Gine Nga ga Mbori Bipai Tipa Buda?

BAKUSIRANI nga gu boro naida kina weneapai naamanga furani, ko akánga na ani ti mbira buda rengbe arengba te.a Kuba gure, ko afu “ime bakakue si ngiisi kpoto boro yo, na nzeme si hasi kpakpuni, na gu riahe nangarãsa kpoto boro yo.” (Atambuahe 104:15) Ti kura regbo pumbo diadee sa, Yesu Kristo asa aboro i du na ngbarago ho ko asa ime ni ‘niwene imekakue.’—Yoane 2:3-10.

Si daada ani yawee gu boro nakusi rani, ko ima ino wai nzunzu buda amangapai na kpotorani gbiati gaani berã. Gu Barani du ngbangbaturũ yo ‘nayugopai furani’ rogo Ziazia Kekeapai tipa ani u na kini za rani ti bakere mbira buda. (Yesaya 48:17) Ani bingo agu arugute du ziazia re:

“Ka oni kpí nga imekakue ya, si du bau rogo, ono oni hí be kina Toro.” (AEfeso 5:18) “Akpibuda . . . adía nga kumbo ga Mbori ngbi te.” (1 AKorindo 6:9-11) Fugo Mbori nasoga “kpibuda, na do pumbo gbarakagbaraka, na tunga agi apai re.”—AGaratio 5:19-21.

Ani wisigingo gu kerepai duho ti bakere mbira buda.

Gu Kerepai Du ti Bakere Mbira Buda

Wa vura duhe nga ngba buda angba, si na agu ahe rogoho naʹaria ga boro berã na wai kpotoni amangasunge. Bakere mbira buda rengbe arengba ka ye na agu apai ani ka fura tipaha kusende re:

Bakere mbira buda naʹaria ga boro berã ki sa ní ní naagumba agu apai adunga rogoyo ti ni ya. (Asanza 23:33) Allen, nga gu kere bambiri ani nifura tipa ko rogo gu kekepai ye mbata fu gere, ayaa: “Kakaka mbira buda agbarasanga kina kpoto boro sa te; ono si nagbarasa ga boro berã agbarasa a. Si nasa boro ka ni berẽnga tipa gu sangbanapai rengbehe ka ye nani kurii gu kura aboro ya.”

Bakere mbira buda nadia zee kusayo ti boro na ki do gunde kusayo tiní. Ziazia Kekeapai nayaa: “Imekakue na vovo imekakue di rugatinapai ku sa yo.” (Osea 4:11) Wai rengbe gipai re ka amanga? Buda rengbe arengba ka sa aboro i bi gupai nga, agu apai i asovura tipa ka diaha kusayo gbiati gu nyemu apai i abihe nga runga ha te, si nigupai daada watadu nigupai si aida i mangihe amanga. Buda nagbarasapa gu rurupai ani nadiberã ka mangaha. Rurupai rogo mbira buda te, na si ima rengba ka gbarasa rani rogo toro yo.

Ani dinga gupai namangi gu kumba nga John nikpiapai. Ho ko apoi ni na diako, ko aguari ki oro ku ba mbira buda yo na imisiringbaduko. Fuo mbira ko buda, dee aye fuoko na wene afugo. Fuo ko mbirihe berewe ki kpihe, ko aga na gu dee re ki mangi bäri na ri. Kusa, ko abiratiko nikerehe tipa mangako gupai ka ko aaberãnga kina kandara pa mangaha ya wa ka si adu nga ko na haha bangiriko.

Bakere mbira buda naye na iraira afugo gbiati iraira mangaapai. Ziazia Kekeapai nasanahe niyaa: “Ako, da du na ima? Da du na rungo? Da du na darãpai?” Si kini karagapai niyaa: “Agu yo naima ku pati imekakue.” (Asanza 23:29, 30) Ho boro ambira buda ni nibakerehe, ní nabi tiní wa pi ní “bebere baime tikpo yo [kidu na kaza], watadu wa gu ni napi ri dangba kurungba.” (Asanza 23:34) Gu boro mbiri buda nibakerehe, ní rengbe ka zinga rameyo ki tona kaa gumba gupai nga: “I yawa re, ono mi aima nga te.”—Asanza 23:35.

Bakere mbira buda naye na kaza fu boro. “Ti digidaha si ade boro wa wo, egetere he ki du wa ga kpokowo.” (Asanza 23:32) Kina gupai re agu aboro birĩ-inohe nga ga husa akaza yó agumbaha ya si nga sangbana bakere mbira buda. Bakere mbira buda naye na dungu akaza. Na ka boro idi ka mbira buda nibakerehe kandara bara sa, si rengbe ka sa gupai nga he maki ní watadu ní kpi. Ono aboro birĩ-inohe afuranga tipa gu kereapai dunduko namanga aboro mbiko kpi buda te.

Gu Kerepai Kisusi Bakere Mbira Buda Aye Nani. Ka si vura du nga boro nambira buda ka ní akpingo ho ya, bakere mbirimbirihe rengbe arengba ka gbarasa pani rogo toro yo. Ziazia Kekeapai nayawee: “Na gberẽ he fu agu yo naguari ngbatutu wiso, ki peke fuo baripiro, ki ima ku yuru, daho i akpi imekakue ni!” Tipagine Ziazia Kekeapai agumbaha ti ni wo? Yesaya agumbapa sangbana bakere mbira buda ki yaa: “[Agu aboro nambira buda nibakerehe,] i aberã nga pa ga Yekova mangaapai te, i adua nga bangiriyo ti sabeko a te.”—Yesaya 5:11, 12.

Fugo Mbori naruga rani tipa ka ani ‘dúnga dagba abambiri imekakue yo ya.’ (Asanza 23:20) I naruga sosono adee a wo ka i ‘fúnga tiyo fu bakere buda ya.’ (Tito 2:3) Tipagine si aidanga ti ni i fu tiyo sani ya? Gupai si aidanga i fu tiyo ti ni sa ni ya nga, fuo tona yó mbiraha tooni tooni, i rengbe ka tona kaa kiiso mbiraha zanga inoho. Niyangaraha, i ki da ni gu kere anambiri nipi sande niyaa, ‘Nigini rago mi ka zinga rameyo? Mi gbata kura mbirimbiri hee berewe.’ (Asanza 23:35) Abambiri buda nidu dedede na nyemu ka mbira kura buda wiso ya si nika gbandaka gu baita du riyo yo.

Ziazia Kekeapai nayawee agu aboro ‘nakpibuda, na kini mangi gbarakagbaraka apai, nado apumbo buda, Mbori asapangbanga yó asapa.’ (1 Petero 4:3, 5) Nibipa gu kere aregbo ani araka rogoho re, Yesu ayaa: ‘Oni bánda tironi, oni ka hisa kpotoroniyo na bakere riahe, na kpibuda, na berãpa gi unga re, gu rago ki da re nibasa wakina gbina naaza.’—Ruka 21:34, 35.

Ginipai rengbe agu aboro nambira buda nibakerehe ka mangaha tipa ki he ‘kpibuda’?

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Bakere mbira buda rengbe ka ye na dungu apai kuti boro