Kindo, gini kparakparapai duho dagba ndikidi aKristano na zire aKristano?

⁶ Yesu ayaa: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Ruka 4:43) Tipagine ga Yesu tungusapai adu ti ni gbe tipa ga Mbori Kindo? Mbiko ko aima ino gupai nga, ko gbiati agu awirinako nga mbedimbedi aKristano, i nika mangasunge rogo gu Kindo re ka dia ingapai kusayo gbiati Bakitingbanga nga tarã gbegberẽ apai. (Rom. 5:12; Yugo. 20:10) Si du ko azinahe ti ni fu apefuoko tipa i naatungusapa gu Kindo re daho gi digido zegino re ka nyasa ni. (Mt. 24:14) Agu aboro namanga tiyo nga i nga apefuo Kristo, i arengbanga ka manga gu sunge nga ga tungusapai re te, nirengo ka i mangingo ho te. Tipagine i arengbanga ti ni ka mangaha ya? I arengbanga ka mangaha te mbiko nduapai biata: Bambataha nga, ka i tungusinga gupai i agianga rogoyo ya te. Uepai nga, i na umbasitise gbiati wingbaduse tipa ka hi agu asogote na agu asawia aboro nikaa mangayó nani gene tungusapa Kindo yo te. (Mt. 24:9; 1 Pet. 2:23) Biatapai nga, ga Mbori toro ti zire aKristano te.—Yo. 14:16, 17.

⁷ Ono tipa ndikidi apefuo Kristo tigayo, i ima rugatiyo na guhe nga ga Mbori Kindo, na gupai si nika mangaha. Kurigure, i naperesapa tungusa wene pangbanga nga ga Kindo rogo gayó raka na i natungusaha rogo zegino naabaha mbiko gu undo ga Yekova toro afuhe. (Zek. 4:6) Ya mo oni naamanga gi sunge nga ga tungusapai re dedede? Ya mo oni naamanga asadatise tipa ka kiiso gaoni sunge tungusapai, nidia oni bakere regbo kuti ngbaha na si kidu na wene sangbanaha ti ni? Kura aboro aima manga ome tipa ka mbakada gayo asino sunge nga ga tungusapai nimangayó sunge na Ziazia Kekeapai ngba wene gene. Sino gu Mokedi nangia Pauro angia fura na aboro rogo Ziazia Kekeapai na kini sakipai naayó. Ko akepai ki yaa: “Gu pai nga ga Mbori du na unga, ki du na tandu.”—Eb. 4:12; Amo. 17:2, 3.

8, 9. (a) Oni penga agu apai nayugo nyakapa mangasunge na Ziazia Kekeapai? (b) Ngba gini gene rengbe ani kadu niwene abamangisunge na Fugo Mbori?

⁸ Ho wirina sa aamangasunge tungusapai ni kini tanga nani ti akporo, ko agedi Daniere 2:​44 fu kumba niboro Katoriko, na ki saki wai fuko ga Mbori Kindo nika ye na ndikidi zereda na ki mbakadi ba aboro. Gu kumba re akaragapai ki yaa: “Mi natambuaro tipa wai mo nagedipai fere kina rogo Ziazia Kekeapai yo angianga ka pe sangba riroyo fere ya.” Ho gu kura wirina na diako agedipai ni fu dee nga kristano, gu dee re asana dungu asanahe nga gu nayugu gupai nga ri adu na kakaka nyemu rengo tiri. Gu wirina re gbiati diako akaragapai fu gu dee re kina rogo Ziazia Kekeapai. Kusa, gi dee re ayaa: “Oni ini ndu gupai mi niidi ti ni ani fura na oni? Mbiko oni ye fuore na Ziazia Kekeapai, na ki gedipai fere kina rogoho.”

