Samungu Ngbangbaturũ Yo

Agu amaraika Yekova akusiyo dunduko adu ni kina weneyo. Ono kura maraika sa aye ka sa tiko ni gbegberẽ ko. Ko nga Satana Bakitingbanga. Satana adu na nyemu gupai nga agu aboro du auru kpotosende niirisiko kuba irisoyo Yekova. Mo bingo gupai namangi:

Rogo gu ati nangia Edene, badungu angua naadu yo nanaakusa wene zuzuhe. Yekova aya fu Adamu na diako nangia Eva wẽ i niri zuzu agu angua re a wa i akpinyemuhe. Ono ngua adu yo sa Mbori aya fuyo ka i ringa zuzuhe ya. Ko aya wẽ ka i ri zuzuhe, i nakpi kindi.​—Bambata Pai 2:​9, 16, 17.

Rogo kura uru sa, woo andu ki fura na Eva ti gu regbo ri adu nisari. Ono anga ndikidi woo naadu te; Satana Bakitingbanga du nafura rogo woo yo si kidu wa u du nafura. Satana aya fu Eva wẽ ka ri ri gu zuzungua Mbori aya ka i ringa ha ya, ri nika du ni iratatamana wakina Mbori. Ko aya a wẽ ri akpingo te. Agu apai ko apehe re dunduko angia ziree. Ono Eva aima ida kuti gupai Satana apehe re ri ki ri gu zuzungua re. Kusa, ri afuhe fu Adamu, ko ki rihe a.​—Bambata Pai 3:​1-6.

Gi pangbanga re nayugo gupai nga Satana nga basamungu na iraziree. Ko aya fu Eva wẽ ka ri basasangba Mbori, ri kpingo te. Ziree du naadu. Ri na kumbari aima kpi. Satana aakpingo tigako te, ono ko nika kpi akpi kumbatayo bambiko ko amangi ingapai. Ono wa du rago re, ko nananga aboro kindi. Ko nga iraziree, na ko naˈasada kaa sa aboro i nikuo ga Mbori andiko.​—Yoane 8:44.

Kura Amaraika Asamungu

Kusa, kura amaraika asatiyo ni gbegberẽyo a. Agu amaraika re angere ku sende no ki bi bawene adee i kini idi ka ye ka kodaba na yo. I aye ku sende no ki di kpoto aboro kutiyo ki du ni akumba. I ki rogodi adee tipa tiyo a wa i akpinyemuhe. Gere aadunga kuti gupai Mbori ambakadi amaraika tipaha te.​—Bambata Pai 6:​1, 2; Yuda 6.

Gipai re aima ye na bakere rungo fu aboro. Agu adee agi amaraika arogoyo re avungu agude, ono ami aadunga wa agu agude aboro naavunga ra te. Ami asono ki da ni diangbadiangba aboro kini mangi aboro gbegberẽ. Kpotosende aye ki hi dunduko be pa zuu si ki sa gupai nga Yekova diberã ka imo gbegberẽ aboro dunduko na bakere mai. Agu aboro nabati angia kina gu ruru kumba nangia Noa na gako aborokporo.​—Bambata Pai 6:​4, 11; 7:23.

Ono gu gbegberẽ amaraika re aakpingo te; i aima ga ku ariyo. Ono Mbori aima fu mbusa fuyo. Ko aaidanga i ga berewe kadu dagba gako ruru amaraika te. Kurigure, Mbori aambunga yo berewe i di kpoto aboro kutiyo te. Na gupai nasungudo yo awere nga ga Mbori sapangbanga na kpio.​—2 Petero 2:4; Yuda 6.

I Ado Satana Ngbangbaturũ Yo

Rogo gu garã nangia 1914, vura amangi ngbangbaturũ yo. Gu kitabu nga Yugoti nasakapaha niya: “Vura ki du ngbangbaturũ yo, Mikaere [nga Yesu] na gako [ruru] amaraika ki so vura na daragona [nga Satana]; daragona ki niso vura na gako [gbegberẽ] amaraika a; ka daragona adia nga be he ya. Ka i aida nga fu daragona na gako amaraika i bi ba berewe ngbangbaturũ yo ya. Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.”

Sangbana gupai re angia gine? Gu pangbanga re nandu kumbatayo niya: “Ako angbangbaturũ, si du ka oni ngi angi ti ni, na agu roni naraka rogo ho.” Ruru amaraika arengbe kaa ngi mbiko Satana na gako gbegberẽ amaraika berewe ngbangbaturũ yo te. Na ginipai du tipa kpotosende? Baibiri nakaragapai niya: “Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”​—Yugoti 12:​7-9, 12.

Nirengo, Satana na gako gbegberẽ amaraika nananga aboro na kini ye na bakere rungo ku auru kpotosende. I nayamba gi gbegberẽ amaraika re nga adaimona. I nga avura Mbori. I dunduko du ni gbigbita yo.