Ka Ani Bingo Pa Iriso Yekova Taata Ya

“Agu apai rengbe na irisa, . . . oni bérẽ pa agi apai re.”​—FRP. 4:8.

1, 2. Gine nasa aboro rogo gi zegino re i naabi raka taata, na gini asanahe si akusaha?

ANI naraka rogo gu zegino nga gu duni kpakarakpakaraha kisusi wai si anidumbata. Agu aboro adunga na wene pagume dagbayó na Mbori ya, si fuyó nikpakarakpakaraha gbe i hipai ti gi “gbegberẽ rago” ani araka ti ni re. (2 Tim. 3:1-5) Boro ho ka i kido kuti ní te, sidu, i nakido kina kuti tiyo, ono ka si adunga na wene sangbanaha gbe ya. Kuba gupai nga i naaberã aberã gbe kuriipa raka, dunguyo nafutiyo sa agu apai nga ga wasa rogo gi zegino re tipa wa ka i abi raka taata.

² Dungu aboro naperesa nyemu ngbarago mbatayo fu apai dũ tipa wa ka i agbia zereda be gu fuda du yó nani. Ka aKristano adunga na rugatise ya, i rengbe arengba ka tona gu ngbatunga raka re. Wai rengbe ani ka ne gupai re? Ya mo si naida ani naabi apai nyanyakii ti aregbo dũ? Wai rengbe boro ka fu tiní sa gani sunge ono ní kini gbia regbo wasa agbia a? Gini abangua rugute nga ga Ziazia Kekeapai si aida si ngbe furani mbatayo tipa wa ka ani aberãpa raka aberã ono angianga kisusi ome ya?

Zanga Biapai Taata Rogo gi Zegino Re

3, 4. Wai Ziazia Kekeapai aundo rani ani ini wai nyakipa zanga biapai taata?

³ Si nibinibangirise nga gi zegino re nanyakasapa “nyemu sangba borose” anyakasa kisusi. (2 Tim. 3:4) Gu gene si anyakasapa agu apai nga ga wasa ngbaha rengbe arengba ka gberesapa boro rogo toro yo. (Snz. 21:17) Si tie du, agu awaraga Pauro akehe fu Timoteo na Tito aduna rugute rogoho nibipa zanga biapai taata. Pa irisa ani gu rugute re nika undo rani ka ani dunga na gu sino du zegino nani nga ga biapai taata ya.​—Oni gedi 1 Timoteo 2:1, 2; Tito 2:2-8.

⁴ Dungu akama agarã kusayo mbata fu ke Pauro agu awaraga re, Soromo akepai tipa pa mbu agu apai nga ga wasa tipa ka berã kurii raka nyanyakii. (Batu. 3:4; 7:2-4) Wa duhe nga raka nikina wiri guruhe gbua, si naida ani ‘asaditirani’ nyanyakii tipa ka gbia bata. (Rk. 13:24) Tipa ka manga gupai re, si naida ani naaberãpa agu apai aberã kindi ‘ngbaa,’ watadu agu apai si aida ani berẽkuriihe nyanyakii. (Frp. 4:8, 9) Gure nga si naida ani naaberã pa gaani raka nga ga aKristano naabaha.a

5. Ginipai duho si aida ani naabihe na nyanyakipaha gbe?

⁵ Nikpiapai, aKristano nawirika Yekova na Yesu nimangayó gayó asunge nyanyakii. (Yo. 5:17) Nisangbana gipai re, dungu aboro ninaatambuayo mbiko gayó wene sunge na mbiko du yó ni agu aboro rengbe boro arengba ka kido kutiyó. Abairakporo naʹasadatiyo ka mangasunge wenengai tipa ka ngerafuo gayó aborokporo. Nirengo, ka boro angeranga fuo gani aborokporo ya, si kina sa na gu ka ní ‘basapa gani idapase’ kuti Yekova!​—1 Tim. 5:8.

