Oni Gbata Ga Yekova Maku Kakaka
“[Mbori] nafu mosoro fu agu yo nagbata ko.”—EB. 11:6.
1, 2. (a) Wai dungu aboro agbata ga Mbori maku? (b) Tipagine si aida ti ni ani gbia ga Yekova maku agbia?
“MBORI fu maku foro!” Rogo kura arago, gure nga gupai dungu aboro naagumbaha ho boro akpisio ni, ka si vura du nga i aabingo gu boro kpisio re mbata te. Abarumbatayo nga ga kura apambori yó naafu maku fu aboro, fu anyaa, na fu agu ahe adunga na unga rogoho ya. Gu kura aboro naandu kurogo agu aba nga ga irisombori tipa ka gbia maku yo. Aboro birĩ-zogarago naasana Mbori ko fu maku kurii gayó ringara. Ya mo oni naberãha nga ngbatunga agu asanahe tipa maku re daada? Ya mo Mbori nakaragapai sa ngbatunga agu asanahe re? Gini ngbatunga boro nzunzu nagbia ga Mbori maku, na tipagine?
2 Yekova ayawee rogo yangara arame, ko nikadu na gigiri aboro beko nga aboro zereda dagba arikaaboro dunduko, nika tungusa gu wene pangbanga nga ga Kindo ki da digido kpotosende yo aboro ki vura nisogoyo vurũ. (Yes. 2:2-4; Mt. 24:14; Yugo. 7:9, 14) Agurani idi kadu dagba agi aboro re, ani naida ga Mbori maku aida bambiko ka si adunga ya, ani rengbenga kadu na diabese te. (Tam. 127:1) Ono wai rengbe ani ka gbia ga Mbori maku?
Amaku Nadusia Aboro Giasangbaa
3. Si adu nga ka aYisaraere duna giasangbaa, sangbanaha ngia gine?
3 Oni gedi Asanza 10:6, 7. Ho gu rikaaboro nangia aYisaraere ambedi ni ka rimo kurogo Ringara Mokido, Yekova ayawee bakere zugo gbiati bandahe i nika gbiaha ka i agiasangbako. (Pa Rug. 28:1, 2) Si adu nga ga Yekova amaku nika “dusia” yó adusia, angianga ka ye kungbo ye ya. Si adu nga agu amaku re duwa ka si ye kuriyó.
4. Ginipai ndikidi giasangba Mbori akodaha?
4 Si aidi aYisaraere gisangba Mbori na gini berã? Ga Mbori Ndiko ayawee rago angbanga tiko te ka gako aboro airisongo ko ‘na kpotoyo yo pusiapusia ya.’ (Oni gedi Pa Fu Rugute ni Ue he 28:45-47.) Yekova aidanga na gu ngbatunga giasangbaa rengbe anyaa arengba watadu adaimona ka mangaha te. (Mk. 1:27; Yak. 3:3) Si naida ani gisangba Yekova mbiko nyemuko du tirani. Si naida ani tagiasangbako ani kidu na ngbarago mbiko ani idi kuti gupai nga gako arugute asusanga omerani te na “ko nafu mosoro [afu] fu agu yo nagbata ko.”—Eb. 11:6; 1 Yo. 5:3.
5. Wai padu boro naa kido kuti ga Yekova kidohe arengbe ka sa ní ní irisi gu ndiko du rogo Pa Fu Rugute ni Ue he 15:7, 8?
5 Oni bingo wai gu giasangbaa duna kido adu niyuguyuguhe ho boro anaairisa gu ndiko ni du rogo Pa Fu Rugute ni Ue he 15:7, 8. (Oni gedihe.) Ka si du nga aboro airisi gu ndiko re ono angianga na ngbaduyó yo dũ ya, ka si asa gupai asa nga rungorungo aboro gbia undo, ono ya mo ka si asa gupai nga ga Mbori aboro du na wene pagume dagbayó na akurayó? Ya mo ka si ayugu gupai nga boro na idapase kuti gupai nga Yekova rengbe arengba ka fu ahe fu gako amoyambu na ní na ngbarago tipa Yekova mangisunge na ní ka fuhe fu gako amoyambu? Wagusa te! Mbori anaabi boro ngbaduniyo ka ino singia ní na nyemu ka gamahe, na ko akidohe ki yawee ko nika fu maku afu kurii gani mangaapai dunduko. (Pa Rug. 15:10) Si aidi idapase kuti gu kidohe re sa boro ní mangipai na ki gbia badungu amaku.—Snz. 28:20.
