Oni Kakuti Gaoni Ngbarago Ti Regbo Fudifudiapai
“Agu yo nafu tiyo ku be ro i ngi angi, i ningbiko na ngbarago.”—TAM. 5:11.
1, 2. (a) Gini ngbatunga apai naye na bakere gberarago areme? (b) Kupati agu agberãngbii namanga aboro dunduko areme, ginipai si aida ndikidi aKristano hi he?
GU GBERÃNGBII namanga rogo zegino dunduko, si namanga aDezire Yekova amanga a. Badungu ga Mbori aboro naarungo arungo be abakuo andiko, be avura, na be iraira sarangbanga. Agu agberango naye be gu mangaapai nga ga ome zegino, zingo aũzegino, na kpio, si nafu kina bakere gberarago fu aboro. Gu mokedi nangia Pauro akepai ki yaa: “Ani ini aina ya ũzegino dũ mongo niukaga omehe nimbu be ima kina ku awere.” (Rom. 8:22) Ani narungo arungo a mbiko gaani zangarengba nitirani. A wa bakindo Davide agumbaha, ani nayaa: “Gimi irairapai fu ri re; wa rõrõi tindiro si rõi susi.”—Tam. 38:4.
2 Kupati agu agberangbii namanga aboro dunduko, ndikidi aKristano natinda ngbunduru ngua-rungosi, ka pepai nimasaku. (Ruka 14:27) Aboro nasogote ga Yesu abawiriki na kini rungosiyo wakinagu si adu tipa ko. (Mt. 10:22, 23; Yo. 15:20; 16:2) Sidu, pa peka ani fuo Kristo naida na bakere asadatise gbiati hipai wa ani apido agu amaku nikadu rogo vovo zegino.—Mt. 7:13, 14; Ruka 13:24.
3. Ginihe nayugo nani furani nga, anga si naida aKristano rungo arungo mbata i niru ka fu ngbarago fu Mbori te?
3 Ya mo gure nayugo gupai nga ndikidi aKristano nabengeta tiyo abengeta ti gu raka duna ngbarago? Ya mo si naida gaani raka hi kina be gberarago daho digido gi zegino re nikada ni? Si tie ziazia nga, Yekova naida ani duna ngbarago wa ani apido gako akidohe si digisitihe. Dedede, Ziazia Kekeapai nafura tipa ndikidi airisimbori ni agu aboro duna ngbarago. (Oni gedi Yesaya 65:13, 14.) Atambuahe 5:11 nayaa: “Agu yo nafu tiyo ku be ro i ngi angi, i ningbiko na ngbarago.” Ii, si nitaatapai tipa kadu na ngbarago, zereda berãse yo, na kini bi agu ahe du berãni nga kinaha rengbe tipa rani zavura ti regbo gberãngbii. Ani wisigingo pai tipa wai rengbe Ziazia Kekeapai ka undo rani ani du na ngbarago rogo gaani sovura kuti agu aʹasada ani ka agbiatirani nani.
Yekova Nga “Betedi Mbori”
4. Gini bipai Mbori nidu nani ho aboro naabasapa manga gupai ni ko akpinyemuhe?
4 Nikpiapai, ani bingo gupai du tipa Yekova. Nidu ko nigu Mbori Duna Tanduapai Dũ, zegino naabaha dunduko du kutii gako pagbia. He ho ko azingo tipaha te watadu undo ho ko aida boro fuhe fuko a te. Ono wa vura duhe nga gu ome du ti Yekova nibaʹiiriwoho, ko aima duna gberarago ho wiriko sa nimaraika asamungu ni kutiko ki da ni Satana. Rago aima gbera tiko a ho gu kura amaraika akoditiyo ni kuti gu basamungu re. Oni berẽnga tipa gu imisiripai Mbori adu nani ho Adamu na Eva nga gu ga Mbori bawene kusikusiahe nangba kisusi asamungu ni kutiko. Natona ti gu regbo re kaa ndu kumbatayo, abirioni atitayo aima ká ka ra fu gu pagbia nga ga Yekova.—Rom. 3:23.