Ka Ani Bingo pa Gaani Irisombori Taata Ya

6. Wai ani aino ya si aidanga ani naabipa iriso Yekova na taatapaha te?

⁶ Yekova naabipa irisoko na nyanyakipaha ti aregbo dũ. Kpiapai nga, ho aYisaraere ambu ndikidi irisombori ni, i agbia dungu asangbana gayó mangapai. (Yos. 23:12, 13) Rogo bambata sa kama agarã Fuo Batikayo Kristo, si aidi apefuo Kristo asaditiyo aʹasada nyanyakii tipa ka banda ndikidi irisombori si nye nigigirihe be zire ayugopai gbiati gbegberẽ aberã. (2 Yo. 7-11; Yugo. 2:14-16) Areme, ndikidi aKristano nabi gayo irisombori kindi na nyanyakipaha gbe.​—1 Tim. 6:20.

7. Wai Pauro ambakadi tiko tipa gako sunge?

⁷ Gaani sunge tungusapai naye na bakere ngbarago furani. Ono tipa ani naagbia ngbarago agbia kindi mbiko gu sunge re, si naida ani naaberã aberã kuriihe nyanyakii na kini mbakaditirani tipaha. Pauro apepa wai ko anaaberãpa agu aboro ko anaayugopai fuyó. Ko akepai ki yaa: “Mi ye ka du ni apai dunduko fu aboro dunduko, si ngia ka mi batasi agu yo. Mi ki nimangi apai dunduko mbiko wene pangbanga, ya mi rogo gi bete he ti ni na akuare.” (1 Kor. 9:22, 23) Pauro anaagbia bakere ngbarago mbiko undoko aboro rogo toro yo, na ko anaaberã aberã gbe tipa wai rengbeko ka undo agu aboro ko anaatungusapai fuyó. Sidu, ko afu wasa fuyó na ki sayo i ye ka iriso Yekova.

8. (a) Gini bipai si aida ani du nani tipa agu aboro ani ayugopai fuyó? (b) Wai pa wisigo ani Ziazia Kekeapai na boro narengbe ka fu bakere ngbarago furani?

⁸ Wai Pauro anaabi gi sunge re? Ko aima ida ka ‘manga pa’ Yekova gbiati agu aboro nanaagia gako pangbanga nga ga rengo. (Rom. 12:11; 1 Kor. 9:19) Ho du ani ni na gu sunge berani nga ga yugo Fugo Mbori fu aboro, singia kpuyo yo, ba dunguratise yo, watadu ti regbo Gu Irisombori Nga ga Aborokporo, ya mo ani nabi gu sunge re na nyanyakipaha gbe? Isoke ani nabihe nga wisigo Ziazia Kekeapai na boro kpuni yo nga rorõi sunge furani. Kina rengo du nga, si naida ani mbu kura gaani apai ambu tipa ka undo aboro wa gure. Ono ya mo anga gure gu Yesu aya ti ni wee “gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi” te? (Amo. 20:35, NW) Ho ani ayugo gene bata ni fu aboro, ani nagbia gu ngbarago kurapai arengbanga ka fuhe furani ya.

9, 10. (a) Ya mo pa zanga bi ani apai taata nayugo gupai nga si aidanga ani di regbo ka wasa na aboro te? Oni sakingo rogoyo. (b) Ginipai rengbe ka sa gupai nga aboro nigbia wasa mbiko bakumba angianga i nigunde agunde beko ya?

⁹ Anga pa zanga bi ani apai taata nayugo gupai nga si aidanga ani di regbo ka wasa na aboro te te. Anga Yesu anaadia regbo sa kina kuti yugopai fu aboro te, ono ko anaadia regbo adia a ka sungo na aboro na ki sonosi wene bakure naayó. (Rk. 5:27-29; Yo. 12:1, 2) Na anga pa zanga dia ani apai taata ngawee ani ningere ti aregbo dunduko hihii te. Ka si adu nga Yesu angia gu boro nangera hihii, amomanga na aboro ya, ani ainongo tigu nga ka aboro aye koyo du ko ni gbe te. Zavura agude, ami anaawasa awasa mbiko ko. (Mk. 10:13-16) Wai rengbe ani ka wirika Yesu rogo gi bangiriba re?

