Da Rengbe Na Batasa Aguyo Nakpara Tipa Undo?
‘Ako Mbori, mo fú ga ruru sarangbanga fu bakindo. . . . Ko abatasa gu irazingo ahe nakpara kuari.’—TAM. 72:1, 12.
1. Nibipa gupai nadu tipa Davide, ginipai ani awirikaha tipa ga Mbori inapai?
NANGBAA wai agi afugo Bakindo Davide re afu ngbarago! Agarã kusayo mbata fu ke ko gipai re, ko aduna gberarago tingbafuo manga ko bäri na Bataseba. Ti gu regbo re, Davide ahõmbupai be Mbori ki yaa: “Ku sangba ga weneringise yo; mo gbándaka pa gi samungu a wa du gamo wene nunga aboro ni ngenge he. . . . Gi ingapai bangire kindi. . . . Mo ngére, i ame re na irairapai, nina ki du na mobarare na kina ingapai.” (Tam. 51:1-5) Yekova nga Mbori inapai natingida gupai atingida nga ani nga kpakpa aboro.
2. Wai rengbe Atambuahe namba 72 ka undo rani?
2 Yekova ima rugatiko na gaani zangarengba. Ono a wa i aima gumbaha, ga Mbori mbedimbedi Bakindo ‘abatasa gu irazingo ahe nakpara kuari; na irarungo na guni adunga mounda tiní ya. Nunga rurungbura boro adu tiko na irazingo ahe a, ko abanda unga airazingo ahe.’ (Tam. 72:12, 13) Wai du i nika batasa airazingo ahe? Atambuahe namba 72 nafu karagapai furani. I asari gi bia re tipa gu zogarago nangia ga wiri Davide nangia Soromo. Si nayugo kpia wai gu zogarago nga ga wiri Mbori nga Yesu Kristo nika batasa aboro bekpio na arungo.
Kpia ga Kristo Zogarago
3. Ginihe Soromo asanahe tipaha, na gine Mbori afu fuko?
3 Ho Davide agbinza ni, ko ayawee i mbedi Soromo nibakindo. Fuoho, ko afu arugute fu Soromo si aidi ko ndu kuti ni. (1 Aba. 1:32-35; 2:1-3) Yekova ayugu tiko fu Soromo rogo musumo yo ki yaa: “Mo sána he tipa gu he mi ka fu foro.” Soromo asanahe tipa he gbua kina sa ki yaa: ‘Mo fú rugatinapai ku kpoto ga moyambu yo ko nisápu ngbanga dagba gamo aboro, mi niíni kpara rurupai ti gbegberẽpai.’ Nisangbana gi ga Soromo sanahe niumbasitise re, Mbori afu guhe fuko ko asanahe tipaha na agu akuraha kuriihe.—1 Aba. 3:5, 9-13.
4. Wai nakindo Seba afura tipa ga Soromo zogarago?
4 Mbiko ga Yekova amaku, ga Soromo zogarago aye na zereda na kidu niwenehe kisusi agu azogarago nadu auru kpotosende dunduko. (1 Aba. 4:25) Dagba agu aboro naye ka bi wai ga Soromo zogarago adu angia nakindo Seba na badungu gari aboro fuori. Ri aya fu Soromo wee: “Ndikidi rengo nga gu pai mi agi tipa gamo apai rogo gi ringara. . . I agumba nga ha fere dati bebere he te; ga tatamana na ga ũkumuko si susi gu pande he mi anagia.” (1 Aba.10:1, 6, 7) Ono tie, Yesu aduna bakere tatamana kisusi Soromo. Ko aya tipa tiko wee: “Oni ngére, gu ko du erẽ nga bahe ti Soromo.”—Mt. 12:42.