5. Ginipai ninaaba gberarago ti Yekova?
5 Gu ga Satana samungu re arame kindi wakinagu nadumbata. Yekova ima bi irisokpiahe, zuũ, imo aboro, gbiati wasiwasi kodaba tipa agarã susi 6,000. (Bam. P. 6:5, 6, 11, 12) Kurigure, ko aima gia badungu aziree na gberangbayo. Zavura ndikidi airisimbori, i anaaimisa ngbaduko aimisa ti kura aregbo. Ziazia Kekeapai naringbisapai tipa gipai re na agu afugo nga: “Na nge agu arago i anasa mungu kuti ko ngbakungba yo, nirungosi ko kpatakpari yo! I aasadi Mbori berewe na berewe, ki nizingisi ga Yisaraere Ziazia Ko.” (Tam. 78:40, 41) Yekova nidu na bakere gberarago tiko ho gako aboro ambuko ni. (Yere. 3:1-10) Nirengo, gu gbegberẽ apai namanga, rago angbanga ti Yekova nani te.—Oni gedi Yesaya 63:9, 10.
6. Wai Yekova naamangapai kuti gu gberarago du ko nani?
6 Wa vura duhe wo, padu Yekova na gberarago tiko akánga naako ti manga gupai ko aida ka mangaha te. Ho kpakarapai naakura ni, Yekova niguari nibasa tipa ka mangapai kuti ni tipa ka rugusa gu gbegberẽpai re. Ko aima digo niimangipai tipa gbanga regbo tipa ka digiso gako ringbisapai. Nibipa wene mangapai, Yekova nangera kumbatayo na ngbarago tipa ka dia gbarasarimo kusayo ti gako bakere pagbia. Fuo gure, ko ki ye na amaku fu ruru airisiko. (Tam. 104:31) Ii, wa vura duhe nga aboro aima digo nigbarasi rimo Yekova, ko kindi nga “Betedi Mbori,” watadu ko kindi na ngbarago.—1 Tim. 1:11; Tam. 16:11.
7, 8. Ho du apai ni furani nigbegberẽhe, wai rengbe ani ka wirika Yekova?
7 Nirengo, ani arengbanga ka ringbisa tirani na Yekova ho si aida ni ani sovura kuti agu akpakarapai ani agbiatirani nani te. Ono wa vura duhe wo, ani rengbe arengba ka wirika Yekova ho ani asovura ni kuti agu arungosi nagbia rani. Sino aboro du nga ka rungo kpotoyo yo ho du apai ni fuyo nigbegberẽhe. Ono si aidanga ani nye kurogo gu ngbatunga rungosi re te. Wa duhe nga, Mbori akusi rani rogo kpiako, gu tandu berãpai gbiati tatamana du ani nani, si naundo rani ani berẽkurii gaani akpakarapai na ki mangi gu wenepai daada kuti ni.
8 Gu kura nyanyakipa pai rengbe ka undo rani ani sovura kuti agu akpakarapai ani agbiatirani nani, si nga ka bi gupai nga, gu kura apai kinaho ani arengbanga ka mangapai kuti ni ya. Pa baka ani bangirani kakaka kurii ngbatunga agu apai re rengbe ka kiiso kina bakere gberarago tirani, na si rengbe arengba ka dia gu dungu angbarago ani agbiaha ti ndikidi irisombori. Fuo manga ani asadatise ka sovura kuti gaani akpakarapai, si adu niwenehe ka si du nga ani ima mbu berãpa agu akpakarapai re, na ki moiberã rani tipa ka manga agu apai nikadu na wene sangbanaha. Agu apangbanga nga ga Ziazia Kekeapai naye re, si nika sakapai furani tipa gipai re wenengai.
