Ani Sovura Kuti Agu Arungosiro du Areme na Wingbaduse

“Mbori nga gaani bagbuko nga gaani ome a, du ni mounda mbembedi rago fudifudipai.”—TAM. 46:1.

ONI RENGBE KA KARAGAPAI SA AGI ASANAHE RE?

Wai rengbe ani ka ne gu fudifudiapai du areme ka si dinga berani ya?

Gini nduapai du berani tipa kadu na wingbaduse?

Gini aundo duho Yekova nafuhe tipa si undo rani ani sovura kuti arungosiro?

1, 2. Gini arungosiro dungu aboro agbiatiyo nani, ono ginipai ga Mbori amoyambu akpinyemuhe?

ANI naraka ti regbo arungosiro. Zegino ima hi be agberango. Abazigizo, sungburosungburo ime, gbitiko arago, ikiʹikiʹ-aime, zaragazaraga fofõi-aime-mbia, kere abavugumo, na bakere abavugumo nga agu apai narungosi aboro areme. Kurigure, gu fudifudiapai nga ga aborokporo gbiati agu apai nafuda aboro nitiyo naye na gunde gbiati rungo. Kina rengo du ngaha nga, “rago gbia kuti mamu namanga” furani dunduko.—Batu. 9:11.

² Ga Mbori amoyambu dunduko nasovura na diabese kuti gi fudifudiapai re. Wa vura duhe wo, si naida ani mbakaditirani tipa ka rẽ tipa gu fudifudiapai rengbe ka gbia rani kumbatayo wa gi zegino re ambeda ka digo. Wai rengbe ani ka sovura kuti gi kpakaraapai re zanga mbuhe si di berani? Ginihe nika undo rani ani sovura kuti agu arungosiro du areme re na wingbaduse?

ANI WIRIKIPAI BE AGU ABORO NAADU NA WINGBADUSE

3. A wa yugu yó ho rogo ARomo 15:4, wai rengbe ani ka ngarasa tirani ho du ani ni na gberarago mbiko agu apai nafuda rani?

³ Wa vura duhe nga fudifudiapai namanga aboro susi gu nidumbata, anga si nivovopai fuyo te. Ani bingo gupai rengbe ani ka wirikaha be gu ga Mbori amoyambu naasovura kuti raka na wingbaduse.—Rom. 15:4.

4. Gini arungosi Davide ahihe, na ginihe naundo ko?

⁴ Ani bingo gupai naadu tipa Davide. Agu apai si aidi ko hihe angia pa soga bakindo ko, pa so avurako vura kutiko, pa zio adiako, pa zinga gako aboro kutiko, gbiati wai ko adu nifudifudiko kpotoko yo. (1 Sam. 18:8, 9; 30:1-5; 2 Sam. 17:1-3; 24:15, 17; Tam. 38:4-8) Gu pangbanga du rogo Ziazia Kekeapai tipa Davide nayugo wai agi apai re arungosi ko. Ono tie, agi apai re aimongo ko rogo toro yo te. Mbiko gu bakere idapase naadu tiko, ko ayaa: “Yekova nga gu gbata nga ga ungare; da ka mi gunde be ni?”—Tam. 27:1; oni gedi Atambuahe 27:5, 10.

5. Ginihe naundo aAbarayama na Sara i sovura kuti gu kpakarakpakara raka i arakihe?

⁵ Abarayama na Sara araki tipa gbanga regbo wa nungunungu aboro rogo bamburoko rogo gu ringara nangianga gayo ya. Raka aadunga taata fuyo te. Ono wa si avura duwo, i asovura kuti angbongi na du ngbapai be agu arikaaboro i aaraka dagbayo. (Bam. P. 12:10; 14:14-16) Ginihe naundoyo i mangi gipai re? Fugo Mbori nape gupai furani nga Abarayama “angere tipa gu bakporo du na nyanyaki mburuhe ti ni, du baduaha nga Mbori ni bamangihe a.” (Eb. 11:8-10) Abarayama na Sara amoi berãyo kuti agu apai naadu kumbatayo, angianga ka mbutiyo fu agu ahe naadu patiyo rogo zegino si kandasi yó ya.

