Ani Di Yesu Kugume, Nga Bakere Davide Na Bakere Soromo

“Oni ngére, gu ko du erẽ nga bahe ti Soromo.” —MT. 12:42.

1, 2. Tipagine rengbehe ti ni ka kpakara bangiri aboro nga Mbori arugu Samuere ko sia Davide nibakindo?

HO GU nebi nangia Samuere anduni kua Yisai yo ka mbeda wiriko sa tipa ko du nibakindo, ko aabingo gu wiri Yisai nangia Davide nigu boro ka da nibakindo te, ono ko adu bangiriko gbua nigu gude rẽ kaa ngerafuo kina akandoro. Kurigure, pa Betereme aanyakanga te nga gu gbata ko asono rogoho. I aringbisipaha ‘niumba he dagba angbatunga aYudo.’ (Mika 5:2) Wa si avura duwo, gi paranga pako aanyakanga re ya, ko du Samuere andu ka mbeda ko tipa ko du nibakindo aYisaraere kumbatayo.

² Anga gu boro Yisai aye na ní mbata tipa Samuere mbedi ní nibakindo nangia Davide te. Anga ko a nangia gu ue boro watadu gu biata boro te. Ho Samuere ayeni kua Yisai yo tipa ka mbeda wiriko sa nibakindo, Davide aadunga kporo ho te. Ono tie, gu boro Yekova aaida ní nangia Davide, na ko nangia gu boro pani anyaki bangiri Yekova.—1 Sam. 16:1-10.

3. (a) Ginipai Yekova abihe ninyanyakipa pai ho ko awisigo boro ni? (b) Ginihe natona ka mangasunge kurii Davide fuo mbeda yó ko na nzeme?

³ Yekova abi gupai Samuere aarengbanga ka bihe ya. Yekova abi agu apai nadu ngbadu Davide yo na si ki ngbaangba tiko. Anga tama boro nyakipaha bangiri Yekova te; ono gupai nyakipaha nga agu apai du ngbaduniyo. (Oni gedi 1 Samuere 16:7.) Fuo ruga Samuere tiko na gupai nga Yekova aasianga agu awiri Yisai nangia aunvuru nadu saba te, ko akedi sunge i ndu ka ye na gayó kiaro ba banda anyaa yo. Pangbanga gupai re nayaa: “[Yisai] ki kedi sunge i ki ye na [Davide]. Kpotoko ki du adu irĩirĩ ni rengo, tamako ki du ni wene he ki susi, bi ko ki ngba angba bangirise. Yekova ki ya, ‘Mo guari, mo mbedi ko; bambiko ko du re.’ Samuere ki di gbanga na nzeme, ki mbedi ko ku dagba aunvurako; ga Yekova Toro ki ye na bakere tandu ku ri Dawidi tona ti gu uru re ki da ku mbata yo kindi.”—1 Sam. 16:12, 13.

Davide Angia Kpiapai Kumbatayo Tipa Kristo

4, 5. (a) Oni ringbisinga pa gu bete apai aDavide na Yesu awiratiyo rogoho. (b) Tipagine ani ayamba Yesu ti ni nga Bakere Davide?

⁴ Fuo susa agarã wa 1,100, tingbafuo gu regbo i abatika Davide, i abatika Yesu Betereme yo a wa i abatika Davide Betereme yo. Yesu aawiranga gu boro kadu nibakindo bangiri aboro te. Ko aangianga ngbatunga gu boro bangiri dungu aYisaraere ka zogo aboro nibakindo te. Wa si avura duwo, ko nangia gu boro Yekova asiani a wa si adu tipa Davide. Wakina Davide a, ko angia gu boro nangba ti Yekova.a (Ruka 3:22) Gupai namangi tipa Davide nga, ‘ga Yekova toro aye na bakere tandu kuriko,’ kina gu bangisapai re namangi tipa Yesu a.

