Gu Sunge Ziazia Toro Amangaha Ka Digiso Ga Yekova Ringbisapai

“Gimi apai nga gu nakura ngbare yo . . . anyása gu pai ngba ti re, ki kpatare rogo gu pai mi akedi he tipa ha.”​—YES. 55:11.

1. Gini kparakparapai du dagba sogimapai na ringbisapai?

ONI moingo kpia gupai ku berãroni yo nga aboro ue nambakada tiyo ka mera na gayó atarambiri. Gu ní sa dagbayó gbaki kpia wai ní nika ndu kurogo gu ba ní aida ka ndu kurogoho re. Gu kurani ima ino gu gene nandu kurogo gani ba wenengai ono ní ima ino gu kura agene a berewe nga gu rengbe ní arengba ka ndu ngbaha ní ki da yo. Gu ní naima ino kura agene re ima mbakada tiní tipa i ndu ngba kura gene ka pai mangiyo ngba gu gene i andu ngbaha. Gu kparakpara berãpai du agi aboro ue re nani nayugo gu kparakparapai du dagba sogimapai na ringbisapai. Ani rengbe na ringbisa sogimapai kuti gbaka kpiarago tipa si undo boro ní da rogo gu ba ní aida ka ndu kurogoho, ono ringbisapai tigaha wa du na sásá nga gu rengbe boro arengba ka ndu ngba dungu agene ní ki da ti ni.

2, 3. (a) Ga Yekova ringbisapai nakoda ginipai, na ginipai ko amangihe ho Adamu na Eva aingipai ni? (b) Tipagine si aida ti ni ani gbeberã rani kuti wai Yekova adigiso gako aringbisapai?

² Ho Yekova aida ka manga gupai ni ko akpinyemuhe, ko rengbe ka ndu ngba dungu agene tipa ka manga gupai re. (Ef. 3:11) Gako ringbisapai nakoda gupai ko aidi si du tipa aboro na kpotosende, nga gi kpotosende re sa tihe niparadizo nga gu rengberengbe aboro nikaa raka rogoho rogo zereda na ngbarago nyeanye kindi. (Bam. P. 1:28) Ho Adamu na Eva amangi ingapai ni, Yekova amangipai ngba gu gene nika sa gupai nga gako ringbisapai tipa aboro na kpotosende mangi a wa ko aringbisihe. (Oni gedi Bambata Pai 3:​15.) Yekova amangi mbakadapai tipa gu dee narukuba gu gako riigbu du ngbangbaturũ yo kusi ‘titari’ nga guni nika nyasa riipa Satana na agu agbegberẽ apai dunduko ko amangaha.​—Eb. 2:14; 1 Yo. 3:8.

³ Anga ome ho ngbangbaturũ yo watadu auru kpotosende ane rengbe ka rugusa Yekova ti ringbisa ko gupai ngba tiko te. (Yes. 46:9-11) Tipagine du ani na gu kido re ti ni? Ani na gu kido re mbiko Yekova namangasunge na gako ziazia toro. Gu gako ome ka boro arugusanga ha re ya nasa gupai nga gako ringbisapai ‘ninyasi agu apai anyasa ngba tiko.’ (Yes. 55:10, 11) Si naida ani nigbeberã rani dedede kuti wai Yekova adigiso gako aringbisapai na kini raki gaani raka ringbisihe kutini, mbiko gaani raka kumbatayo naruriipa gu gako ringbisapai re. Kurigure, si nipa nyakasaro ka bi wai Yekova amangasunge na gako ziazia toro. Awere tie, ani makianga gu sunge ziazia toro amangihe bakuru kusayo, gu sunge si amangaha awere, na gu sunge si nika manga kumbatayo nibipa ga Yekova ringbisapai.

Agu Apai Ziazia Toro Amangihe Bakuru Kusayo

4. Wai gu Yekova aayugo gako ringbisapai fu aboro tooni tooni?

⁴ Ti agu aregbo i aakeka Ziazia Kekeapai ti ni, Yekova anaayugo gako ringbisapai fu aboro tooni tooni. Ti tonatonaha, ino pa gu tita dee i akido pako adu niga Mbori “gbugbu pai.” (1 Kor. 2:7) Si adi agarã wa 2,000 tipa Yekova fura berewe tipa gu tita dee re. (Oni gedi Bambata Pai 12:7; 22:15-​18.) Yekova akido Abarayama na gu mokido si adu nga si nika ringbisatihe ngba bakere gene. Gu fugo Yekova ko agumbaha fu Abarayama nga “rogo ngbatunga ro” ayugu gupai ziazia nga tita dee akura ngbatunga Abarayama yo. Si nawira gupai nirengo nga, rago aima ngba ti Satana ka gia gi gbugbupai re. Satana aima ida ka gberesapa ngbatunga Abarayama tipa ka gberesapa ga Yekova ringbisapai. Ono ko aarengbanga te mbiko gu ga Mbori ziazia toro ani abingo ho ya naamangasunge. Si aamangasunge ngba gini agene?

