Oni Naanyakasa Dungurati Kindi

“Oni zúngadi tironi na akuaroni, ki ninyakasi tironi dagba roni yo.”​—1 TESA. 5:11.

1. Gini amaku naye mbiko padu ani rogo gu dungurati nga ga aKristano, ono gini akpakarapai rengbe ani kaa gbiatirani nani kindi?

NIRENGO, padu boro rogo gu dungurati nga ga aKristano nga bakere maku. Si nasa rani ani duna wene pagume dagbarani na Yekova. Pa kido ani kuti Fugo Mbori rengbe ka banda rani be asangbana gu sino raka angianga ga aKristano ya. Ani na badungu wene abakure nga aguyo rengbe ka ngarasa rani. Nirengo, amaku ima nge. Wa vura duhe wo, badungu aKristano nasota na akpakarapai ngba arikoho. Si naida i undo agu akurayó aundo tipa i girogo gu dudunguroapai yo du rogo Fugo Mbori. Agu akurayó rengbe kadu na kaza, bakere gberarago, watadu i rengbe ka rungo be sangbana gayó mumungo diaberã. Ani dunduko naraka rogo gu zegino adunga kutiibe Mbori ya.

2. Ginipai rengbe ani ka mangaha fu agu awirinarani nagbiatiyo na akpakarapai, na tipagine?

² Anga boro ho dagbarani naida ka bi kurani Kristano ní nirungo watadu sota te. Gu mokedi nangia Pauro aringbisi dungurati kuti kpoto boro ki ya ka ‘gu paha hi pai, kura apaha na hi pai na ni dunduko.’ (1 Kor. 12:12, 26) Ho wirinarani ambu ni be pai, si naida ani asadi ka undo ní. Badungu apai gudu ho rogo Ziazia Kekeapai nayugo wai agu aboro du rogo dungurati aundo akurayó i dibe gayó akpakarapai. Wa ani ka wisigo agu apai re awere, ani berẽpa wai rengbe ani ka undo aboro wa kina ngbatunga gu pe yó paha re. Wai rengbe oni ka undo awirinaroni rogo toro yo i nye kindi kuti iriso Yekova?

“I Ki Di Ko Fuo Yo”

3, 4. Gini gene Akuira na Puriseka aundo Aporo ngbaha?

³ Ho Aporo aduni Efesa yo, ko aima du nizaaza batungusi wene pangbanga. Gu pangbanga du rogo Amokedi yo nayaa: ‘Wa ko adu ni irarubangirise, ko agumba apai tipa Yesu ki niyuguhe nzunzu, ono ko aini kina pa ga Yoane bapatiza.’ Aporo aruganga tiko naapa zio bapatiza “ku rogo rimo Mbori nga Ba na Wiri na Ziazia Toro” te. Si kini wiri gupai nga ga Yoane Bafu Bapatiza abawiriki du natungusipai fuko watadu ga Yesu yó mbata fu Pendekote 33 F.B.K. Wa Aporo avura ka tungusapai kakaka, dungu apai kinaho ko aruganga tiko nani ya. Wai pa koda ko tiko na awirinako aidipase aundoko?​—Amo. 1:4, 5; 18:25; Mt. 28:19.

⁴ Gu Kristano nangia Akuira na diako nga Puriseka abi Aporo ko nitungusipai niwingbaduse bambutiria yo, i ki diko fuo yó, na ki yugu kura apai fuko. (Oni gedi Amokedi 18:24-​26.) Gure nangia gu mangapai nga ga nyemuse, wa vura duhe nga si aidi Akuira na Puriseka aria Aporo ki fura naako ngba wene gene, angianga ka sa ko ko bihe wa i nabisira pako abisira ya. Gupai nadu tipa ko gbua nga ko aruganga tiko naapa wai gu dungurati nga ga aKristano atona te. Zanga kapa, Aporo aduna bakere ngbarago tipa wai i adiko tipa ka yugo kura apai berewe fuko. Fuo Aporo ini agi apai re, ko ‘aunda’ agu awirinako nadu Akaya yo na ki mangi nyanyaki dezirepai yo.​—Amo. 18:27, 28.

5. Gini undo akutu abatungusipa Kindo afuhe, na gine nga sangbanaha?

⁵ Badungu agu aboro du rogo gu dungurati nga ga aKristano areme nafu tambuahe fu agu aboro naundo yó i gi rogo Ziazia Kekeapai yo, na i nazio bakure na agu aboro nayugupai fuyó, nga gu bakure kaa digongo ya. Rogo dungu apai yo, undo aboro i girogo rengo yo naida ringbisa regbo tipa ka fura naayó dedede rogo adiwi yo. Ono tie, abatungusipa Kindo na nyemu ka mbupa kura gayó apai tipa ka undo aboro mbiko i ini gupai nga si nabipa ga aboro raka. (Yo. 17:3) Nairiwo gu ngbarago nga ka bi aboro i nidi rengo kugume, kini raki ringbisihe kuti ni, na kini mangisunge na gayó raka tipa ka manga gupai Yekova akpinyemuhe!