6. Wai rengbe ani ka wirika Eyobo?

⁶ Eyobo aima du nifudifudiko be apai. Oni berẽnga kina wai ko abi tiko ho apai aandunga ni wenengai rogo gako raka ya. (Eyo. 3:3, 11) Gu naagarakaha berewe nga, ko ainongo ndu gupai agi apai re aamanga ko ti ni te. Wa si avura duwo, ko aambunga tiko fuhe te. Ko akakuti gako ruru mangapai gbiati idapase fu Mbori. (Oni gedi Eyobo 27:5.) Nairiwo gu wene kpiapai si aida ani wirikihe re!

7. Ginipai Pauro agbiatiko nani wa ko aairisombori, ono ginipai naafu wasa fuko tipa ko nindu kindi kumbatayo?

⁷ Ani bingo ga Pauro kpiapai a. Ko adu ‘ngbapai bakporo yo, ngbakungba yo, na rogo baime.’ Ko afura a tipa ‘gomoro na gomoro ime, zere na zingo rokoo.’ Pauro ape gupai berewe a nga ko amangi ‘yuru sa na uru sa rogo baime’ mbiko gberã kurungba naako. (2 Kor. 11:23-27) Wa agi apai re avura kaa mangako, oni bingo gupai ko agumbaha ho ko agbiatiko ni na kpio tipa irisombori ki yaa: “Ka ani fu nga tirani ku be rani ya, ono ku be Mbori nazingisa kangba aboro: ko nabatasi rani be gi bakere kpio re, ko abatasa rani a.” (2 Kor. 1:8-10) Ngenga agu aboro naagbia tiyo na dungu gbegberẽ apai wagu naadu tipa Pauro te. Wa vura duhe wo, agurani nibi tirani ti kura regbo nga apai namanga rani wakina gu naadu tipa ko, ani rengbe arengba ka gbia wasa ti gi gako kpiapai nga ga wingbaduse re.

KA ANI MBUNGA KPAKARAAPAI SI DI BERANI YA

8. Wai rengbe agu akpakarapai du areme ka fuda rani? Oni funga kpiapai tipa gipai re.

⁸ Rogo gi zegino hi be agberango, kpakaraapai, na asoapai re, dungu aboro nabi tiyo nga apai nadia adia beyo. Zavura gu kura aKristano nabi tiyo abi kinawo a. Lani,a nga gu wirina naadu na ngbarago ka mangasunge tungusapai ti aregbo dunduko na kumbaari Australia yo, ri aya wee, ti gu regbo i abi gu kaza tiri nga kenisa, si aima fuda ri nikerehe. Sangbari nga, “gu dawa i aafuhe fere tipa gu kaza re angia kina gu kura kaza berewe fere, na mi aabi tire nga sunge tire berewe te.” Kurii agi apai re dunduko, si aidi ri ningere angerafuo kumbaari amunganga agba ko. Kangia ani du pai namangi rani wa gure, ani mangi wai?

9, 10. (a) Ginipai si aidanga ani mbu Satana ko mangihe ya? (b) Wai rengbe ani ka mangapai kuti gupai gumbayo ho rogo Amokedi 14:22?

⁹ Si naida ani tingidi gupai nga Satana naida ka mangasunge na agberãngbi tipa ka gbarasapa gaani idapase. Ono tie, si aidanga ani mbu gene fuko ko di gu ngbarago du ani nani kusayo te. Asanza 24:10 nayaa: “Ka he amaka ro ti uru gberãngbi, omero adu toni gbua.” Ka ani aaberãkurii agu akpiapai nga ga Ziazia Kekeapai, ngbatunga gu ani na wisigipai tipaha re, si rengbe ka undo rani ani duna wingbaduse tipa ka sovura kuti arungosiro.