5, 6. Wai Yekova amangisunge na gako ziazia toro ka banda agu aboro tita dee aye rogoyo yo?

⁵ Yekova amangisunge na gako ziazia toro tipa ka banda agu aboro dunduko gu tita dee re aye rogoyo yo. Yekova aya fu Abarama wee: “Mi nga ga vurakube.” (Bam. P. 15:1) Anga kungbo afugo nangiaha te. Nikpiapai, ani makianga gupai namangi rogo gu garã nangia 1919 M.B.K. ho Abarayama na Sara aaraka ni Gerara yo. Gu bakindo nangia Abimereke adi Sara ri du nidiako mbiko ko aainongo nga dia Abarayama du nangia ri te. Ya mo Satana du naaida ka tudo apai tipa ka Sara batikanga tunga Abarayama ya? Ziazia Kekeapai afuranga tipaha te. Gupai Ziazia Kekeapai apehe furani nga Yekova aima rimo kurogo gupai re tipa ka undo. Rogo musumo yo, Yekova aza Abimereke ki ya ka ko zadinga kpoto Sara wagusa ya.​—Bam. P. 20:1-18.

⁶ Anga gure nangia gu bangisa regbo Yekova aundo Abarayama te. Yekova aima batasa ko na gako aborokporo bara dunguhe. (Bam. P. 12:14-20; 14:13-20; 26:26-29) Nibipa Abarayama na atita ko, bake apapara Atambuahe ayaa: “[Yekova] aida nga fu boro ni mangi yo gbegberẽ wa sa te; ko aza abakindo tipa yo, ni ya: ‘Ka oni zádi nga gimi mbedimbedi yo ya, ka oni mángi nga gimi anebi gbigbita a ya!’ ”​— Tam. 105:14, 15.

7. Ngba gini agene Yekova aundo aYisaraere?

⁷ Yekova amangisunge na gako ziazia toro a ka banda gu rikaaboro nangia aYisaraere, nga gu rikaaboro si adu nga gu tita dee i akido pako nika kura rogoho. Yekova amangisunge na gako ziazia toro ka fu agu arugute fu aYisaraere nabanda ndikidi irisombori na ki banda aYuda ka i irisingo kura ambori ya na ka i namaanga wasiwasiapai ya. (Gate 31:18; 2 Kor. 3:3) Ti regbo Abasapungbanga, ga Yekova ziazia toro afu ome fu kura akumba tipa i batasi aYisaraere be avurayo. (Abasa. 3:9, 10) Rogo agu agarã naye ki dati gu regbo i abatika Yesu, nga gu ngbatunga Abarayama nyaki pani gbe, ga Yekova ziazia toro abanda agu aba nga Yerusarema, Betereme, na yekaru, nga agu aba si adu nga agu sangbaanebi nadu tipa Yesu nika ringbisatihe rogoho.

8. Gini gopai duho nayugo nani nga ziazia toro naamangasunge na Yesu rogo gako raka na rogo gako sunge yo?

⁸ Ziazia toro aundo Yesu rogo gako raka na gako sunge. Ziazia toro amangisunge rukumbu gu ngasudee yo nangia Maria ri kidu na mobara ki vungu gu gude naadunga na ingapai tiru ya, naadunga a ti gu zio nga ga kpio ya. (Ruka 1:26-31, 34, 35) Kina gu bangisa toro re nabanda ko a ho ko adu ni tooni kindi be agbaakpio. (Mt. 2:​7, 8, 12, 13) Ho garã Yesu adani nga 30, Yekova ambedi ko niziazia toro ki sako nidikumbo ga Davide mbatabakindo na ki fu sunge tungusapai fuko. (Ruka 1:​32, 33; 4:​16-​21) Ziazia toro asa Yesu ko naamanga iiriwoapai wa husa aboro be akaza, riga ndurumo aboro, na zingisa aboro bekpio. Agu apai Yesu amangihe re angia mboimboi agu apai Yesu nika mangaha ti regbo gako zogarago.

9, 10. (a) Gini gopai nayugoho nga ziazia toro naamangasunge na ga Yesu abawiriki? (b) Gini vovo pai Yekova ayuguhe rogo bambata sa kama agarã nibipa gako ringbisapai?