6. AEbere 11:6 nafu gini kido furani?
6 Kurii gupai nga boro duna idapase kuti Yekova nigu boro nafu mosoro fu aboro, AEbere 11:6 nagumbapa kurapai si aida boro mangihe tipa ka gbia ga Mbori maku. A wa gu veresi re agumbaha, Yekova nafu mosoro fu agu aboro nagbata ko. Gu fugo Giriki i asaha ane re nga ‘gbata,’ si nayugopa gbata he kakaka. Ka ani agbata Mbori kakaka, ani henga gbia maku te! Ndikidi Mbori “arengba nga na re zire” te. (Tito 1:2) Ko ima yugo gupai tipa dungu akutu agarã nga, gupai ko agumbaha, si duwa ka si mangi. Sangbako ahenga manga te. (Yes. 55:11) Si naida ani duna gu nyanyaki kido nga, ka ani duna ndikidi idapase, ko fu mosoro afu furani.
7. Wai rengbe ani ka gbia ga Mbori maku mbiko ‘ngbatunga’ Abarayama?
7 Yesu Kristo nangia bambata papara ‘ngbatunga’ Abarayama. Mbedimbedi aKristano nga ue papara ngbatunga Abarayama. Mbori naruga yó i ‘yugu gu wene sino gbayaga nga ga gu ko nayambu yó bitimo yo kurogo gako iiriwo imarago yo.’ (Gara. 3:7-9, 14, 16, 26-29; 1 Pet. 2:9) Ani arengbanga kadu na wene pagume dagbarani na Yekova te ka ani abasapa agu aboro abasa Yesu namoi yó i naangerafuo gako ahe. Ka ‘ruru kangara moyambu’ naaundongo rani ya, ka ani rugunga tirani wenengai na agu apai ani agedaha rogo Ziazia Kekeapai te, na ka ani iningo wai ka mangasunge nani te. (Mt. 24:45-47) Ka ani amanga agu apai ani awirikaha rogo Ziazia Kekeapai, ani gbia ga Mbori maku agbia.
Oni Naaberãpa Manga Gupai Mbori Akpinyemuhe
8, 9. Wai Yakobo amangipai ringbisihe kuti ga Mbori ringbisapai?
8 Ka ani berẽkurii gupai Yakobo amangihe, si nika undo rani ani asaditirani aʹasada kakaka tipa ka gbia ga Mbori maku. Yakobo aainongo wai gu mozunga Mbori amangihe na Abarayama nika manga te, ono ko aima ida kuti gupai nga Yekova nika ngeesa ngbatunga Abarayama angeesa i ki da nibakere rikaaboro. Si ki tadu were, rogo gu garã nangia 1781 M.B.K., Yakobo andu ku Arana yo tipa ka gbata dee. Anga ko agbata gu kungbo dee nikadu niwene ri te; ono ko agbata gu dee nangia irisi Yekova nga guri nikadu niwene naagude.
9 Yakobo andu ki bi Raere nangia wiri andoko. Ko akpinyemuri na ki idi ka mangasunge fu bari nangia Rabana tipa agarã saba tipa ka diari nidiako. Anga kungbo pangbanga nga ga nyemuse du gbua nangia gipai re te. Yakobo aima inopa gu mozunga Mbori Duna Tanduapai Dũ amangihe fu titako nangia Abarayama na ki gumbaha berewe fu bako nangia Yisaka. (Bam. P. 18:18; 22:17, 18; 26:3-5, 24, 25) Yisaka aya fu Yakoba a wee: “Mbori du na tandu apai dũ, ko fú maku foro, ki nizugasi ro, ki ngeesi ro, ya mo du ni rimbasa ngbatunga aboro. Ko fú gu maku foro a nga ga Abarayama, foro na fu ngbatungaro a, ya mo di gu ringara ni gamo du mo rogo ho ni nungunungu boro nga gu Mbori afu fu Abarayama!” (Bam. P. 28:3, 4) Sidu, gu asadatise Yakobo amangihe ka gbia ruru dee na ki vungu agude ayugupa gako kido kuti gupai Yekova apehe.
10. Tipagine Yekova aduadu ti ni na ngbarago ka fu maku fu Yakobo ringbisihe kuti gako zungodihe?
10 Yakobo aagbatanga kumuko tipa kpuko te. Gupai ko aaberãpaha gbe nga pa gako ũkumbo. Ko aaberãpa gupai Mbori akpinyemuhe. Ko aʹasadi ka manga agu apai dunduko omeko arengbe nani tipa ka gbia ga Mbori maku kpakaraapai ki vura du vurũ. Ko aamanga gipai re kindi zavura ho ko agbinza ni, na Yekova aima fu maku fuko mbiko mangako ho wo.—Oni gedi Bambata Pai 32:24-29.