¹⁰ Si naida ani moi gupai a kurirani yo nga, ani arengbanga ka dia kpakaraapai dunduko kusayo te. Nirengo, si naida ani inihe aino nga ani nikaa gbiatirani agbia nani kindi. (2 Tim. 3:12) Amokedi 14:22 naya furani wee: “Ani aríma arima ku rogo ga Mbori ngbi ti dungu gberãrago.” Kuba gupai nga rago nigberẽ tirani, si angba wai ka ani bi gu kpakaraapai re nimomu tipa ka yugo gu gaani wingbaduse du mburuhe rii gu idapase du ani nani kuti gu ome du Mbori nani tipa ka undo rani.

11. Ginipai rengbe ani ka mangaha tipa ka arungosiro dinga berani rogo raka yo ya?

¹¹ Si naida ani moibera rani kuti weneapai. Fugo Mbori naya furani wee: “Ngbarago ku kpotose yo nasa kpakpu boro ni wene he; ono rungo ku kpotose yo si naimisa toro boro.” (Snz. 15:13) Amunganga ima ino gupai nga guhe rengbe ka undo borokaza ní da wenengai nga ka ní aberã gupai nga ní nika hu ahu. Dedede, ho boro adia gu dawa ni angianga ndikidi dawa gu kaza namanga ní ya ono ní ki duna gu ida nga si nika undo ní aundo, ní naduadu wenengai. Ono ka borokaza aberã gupai nga gu dawa ní adiaha re naye na kina gu kura kaza funi, gani kaza nazinga kina kumbatayo. Gi kpiapai re nayugo gupai nga, ka ani aaberã dedede tipa kina agu apai ani arengbanga ka ariaha rogo gaani raka yo ya, ani nikadu na kina gberarago. Ani na tambuahe nga Yekova nafu kina boro gu undo rẽ tipa rani. Zavura ti regbo agberango, ko nangarasa rani rogo Fugoko, awirinarani, gbiati gu ome ziazia toro afuhe fu rani. Ka ani amaaberã rani kurii agi apai re, si rengbe arengba ka undo rani. Kuba gupai nga ani moiberã rani kuti agu apai angbanga ya, si naida ani mangipai amanga tipa ka sovura kuti kpakaraapai nibasasa na ki gbeberã rani kuti gu weneapai namanga rogo gaani raka yo.—Snz. 17:22.

12, 13. (a) Ginihe naaundo ga Mbori amoyambu i hi surungba agberango? Oni funga kpiapai tipa gipai re. (b) Ti regbo gberango, ginihe nayugo pa guhe boro abihe na nyanyakipaha rogo gani raka yo?

¹² Barambeda kusayo, bete aringara ima rungo be kere agberango. Dungu awirinarani rogo agu aringara re aima adu na wingbaduse. Anga gipai re nayugo gupai nga apai adu fuyo taata te. Bara ti tonatona 2010, bakere sungburosungburo baime agbarasi rago rogo gu ringara nga Chile badungu ga awirinarani ahe, akporo gbiati agu asunge naundo yó ki gberẽ. Wa gipai re avura ka mangayo, i aandu kindi wenengai rogo toro yo. Wirinarani nga Samuel pa gako kporo agberẽ ayaa: “Zavura ti regbo gi kpakaraapai re, mi na diare, ani aambunga nduge ku ba adunguratise yo na ku gene tungusapai yo te. Mi nabihe nga agi apai re naasa gupai nga ka ani bakingo bangirani kisusi ya.” I gbiakuti dungu awirinayo naamangi kina gu bangisapai re nga ka zanga mbu gberango si ká naayo ti manga ga Yekova sunge.

¹³ Rogo Mbirinvuo 2009, bakere mai agbarasi bakere papara gu gbata nga Manila du Philippines yo. Kumukokumuko kumba sa dungu gako ahe agberẽ aya, “Gu mai naana re asa gupai nga aboro dunduko du kina kubani sa, na si aye na kpakarapai gbiati rungo fu kumukokumuko aboro na rungorungo yó a.” Gipai re natingida rani naapa ga Yesu arugute nayaa: “Oni dúngura ũkumuko ni gaoni ku ngbangbaturũ yo; yo ayawe agbarasa nga ahe ni na gbegbe ya, yo airadĩ akua nga bambu ni nidĩ ahe ya.” (Mt. 6:20) Agu aboro namaa gayo raka kuti aũzegino nga gu rengbe ka inga niipo, si naye na kina gberarago fuyo. Si nipatatamana ani moi Yekova nibambatapai rogo gaani raka yo mbiko si rengbe ka sa gupai nga ka gaani pagume naako gberẽnga ya ka apai vura kaa manga pati rani wai vurũ!—Oni gedi AEbere 13:5, 6.