Si Naida Ani Du na Ruru Berã
9. Rogo gini gene Ana amangisunge na ruru berã?
9 Ani wisigingo gu kpiapai du tipa Ana nangia navungu gu nebi nangia Samuere. Ri aduna rungo kpotoriyo mbiko gupai nga ri arengbanga ka batika gude te. Aboro anaamomari na kini sawia ri mbiko padu ri ni irazangada. Ti kura aregbo, ri anidu na bakere gberarago kini kpari zanga ri riahe. (1 Sam. 1:2-7) Ho Ana anduni ti kura regbo kurogo ga Mbori kparakpara ba, ‘imisiringbaduse amangi ri, ri kini kpari fu Yekova, kini kpari ni aume gbe.’ (1 Sam. 1:10) Fuo Ana peke agu apai nadu ngbaduriyo dunduko fu Yekova, Eri nangia gbiamotumo aye fuori na ki ya furi wee: “Mo ndú zezeredi, Mbori nga ga aYisaraere ko, ko idi pa ga kpe nga gu sana mo ko ti ni.” (1 Sam. 1:17) Ti gi regbo re, Ana adu naa kido nga ri ima manga gupai nzunzu si aaida ri mangihe. Ome ri aima bata be gu pari nangia ga zangada. Ana amangisunge na ruru berã. Fuo gipai re, ri aga “ki ri riahe, ka kpakpuri adu nga na rungo berewe ya.”—1 Sam. 1:18.
10. Gini ruru bipai Pauro adu nani ho ko agbiatiko ni na gu kpakarapai ko arengbanga ka diabehe ya?
10 Gu mokedi nangia Pauro amangi kina gu bangisapai re ho ko agbiatiko ni na arungosi. Pai adu kinaho naarungosiko nga gu nasako ko duna bakere gberarago. Ko afura tipa gipai re ki yawee si wa ‘kiwe ti kpotoko yo.’ (2 Kor. 12:7) Ka si vura du nga gu kiwe re adu wai, Pauro amangi kina gupai si aaida ko mangihe tipa ka dia gu kiwe re kusayo, nga ka kpara fu Yekova tipa undo. Pauro azungodi Yekova bara wai tipa gipai re? Ko azungodi Yekova bara biata. Tingbafuo gu biata zungodihe, Mbori ayugu gupai fu Pauro nga, gu “kiwe” du tii kpotoko yo re, Ko adianga ha kusayo te. Pauro aima ida kuti gipai re na ki moiberãko kuti mangasunge fu Yekova na kpotokoyo dunduko.—Oni gedi 2 AKorindo 12:8-10.
11. Ginipai kparakpee gbiati zungoditise amangaha rogo gaani sovura kuti agu apai nafuda rani?
11 Agi akpiapai re ayugongo gupai ngawee, si aidanga ani kpari fu Yekova tipa agu arungo du ani nani te te. (Tam. 86:7) Kuba gure, Fugo Mbori nazungodi rani niyaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.” Wai Yekova akaragapai kuti gi ngbatunga zungaditise na tambuahe re? Ziazia Kekeapai nagbia kurupai kuti ni nga: “Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (Frp. 4:6, 7) Ii, Yekova arengbanga ka dia gaani akpakarapai kusayo te, ono ko rengbe arengba ka karagapai kuti gaani kparakpee nibandako kpotoraniyo na gaani aberã. Fuo kpara ani tipa gupai nafuda rani, si rengbe ka manga nga ani nika kparia gu kerepai rengbe ka gbia rani be gu fudifudipai ani abaka bangirani behe re.
Manga Gupai Mbori Akpinyemuhe Naye na Ngbarago
12. Tipagine si aidanga ti ni rago gberẽ tirani tipa gbanga regbo ya?
12 Asanza 24:10 nayaa: “Ka he amaka ro ti uru gberãngbi, omero adu toni gbua.” Gu kura Asanza naya berewe wee: “Rungo ku kpotose yo si naimisa toro boro.” (Snz. 15:13) Kura aKristano narungo kpotoyo yo si ki sa gupai nga i mbu geda Ziazia Kekeapai nisase gbiati berãkurii Fugo Mbori. Si rengbe ka sa yó i naakpara gbua kina auru ngbayo, na i kpara tiyo ti akurayó aidipase. Si ziazia tie nga, ho boro ambupa tiní ni kurogo bakere gberarago tipa ngbanga regbo, si naye na kina imisiri funi.—Snz. 18:1, 14.