⁵ Dungu kura apai gudu kinaho agi akumba re awiratiyo rogoho. Nikpiapai, gu bafurugute fu Davide nangia Aitofere asamungu kutiko ki kusi ko fu akare, kinawo a si adu tipa Yesu. Gu ga Yesu mokedi nangia Yuda Keriota, ko nakusi ko fu avurako. (Tam. 41:9; Yo. 13:18) I dunduko tibarayo ue nga Davide na Yesu nadu na kakaka nyemuse tipa agu aba aboro anaairiso Yekova rogoho. (Tam. 27:4; 69:9; Yo. 2:17) Yesu a angia dikumbo Davide. Mbata fu i batika Yesu, maraika aya fu nako wee: “Gbia Mbori amáa ko ni bakindo a wa titako adu nangia Dawidi.” (Ruka 1:32; Mt. 1:1) Ono tie, wa duhe nga agu asangbanebi dunduko du tipa Masiya nika digo kuti Yesu, si nasa gupai nga pako kii kisusi ga Davide. Ko nga Bakere Davide, nga gu Bakindo aboro aima digo nipidiko.—Yo. 7:42.

Ani Naapefuo gu Bakindo Nga Babanda Akandoro

6. Wai Davide angia wene babanda akandoro?

⁶ Yesu a nga babanda akandoro. Gine nga agu asino du ti wene babanda akandoro? Ní na gu sino tiní nga ga ngera wenengai fuo gani akandoro kini rigi ra na kini banda ra. (Tam. 23:2-4) Ho Davide aduni nga paranga, ko anaangerafuo ga bako akandoro wenengai. Nikpiapai, ko amoi gako raka ngbapai ki guari niwingbaduse ka sovura kuti bahu na kuti urisi ho ami azubo gako akandoro ni.—1 Sam. 17:34, 35.

7. (a) Ginipai naundo Davide ko du niwene bakindo? (b) Wai Yesu adu niwene babanda akandoro?

⁷ Agu agarã Davide adihe nvuo yo kaa ngerafuo akandoro, si ambakadiko tipa gu nyanyakipa sunge ko atonaha kusa nangia ngerafuo aYisaraere.b (Tam. 78:70, 71) Yesu a nga wene babanda akandoro. Ko nagbia ome be Yekova wa ko angerafuo gako akandoro i aringbisa para kuti “umba rika aboro” gbiati gu kura ra i ayamba ra nga “kura akandoro.” (Ruka 12:32; Yo. 10:16) Si ki tadu were, Yesu kini du niwene babanda akandoro. Ko ima ino gako rimbasa akandoro wenengai gbe, na ko nayamba ra nibasasa ti rimora. Ko akpinyemu gako akandoro bakere gbe si ki sa ko ko fu ungako tipa ra. (Yo. 10:3, 11, 14, 15) Wangia Yesu Wene Babanda Akandoro, ko mangi gupai Davide aarengbanga ka mangaha ya. Gako motumo tumorii nakusi goro aboro bekpio. He ho nika ká naako ti ngbembatayo fu gako “umba rika aboro” ku ngbangbaturũ yo na ki ndu na “kura akandoro” kurogo ga Mbori vovo zegino te.—Oni gedi Yoane 10:27-29.

Ani Pekefuo gu Bakindo Nga Badibevura

8. Wai Davide adu nigu bakindo nga badibevura?

⁸ Davide watadu Dawidi angia gu bakindo nanaasovura nyanyakii tipa ka banda gu ringara nangia ga ga Yekova aboro, na “Yekova ki nifu diabese fu Dawidi yo ko anaandu ku ho ni.” Ti regbo ga Davide zogarago, ga aYisaraere ringara atona ti gu di du Ezipeta yo ki da ti gu di nga Ferata. (2 Sam. 8:1-14) Yekova afu ome fuko ko kidu nigu bakindo duna ome gbe. Ziazia Kekeapai nayaa: “Rimo Dawidi ki wo awo rogo aringara dunduko, Yekova ki moi gunde Dawidi ku kpoto rika angbatunga aboro yo dunduko.”—1 Peka 14:17.

9. Oni gumbanga pa wai Yesu adibe vura nidu ko nisiasia Bakindo.

⁹ A wa Bakindo Davide adu, Yesu anaagundenga te. Ho Yesu adani nisiasia Bakindo, ko adu na ome kurii adaimona, ki batasi agu aboro nadu na adaimona tiyó. (Mk. 5:2, 6-13; Ruka 4:36) Zavura gu kere vurako nga Satana, aadunga a na ome kuriko te. Yekova aundo Yesu ko ki dibe zegino, nga gu zegino du kuvurube Satana.—Yo. 14:30; 16:33; 1 Yo. 5:19.