GU NDUAPAI NASARANI ANI DU NA WINGBADUSE

14. Gini nduapai du berani tipa kadu na wingbaduse?

¹⁴ Yesu aima ino ho nga kpakaraapai nikadu adu tigu regbo ko kadu na ome kindo beko, ono ko ayaa: “Ka oni gúnde nga ya.” (Rk. 21:9) Ani na wene ndupai berani tipa kadu na wingbaduse mbiko gaani Bakindo nga Yesu Kristo gbiati Yekova nga Bakusiahe, i nasongoda rani. Pauro angarasi Timoteo ki yaa: “Mbori afu nga toro gunde fu rani te; ono gu nga ga ome na nyemuse na rugatinapai.”—2 Tim. 1:7.

15. Oni funga agu akpiapai nayugo pa gu kakaka idapase naadu ti ga Mbori amoyambu, na oni ki sakingo wai rengbe ani kadu na wingbaduse wa yó?

¹⁵ Oni kparianga agu afugo idapase naadu ti ga Mbori amoyambu. Davide ayaa: “Yekova nga gi ome nga gi vurakube; kpotoreyo nakida kuti ko; si ki unda re, kpotore yo ki ningi, mi ki nitambua ko ni gi bia.” (Tam. 28:7) Pauro afura tipa gu nyanyaki kido ko adu nani ki yaa: “Ani nadia adia be agi apai dũ re susi mbiko gu ko nakpi nyemu rani.” (Rom. 8:37) Wakina gure a, ho Yesu aini gupai ni nga kerepai nadusio ko, ko apepai fu agu aboro naadegatuyo fuko nga gu nayugu pa gu nyanyaki pagume du dagba tiko na Mbori ki yaa: “Mi ni sa re te, bambiko ani na Buba.” (Yo. 16:32) Ginipai du gbaiga rogo agi afugo nga ga ga Mbori amoyambu re? Afugoyo nibasasa nayugo gu bakere kido i adu nani kuti Yekova. Ka ani sonosi gu bangisa kido kuti Mbori re, si rengbe ka fu wingbaduse furani tipa ani sovura kuti agu arungosiro ani agbiatirani nani areme.—Oni gedi Atambuahe 46:1-3.

ANI GBIA UNDO BE AGU AUNDO MBORI NAFUHE TIPA ANI DUNA WINGBADUSE

16. Tipagine du pa wisigo ani Fugo Mbori ti ni ninyanyakipa pai furani?

¹⁶ Gu wingbaduse nga ga aKristano ayengo be gaani ome nitirani te. Si naye mbiko ino ani Mbori wenengai na kini kido kutiko. Wisigo Ziazia Kekeapai nisase nasarani ani du na gi wingbaduse re. Wirinarani sa nawoka be gu kaza nga ga bakere gberarago ape gupai naundo ri ki ya, “Wo mi naageda agu averesi nangarasa re dedede.” Ya mo ani mangingo agu arugute i afuhe tipa sia regbo tipa kaa manga gu irisombori nga ga aborokporo ti ni dedede? Manga ani he wo nika undo rani ani du na gu bipai naadu ti gu bake papara Atambuahe nayaa: “Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.”—Tam. 119:97.

17. (a) Ginihe rengbe ka undo rani ani banda gu bipai nga ga wingbaduse? (b) Oni funga kpiapai tipa wai oni agbia undo ti geda gu pangbanga du tipa awirinaroni?