“I Agumba Ruru Pai Kutiko”

6, 7. (a) Tipagine Pauro asia Timoteo ti ni i nita naako? (b) Gini sonakumbatayo Pauro aundo Timoteo ko mangihe?

⁶ Ho aPauro na Sira andu ni ku Rusetura yo ti regbo ue nunguro na sunge amokedi, i abi paranga yo rimoko angia Timoteo, garãko kini mbedi kuti 20 watadu si asusi 20 tooni. “Agu awirina nadu Rusetura yo na Ikonio yo i agumba ruru pai kutiko.” Na Timoteo nangia Eunike, gbiati titako nangia Roi angia aKristano, ono bako aangianga Kristano te. (2 Tim. 1:5) Si nawira gupai nga Pauro aini agi aboro re ti regbo gako bambata nunguro kurogo gu rago re bete agarã kusayo. Ono Pauro adu na bakere nyemu Timoteo berewe bambiko ko abi ko nigu paranga nadu kia. Sidu, fuo ida abaakumba pa Timoteo, Pauro adiko ko du nigako moundo ba sunge amokedi yo.​—Oni gedi Amokedi 16:​1-3.

⁷ Badungu apai si aidi Timoteo wirikihe be Pauro, na ko aima wirikaha a, bambiko fuo bete regbo gbua, Timoteo aima rẽ tipa Pauro kedi ko ko ndu kaa biko adungurati kubako. Vuru agu agarã 15 Timoteo adihe fuo Pauro, ko aima sona rogo toro yo ki da nibawene babiapai.​—Frp. 2:19-22; 1 Tim. 1:3.

8, 9. Ginipai rengbe agu aboro du rogo dungurati ka mangaha tipa ka ngarasa paranga aboro? Oni funga kpiapai.

⁸ Badungu paranga akumba na adee rogo dungurati rengbe ka sona kumbatayo kini undo dungurati bakere gbe. Ka aboro duho nangarasa yó na kini berẽpa yó wenengai, i rengbe ka sona kumbatayo kini mangi bakere asunge tipa ka undo ga Yekova aboro. Oni ngerenga rogo gaoni dungurati! Ya mo oni nabi gu paranga aboro rengbe ka futiyo tipa sunge wa Timoteo? Ka oni aundoyo na kini ngarasi yó, i rengbe arengba ka da ni abazakigene, aboro Betere, amokedi, gbiati agu ababiapai ninaata ata. Gini apai rengbe oni ka mangaha tipa ka undoyo i da ti gayó asásá?

⁹ Martin, mangisunge Betere yo tipa agarã 20 awere, ko natingidapa wai babi adungurati angarasiko agarã 30 kusayo ho i aatungusapai ni naako. Gu babi adungurati re afura wenengai tipa gu sunge ko amangihe Betere yo ho ko aduni niparanga. Ko angarasi Martin ko berẽpa fu tiko ka mangasunge fu Yekova wakina gure. Martin nape gupai nga, agu apai gu babi adungurati re apekehe, si aima undoko ko mangi wene adiaberã. Oni arengbanga ka ino gupai nika manga kumbatayo nisangbana fura oni na agu abakurearoni nga aparanga tipa agu asásá nga ga toro te.

“Oni Nyákasi Agu Yo Nawo”

10. Ginipai namangi Epafuradita, na si aye be gine?

¹⁰ Epafuradita aguari Firipoi yo ka ndu gbanga nunguro ku Roma yo tipa ka bi Pauro i aba ko ku bambukiso yo tipa gako idapase. Epafuradita aduni ga aFiripoio mokedi. I akedi ko na agamahe fu Pauro, na ko aidi ka sungo yo a na Pauro tipa ka undoko rogo gu kerepai ko adu rogoho. Ono ho ko adani Roma yo, kaza aba ko ko ‘ki mbedi ka kpi.’ Ho ko abi gupai ni nga gene ho tipa ko mangi gupai ko andu tipaha te, ko adu nifudifudiko gbe kpotokoyo.​—Frp. 2:25-27.

11. (a) Ka ani bi gupai nga kura aboro rogo dungurati nawoka be bakere berã, tipagine si aidanga si iriwo ti ni tirani gbe ya? (b) Ginipai Pauro aya i mangihe fu Epafuradita?