10, 11. Ga Yesu sunge nga gine wangia ko gu Bakindo nga basovura ngbangbaturũ yo?

¹⁰ Agarã wa 60 fuo kpi Yesu ki zingi bekpio na ki ga ku ngbangbaturũ yo, gu mokedi nangia Yoane abi yuguyugupai, ki bi Yesu nigu Bakindo nga basovura ngbangbaturũ yo. Yoane akepai tipa gupai ko abihe ki yaa: “Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.” (Yugo. 6:2) Gu boro nasungu rii pusi farasi re angia Yesu. Mbori ‘afu kpakpari fuko’ rogo gu garã nangia 1914 ho ko amoiko ni nibakindo ngbangbaturũ yo. Tingbafuo gure, ko andu ‘kini dibe apai.’ Nirengo, Yesu nga gu bakindo nga badibeapai watadu badibevura, a wa Davide adu. Nibasa tingbafuo maa yó ko nibakindo ga Mbori Kindo, ko asovura na Satana na ki dibeko, ki ba ko ku sende no na gako adaimona dunduko. (Yugo. 12:7-9) Ko nika sovura daho ko nika nyasa gako “diabe apai” ni, nga gu regbo ko nika gbarasa gi ga Satana zegino re ti ni.—Oni gedi Yugoti 19:11, 19-21.

¹¹ A wa Davide adu, Yesu nga gu bakindo duna nunga aboro tiní, sidu, ko nika banda “bakere rimbasa aboro” abanda ti regbo Aramegido. (Yugo. 7:9, 14) Kurigure, ti regbo gu zogarago nga ga Yesu gbiati agu aboro du bangeyo 144,000, “ruru aboro azinga be kpio na iraira yo a.” (Amo. 24:15) Agu aboro i nika zingisa yó re, ka i amanga gupai Mbori akpinyemuhe, i araka nyeanye kindi. Nairiwo gu bawenepai nasungudo yó kumbatayo re! Si naida ani diberã kaa ‘manga wenepai’ amanga kindi, tipa wa ka ani raki ti gu regbo kpotosende nika hi dunduko be kina ruru aboro i kini raki na ngbarago, nga agu aboro nikangia avuru Bakere Davide.—Tam. 37:27-29.

Soromo Asanahe Tipa Tatamana

12. Ginihe Soromo asana Yekova tipaha?

¹² Wiri Davide nangia Soromo angia kpiapai kumbatayo a tipa Kristo.c Ho Soromo adani nibakindo, Yekova aye fuoko rogo musumo ki ya fuko wee, guhe ka ko sanako tipaha, ko afuhe afu fuko. Soromo arengbe arengba ka sana Yekova tipa kumuko, ome, watadu tipa gbanga raka. Ono tie, Soromo ambu agi apai re ambu dunduko ki ya fu Yekova wee: “Mo fu tatamana fere awere na inahe mi ki ta kura sa pai ki niyega ku bangiri agi aboro re, bambiko da rengbe ka sara ngbanga gi gamo aboro du ni badungu yo re?” (2 Peka 1:7-10) Yekova akaragapai fu Soromo, ki fu tatamana fuko.—Oni gedi 2 Pekapai 1:11, 12.

13. Bakio ga Soromo tatamana adu wai, na wari ko agbia gi tatamana re ni?

¹³ Ti agu aregbo Soromo adu niruruko fu Yekova, gako afugo tatamana aima susa gu nangia ga agu aboro dunduko nadu ti ragoko. Soromo agumbapai “ni asanza wa 3,000.” (1 Aba. 4:30, 32, 34) Badungu agi asanza re i akekehe na si naundo agu aboro kindi nagbata tatamana. Nakindo Seba andu nunguro nga amairo 1,500 tipa ka ba asada fu Soromo na gari “nyanyaki sasana ahe.” Ngbari azere gbodo mbiko gupai Soromo apehe furi, na mbikopa gako aũkumuko. (1 Aba. 10:1-9) Ziazia Kekeapai nagumbapa Soromo niyaa: “Aboro auru kpotosende no dunduko ki idi ka ye ku bara bangiri Soromo, ka gia pa gako tatamana nga gu Mbori afu he ku rogo gako berã.”—1 Aba. 10:24.