11. Gini asadatise si aida ani mangihe ringbisihe kuti gupai Mbori nayuguhe furani?
11 A wa Yakobo adu, ani ainongo apai dunduko na afutufutuhe tipa ga Yekova ringbisapai te. Ono wa vura duhe wo, ho ani awisigo Fugo Mbori ni, ani naino agu apai aino nika manga rogo “ga Yekova uru.” (2 Pet. 3:10, 17) Nikpiapai, ani ainongo gu regbo nzunzu gu uru re nika ye te, ono gupai ini ani he nga si ima mbeda. Ani ima ida kuti gu sangba Ziazia Kekeapai nga, ka ani mangi dezirepai sirisiri vuru gi wiri regbo nye koyo re, ani batasi tirani abatasa na agu aboro ka gipai ku ngbarani.—1 Tim. 4:16.
12. Ginipai si aida ani duna kido tipaha?
12 Ani ini gupai nga digida rago rengbe ka da ti ai regbo; Yekova asungudongo rani asungudo mbata ani mangi dezirepai fu ai boro auru kpotosende te. (Mt. 10:23) Na ani nagbia wene arugute tipa wai ka mangasunge tungusapai wenengai. Ani namanga gi sunge re wenengai gbe niʹidapase, kini mangisunge na agu aũsunge duho berani. Nirengo, ani arengbanga ka ino bange agu aboro nika ida na wene pangbanga rogo gu rago ani atungusapai rogoho te. (Oni gedi Batungusipai 11:5, 6.) Gaani sunge nga ka tungusapai, kidu naa kido nga Yekova nika fu gako maku afu. (1 Kor. 3:6, 7) Si naida ani duna gu kido nga, ko nabi gu asadatise abi ani amangaha, na ko nika undo rani aundo na gako ziazia toro ho ka ani aida undo ni.—Tam. 32:8.
Gbata Ziazia Toro
13, 14. Wai ziazia toro aundo ga Mbori amoyambu i rengbe ka mangasunge?
13 Na ka ani bi tirani nga ani arengbanga ka manga gu sunge fuuyó ho furani te watadu ka tungusapai te? Ka si duwo, si naida ani sana Yekova ko fu gako ziazia toro si kiisi gu tatamana nga ga sunge du ani nani. (Oni gedi Ruka 11:13.) Ga Mbori toro rengbe arengba ka sa aboro i rẽ tipa sunge ka si vura du nga apai adu tipa yó mbata wai vurũ. Nikpiapai, nibasa fuo kura aYisaraere Ezipeta yo, ga Mbori toro aundo ababanda anyaa na akanga i dibe avurayo wa si avura du nga i aasonga vura mbata te. (Gate 17:8-13) Fuo gure ngbutuko, ga Mbori toro aundo aBesarere na Oriaba i ini mbakada ahe berewe gbe, tipa i mbakadi banye a wa Mbori aringbisihe.—Gate 31:2-6; 35:30-35.
14 Ziazia toro aundo gu ga Mbori amoyambu du awere i mangi agu asunge nga ga riigbu ho si aidi ni i tona ka kusa awaraga. Robert J. Martin naangerakurii ba kusa awaraga ti gu regbo re apepa gu sunge i amangihe mbata fu 1927 ki yaa: “Gbia azaki ngbadimo ti kina boro wene regbo; bakere makana kusa awaraga ki da ku berani, nga agurani naainongo wai i ambakadihe na wai si amangasunge ya. Ono Gbia ima ino wai ka fu tatamana ku berã aboro yo nga aguyo naida ka mangasunge fuko na omeyo dũ. . . . Fuo wiri bete aposo gbua, ani asa gu makana kusa awaraga re si nimangisunge; na si namanga sunge a kindi, nga agu asunge abamangihe aainongo nga si amangaha ya.” Yekova nafu maku kindi kurii gu asadatise aboro amangaha wa gure.
15. Wai rengbe ARomo 8:11 ka ngarasa agu aboro du rogo asada?
15 Ga Yekova toro namangasunge ngba dungu agene. Gu toro re ho tipa aboro dunduko, na si naundo yó i dibe agu apai naba kina gunde tiyo. Na ka ani bi tirani nga ome asada ima fu rirani, ani rengbe ka gbia ngara be gupai Pauro apehe du nikekehe rogo ARomo 7:21, 25 na 8:11. “Ga Mbori Toro nazingisi Yesu dagba akangba” rengbe arengbe ka mangasunge ku barani, ki fu ome furani ani dibe gu asada du ani rogoho. Pauro ake gupai re fu mbedimbedi aKristano, ono gupai re si tipa ga Mbori amoyambu a dũ. Ani dunduko nika gbia unga mbiko du ani na idapase kuti Kristo, mbiko asada ani tirani nyanyaki ka imo gbegberẽ nyemuapai, na mbiko raka ani ringbisihe kuti gu rugapai nga ga toro.