13. Gini ngbatunga asunge rengbe ka dia gberarago tirani kusayo na ki sa rani ani du na ngbarago?
13 Ono tipa wene bipai tigaha, si rengbe ka undo rani ani moiberã rani fuo agu apapara gaani raka rengbe ani ka gbia ngbarago behe. Davide akepai ki yaa: “Ako gi Mbori, rago ngba ti re ka amanga gu pai ngba angba ti ro.” (Tam. 40:8) Ho angbanga apai ni furani rogo raka yo ya, si aidanga ani mbu irisombori te. Nirengo, gu ziga rengbe ka undo rani tipa gu gberarago du ani nani, si nga manga gupai rengbe ka ye na ngbarago furani. Yekova nape gupai furani nga ani rengbe ka gbia ngbarago rogo geda ani Fugoko na kini berẽkuriihe dedede. (Tam. 1:1, 2; Yak. 1:25) Ho ani ageda Ziazia Kekeapai ni na kini ndu kupati agu adunguratise nga ga aKristano, ani nagia gu “wene afugo” nga gu rengbe ka ngarasa rani na ki sa ngbaduraniyo si du na ngbarago.—Snz. 12:25; 16:24.
14. Gini kidohe Yekova nakido rani nani nga gu nafu ngbarago furani?
14 Badungu nduapai duho Mbori nafuhe furani tipa si sa ngbarago tirani. Gu gako kidohe du tipa bata, si nga gu banguapai nasa rani ani du na ngbarago. (Tam. 13:5) Ani ima ino gupai nga, ka apai vura kaa manga rani kina wai awere ti gi digido rago re, Mbori nika fu mosoro afu fu agu aboro nagbatako kakaka. (Oni gedi Batungusipai 8: 12.) Gu nebi nangia Abakuka ape gipai re ngba wene gene ki yaa: “Ka vurumo avura nga mbumbo ya, ka zuzu bakakue adu nga ti ni ya, zuzu aeraya ki kpa, ka aati azu nga riahe ya, rimbasa akandoro ki du ni bafubafu ra ku sa yo ti ndugu ra ka zogozogo anya adu nga rogo bambu ra yo a ya, ono mi tigimi, mi angí rogo Yekova yo, mi adú na ngbarago rogo Mbori yo nga [Mbori] gi bata.”—Abak. 3:17, 18.
“Rago Nangba ti agu Aboro Du Gayo Mbori Nga Yekova!”
15, 16. Ani penga pa agu agamahe Mbori nafuhe furani nga gu ani agbia ngbarago behe awere wa ani apido agu amaku du kumbatayo?
15 Wa duhe nga ani napido gu baiiriwo amaku du furani kumbatayo, gupai Yekova akpinyemuhe nga ani gbia ngbarago be agu ahe ko nafuhe furani. Ziazia Kekeapai nayaa: “Mi ini he ya he ho ngba fu yo susi ngi mbaro, na ka manga gu pai ngba ti yo wa du yo ni ungayo te. Ga Mbori gamahe fu aboro ni ba sa sa nga ri riahe ki mbiri he, ki du na ngbarago ti ni rogo gani sunge dunduko.” (Batu. 3:12, 13) Manga wenepai fu akuarani nga “ka manga gu pai ngba [angba].” Yesu agumba gupai nga, bakere ngbarago duho rogo gamahe ti diaha. Manga weneapai fu gaani badiarogatise, fu awirani, fu avungurani, na gu kura agumerani rengbe ka ye na bakere ngbarago. (Snz. 3:27) Manga akuarani rogo wesewese nyemuse, dia yó kugume, na kini mbupai fu agu awirinarani nga aKristano naye na bakere ngbarago furani na si nafu ngbarago afu fu Yekova. (Gara. 6:10; Koro. 3:12-14; 1 Pet. 4:8, 9) Na berewe, pa mbu ani kura gaani apai tipa ka manga gu gaani asunge nga ga tungusapai nga gu kura ndupai nafu ngbarago furani.