¹⁰ Wirina sa afura tipa bakumba rogo dungurati ki ya, “Ko naida kaa manga bakere apai ono ko aidanga aboro naamangaha wakina gu ko amangaha te.” Ya mo i rengbe ka gumbaha wo tipa roni? Si ngba angba ka ani naaidanga bakere apai be akuarani susi ome ya. Nikpiapai, avunguagude rengbe ka undo awiriyo i sono kumbatayo nimaa yó agu asásá fuyó rengbeyó arengba ka da ti ni na ki undoyo i da ti ni. Wakina gure a, si ngba angba abaakumba ningarasi agu aboro du rogo dungurati wadu yó dunduko nibasasa tipa i sono rogo toro yo na kini fu agu aberãpai fuyó rengbe ka undoyo. Kurigure, ho du bakumba ni na wene bipai tipa tiko, aboro nagbia wasa agbia gbiati ngarasaro mbiko ko. (Rom. 12:3) Wirina sa ayaa: “Mi aidanga bakumba nidi apai dunduko kina rogo pa mbaro yo te. Ono ka ko adia apai ti aregbo dunduko nyanyakii, si duadu nikpakarapai fu boro ní mbedi naako.” Gu kurari ayawee ri nabihe nga kura abaakumba “rengbe kadu ni agu aboro aboro agunde agunde beyo mbiko gu gene du yó ngbaha.” Si aidanga abaakumba duni agu aboro aboro nikaa gunde agunde beyo si ki sa gupai nga ka i nairisongo Yekova na ngbarago ya te, nga “betedi mbori.”​—1 Tim. 1:11.

Gaani Sunge Rogo Dungurati

11. Gine nga “gbata sunge” rogo dungurati?

¹¹ Ho Pauro angarasi akumba ni i asadi ka rẽ tipa kura asunge rogo dungurati, anga ko apehe wo i asadi ka mbiisa gayó gbegberẽ nyemuhe te. Ono ko ayaa: ‘Ka kumba agbata sunge babipai, ní nakpinyemu wene sunge.’ (1 Tim. 3:1, 4) Gu “gbata sunge” re nga ka asadatise nyanyakii tipa kadu na agu asino nga ga toro rengbe ka sa boro ní gbia asunge rogo dungurati tipa kaa undo awirinani. Ka si du nga wirina ho naima zio bapatiza garã ki ima manga kandara sa, na ko kidu nigu ngbatunga boro Ziazia Kekeapai aringbisa pani rogo 1 Timoteo 3:8-13, nga guni rẽ tipa kadu nimoundo abaakumba, i rengbe arengba ka ida pako tipa gu sunge re. Oni kparia gupai nga veresi 8 nayawee: ‘Adiakona [nga amoundo abaakumba] kadu a tigayo na zera, [“ni agu aboro namangapai nyanyakii,” NW].’

12, 13. Oni gumbanga pa bete agu agene rengbe agu awirina nga aparanga ka gbata sunge ngbaha.

¹² Ya mo mo nga gu paranga naima zio bapatiza garãro ambeda kuti 20? Ka si duwo, dungu agene duho rengbe mo ka gbata asunge ngbaha? Gu sa nga nifu mo tiro sa sunge tungusapai. Ya mo mo naakura na awirina gene tungusapai yo nga gu sosonoyo na gu parangayo a? Ya mo mo naʹasada tiro ka gbia gu boro ka mo awisigo Ziazia Kekeapai na ní? Ka mo awisigo Ziazia Kekeapai na boro ngba agu agene i naagumbapaha ti regbo gaani adunguratise nga ga aKristano, gamo yugopai nikadu niwenehe. Kurigure, mo nikadu adu na nunga gu boro nawirika ga Yekova agene. Ho gamo bawiriki Ziazia Kekeapai nika tona ka bi gupai ni nga si naida ní mangi ariapai rogo gani raka, mo nika wirika wai awirika rengbe mo ka undo ní nizerangbaduse na nitatamana tipa ní irisi agu arugute nga ga Ziazia Kekeapai.