⁹ Tona ti rago Pendekote rogo gu garã nangia 33 F.B.K., Yekova ambedi gu ue papara tunga nga ga Abarayama niziazia toro. Dungu agi aboro re aangianga ngbatunga Abarayama te. (Rom. 8:15-17; Gara. 3:29) Ziazia toro afu ome fu ga Yesu abawiriki rogo bambata sa kama agarã tipa i naatungusapai na kini mangi iiriwoapai. (Amo. 1:8; 2:1-4; 1 Kor. 12:7-11) Gu tandu manga iiriwoapai i afuhe fuyó re ayugu vovo pai tipa pa wai Yekova adigiso gako ringbisapai. Si ayugu gupai nga Yekova aidanga berewe aboro irisi ko ngba gu gene i anaairiso ko ngbaha Yerusarema yo te. Gu vovo dungurati nga ga aKristano ko atona ka mangasunge nani. Natona ti gu regbo ka da ku awere, Yekova namangasunge na gu dungurati nga ga mbedimbedi aKristano ka digiso gako aringbisapai.

¹⁰ Bete agu apai Yekova amangihe na gako ziazia toro ti agu aregbo i aakeka Ziazia Kekeapai ti ni nga ka banda gako aboro, ka fu ome mangapai fuyó, na ka mbeda yó tipa sunge. Agi apai re nasa ga Yekova ringbisapai si nindu kumbatayo ka da ti digidoho. Na ginipai du tipa rani areme? Wai Yekova amangasunge awere na gako toro tipa ka songoda gako ringbisapai? Si naida aida ani inihe mbiko ani naida kaa manga gaani apai ringbisihe kuti ziazia toro. Ani wisigingo agu agene biama Yekova amangasunge ngbaha na gako ziazia toro areme.

Agu Apai Ziazia Toro Amangaha Areme

11. Ginihe nayugo gupai nga Yekova namangasunge na gako ziazia toro tipa ka giriso gako aboro, na wai rengbe oni ka yugoho nga oni nandu sa na gu toro re?

¹¹ Bambatapai nga, ziazia toro naundo ga Mbori aboro i nye nigigiri yó. Agu aboro dunduko namangasunge fu Yekova si aida i du nigigiri yó rogo gayó mangaapai yo. (Oni gedi 1 AKorindo 6:​9-​11.) Kura aboro kinaho nanaamanga gu wasiwasi apai duwa meteka, bäri, naapa kodaba kumba na kurani. Gu nyemu mangapai nasa boro ní ti kurogo ingapai rengbe kadu nibakerehe kpotoniyo. (Yak. 1:14, 15) Wa vura duhe wo, kura aboro kina dagbayó i ‘nazunduyo’ i ki mangi ariapai rogo gayó raka tipa ka sa ngbarago ti Mbori. Ginipai naundo agu aboro nakpinyemu Mbori tipa i ne agu aberã rengbe ka sayo i mangi gbegberẽpai? Guhe naundo yó nga “Toro gaani Mbori,” wo 1 AKorindo 6:​11 agumbaha. Ka ani abanda gaani mangaapai nigigirihe, si nika yugo gupai nga ani nambu gu toro re si mangisunge rogo gaani raka yo.

12. (a) Ringbisihe kuti gu yuguyugupai Yezekere abihe, wai Yekova anungusa gako riigbu? (b) Wai rengbe ani ka yugoho nga ani namangapai ringbisihe kuti ga Mbori toro?

¹² Uepai nga, Yekova namangasunge na gako toro tipa kaa nungusa gako riigbu ngba gu gene ko aida si nindu ngbaha. Rogo gu yuguyugupai Yezekere abihe, i ringbisi gu papara ga Yekova riigbu du ngbangbaturũ yo kuti gu ngbagida nga ga ngbangbaturũ nga guru nandu kina kumbatayo ka digiso ga Yekova ringbisapai zanga he duho naka na gene beru. Ginihe nasa gu ngbagida re u ndu ngba kura gene? Guhe nasa ru nga ziazia toro. (Yeze. 1:20, 21) Si naida ani tingidi gupai nga ga Yekova riigbu na apaparaha ue, gu sa ngbangbaturũ yo na gu kuraha auru kpotosende ane. Ka si du nga ziazia toro nanungusa gu paparaha du ngbangbaturũ yo, kina gu bangisapai re du tipa gu paparaha du auru kpotosende a. Pa manga ani pai ringbisihe kuti agu arugute ani agbiaha be gu papara ga Mbori riigbu du auru kpotosende ane nayugo gupai nga ani naaora sa na ga Yekova ngbagida na kini mangipai ringbisihe kuti gako ziazia toro.​—Eb. 13:17.