16 Agu afugo di ani he rogo Batungusipai kuari re, si nafura tipa gu ngbarago nga ga rihe na mbirahe. Ii, ka kina gini ngbatungapai vura ka manga rani, ani rengbe arengba ka gbia ngbarago rogo agu agamahe du berani nga gu Yekova nafuhe furani. Kurigure, ho du ani ni gbodogbodo-nyemu, na kini bi wene arago, na kini bi gu wene mangimangiapai nga ga anyaa, gbiati gu kura apai du rogo zegino ani tumongo atumo tipaha ya, si ima rengba ka sa ngbarago tirani. Wa ani kaa berãkurii ngbatunga agi apai re, gaani nyemuse tipa Yekova nika sona mbiko ko nga gu boro nagama wene ahe dunduko furani.
17. Ginihe nika ye na bakere ongoda furani be agu arungo du ani nani, na ginihe nafu wasa furani ti gi gaani regbo re?
17 Niyangarapai tie, gu nyemuse du ani nani tipa Mbori, irisa gako arugute, na gu idapase du ani nani kuti motumo tumorii, si nika ye na ongoda furani be agu arungosi nga ga zangarengba na ki sa rani ani gbia ngbarago nyeanye kindi. (1 Yo. 5:3) Wa du rago re, ani nagbia ngbarago mbiko ino ani gupai nga, Yekova ima ino agu apai dunduko ani arungo behe. Davide akepai ki yaa: “Mi adu pusiapusia ki ningi tipa ga weneringise, bambiko mo abi gi gberãngbi, mo aini pa ga mbisimore fudifudiapai.” (Tam. 31:7) Mbiko gu nyemuse du Yekova nani koyo du ani ni, si nika fõngbadukoyo tipa ko batasi rani ti regbo gberãngbii.—Tam. 34:19.
18. Tipagine si aida ngbarago moipai ti ni dagba ga Mbori aboro?
18 Wa ani apido ga Yekova akidohe si ringbisitihe, ani dunga wakina ko nga betedi Mbori. Ka ani ya mbunga gbegberẽ aberã si ká na ani ti manga ani sunge fu Mbori ya. Ho akpakarapai akura ni, ani mbu kina gaani tandu berãpai gbiati tatamana si ngbe furani kumbatayo. Yekova nika undo rani aundo ani dibe agu anunga du ani nani, wa ka ani ruho ka manga gupai rengbe ka undo rani ani ne gu gbegberẽ sangbanapai rengbe ka gbia rani. Ani gbianga ngbarago agbia be gu wenepai naye yo du ko ni, nga ga toro na ga borose. Ka ani du mbembedii na Mbori, ani nikadu adu na ngbarago mbiko “rago nangba ti agu aboro du gayo Mbori nga Yekova!”—Tam. 144:15.
Ginipai Wiriki Oni He?
• Ho ani asovura ni kuti arungo, wai rengbe ani ka wirika Yekova?
• Wai rengbe ruru berã ka undo rani ani sovura kuti arungo?
• Ho du ani ni rogo rungo, wai rengbe ani ka gbia ngbarago rogo manga gupai Mbori akpinyemuhe?
[Gu kpiahe du ti kpewaraga 16]
Ngbanga rago ti Yekovah na gu gbgberẽ apai namanga rogo zegino te
[Gu kpiahe du ti kpewaraga 16]
© G.M.B. Akash/Panos Pictures
[Gu kpiahe du ti kpewaraga 18]
Yekova ima fuka agu ahe furani rengbe ka undo rani ani banda gaani ngbarago