Aboro Abi Kpia agu Apai Du Ariyo

KA ONI vura ngera angera wai vurũ ku ariyo, oni abingo aboro yo nga atoro te. Na ka oni vura degaturani, oni agianga fugo yo te. Ono wa vura duhe wo, oni rengbe arengba kadu naa kido nga i kinaho. Agu aboro nga atoro watadu amaraika na bakere ome tiyo na arimoyo nibakiakia na asinoyo a nibakiakia. Aguyo kinaho naundo rani aundo, na aguyo kinaho naida ka manga rani gbegberẽe.

Ndikidi Mbori nitiko nga Toro. (Yoane 4:24) Rimoko kina ti ni nakpara ko ti kura kungbo ambori dunduko. Gu rimoko re nga Yekova. (Atambuahe 83:18) Bake apapara Atambuahe akepai ki yaa: “Yekova nga bahe, rengbe na tambua ko bakere gbe; i ka gunde ti ko susi ambori dunduko. Bambiko ga aboro ambori dunduko nga kina kungba ahe; ono Yekova namangi angbangbaturũ.”—Atambuahe 96:4-6.

Kpia Ndikidi Mbori

Ziazia Kekeapai nayawee “a nga boro sa nabi Mbori wa sa te.” (Yoane 1:18) Ka ani ruganga tirani na pako na gako taarimo te, a wa gu boro i avunguni na vurari arengbanga ka ino wai du rangi kpoto he ya. Ono a wa wene bayugupai naasakarogo kpakarakpakaraapai yo fu agude sukuru ngba gu gene rengbeyó arengba ka giarogoyo, kinawo a Mbori amangasunge na agu ahe ani abihe abi tipa ka sakarogopaiyo furani tipa agu ahe ani arengbanga ka bihe ya. Yekova afu ayuguyugupai fu bete gu ruru aboro nadumbata tipa i ini wai du apai ngbangbaturũ yo na wai du agu aboro du yó kia tirani.

Nikpiapai, Yezekere abi ga Yekova taarimo si kidu wa we, imaima imarago, gu mbia nga safira, na wangu. Rogo gu kura yuguyugupai, gu mokedi nangia Yoane abi Yekova ko nasungu rii mbatabakindo ngbanya ko kidu wa “gu mbia nga yasipi na sadio. Wangu adu kengerekengere pati mbatabakindo, si adu bangirise wa kina [gu mbia nga] zumeradi.” Gu ringbisapa Yekova re nayugo gupai nga ko kia, na ko ima ngba kisusi.—Yugoti 4:2, 3; Yezekere 1:26-28.

Gu nebi nangia Daniere abi Yekova a rogo yuguyugupai yo, “[amaraika] wa kutu bawe bara kutu bawe ki ru bara bangiriko.” (Daniere 7:10) Iriwo gupai re aima ti ti Daniere gbe! Ka boro bi kandara maraika sa, iriwo apai naima ti tiní gbe, ono oni berẽnga pa bi amaraika kutu bawe bara kutu bawe!

I gumbapa amaraika wa bara 400 rogo Ziazia Kekeapai, na i na arikayo ue nga aserafa na akeruba. Gu fugo Ebere na Giriki i asaha nga “maraika,” rogoyo nga “bamokedi.” Sidu, amaraika nafura afura dagbayó, na mbata kusayo, i anaafura afura na aboro. Ono anga amaraika nga aboro naraki araka mbata auru kpotosende i kini ru ka ga ku ngbangbaturũ yo te. Yekova akusi amaraika bakuru kusayo mbata fu kusa ko boro.—Eyobo 38:4-7.

Rogo gu yuguyugupai Daniere abihe, amaraika adunguratiyo ka bi baiiriwopai. Daniere abi ‘boro wa wiri boro’ ko nandu koyo du ga Yekova mbatabakindo ni, Yekova ki “aasia pa zogarago fu ko na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko.” (Daniere 7:13, 14) Gu “wiri boro” re na nyanyakipa bangiriba beko ariyo, na ko nga Yesu Kristo, nga guko i naʹasiapa zoga kpotosende fuko dunduko. Gako zogarago ima mbeda ka diaba agu azogarago nga ga aboro dunduko, na si nika digiso akaza, arungo, afuda, na kpio.—Daniere 2:44.

Zanga kapa, pa maa yó Yesu rii mbatabakindo aima fu bakere ngbarago fu gu badungu ruru amaraika du ngbangbaturũ yo, nga aguyo naida wenepai mangi fu aboro. Ono tie, anga amaraika dunduko rago angba tiyo nani te.