Bata Vurube ga Bakere Soromo Zogarago
5. Ginipai Atambuahe namba 72 ayugoho, na kpia gine si ayugoho?
5 Awere tie, ani wisigingo bete averesi rogo Atambuahe namba 72 tipa ka wirikapai tipa agu amaku nikadu ti regbo gu zogarago nga ga Yesu Kristo nga Bakere Soromo. (Oni gedi Atambuahe 72:1-4.) Gi bia re nayugo wai Yekova abi gu “pa zogaaboro” nga ga Wiriko, nga “Gbia Zereda.” (Yes. 9:6, 7) Vurube gu rugapai nga ga Mbori, Bakere Soromo nika ‘sarangbanga fu rungorungo aboro na ki fu bata fu irazingo ahe.’ Gako zogarago nika ye na zereda na rurupai. Ho Yesu aduni auru kpotosende, ko ayugukpia gupai nika manga tiibe gu gako zogarago nikadu tipa agarã kutu.—Yugo. 20:4.
6. Gini apai Yesu ayugukpiaha nga gu nika manga tii gako zogarago?
6 Ani wisigingo ga Yesu Kristo mangapai nga gu nayugo mboimboi gupai ko nika mangaha ki digisi gupai Atambuahe namba 72 apehe. Gako mangapai nga ga nunga fu agu aboro narungo nasa rani ani duna ngbarago. (Mt. 9:35, 36; 15:29-31) Nikpiapai, kumba nadu na ngbataka aye fuo Yesu nikpari niyaa: “Ka mo kpi nyemu he, mo húsi re ahusa.” Yesu akaragapai ki yaa: “Mi nakpi nyemu he; mo hú.” Ngbataka ki go! (Mk. 1:40-42) Fuo gure, Yesu agbia dekurugbo bangisa wiiri akpi. “Nungari ki nimangi ko amanga,” ko ki ya, “Paranga, ya mi foro, mo gúari!” Ko ki guari, kidu niungako berewe!—Ruka 7:11-15.
7, 8. Wai Yesu amangisunge na gu ome Yekova afuhe fuko?
7 Yekova afu ome fu Yesu ko mangi iiriwoapai. Gure adu niyuguyuguhe rogo gupai ko amangihe na gu “de, kureri anaga garãha ki du bawe na ue.” Wa ri avura ‘ima be dungu amunganga gbe, ki bagi agu ahe naadu be ri dũ,’ ri ahunga te. Ri arimi dagba rimbasa ki zadi Yesu ki kuo gu ndiko nadu tipa gu boro ‘kaza adee amanga ní.’ (Pa Mot. 15:25) Fuo zada ri Yesu, ko ainihe ya tandu guari tiko, ko ki sanahe ki ya da zadi ko. “De ki ta ye ta gunde nikio, . . . ri ki ti sande barangba ko, ki gumba kinaku rengo fu ko dũ.” Fuo ino Yesu gupai nga Yekova husi gu dee re, ko aya furi ninunga wee: “Vungu, ga idapase batasi ro; mo ndu zezeredi ki bati be ga kere kaza.”—Mk. 5:25-27, 30, 33, 34.
8 Gu ome Yekova afu fu Yesu ahusi aboro na kidu na iiriwo sangbanaha kurii agu aboro naabihe. Zanga kapa, dungu agu aboro nabi ga Yesu husa aboro mbata fu gu gako tungusapai nadu rii bagangara yo aima duna ngbarago. (Ruka 6:17-19) Ho Yoane Bafu Bapatiza akedi gako abawiriki ni ue i ndu ka ino singia Yesu du nangia Masiya, i abi ko ko “nihusi dungu aboro be kaza na kere akaza na gbigbita atoro; ko ki fu ngera fu agu yo nangia airavurari.” Yesu aya fu gu ga Yoane abawiriki re wee: “Oni gá, ki gumba pa agu apai fu Yoane oni abi he ki nigi he; airavurari nangera, airaterenga nata, airangbataka nahu, airangbianga ki nigi pai, kangba aboro ki nizingi, i nitungusi wene pangbanga fu rungorungo aboro.” (Ruka 7:19-22) Gu pangbanga re aima ngarasa Yoane nirengo!
