Bambatapai Mo

Bambatapai Mo Kpinyemu Aboro, Angianga Marã na Aũkumuko Ya

GINIPAI ZIAZIA KEKEAPAI AYUGOHO TIPA GIPAI RE? “Nyemu marã nga tarã ngbatunga gbegberẽapai dũ.”—1 Timoteo. 6:10.

GINIPAI DUHE TI NI NIMBUMBUHE? Abatakipande gu vovo ahe nakura nasosoda rani ka ani rengbenga be kina agu ahe du berani ya. Gupai i aidaha nga ani mangisunge wa akanga tipa ka gbia marã tipa ka ngbe vovo ahe, wene ahe, watadu bakere ahe. Marã nga guhe nazomia boro azomia, na si nitaatapai ani kpinyemu marã. Ono tie, gu boro nakpinyemu kumuko, ní arengbanga behe te. Ziazia Kekeapai nayaa: “Gu ni nakpi nyemu marã, marã anyasa nga gani nyemuhe te; watadu gu ni nakpai nyemu badungu ahe na mokiisa ku ri he.”—Batungusipai 5:10.

GINIPAI RENGBE MO KA MANGAHA? Mo wiriki Yesu nakpinyemu aboro susi ahe. Yesu aima ida ka mbu agu ahe nadu beko dunduko, zavura gako unga, mbiko gako nyemuse tipa aboro. (Yoane 15:13) Ko ayaa: “Fu he ngba ti dia ha.” (Amokedi 20:35) Ka ani moihe nisino rani kaa fu gaani ahe watadu gaani regbo fu akurani, kina gu bangisapai re aboro nikaa mangaha furani a. Yesu ayaa: “Oni fu he, i ki fu he furoni.” (Ruka 6:38) Agu aboro naorafuo marã na ahe nagbiatiyo na fudifudiapai na arungo. (1 Timoteo 6:9, 10) Tipa boro rengbe be kina guhe du beni, si naida ní nikpinyemu aboro na aboro kini kpinyemuni a.

Si ngbaangba oni wisigipa wai rengbe oni ka sa gaoni raka si du taata. Ya mo oni rengbe ka zogosa bete agu ahe du beroni watadu gu oni aida ka gbiaha? Ka oni mangihe wo, oni kadu na bakere regbo na bakere ome tipa gupai nyakipaha rogo raka yo, nga undo aboro, na kini irisi Mbori nga gu ko nafu agu ahe dunduko du beroni.—Matayo 6:24; Amokedi 17:28.

[Gu kpiahe du ti kpewaraga 4]

“Oni fu he, i ki fu he furoni”