16. Gini apai si aida ani mangihe tipa ka gbia ga Mbori ziazia toro?
16 Ya mo Mbori rengbe ka fu gako toro furani zanga ani mangi wiripai amanga tipa ka gbiaha? Wagusa te. Si naida ani kpari akpara tipaha, na kini ri gu riahe nga ga toro wenengai nga gudu rogo Fugo Mbori yo. (Snz. 2:1-6) Kurigure, ga Mbori toro du rii gu dungurati nga ga aKristano. Pa ndu ani tipa adunguratise ti aregbo dũ nayugo gupai nga ani na nyemu ka ‘gia gupai Toro agumbaha fu akanisa.’ (Yugo. 3:6) Kurigure, si naida ani mangipai kuti gupai ani awirikaha. Asanza 1:23 naruga rani kini yaa: “Oni sá tironi ka gia gi zapai; oni ngére, mi aúka torore ku ri roni.” Nirengo, Mbori nafu ziazia toro “fu agu yo nagia sangbako.”—Amo. 5:32.
17. Ani rengbe na ringbisa sangbana ga Mbori maku kuti gine?
17 Wa vura duhe nga kakaka asadatise du si aidaha tipa ka gbia ga Mbori maku, si naida ani tingidi gupai nga, gu badungu bawene apai Yekova namangihe fu gako aboro, anga si mbiko kina gu asadatise i amangaha te. Ani rengbe na ringbisapa sangbana gako maku kuti wai kpotorani agbia undo be gu riahe ani arihe. Mbori amangi rani ani naagbia ngbarago be riahe na kpotorani kidu wenengai behe. Ko nafu riahe a furani. Ani ainongo wai nzunzu riahe agbia agu ahe du rogoho naundo kpoto boro te, na ani ainongo wai a kpotorani amangasunge na gu riahe ani arihe te. Gupai ani nainihe gbua nga agu apai re namanga amanga na si naida ani rihe ari tipa si mangi. Ka ani ari gu riahe duni wenehe gbe tipa kpotoboro, sangbanaha du niwenehe a gbe. Wakina gure a, Yekova ima gumba agu apai furani si aida ani mangihe tipa ka gbia nyenye unga, na ko naundo rani aundo ani mangi agu apai re. Ko nzunzu namanga bakere sunge, na ko si aida ani tambuako. Ono si naida ani mangipai amanga ringbisihe kuti gupai ko akpinyemuhe tipa ka gbia gu maku re.—Agai 2:18, 19.
18. Ginipai oni nadiberã tipaha, na tipagine?
18 Oni fu tironi ka manga ai gu sunge i afuhe furoni. Oni ngere kube Yekova tipa kadu na diabese. (Mk. 11:23, 24) Oni duna gu kido nga, “gu ni nagbata he ni abí he abi.” (Mt. 7:8) Agu aboro du nimbedimbediyo nitoro, i nika fu “kpakpari unga” fuyó ngbangbaturũ yo. (Yak. 1:12) Ga Kristo “kura akandoro,” nga aguyo namanga asadatise nyanyakii ka gbia maku vurube gu tunga nga ga Abarayama nikadu na ngbarago ka gia gu fugo nga: “Ga Buba aboro maku oni yé, oni dí kumbo gu ngbi du ni mbakadimbakadi he tipa roni ho rago aenge ni da awere.” (Yo. 10:16; Mt. 25:34) Ii, “agu yo Yekova afu maku fu yo i adía kumbo ringara, . . . ki nye anye kindi.”—Tam. 37:22, 29.
[Gu kpiahe du ti kpewaraga 12]
Yakobo ata kpata na maraika tipa ka gbia ga Yekova maku.
[Gu kpiahe du ti kpewaraga 12]
Ya mo oni namanga asadatise kakaka wa gure?
[Gu kpiahe du ti kpewaraga 13]
Ga Mbori ziazia toro aundo aBesarere na Oriaba i ini mbakada ahe berewe gbe
[Gu kpiahe du ti kpewaraga 14]
Oni Rengbe ka Sakarogoyo?
• Ginipai ndikidi giasangbaa akodaha?
• Ginipai si aida boro mangihe tipa ka gbia maku?
• Wai rengbe ani ka gbia ga Mbori ziazia toro, na wai rengbehe ka mangasunge kuba rani?