¹³ Aguroni nga aparanga, si ngba angba oni niundo sosono awirina rogo dungurati. Si ngba angba a oni asadi ka sa Bambu Kindo si du niwenehe na nigigirihe. Ho oni afu tironi ni ka undo gu sunge duho, gure nayugo gupai nga oni nabi ga Mbori sunge na nyanyakipaha. Wakina Timoteo, oni rengbe arengba ka wirika ngerafuo dungurati wenengai.​—Oni gedi AFiripoio 2:19-22.

14. Wai rengbe abaakumba ka ‘asada’ gu paranga aboro du rogo dungurati?

¹⁴ Abaakumba, ka bangironi gonga ti fu sunge fu agu awirina naʹasadatiyo ka ‘ora be ga paranga gbegberẽ nyemuahe’ na kini “peke fuo rurupai, idapase, nyemuse na zereda” gbiati gu kura wene asino ya. (2 Tim. 2:22) Oni “asadi yo” nifu oni wiri asunge fuyó i nimangihe rogo dungurati, tipa ka ino singia i rengbe ka manga bakere sunge, gayó “susa na apai ki du ni yuguyugu he fu aboro dũ.”​—1 Tim. 3:10; 4:15.

Zanga Biapai Taata Rogo Dungurati na Kporoyo

15. Ringbisihe kuti 1 Timoteo 5:1, 2, wai rengbe ani ka yugo irisa tipa akuarani?

¹⁵ Pa zanga bi ani apai taata nakodapa fu ani irisa fu awirinarani nga akumba na adee. Rogo gu rugute Pauro afuhe fu Timoteo, ko anyakasipa fu irisa fu aboro. (Oni gedi 1 Timoteo 5:1, 2.) Gere nga nyanyakipa pai a ho ani amangapai ni na gu boro angianga kumba wa ani ya watadu gu boro angianga dee wa ani ya. Eyobo amoi wene kpiapai nibipa fu irisa fu adee, gbe, fu diako. Ko adiberã na ngbadukoyo dũ ka he kparia kura dee na nyemuri. (Eyo. 31:1) Ka ani airisa awirinarani, ani nibanga nyemurani tiyo watadu ka manga gupai nika sa guni nga dee watadu guni nga kumba ka rago ngbanga tiní ho du ani ni ho ya te. Zavura agu aboro nambakada pa rogatise a, si ninyanyakipa pai i duna irisa dagbayó. Gu Kristano adianga apai dunduko taata ya, ní anginga gbegberẽ mbaro na guni angianga kurani ya te, wa ngbatunga gu nga kaa manga agu apai nika sa gu kurani ní berẽ gupai nga ní naida aida ka diani.​—Snz. 12:22.

16. Gini kparakparapai duti gu bipai du kura aboro nani rogo zegino tipa gu sunge nga ga kumbakudee na baagude ti gu nga ga Ziazia Kekeapai?

¹⁶ Ani naida kadu na rugatise a tipa kaa manga gu sunge Mbori aida ani nimangihe kpurani yo. Ga Satana zegino nasawia akumbakuadee asawia na abaagude nibipa gayó sunge. Agu aũngbarago aboro akusaha nayugo abairakporo nikungbo ũsawia na ũzanga irisa. Ono tie, Ziazia Kekeapai nakiisopa kumbakudee akiiso, bambiko si naya ko nga ‘rii diako.’​—Ef. 5:23; 1 Kor. 11:3.

17. Oni sakingo pa wai pa songoda ani gu mbakadapai nga ga gu irisombori nga ga aborokporo narengbe ka yugo gupai nga ani nabi gaani asunge na kiipaha.

¹⁷ Si naida kumbakudee nifu aũborose afu fu gako aborokporo. Ono ka ko afunga agu arugute nga ga toro fu gako aborokporo ya, gure du fuko nizanga tatamana. (Pa Rug. 6:6, 7) Sidu, 1 Timoteo 3:4 nayawee kangia bairakporo nga mo, na mo kini gbata amomu nga ga sunge rogo dungurati, si naida mo duadu nigu kumba ‘nazoga kpuni wenengai, nizogo awirini nizera.’ Oni sananga tironi nga, ‘Ya mo mi naakpara regbo tipa gu irisombori nga ga aborokporo kpure?’ Kura dereakumba kinaho ninaazungodi akumbaayo azungodi tipa i naangbe mbatayo wenengai rogo agu apai nga ga toro. Akumba dunduko nibasasa si aida i naabi gayó sunge na nyanyakipaha na i kini mangihe wenengai. Na si naida diakumba naasongoda gu mbakadapai asongoda nga ga Gu Irisombori Nga ga Aborokporo na kidu na wene giatise na kumbaari tipa si nimangi wenengai.