13, 14. (a) Gini “rika aboro” du Yesu afura tipa yó? (b) Oni funga gu kpiapai nayugo gupai ziazia toro naundo ga Yekova aboro i girogo rengo yo wenengai. (Oni bi gu sanduki nga “Ya Mo Oni Nandu Sa na Gu Imarago Naha Kina Kumbatayo?”)

¹³ Biatapai nga, ziazia toro naundo tipa kaa kusa agu arengo nga ga Ziazia Kekeapai kuyangura. (Snz. 4:18) ‘Ruru kangara moyambu’ aima digo nikusi rengo tooni tooni nimanga yó sunge na gi magazini nga Ngbaõbambu Sinziri re. (Mt. 24:45) Nikpiapai, oni bingo gu giarogopaiyo ani nada awere kutini nibipa gu “rika aboro” Yesu agumba payo. (Oni gedi Matayo 24:32-​34.) Gini rikaaboro du Yesu afura tipa yó re? Gupai riihe adu nga “Ginipai Padu Kristo Ho na Ome Kindo Beko Ayugoho Furoni?” ayawee Yesu aafuranga tipa gbegberẽ aboro te, ono tipa gu gako abawiriki si adu nga i nika mbedayo niziazia toro fuo regbo ngbutuko.a Bambata digisidigisi gu sangba Yesu re amangi rogo bambata sa kama agarã. Sidu, agu apefuo Yesu nadu rogo bambata sa kama agarã nadu nimbedimbediyo nitoro, gbiati gu mbedimbedi aKristano du awere, i du Yesu ayawee i nika bi agu apai i aino pa apai ti ni na ki rugutiyo na gupai nga Yesu “mbedi, ko ngbadimo.”

¹⁴ Ginipai gipai re ayugoho furani? Wa vura duhe nga ka ani ringbisinga bagizo gu regbo “gi rika aboro re” adiaha si ki nyasi te, apai kinaho si aida ani tingidihe tipa guhe nga “rika aboro”: Rikaaboro nga agu aboro naraka ti gu regbo sa. Agarãyo nibakiakia. Rikaaboro aimanga aima gbe si kini ru ka go te. (Gate 1:6) Nikpiapai, oni berẽnga pa kumba na wiriko gbiati wiri wiriko. Ka si du nga i raki ti bangisa regbo sa tipa kandara bete regbo, ani rengbe ka ya tipa yó wee i nga papara rikaaboro sa. Ono tie, gu gude i avunguru titaru naima kpi arengbanga kadu nipapara gu rikaaboro nga ga titaru te, bambiko u arakanga ti bangisa regbo na gu titaru re te. Ono gini rikaaboro du Yesu afura tipa yó re? Zanga kapa, gupai ko aapehe tipa gi gaani regbo re nga, kura mbedimbedi aKristano kinaho nika kura ki raki ti bangisa regbo sa na bete gu mbedimbedi aKristano nabi tonatona agu apai i aino apai ti ni rogo 1914, na agiyo re gu nika bi tonatona bakere gberãngbi abi. Gu rikaaboro re adu na kina tonatonaha ti ni, na si nikadu adu na digidoho a ti ni. Agu apai i aino apai ti ni namanga, si nayugo gupai nga bakere gberãngbi ima mbeda. Ka oni duna gupai berãroni yo nga bakere gberãngbi ima mbeda, na oni kini ngere angera kindi, si nika yugo gupai nga oni nandu sa na gu vovo giarogo Ziazia Kekeapai namanga na oni napekafuo ziazia toro.​—Mk. 13:37.

15. Ginipai nayugoho nga ziazia toro du naundo rani ani naagbandaka wene pangbanga?

¹⁵ Biamapai nga, ziazia toro nafu ome furani tipa ani tungusi wene pangbanga. (Amo. 1:8) Ginihe duho rengbe ka sakapa gu gene wene pangbanga nagbataka ngbaha auru kpotosende? Oni berẽnga kuriihe. Isoke oni dagba agu aboro yo nanaagunde agunde mbata be tungusapai rogo akporo. Oni aniyaa, ‘Ka mi ndunga ka tungusapai rogo akporo te!’ Ono tie, oni awere nga wene abatungusipai.b Badungu Dezire Yekova naandu kumbatayo kindi kaa tungusapai i ki vura kaa gbiatiyo na rungosi vurũ. Kina ga Yekova toro sa rengbe ka sa rani ani dibe agu apai rengbe ka ká na gene tungusapai berani nga gupai ka ani amanganga ha nigaani ome ya. (Mika 3:8; Mt. 17:20) Ka ani atungusapai na omerani dunduko, gure nga ani namangapai sa na gu toro re.