¹⁷ Uehe nga, ani na agu awaraga du mburuhe rii Ziazia Kekeapai nga gu duna agu apai rogoho nanyakasa gaani kido kuti Yekova. Dungu awirina ninaagbia undo ti geda yó agu apangbanga du tipa awirinayo rogo gi gaani amagazini re. Wirinarani sa du Asia nawoka be gu kaza nasa boro nidu na ngbarago watadu gberarago adu na ngbarago ho ri agedipai ni tipa gu pangbanga naadu tipa gu mokedi nasovura na diabese kuti gu kaza namanga ri re. Ri akepai ki ya, “Si aima undo re mi rugu tire na gupai namanga re na ki fu maabangirise fere.”

18. Tipagine si aida ani mangisunge ti ni na gu undo nga kparakpee?

¹⁸ Gu biata undo nga kparakpee. Si rengbe ka undo rani rogo apai yo dunduko. Afugo Pauro nagbe berãni kuti wai nyaki pa gi undo re niyaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (Frp. 4:6, 7) Ya mo ani namangasunge na gi undo re tipa ka gbia ome ti gu regbo du ani rogo arungosiro? Alex nga gu wirinarani du ringara aNgirisi yo niima woka be kaza bakere gberarago tipa gbanga regbo ayaa: “Fura na Yekova rogo kparakpee yo na degatue fuko ho mi ageda Fugoko ni nga agu apai ninaaundo re.”

19. Gini bipai si aida ani du nani tipa nduge kuba agu adunguratise nga ga aKristano yo?

¹⁹ Kodatise na awirina ba dunguratise yo nga gu biama pai rengbe ka undo rani. Bake papara Atambuahe ayaa: “Mbisimore nakpi nyemu ga Yekova avurukporo.” (Tam. 84:2) Ya mo kinawo du gaani bipai? Lani ani nifura tipa ri mbata nape pa gu bipai ri adu nani tipa agu adunguratise nga ga aKristano niyaa: “Anga nduge kuba adunguratise yo nga gupai si aniidi mi berẽ aberã mbata tipaha te. Mi aima inoho nga si naida mi du kina yo ka mi aida Yekova undo re mi sovura kuti gipai re.”

20. Wai rengbe sunge tungusapai ka undo rani?

²⁰ Bisue undo nga du zaaza gene sunge tungusa pa Kindo yo. (1 Tim. 4:16) Wirina sa Australia yo naagbia tiri na dungu akpakarapai ayaa: “Gu yangarapai mi aaida ka mangaha rogo gimi raka nga tungusapai, na bakumba ayambu re tipa ani ndu naako ka tungusapai. Mi aidihe fuko ani ki ndu. Yekova aima undo re, agu aregbo dunduko mi anindu ku gene tungusapai yo, mi anidu na ngbarago.” (Snz. 16:20) Dungu awirina bi gupai nga ka i aundo akurayo i nyakasi gayo idapase kuti Yekova, si nanyakasa yó anyakasa a. Nimangayo ho wo, si naundoyo ka i naaberãnga gbe kurii gayo akpakarapai ya ono kurii agu apai nyaki paha gbe.—Frp. 1:10, 11.

21. Gini kidohe du ani nani berani tipa gu fudifudiapai ani agbiatirani nani?

²¹ Yekova ima fu dungu aundo furani tipa ani sovura kuti agu arungosiro du areme na wingbaduse. Ka ani mangisunge na agi aundo re dunduko na kini berẽkuriihe na kini wiriki agu akpiapai nga ga wingbaduse naadu ti ga Mbori amoyambu, ani duadu naa kido nga ani rengbe arengba ka sovura kuti fudifudiapai na diabese. Wa vura duhe nga dungu gbegberẽ apai nikaa manga rani amanga wa gi zegino re ambeda ka digo, ani rengbe kadu wakina Pauro nayaa: “I nabafa rani ono i agbarasa nga rani te. . . . Ani arungbura nga te.” (2 Kor. 4:9, 16) Mbiko gu undo nga ga Yekova, ani rengbe arengba ka sovura kuti agu arungosiro nagbia rani areme na wingbaduse.—Oni gedi 2 AKorindo 4:17, 18.

[Footnote]