Ani Pekefuo gu Bakindo Nga Iratatamana

14. Rogo gini gene Yesu adu ni “bahe ti Soromo”?

¹⁴ Bangisa boro gbua sa nasusi Soromo rogo patatamana yo. Gu boro re nangia Yesu Kristo, Ziazia Kekeapai aya tipa ko wee ko “nga bahe ti Soromo.” (Mt. 12:42) Yesu anaagumba ‘agu apai nga ga nyenye unga.’ (Yo. 6:68) Nikpiapai, gu tungusapai Yesu amangihe rii bagangara yo adu na agu apai rogoho nawira kina bete ga Soromo asanza. Soromo agumbapa bete agu apai nafu ngbarago fu airisi Yekova. (Snz. 3:13; 8:32, 33; 14:21; 16:20) Yesu anyakasi gupai nga, boro nagbia ndikidi ngbarago ho ní amanga agu apai ni nga ga irisombori, na ho ní abi agu akidohe ni nga ga Mbori si nidigi. Yesu ayaa: “Aboro ngbarago nga agu aboro inipa gu gayó azingo nga ga toro, bambiko gu kindo nga ga ngbangbaturũ nga gayo.” (Mt. 5:3, NW) Agu aboro namanga agu apai Yesu ayuguhe, i nambeda na Yekova gbe, nga gu boro duna ‘gugaabi unga beni.’ (Tam. 36:9; Snz. 22:11; Mt. 5:8) Kristo namangasunge na “ga Mbori tatamana.” (1 Kor. 1:24, 30) Wangia Yesu Kristo mbedimbedi Bakindo, ko nga “gu toro nga ga tatamana.”—Yes. 11:2.

15. Wai rengbe ani ka gbia undo be gu tatamana nga ga Mbori?

¹⁵ Wangia ani apefuo Bakere Soromo, wai rengbe ani ka gbia undo be gu tatamana nga ga Mbori? Wa duhe nga ga Yekova tatamana rogo Fugoko nga Ziazia Kekeapai, si naida ani mangi bakere asadatise ka gbiaha niwisigo ani Ziazia Kekeapai. Gu paparaha gbe si aida ani wisigihe na kini berẽkuriihe, si nga afugo Yesu. (Snz. 2:1-5) Kurigure, si naida ani naasana Mbori asana kindi tipa tatamana. Ziazia Kekeapai nakido rani kini yawee ka ani asana Mbori tipa tatamana na ngbaduraniyo dũ, ko fuhe afu furani. (Yak. 1:5) Mbiko gu undahe nga ga ziazia toro, ani rengbe arengba ka gbia gu tatamana du rogo Fugo Mbori nga gu rengbe ka undo rani ho ani agbiatirani ni na fudifudiapai, na ki undo rani ani nimangi agu adiaberã duna tatamana. (Ruka 11:13) I anaaya ti Soromo a wee ko angia gu “Batungusipai” ‘nanaayugo inahe fu aboro.’ (Batu. 12:9, 10) Wangia Kristo Rii gu dungurati nga ga aKristano, ko nga batungusipai a, watadu badungura aboro. (Yo. 10:16; Koro. 1:18) Sidu tie, si naida ani naandu tipa adunguratise kindi, bambiko yo i ‘ayugopai’ ni furani.

16. Gini wiratise du dagba Soromo na Yesu?

¹⁶ Soromo angia gu bakindo nadu zaaza. Ko ambakadipai tipa sunge dudua abambu, agene, ki sasari agene-ime si naafu kurogo abaakporo, ki dudua abaakporo tipa igo-ahe, abaakporo tipa gako angbagidavura, na abaakporo tipa abandurii afarasi. (1 Aba. 9:17-19) Agu asunge re aundo gako aboro-ringara dunduko. Yesu nga kina badua bambu a. Ko adua kanisa watadu dungurati rii “mbia.” (Mt. 16:18) Ko nikaa ngerakurii sunge dudua arago a rogo vovo zegino.—Yes. 65:21, 22.