Agu Amaraika Nga Avura Mbori na Aboro

Tona ti kina gu regbo Yekova akusi aboro, kura maraika sa aduna nyemu gupai nga aboro niirisiko, ko ki samungu kuti Yekova ki sa tiko ni Satana, du rogoyo nga “gu boro nasovura kuti kurani.” Satana nga bambata gbegberẽ boro, na ko kia naabako ti Yekova, duna nyemuse kisusi. Gu kura amaraika angbe na Satana rogo gako samungu, na Ziazia Kekeapai nayambayo nga adaimona. Adaimona namanga aboro gbegberẽe wakina Satana a. Badungu agu arungo du auru kpotosende areme, wa agu nga iraira sarangbanga, akaza, rungo, gbiati avura naye be kina gayó mangaapai.

Wa vura duhe nga dungu akanisa afuranga berewe gbe tipa Satana wa gu naanidu mbata te, gu kitabu nga Eyobo naundo rani ani rugutirani gbe na gu ngbatunga boro nga Satana na gupai ko akpinyemuhe. Si nayaa: “Ni gu uru ho awiri Mbori aye ni ku bara bangiri Yekova, Satana ki ye a tigako ku dagba yo.” Yekova atona fugo na Satana, Satana ki kitingbaanga Eyobo ki yawee ko nairiso Mbori mbiko kina gu wene apai ko agbiaha be Mbori. Satana aye na bakere gberãngbi kurii Eyobo, nga ka imo gako anyaa na awiriko nadu bawe. Fuo gure, Satana aye na kere kaza kuti Eyobo nga gu nadadi kpotoko dunduko. Satana amangi agi apai re mbiko ko aidi ka sa Eyobo ko mbu Yekova. Ono tie, Eyobo anye kindi niruruko.—Eyobo 1:6-19; 2:7.

Wene nduapai kinaho Yekova ambu Satana ti ni ko naaima tipa gbanga regbo wa gere, na ko ahenga ko ahe kindi te. Fuo regbo ngbutuko, ko nika nyasariipako kusayo. Gupai i naima mangaha awere nga, i aima do Satana ngbangbaturũ yo na adaimona. Ani naino gipai re rogo gu kitabu du rogo Ziazia Kekeapai nga Yugoti. Ani nageda gupai yo nga: “Vura ki du ngbangbaturũ yo, Mikaere na gako amaraika ki so vura na daragona; daragona ki niso vura na gako amaraika a; ka daragona adia nga be he ya. Ka i aida nga fu daragona na gako amaraika i bi ba berewe ngbangbaturũ yo ya. Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.”—Yugoti 12:7-9.

Oni bingo gupai gumbayo ho nga Satana nga “banangi aboro kpotosende yo dunduko.” Ko nananga aboro na agu azire yugopai nga ga apambori tipa ka gbe aboro kusayo ti Yekova. Ziree sa ko ayugoho nga, ho boro akpi ni, ní naga gu baatoro kpikpi aboro yo. Badungu aberãpai duho tipa gipai re. Nikpiapai, rogo Afirika na Asia, badungu aboro idi kuti gupai nga, ho boro akpi ni, ní naga koyo du atoro atitani ni. Gu kura yugopai berewe nasa aboro i naaberãha nga boro naraka araka fuo kpioni, si nga gu yugopai du tipa paragotorio na iferno.

Ya Mo Boro Nakpi Kini Ga Ku Ngbangbaturũ Yo?

Na gu berãpai tigaha du badungu amirioni aboro nani auru kpotosende dunduko nga, ruru aboro nakpi kini ga ku ngbangbaturũ yo? Kina rengo du nga bete aboro kinaho naga ku ngbangbaturũ yo, ono bangeyo gbua nikina wiri tooni he ka ani ringbisihe na bange gu badungu aboro kpiki. Ziazia Kekeapai nayugo gupai nga aboro 144,000 i nika ‘tumoyo rogo kpotosende’ i ndu ku ngbangbaturũ yo kadu ni “aboromotumo” na “abakindo” kini zogorago ku auru kpotosende. (Yugoti 5:9, 10; 14:1, 3) I nika zogarago na Yesu Kristo rogo gu Kindo nga ga ngbangbaturũ. Gu kindo re nika nyasariipa Satana na gako adaimona na ki sa kpotosende niparadizo. Agu aboro naima kpiko, i nika zingisayo azingisa bekpio i raki nyeanye kindi ka i amanga gupai Mbori akpinyemuhe.—Ruka 23:43.

Sidu, ani bi gupai nga badungu aboro naraka ariyo. Guni kii pani gbe dagbayó nga Yekova Mbori, nga Bakusi ungaahe dunduko. Badungu akutu amaraika namangasunge fuko. Satana gbiati gu kura amaraika asamungu kuti Yekova na i namanga aboro areme gbegberẽe. Kurigure, i sia wiri bete aboro auru kpotosende i ndu ka mangasunge ngbangbaturũ yo. Awere tie, ani wisigingo pai tipa gu boro si aida ani idi ka fura na ní ku ariyo, na wai rengbe ani ka mangaha.