⁹ Rengo ngaha nga, gaani abuku na nyanyakipaha na si naida ani naakparakaha akparaka fu aboro. Wa vura duhe wo, Ziazia Kekeapai nga guhe si aida ani naamangasunge nani bakere gbe. Ka si du nga oni naamanganga sunge na Ziazia Kekeapai dedede gene sunge tungusapai yo te, si naida oni tonaha awere. Watadu oni rengbe ka sia bete averesi rogo Ziazia Kekeapai yo nga gu nafura tipa ga Mbori Kindo, na wai si nika nyasa riipa gu kpakaraapai nga gu nambusa agu aboro du rogo gaoni dagbarago. Sidu, oni mbakadi tironi tipa geda Ziazia Kekeapai fu aboro wa oni kaa tungusapai nitanga nani ti akporo.

Ani Duna Ngbarago Mbiko Rimo Mbori Rirani

10, 11. Nibipa mangasunge na rimo Mbori, gini kparakparapai duho dagba Yesu na agu aboro naya tipa tiyo wee i nga apefuoko?

¹⁰ ‘ “Oni nga gimi adezire,” wo poi Yekova.’ (Yes. 43:12) Gu ga Yekova bakere dezire nga Yesu Kristo, ko abihe nipa irisa kadu na rimo Mbori riko na ka takapande rimo Mbori fu aboro (Oni gedi Gate 3:​15; Yoane 17:6; AEbere 2:​12.) Nirengo, Yesu aima takapande rimo Bako, na i nayamba Yesu nga “ndikidi dezire.”—Yugo. 1:5; Mt. 6:9.

¹¹ Nigupai dukia ti gure, dungu aboro namanga tiyo nga i namangasunge kuba Mbori na Wiriko, ono gayó bipai watadu asinoyo ayugongo irisa tipa rimo Mbori te, na i aima kusa rimoko kusayo rogo gayó Ziazia Kekeapai. Barambeda kusayo, kikiipa boro-pambori ake waraga fu agu abisopu nga ga Katoriko yó ki yawee “gu rimo Mbori i akehe rogo pa-Ebere nga YHWH, [nga Yekova rogo pa-Zande,] si aidanga i mangisunge nani watadu ka yambaha ti regbo irisombori te.”a Oni bingo gu gbegberẽ berã re!

12. Wai ga Yekova amoyambu azi kura wene pagume naako berewe rogo gu garã nangia 1931?

¹² Ndikidi aKristano namangasunge na rimo Mbori nipekafuo ga Yesu kpiapai gbiati gu kpiapai nangia ga gu dungu ‘adezire duwa ndurõ’ nga aguyo nadumbata fu regbo Yesu. (Eb. 12:1) Rogo gu garã nangia 1931, ga Mbori amoyambu azi kura wene pagume naako berewe, bambiko i adi gu rimo nga aDezire Yekova kuriyo. (Oni gedi Yesaya 43:10-12.) Si atadu were, ndikidi apefuo Kristo kini da ni agu ‘aboro yambu yo rimo [Mbori] tiyo.’—Amo. 15:14, 17.

13. Wai rengbe ani ka raka na ngbanya kuti rimo Mbori?

¹³ Wai rengbe ani ka raka na ngbanya kuti rimo Mbori? Gene sa dagba agu akuraha nga, ani duwa ka ani amanga dezirepai tipa ko. Gu mokedi nangia Pauro akepai ki yaa: “ ‘Gu ni ka kpari ni rimo Gbia ni bati abata.’ I awíra pa kpara tie wãi fu gu ko i aida nga pa ko ya? ki wiri pa ida pa gu ko wãi i agia nga pako ya? ki wiri pa gia ha wãi nizanga batungusipai? I awíra pa tungusa ha wãi ka i akeda nga yo akeda ya?” (Rom. 10:13-15) Na berewe a, si naida ani duna rubangirise tipa ka ino agu apambori nayugo zire tipa Bakusirani, wa ngbatunga agu ayugopai nga Mbori nazo aboro rogo we yo, nga gupai nayugo Mbori nigbegberẽ boro wakina Satana, baraho du Mbori ni niboro nyemuse.—Yere. 7:31; 1 Yo. 4:8; oni ringbisinga ha na Marako 9:17-27.