9. Ga Yesu iiriwoapai angia kpia gini apai?
9 Gu bata Yesu aye nani ti regbo gako sunge auru kpotosende adu gbua tipa bete regbo. Agu aboro ko ahusi yó watadu ko azingisi yó bekpio araki i ki ima kpiko. Ono wa vura duhe wo, gu iiriwoapai Yesu amangihe auru kpotosende angia kpia gu nyenye weneapai aboro nika gbiaha ti regbo gako zogarago.
Kpotosende Dunduko Nikadu Niparadizo!
10, 11. (a) Agu amaku ga Mbori Kindo nika ye nani nika ima ki da ti gini regbo, na wai ga Yesu zogarago nikadu? (b) Da nika duadu na Kristo Paradizo yo, na ginipai ka ní mangihe ní ki raki nyeanye kindi?
10 Oni berẽnga pa wai raka nikadu rogo Paradizo auru kpotosende. (Oni gedi Atambuahe 72:5-9.) Airisi bangisa ndikidi Mbori nika raka wene raka rogo Paradizo nyeanye kindi, a wa uru na diwi nika nyeanye kindi! Gu Bakindo nga Yesu Kristo nikadu nibawene Bakindo kisusi. Ko ‘adu wa mai naana ku auru dede nvuo, a wa mai naanada kpotosende.’
11 Wa oni aberãkurii wai sangba gi bia nga ga Atambuahe re nika digo, ya mo ngbaduroniyo afõnga tihe oni kidu na maabangirise ka raka nyeanye kindi rogo Paradizo te? Gu boro ingapai i akenge ko pati Yesu aima gbia maabangirise ho Yesu ayani fuko: “Ani adú na mo Paradiso yo.” (Ruka 23:43) Ti regbo gu ga Yesu zogarago nikadu tipa agarã kutu, ko nika zingisa gu kumba re azingisa bekpio. Ka ko ra kutiibe ga Yesu zogarago, ko raki araka nyeanye kindi na wene kpotoko na ngbarago.
12. Ti regbo ga Kristo zogarago tipa agarã kutu, gini momu nikadu fu gu iraira aboro i nika zingisayo bekpio?
12 Ti regbo ga Bakere Soromo zogarago, nga Yesu Kristo, ‘rurupai azuga, zereda ki du kpaima!’ (Tam. 72:7) Ga Kristo nyemuse na dawedawe nunga nikadu kpaima, a wa si adu ho ko aduni auru kpotosende. Rogo ga Mbori vovo zegino, zavura gu ‘iraira aboro’ i nika zingisayo, i aduadu na wene momu beyo ka wirikapai tipa Yekova tipa kaa raka araka kindi. (Amo. 24:15) Ono agu aboro nikaa ndunga kuti gupai Yekova akpinyemuhe ya, Ko afunga nyenye unga fuyó te, i andu ka gberesa gu zereda na gu ngbabase nikadu rogo vovo zegino te.
13. Bakio gu rago Yesu nika zogaha nikadu wai, na tipagine gu zogarago re nikadu ti ni na zereda?
13 Bakere Soromo ‘azogarago tona ti gu baime dati kura baime, tona ti gu Di [nga Ferata] dati digida kpotosende! Agu yo sungu ngbakungba yo i atumusa fuko, avurako asira nvutu sende!’ (Tam. 72:8, 9) Yesu Kristo nika zoga kpotosende dunduko a wa agu averesi du kuari re agumbaha. (Zek. 9:9, 10) Agu aboro duna tambuahe tipa gako zogarago na gaha amaku nika “túmusa” na ki ra nigoyo fuko. Ono agu aboro ingapai nikaa sanga berãyo ya, i adiayo adia kusayo, zavura gu “boro ingapai du garãni 100.” (Yes. 65:20) I ‘asira nvutu sende.’
Yesu Naberã Parani Ninunga
14, 15. Wai ani aino gupai nga, Yesu ima rugatiko naapa gaani arungo, na ko ‘abatasa gu irazingo ahe nakpara kuari’?