¹¹ Badungu apai nasa aboro areme i du nifudifudiyo gbe si ki da nikaza. Riigbu nga World Health Organization nayawee 1 dagba 5 nga ga agu aboro du auru kpotosende nawoka be berã rogo gayó raka. Gipai re namanga ga Yekova aboro amanga a. Bete agu apai naye na gipai re nga, zingo marã ka ngerafuo kporo, kaza, na gberarago mbiko zangarengba. Ginipai si aidi aFiripoio mangihe tipa Epafuradita? Pauro akepai fuyó ki yaa: “Oni dí ko ku gume tie rogo Gbia na ngbarago dunduko, ki irisi ngbatunga agu yo du wa ko, bambiko mbiko ga Kristo sunge ko ambedi na kpio, pa ungako adu nga bangiriko te, ka fu gu nakpa rogo gaoni mangapai fere.”​—Frp. 2:29, 30.

12. Ginipai rengbe ka fu wasa fu agu aboro duna bakere gberarago tiyo?

¹² Ani a, si naida ani ngarasi agu awirina duna bakere gberarago tiyo si ki da nikaza. Badungu apai duho rengbe ani ka gumbaha tipa gayó sunge fu Mbori. Isoke i amangi bakere ariapai rogo gayó raka tipa kada ni aKristano watadu kaa mangasunge kindo ti aregbo dũ. Ani nabi gu ariapai i amangihe re na kikiipaha, na kinawo Yekova abihe a. Ka si du nga gbinza watadu kaza nasa kura aboro ka i namanganga agu apai i anaamangaha mbata ya, si naida ani naairisa yó airisa tipa agu agarã i adihe kutingba ga Yekova sunge. Ka si vura du nga kina ginipai du nafuda ga Yekova boro, gu rugute Yekova afuhe furani nga: “Oni rùgu agu yo namanga utukuru, oni nyákasi agu yo nawo [duna bakere gberarago tiyo, NW ], oni sóngodi agu yo narungbura, oni hi pai ni gbanga ha fu aboro dunduko.”​—1 Tesa. 5:14.

‘Oni Vu Ní ki Fu Wasa Funi’

13, 14. (a) Gini bakerepai gu dungurati nadu Korinda yo amangihe, na tipagine? (b) Gini wenepai namangi mbiko kusayo boro-ingapai kusayo rogo dungurati?

¹³ Gu dungurati nadu Korinda yo aduna kumba rogoho naamanga meteka zanga ko idi ka saberã ko. Gako mangaapai ambedi ka gberesa dungurati, na zavura azangaidapase, gako mangaapai airiwo airiwo tiyo. Si kita duwo, Pauro kini ya fuyó wee i kusiko kusayo rogo dungurati.​—1 Kor. 5:1, 7, 11-13.

¹⁴ Pa kusayo ko rogo dungurati aima ye na wenepai. Dungurati anye nigigirihe, na gu boro-ingapai re amakia gako mangaapai ki saberã ko. Wa duhe nga gu kumba re aima tona ka manga agu apai nayugu nani nga ko aima saberã ko, Pauro ape gupai fu aKorindo rogo gako ue waraga nga, i karaga ko kurogo dungurati. Ono anga kina gu bangisapai re sa si aidi i mangihe te. Pauro aya fuyó wee i “vu [gu boro-ingapai re] ki fu wasa fu ni, ni ka gberã agberã be gani bakere rungo susi.”​—Oni gedi 2 AKorindo 2:5-8.

15. Wai si aida ani naabi agu aboro-ingapai i akaragayo kurogo dungurati?

¹⁵ Ginipai ani awirikaha ti gipai namangi re? Ho si nidu ni nga i kusi kura aboro kusayo rogo dungurati, ani nidu na bakere gberarago. Agu aboro re aima ye na pazee kurii Yekova, na ki gbarasi rimo dungurati. Si rengbe kadu a nga i aingipai kina boro kuti rani. Ono ho abaakumba niwisigi pai ni ringbisihe kuti ga Yekova agene, ki bi gupai nga si naida i karaga boro-ingapai berewe kurogo dungurati, gure niyugu gupai nga Yekova ima mbupai funi. (Mt. 18:17-20) Ya mo si aidanga ani gbatagene ka wirika Yekova te? Nirengo, ka ani kpipai ka ani aidanga ka mbupai fu gu boro namangi ingapai re ya, gure nga ani natikango na Yekova. Tipa ka sa dungurati si du na zereda gbiati kodatise rogoho, na Yekova ki idi na ani, si naida ani ‘nyakasi gaani nyemuse’ tipa agu aboro-ingapai nasa gayó berã nzunzu i ki karagayo kurogo dungurati.​—Mt. 6:14, 15; Ruka 15:7.