14. Ho kura aboro awiriki rimo Mbori ni, wai i adu?

¹⁴ Ya mo oni na ngbarago tipa kadu na rimo gu Baroni du ngbangbaturũ yo rironi? Ya mo oni naaundo kura aboro i ini gu ziazia rimo re? Dee sa France yo agi gupai nga, aDezire Yekova nga agu aboro ini rimo Mbori, sidu, ri asana gu Dezire Yekova ri agbia ní tingbafuo gu regbo re ní yugu rimo Mbori furi rogo Ziazia Kekeapai yo. Ho ri agedi Atambuahe 83:18 ni, si aduna bakere ome kuri ri. Ri atona ka wirika Ziazia Kekeapai, na ri awere natungusapai rogo kura ringara. Ho dee niboro katoriko naraka Australia yo abi rimo Mbori ni nibambataha rogo Ziazia Kekeapai, ri angbiko na ngbarago. Ri ima mangasunge awere ninazakigene tipa dungu agarã. Bambeda kusayo, ho awirina aamanga dezirepai ni Jamaica yo, i ayugu rimo Mbori fu dee kina boro rogo gari Ziazia Kekeapai. Ri adu a na bakere ngbarago. Si naida ani du na ngbarago ka yugo rimo Mbori fu aboro nipeka ani fuo gu kpiapai nga ga Yesu kaa yugo rimo Mbori fu aboro.

‘Ka Nyemu Zegino Dunga ti Roni Ya’

15, 16. Wai ndikidi aKristano abi gi zegino re, na gini asanahe si aida i sana tiyo nani?

¹⁵ “Ka nyemu zegino du nga ti roni ya, na agu ahe du zegino. Ka nyemu zegino du ti boro, ga Mbori nga Ba nyemuse du nga ti ni te.” (1 Yo. 2:15) Gi zegino re na gaha toro nasovura kuti Mbori na kuti gako ziazia toro. Si du adunga ndikidi apefuo Kristo ti ni nipapara gi zegino re ya. I akpingo nyemuhe te mbiko i ima ino gupai gu bawiriki nangia Yakoba akehe tipa zegino ki yaa: “Ngbanya na zegino si nga sogote fu Mbori.”—Yak. 4:4.

¹⁶ Si rengbe kadu nikpakarapai tipa ka mangasunge na agu afugo Yakoba re rogo gu zegino duna dungu aʹasada rogoho. (2 Tim. 4:10) Si du Yesu akpari ti ni tipa apefuoko ki yaa: “Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. Aboro zegino nga yo te, wa kina re adu nga ni boro zegino ya.” (Yo. 17:15, 16) Oni sana nga tironi na agu asanahe nga: ‘Ya mo mi namanga ome ka zanga du nipapara gi zegino re? Ya mo aboro ini re nigu boro airisongo agu aʹuru na asino andunga kuti Ziazia Kekeapai ya nga kina sino apagano?’ —2 Kor. 6:17; 1 Pet. 4:3, 4.

17. Ginipai rengbe ka fõngbadu agu aboro yo duwa avusende tipa i ye kaa iriso Yekova?

¹⁷ Agu andiko du berani du mburuhe rii Ziazia Kekeapai ani andu kuti ni, si asanga rani ani ngba bangiri aboro zegino te, ono si rengbe ka sa agu aboro duna ruru ngbaduyó yo i du na nyemu ka ino apai tipa rani. Nirengo, ho aboro abi gupai ni nga gaani idapase naru rii Ziazia Kekeapai, na kini kodi gaani raka naabaha, si rengbe ka sa yó i gumbapai fu mbedimbedi aKristano wa gere: “Ani ndú na mo, bambiko ani gi he ya Mbori du na mo.”—Zek. 8:23.

Oni Yugu Ndikidi Nyemuse Nga ga AKristano

18. Pa yugo ani nyemuse fu Yekova na fu akuarani nakoda ginipai?

¹⁸ Yesu ayaa: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ” na “Mo nikpí nyemu kuaro wa mo akpi nyemu tiro.” (Mt. 22:37, 39) I nayamba gu nyemuse re nga (a·gaʹpe rogo pa-Giriki) nga gu nyemuse du riipa ruru mangaapai, rii arugute, na riipa agu apai nafõ boro ngbaduniyo. Si nga gu nyemuse duna bakere ome ti ni. (1 Pet. 1:22) Gu nyemuse re kia ti gbangbati, na si nayugotihe rogo afugo na mangaapai.​—Oni gedi 1 AKorindo 13:​4-7.