Ani Pekefuo Bakindo Zereda

17. (a) Ginipai nasa ga Soromo zogarago si dukia? (b) Gini apai Soromo aarengbanga ka mangaha ya?

¹⁷ Gu rimo nga Soromo aenge ti gu fugo Ebere du rogoyo nga “zereda.” Ga Bakindo Soromo mbatabakindo adu Yerusarema yo, nga gu rimo du rogoyo nga “Azereda Ue.” Ko azogorago tipa agarã 40, na gako zogarago aye na gu zereda naadunga mbata ya. Ziazia Kekeapai nagumbapa agu aregbo re niyaa: “AYudo ki nisungu zezeredi na aYisaraere, aboro dunduko ki nisungu tii gayo bakakue na tii gayo vurumo, tona Dana yo ki da kina ku Beta-saba yo, ti agu arago dunduko nangia ga Soromo.” (1 Aba. 4:25) Ono wa Soromo avurangia iratatamana, ko aadianga akaza kusayo na ingapai gbiati kpio te. Ono tipa Bakere Soromo nga Yesu, ko nika batasa avuruko be agi apai re dunduko.—Oni gedi ARomo 8:19-21.

18. Gini wenepai du berani rogo gu dungurati nga ga aKristano?

¹⁸ Zavura awere rogo gu dungurati nga ga aKristano, ani naraka araka rogo pazereda. Nirengo, ani naraka rogo gu paradizo nga ga toro. Zereda dagbarani na Mbori gbiati akuarani. Oni bingo wai Yesaya agumbapai ninebi tipa gu raka ani arakaha re. Ko ayaa: “I atá gayo abasape ni marã sopabino, na gayo abaso ni marã kuya ngua; rikaaboro amófa nga basape kuti gu rikaaboro te, i awírika nga pa sovura berewe a te.” (Yes. 2:3, 4) Ka ani mbu ga Mbori toro si ningbe furani mbatayo, si nika sa gupai nga ani naaraka rogo pazereda.

19, 20. Gini nduapai du berani tipa ka ngbiko ningbarago?

¹⁹ Ono tie, agu apai nika manga kumbatayo, si ngbaki kisusi. Wa aboro-giasangba nikaa raka rogo pazereda ti regbo ga Yesu zogarago, ko nikaa kusa goyo tooni tooni be “du ni ga zirã kanga,” daho i nika da ni nirengberengbe aboro. (Rom. 8:21) Fuo susa bayee aboro rogo yangara asada ti digido gu ga Yesu zogarago nikadu tipa agarã kutu, i nika ‘día kumbo ringara, kidu na ngbarago tipa gu wenepia nikadu kpaima.’ (Tam. 37:11; Yugo. 20:7-10) Nirengo, ga Kristo zogarago nika ngba kisusi ga Soromo ngba gu gene ani arengbanga ka ino kpiaha ya!

²⁰ A wa aYisaraere aduna wene ndupai beyo kaa ngbiko ningbarago ti agu aregbo Moize, Davide, na Soromo angbe fuyó mbatayo, ani nikadu na wene nduapai berani wakina gure kaa ngbiko ningbarago ti regbo ga Kristo zogarago. (1 Aba. 8:66) Ani nafu tambuahe fu Yekova tipa kedako bangisa Wiriko furani, nga Bakere Moize, Bakere Davide, na Bakere Soromo!

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Wai du Yesu ni Bakere Davide?

• Wai du Yesu ni Bakere Soromo?

• Gini apai ngba tironi gbe nibipa Bakere Davide, nga Bakere Soromo a?

[Gu kpiahe du ti kpewaraga 31]

Gu tatamana Mbori afuhe fu Soromo, si ayugukpia gu nga ga Bakere Soromo

[Gu kpiahe du ti kpewaraga 32]

Ga Kristo zogarago nika ngba kisusi ga Soromo ngba gu gene ani arengbanga ka ino kpiaha ya!