Gupai Ziazia Toro Nika Mangaha Gizo Kumbatayo

16. Tipagine rengbe ani kadu ti ni na gu kido nga Yekova nika banda gako aboro abanda ti regbo gu bakere gberãngbii naye re?

¹⁶ Gizo kumbatayo, Yekova nika mangasunge na ziazia toro rogo dungu agene tipa ka digiso gako ringbisapai. Ani makianga pai mbata tipa ga Yekova bandahe. A wa ani nabihe, Yekova anaamangasunge mbata kusayo na gako toro tipa kaa banda aboro kodihe na ringara aYisaraere. Sidu tie, ani na gu kido nga Yekova nika mangasunge na kina gu bangisa toro re tipa ka banda gako aboro ti regbo gu bakere gberãngbii naye re. Si aidanga ani kapa tipa wai Yekova nika banda rani te. Si naida ani du na gu kido nga Yekova nikadu kinaho tipa ka undo gako aboro.​—2 Peka 16:9; Tam. 139:7-12.

17. Wai Yekova nika mangasunge na gako ziazia toro rogo vovo zegino?

¹⁷ Wai Yekova nika mangasunge na gako ziazia toro rogo gu vovo zegino naye re? Gu toro re nika ngia gu ome nikadu kugii agu akitabu i nika zakaha ti gu regbo re. (Yugo. 20:12) Gini apai nikadu vuru agu akitabu yo re? Zanga kapa, agu apai nikadu rogoho nga agu apai Yekova nika kpinyemuhe berani vuru agu agarã nikadu kutu. Ya mo oni nangera kumbatayo tipa agu apai nikadu rogo agu akitabu re? Ani napido gu vovo zegino re na omerani dunduko. Si adu ni bawenepai ka raka ti gu regbo Yekova nika mangasunge na gako ziazia toro tipa ka digiso gako ringbisapai tipa kpotosende na agu aboro nika raka auruhe.

18. Gini nyanyaki diaberã oni nadihe?

¹⁸ Ka bangirani gonga ti gupai nga, Yekova duwa ka ko digisi gako ringbisapai mbiko ko namangasunge na gako ziazia toro ya. Ga Yekova ringbisapai nabi roni abi a. Sidu tie, oni moingo ho nigaoni nyanyaki diaberã kaa kpara fu Yekova tipa gako ziazia toro na kini raki ringbisihe kuti ni. (Ruka 11:13) Ka oni mangihe wo, oni duadu na maabangirise tipa ka raka paradizo yo auru kpotosende.

[Gu rukutu kekeapai du bandu kpewaraga yo]

[Gu kpiahe du ti kpewaraga 23]

Oni Natingidaha?

• Ngba gini agene Yekova anaamangasunge na gako ziazia toro ti agu aregbo i aakeka Ziazia Kekeapai ka banda gako ringbisapai si niindu kina kumbatayo?

• Wai Yekova amangasunge na gako toro areme?

• Wai Yekova nika mangasunge na gako toro gizo kumbatayo ka digiso gako ringbisapai?

[Gu kpiahe du ti kpewaraga 22]

Ya Mo Oni Nandu Sa na Gu Imarago Naha Kina Kumbatayo?

Yekova naziga we kindi kurii gako aboro si kini sa gupai nga i gi rogo Ziazia Kekeapai yo berewe wenengai. Gini bete giarogopaiyo i ada kutini i ki kusihe rogo aNgbaõbambu Sinziri?

▪ Gu sanza Yesu agumbaha tipa agbooro nayugopa ginipai furani tipa sona rogo toro yo? (Mt. 13:33)​—Bamburu 1, 2008, kpewaraga 27-​28.

▪ Ti gini regbo yamba aboro ku ngbangbaturũ yo adigo?​—Buza 1, 2008, kpewaraga 27-​28.

▪ Gine nga iriso Yekova “ni toro”? (Yo. 4:24)​—Buza 1, 2002, kpewaraga 12.

▪ Gini vurukporo bakere rimbasa aboro amangasunge rogoho? (Yugo. 7:15)​—Mbirinvuo 1, 2006, kpewaraga 25.

▪ Ti gini regbo i akparaka akandoro ti ameme? (Mt. 25:31-​33)​—Tanvuo 15, 1995, kpewaraga 18-​28.