19, 20. Oni gumbanga bete agu apai namangi nayugopa gu ome du ga aKristano nyemuse nani kurii aboro.

¹⁹ Wa duhe nga nyemuse nga zuzu ga Mbori toro, si nasa gupai nga ndikidi aKristano mangi gupai kura aboro arengbanga ka manga ya, wa gu nga diabe gu sogote nga ga angbatunga, na ki sa gupai nga i zanga rimiso tiyo kurogo agu apai nga ga birĩ zogarago. (Oni gedi Yoane 13:34, 35; Gara. 5:22) Ho agu aboro duna ngbaduyó yo wa ga avusende abi ngbatunga gu nyemuse re ni, si nafõngbaduyo yó. Nikpiapai, ho paranga nga Yuda naraka Yisaraere yo andu ni kupati gu dungurati nga ga aKristano nibambataha na ki bi gupai nga aYuda na aArabi asungu sa kaa iriso Yekova, kina ngbako nazere. Nisangbana gipai re, ko atona kaa ndu kupati adunguratise yo dedede na ko ki idipa wisigo Ziazia Kekeapai. Ya mo oni naayugo ngbatunga gu ndikidi nyemuse re fu awirinaroni? Na ya mo oni naamanga bakere asadatise tipa kaa dia gu vovo aboro naye ku Bambu Kindo yo kugume, zanga bipa angbatungayo, rangi kpotoyo, pa gayó ringara, watadu zanga bipa kio payo?

²⁰ Wangia ani ndikidi aKristano, ani namanga ome tipa ka yugo nyemuse fu aboro dunduko. Rogo gu ringara nga El Salvador, paranga dee ninatungusipai sa aawisigo Ziazia Kekeapai na dee niboro katoriko du garãri nga 87 nga gu dee naima kpatagara kuti gari pambori. Ti kura regbo sa, kaza azi gu dee re ri kini woki awaka nikerehe i ki dika ri ku bambungua yo. Ho ri aga ni ku kpuri yo awirina ni adee anaandu ka bi ri na kini fu riahe furi. I amangi gipai re tipa bagizo regbo wa diwi sa. Anga boro ho sa dagba gari aboro pambori naye ka bi re te. Gine nangia sangbana gipai re? Ri abafu gari akpiahe kusayo, ki mbu gu pambori ri adu rogoho, na ri ki susi kumbatayo na gari wisigo Ziazia Kekeapai. Nirengo, gu nyemuse nga ga aKristano na ome ti ni! Pa yugo aKristano nyemuse fu aboro rengba ka fõngbaduyo yo susi kungbo tungusapai fuyó.

21. Wai rengbe ani ka sa gaani raka kumbatayo si du niwenehe?

²¹ Barambeda kumbatayo, Yesu nika ya fu agu aboro namanga tiyo nga airisiko wee: “Mi aína nga roni wa sa te; oni gúari pati re, amangi irairapai.” (Mt. 7:23) Sidu, si naida ani sonosi agu asino nafu iriso fu Mbori na Wiriko. Yesu ayaa: “Were gu ni nagia gi gimi apai re, ki mangi he, ni wiri gu boro tatamana nadua gani bambu auru mbia.” (Mt. 7:24) Nirengo, ka ani yugu tirani nzunzu nindikidi apefuo Kristo, Mbori inipai aino furani na barani ki ngba angba kumbatayo wakina gu bambu duayo ho ri mbia!

[Gu rukutu kekeapai du bandu kpewaraga yo]

Oni Natingidaha?

• Ngba gini gene du ndikidi apefuo Kristo nikparakpara yó ti zire akristano?

• Oni yambungo rimo bete gu “zuzu” ahe nayugo ndikidi aKristano

• Tipa ka sonosa agu asino nga ga aKristano, gini asásá si aida oni moihe?