18. Wai rengbe agude kaa berãkurii agu apai nyakipaha gbe?

¹⁸ Si naida agude naaberã aberã a gbe kurii gu nyanyakipa apai nga ga raka. (Batu. 12:1) Gbegberẽpai ho ti wirika rukutu agude sunge te. Si naida i naamanga agu asunge amanga kporoyo rengbe na garãyo gbiati omeyo. (Kpe 3:27) Ho Bakindo Davide aduni kindi nitooni gude, ko awiriki sunge banda anyaa wenengai. Ko awiriki taka manzigo a na bibia, na gipai re nasako ko ndu kaa ta manzigo fu bazogo aYisaraere. (1 Sam. 16:11, 12, 18-21) Zanga kapa, ho Davide aduni nigude, ko anaangimbaro angi, ono wa ko avura kaa ngimbaro, ko aima dia regbo ka wirika agu apai naundoko kumbatayo ko naasambuo Yekova wenengai. Gu sunge banda anyaa ko amangihe ko du tooni re aundo ko ko mangisunge nibangbembatayo fu aYisaraere nizerangbaduse. Oni paranga aboro, gini asunge duho oni awirikaha, nga gu nika undo roni oni mangisunge fu Bakusironi na ki mbakadi roni oni rẽ tipa kura asunge kumbatayo?

Oni Duna Rengberengbe Bipai

19, 20. Gini rengberengbe bipai si aida ani du nani tipa tirani na tipa gaani irisombori?

¹⁹ Ani dunduko si aida ani asaditirani kadu na rengberengbe bipai tipa tirani, angianga kaa dia apai ti aregbo dunduko nyanyakii kisusi ome ya. Ani aidanga ka maa tirani ‘niruru aboro susi’ te. (Batu. 7:16) Apai kinaho rengbe ani ka mangaha ani ki gbia wasa tipa kpotorani, singia kporoyo, basunge yo, watadu ho du ani ni na agu awirinarani nga aKristano. Si aidanga aborokporo naadia apai ti aregbo dunduko nga nyanyakii te, si andu ka gberesapa gu zereda si aida si du kporo. Rogo dungurati, aboro dunduko si aida i wiriki wai ka moma na kurayo tipa ka gbia wasa, gaani afugo na gaani gene yugopai kidu nigupai nanyakasa boro anyakasa na kini fu wasa funi.​—2 Kor. 13:10; Ef. 4:29.

²⁰ Ani naraka rogo gu zegino abingo ga Yekova andiko na nyanyakipaha ya. Ono tipa rani nga ga Yekova aboro, ani naberã aberã gbe kuriipa gaani giasangbaa gbiati ranigose fu Mbori. Nangbaa gupai nga ani du rogo gu bakere riigbu nga ga ga Yekova aboro nga aguyo abingo pa irisoko nitaatapai watadu pa mbaro ya! Sidu tie, ani dunduko, ani naabi gaani raka na gaani irisombori na nyanyakipaha, angianga kaa bihe taata gbua ya.

Gaoni Karagapai Nga Gine?

• Aboro rogo gi zegino re nabi raka taata, ono wai rengbe ani ka ne gu bipai re?

• Wai rengbe ani kadu na ngbarago na kini bi gaani sunge na nyanyakipaha?

• Wai gaani bipai tipa dia kura asunge ayugo singia ani nabipa iriso Yekova na nyanyakipaha watadu ani abingo ho wo te?

• Oni sakingo pa gupai duhe ti ni ninyanyakipa pai ani naafu irisa fu awirinarani na gaani aborokporo?

[Gu sura du ti kpewaraga 16]

Si naida kumbakudee naangerafuo gako aborokporo rogo borose yo na rogo toro yo

[Gu rukutu kekeapai du bandu kpewaraga yo]