14 Ani nga aboro ingapai rogo kere rungo, na ani naida undo. Ono maabangirise kinaho berani. (Oni gedi Atambuahe 72:12-14.) Bakere Soromo nga Yesu na nunga rani tiko bambiko ko aima rugatiko naapa gaani rungo. Kurigure, Yesu ambu tipa rurupai, na Mbori ambu aʹasada si ye sako. Yesu adu nifudifudiko gbe, “gako randimo ki du wa kina bakere togoro kure nitotogo ku sande.” (Ruka 22:44) Ho i akenge ko ni kuti ngbunduru ngua-rungosi, ko akpari ki yaa: “Gi Mbori, gi Mbori, guari mo ti re sa gine?” (Mt. 27:45, 46) Wa dungu arungosi avura gbia Yesu, na wa Satana avura ye na dungu aʹasada kutiko tipa ka sa ko ko mbu Yekova, ko anye niruruko fu Yekova Mbori dati kpio.
15 Si naida ani idi kuti gupai nga, Yesu ima rugatiko naapa gaani arungo, na ‘ko abatasa gu irazingo ahe nakpara kuari, na irarungo na guni adunga mounda tiní ya.’ Wa Yesu aberãpa aboro wakina Bako, ko nika ‘giapa airazingo,’ na ki ‘husi aguyo duna rungo kpotoyo yo, ki vodi gayó aoro.’ (Tam. 69:33; 147:3) Yesu ‘rengbe arengba ka rungo na ani tipa gaani arungbura’ bambiko “i aima asada ko rogo apai dunduko wa kina rani.” (Eb. 4:15) Si nibawenepai ka ino gupai nga Bakindo Yesu Kristo nazogarago awere ngbangbaturũ yo na ko nika ye awere ka dia arungo dunduko kusayo ti aboro!
16. Wai Soromo arengbe ka rungo na avuru gako kindo?
16 Wa Soromo aduna tatamana na dudunguro giarogopaiyo, “nunga rurungbura boro” aduadu tiko. Kurigure, badungu kereapai aima manga rogo gako raka. Wiriba Soromo nangia Amanona api na dawiriko nangia Tamara ngbaome, na wiribako nangia Abisaroma ki imi Amanona tipa gu kerepai ko amangihe re. (2 Sam. 13:1, 14, 28, 29) Abisaroma ataburo ka dia zogarago be bako nga Davide ngbaome, ono gako buro agberẽ Yoaba ki imiko. (2 Sam. 15:10, 14; 18:9, 14) Fuo gure, wiriba Soromo nangia Adoniya aidi ka dia zogarago ngbaome, nga gu nadu tipa Soromo. Ka ko adi gu zogarago re, ka ko aimi Soromo kindi. (1 Aba. 1:5) Gu kpee Soromo afuhe ti regbo kpara yekaru nayugo gupai nga ko aima rugatiko naapa ga aboro arungo. Ko akpari tipa avuru gako kindo ki ayaa: “[I ini pa] gayo gberãngbi ni ba sa sa, na gayo rungosi, . . . [Mo nga Yekova, mo] vu yo, ki nifu he fu aboro dunduko rengbe na gayo apai.”—2 Peka 6:29, 30.
17, 18. Gini rungo ga Yekova amoyambu ahihe, na ginipai naundo yó i hihe?
17 ‘Gaani rungosi’ rengbe ka ye be agu apai namangi rani kusayo. Mary, nga Dezire Yekova du garãri awere gii 30 yo, akepai ki yaa: “Mi gu duadu na nduapai tipa kadu na ngbarago, ono ho mi atingida agu apai ni namangi kusayo, kina zee nazio re, na ka rago angbanga tire ya. Ho kere gberarago azio re ni, mi nati nikina kpee si kidu wa ka i yawee gupai re amangi kina gba. Mi natingida pa gu gbegberẽ apai mi amangihe kusayo mi kini bi tire nga mi arẽnga tipa apai te na mi kini bihe nga ingapai kina kurire.”