“Ko Rengbe na Unda Re na gi Sunge”

16. Tipagine Pauro aaidanga Yoane Marako ndu ti ni naayó ti regbo ue nunguro ya?

¹⁶ Gu kura pangbanga du rogo Ziazia Kekeapai nayugo gupai nga si aidanga ani kpipai kuti agu aboro ba gberarago tirani te. Yoane, kura rimoko angia Marako, aba gberarago ti gu mokedi nangia Pauro. Wai si amangi? Ho aPauro na Barunaba atona gayó bambata nunguro ni nga ga amokedi, Yoane Marako aguari fuoyo tipa ka undoyo. Ono ti kura regbo sa, ko ambu aPauro na Barunaba ki karagatiko ku kporoyo, ono Ziazia Kekeapai apenga gupai nasako ko mangihe wo te. Rago aima gberã ti Pauro mbiko gupai Yoane Marako amangihe re, Pauro ki dati ti gupai nga, ho i nika tona ue nunguro ni, i adianga ko fuoyo te. Gipai re akusi tagbagapai dagba aPauro na Barunaba.​—Oni gedi Amokedi 13:​1-5, 13; 15:37, 38.

17, 18. Wai ani aino gupai nga, aPauro na Marako aima mbakada gu tagbagapai nadu dagbayó, na ginipai ani awirikaha ti gipai re?

¹⁷ Si nawira gupai nga rago agberãnga agberã ti Marako nikerehe mbiko Pauro aka ko te. Gumba ani he wo mbiko gupai nga, ko aandu kindi kumbatayo na gako sunge mokedi rogo kura rago i na Barunaba. (Amo. 15:39) Gupai Pauro akehe fuko fuo bete agarã kusa nayugo gupai nga, ko anye kindi niruru boro. Ho Pauro aduni bambukiso yo Roma yo, ko ake waraga fu Timoteo. Ko aya rogo gu waraga re wee: “Mo di Marako ki ye na ko, bambiko ko rengbe na unda re na gi sunge.” (2 Tim. 4:11) Ii, Pauro abi gupai nga Marako aima sona rogo toro yo ki sa sinoko.

¹⁸ Pai kinaho rengbe ani ka wirikaha ti gipai re. Marako aima sonosa agu asino si aidi mokedi du nani. Ko aakotanga mbiko gupai nga Pauro aka ko te. Ko gbiati Pauro angia agu aboro naima nyaka rogo toro yo, sidu, sogote aayenga dagbayó te. Kuba gure, gu waraga Pauro akehe fu Timoteo nayugo gupai nga, pa Marako aima nyaka fuko, na ko abi ko nigu boro narengbe arengba ka undoko wenengai. Sidu, ho awirina anyasa ni riipa gu tagbagapai du dagbayó, gupai si aida i moiberã yó tipaha nga pa undoyo akurayó i nyaki rogo toro yo. Ho boro aberãpa gu weneapai ni akurani amangaha, si nasa dungurati si naasona kumbatayo.

Mo na Dungurati

19. Ginipai rengbe agu aboro du rogo dungurati dunduko nibasasa ka mangaha fu akurayó?

¹⁹ Ti gi “gbegberẽ rago” ani araka ti ni re, mo naida gu undo aida nga ga agu awirinamo du rogo dungurati, na i naida gamo aida a. (2 Tim. 3:1) Kura aregbo kinaho kura Kristano ainongo gupai ka ní mangihe ho du ní ni rogo fudifudipai ya, ono kina Yekova inihe. Yekova rengbe ka mangasunge na agu aboro du rogo dungurati, kodihe na mo a, ka undo kura aboro i ini gupai ka i mangihe. (Yes. 30:20, 21; 32:1, 2) Sidu tie, ani di ga Pauro zungadihe kugume, nga gu nayaa: ‘Oni naazungodi tironi na akuaroni kindi, ki ninyakasi tironi dagbaroni yo, a wa oni naamanga ha.’​—1 Tesa. 5:11.

[Gu kpiahe du ti kpewaraga 15]

Gaoni Karagapai Nga Gine?

• Tipagine si aida ti ni aboro naanyakasa akurayó rogo gu dungurati nga ga aKristano?

• Gini ngbatunga fudifudiapai rengbe oni ka undo kura aboro i dibehe?

• Tipagine ani aida gu undo ti ni nga ga agu awirinarani du ani naayó rogo dungurati?