18 Badungu ga Yekova amoyambu apai amanga yó wakina ngbatunga gure, ono ginipai rengbe ka undo yó i gbia ome tipa ka hi agi apai re? Mary nayaa: “Awirina rogo dungurati nga akumba na adee nafu ngbarago fere awere. Mi naʹasadatire tipa ka berãkurii agu apai Yekova akidopaha ku kumbatayo, na si nasa re mi duna kido nga gi kpee tipa undo asatihe asa nikpee ngbarago.” (Tam. 126:5) Si naida ani naangera koyo du Wiri Mbori ni, nga gaani Bakindo. I akepai tipa ko ki yaa: “Nunga rurungbura boro du ti ko na irazingo ahe a, ko nabanda unga airazingo ahe. Ko natumo ungayo be bau pai na zuu; kureyo ki du ni kikiipa he bangiriko.” (Tam. 72:13, 14) Nangbaa wai gi fugo re afu kido furani!
Vovo Zegino Nikadu na Weneapai Rogoho Kpaima
19, 20. (a) A wa duhe rogo Atambuahe namba 72, ginipai ga Mbori Kindo nika diaha kusayo? (b) Gini bambata boro si aida i tambua ní tipa ga Kristo zogarago, na wai oni abi agu apai si nika mangaha?
19 Ani asadingo ka maa kpia wai ku berãrani yo ga aboro raka nikadu rogo ga Mbori vovo zegino nga gu nikadu tiibe Bakere Soromo. I nakido rani nga, ‘zende ahe nika zuko rogo ringara kpaima; si adu wo rii abaagangara yo.’ (Tam. 72:16) Wa duhe nga ahe naazugongo rii bagangara yo te, agi afugo re nayugopa wai ahe nika zugo auru kpotosende dunduko kpaima. Gaha zuzuhe ‘adú wa Rebanona,’ nga gu ringara ahe anaaida rogoho nibakerehe ti regbo ga Soromo zogarago. Oni bingo gipai re! Zingo riahe berewe te, boro ho nauguda watadu nakoba be gomoro te! “Yekova nga ga arimbasa ko amánga pumbo fu aboro dunduko nga agu ariahe du na kina ku nzeme ti ni.”—Yes. 25:6-8; 35:1, 2.
20 Da si aida i tambua ní tipa agi amaku re? Gu bambata boro si aida i tambua ní nga Nyenye Bakindo na Bazogo arago dunduko, nga Yekova Mbori. Ani dunduko nika ngbiko ningbarago kini bibia tipa Bakindo Yesu Kristo wa gu babi Atambuahe abihe nga gu nadigo kini yaa: “Rimoko nyé anye kindi, wo rimoko nyé wa nye uru! Aboro sámbua tiyo mbiko ko, arikaaboro dunduko yá ti ko boro maku! Yekova nga Mbori dú ni sambuasambua ko, nga ga aYisaraere Mbori, kina gu ko namanga iiriwo apai. I sambua rimoko du ni taasitaasi he nye anye kindi; gako taarimo hiisi zegino dunduko! Amina, na amina!”—Tam. 72:17-19.
[Gu kpiahe du ti kpewaraga 28]
Gu weneapai nadu ti regbo ga Soromo zogarago angia kpia ginipai?
[Gu kpiahe du ti kpewaraga 31]
Si ngba angba tipa boro asadi tiní ka raka rogo Paradizo tiibe gu zogarago nga ga Bakere Soromo
[Gu kpiahe du ti kpewaraga 30]
Gaoni Karagapai Nga Gine?
• Atambuahe namba 72 ayugu kpia gine?
• Da nga Bakere Soromo, na wai bakio gu rago ko nika zogaha nikadu?
• Ginipai ngba tironi gbe dagba agu amaku gumbayo paha rogo Atambuahe namba 72?