Oni Rimi Kurogo Ga Mbori Ongoda?

“Gu pai nga ga Mbori du na unga, ki du na tandu.”​—EB. 4:12.

1. Ginipai sa dagba akuraha rengbe ani ka mangaha tipa ka rimo kurogo gu ongoda nga ga Mbori areme, ono tipagine duhe ti ni nga pepehe ipi ti mangaha?

ROGO gu kekeapai nasusi, ani awiriki gupai nga ani rengbe ka rimo kurogo ga Mbori ongoda ka ani agiasangbako gbiati gako riigbu. Ono pehe ngbayo ipi ti mangaha. Nikpiapai, ho ani agia gupai ni nga Yekova nasoga gupai asoga ngba mangaha tirani, rago naangbanga tirani ti bambataha te. Gipai re nayugo gupai nga si naida ani mangi sonakumbatayo amanga rogo gu bangiriba nga ga ipo sa giapai. (Yak. 3:17) Rogo gi kekeapai re, ani nika wisigo gu bangiri aba rengbe ani ka yugo gupai rogoho nga ani nga boro giasangba ti aregbo dũ.

2, 3. Gini asadatise si aida ani nimangihe amanga kindi tipa ka nye ni agu aboro ngba gbe bangiri Yekova?

² Ho i afu gu rugute ni furoni du mburuhe rii Ziazia Kekeapai, ya mo oni nimangihe niipo? Ziazia Kekeapai nagumba gupai nga Mbori nakpinyemu ka dungura “agu ahe ngba bangiri arikaaboro dunduko” fu tiko. (Agai 2:7) Rengo ngaha nga, ho ani awiriki rengo awirika ni, ani aadanga nibasa niwene aboro te. Wa si avura duwo, nyemu Yekova gbiati Wiriko afõngbaduraniyo ani mangi bakere ariapai rogo gaani aberã na gaani mangaapai tipa ka sa ngbarago ti Mbori. Niyangaraha, fuo kakaka kparakpee gbiati nyanyaki asadatise, gu bawene uru aye nga gu ani azi bapatiza rogoho.​—Oni gedi AKorosaio 1:9, 10.

³ Ono tie, gu vura ani asoho kuti zangarengba aadigongo ni gu uru ani azi bapatiza te. Gu vura re nandu kindi na si nika ndu daho ani nika da ni nirengberengbe aboro. Ono wa vura duhe wo, ani na gu kido nga ka ani asovura kindi kuti zangarengba tipa kadu ni agu aboro ngba gbe bangiri Mbori, ko nika fu maku afu kurii gaani asadatise.

Ho Duhe Ni Nga Si Naida Ani Mangi Ariapai Rogo Gaani Raka

4. Ngba gini agene biata rengbe ani ka gbia gu rugute du mburuhe rii Ziazia Kekeapai?

⁴ Mbata fu ani mangi ariapai rogo gaani raka, si naida ani ini gu ariapai si aida ani mangihe. Yekova naundo rani ngba dungu agene tipa ani ini gu ariapai si aida ani mangihe rogo gaani raka. Ko rengbe ka mangasunge na gumbapai Bambu Kindo yo watadu kekeapai rogo gaani awaraga tipa ka yugo gupai furani nga pai gu duho rogo gaani berã watadu gaani mangapai si aida ani mangi ariapai rogoho. Ti kura aregbo, ka ani vura gia gumbapai agia vurũ watadu ka ani vura gedapai ageda nga gu nafura tipa gupai si aida ani mangi ariapai rogoho, ani arengbanga ka mangaha rogo mangimangipai yo te. Kangia wo duhe, Yekova rengbe ka mangasunge na wirinarani ni Kristano tipa ní yugu gupai furani si aida ani mangi ariapai rogoho.​—Oni gedi AGaratio 6:1.

5. Gini apai rengbe ani ka mangaha ti kura aregbo ho i afu rugute ni furani, na tipagine si aida agu abaakumba nga aKristano naasota asota ti ni kindi tipa ka undo rani?

⁵ Anga si nitaatapai ka gia rugute ngba kpakpa boro te, ka ní vura fuhe rogo birĩ na rogo nyemuse yo vurũ. Ono, AGaratio 6:1 nagumba gupai nga Yekova nazinahe fu agu aboro duna gu inohe nga ga toro nga i songodi rani na “zera.” Ho i asada ka songoda rani ni, na ani ki di gu undo re kugume, ani nangba bangiri Yekova kisusi. Ho ani naakparakpee ni fu Yekova, ani dunduko ninaagumba gupai fuko nga kpakpa aboro nga ani. Ono tie, ka si du nga kura boro du gbe berã rani kuti gu ariapai si aida ani mangihe, gupai dedede ani naamangaha nga ka asada ka rugusapai kubara rani yo, ka umbasipa gupai mangi ani he, ka kapa kuti gu boro naʹasada ka undo rani re, watadu ka gumba gupai nga ní naafunga gu rugute re ngba wene gene te. (2 Aba. 5:11) Gu garakaha agaraka berewe gbe nga ka gu rugute re zi boro dagba gaani aborokporo, ka si du tipa wai ani avo rokoo watadu wai ani ambakada tirani, watadu ka si du tipa gu zambuatise ngba tirani gbe ono Yekova asogaha asoga. Mbiko zinga, ani rengbe ka gumba agu apai si aidanga ani gumbaha ya, si ki fu bakere gberarago furani na fu gu boro ninaafu gu rugute re furani. Ono dedede, tifuo ngbadurani zere, ani nida kuti gupai nga gu rugute re ngba angba tipa rani.

6. Wai gu fugo Mbori akusa “agu aberã nga ga ngbaduse na gaha nyemuhe” gbaiga?

⁶ Gu bangua veresi nga ga gi kekeapai re du rogo AEbere 4:12 natingida rani na gupai nga fugo Mbori “na tandu” ti ni. Nirengo, tandu kina ti fugo Mbori nga gu rengbe ka manga ariapai rogo ga boro raka yo. Kina wai si aundo rani ani mangi ariapai rogo gaani raka mbata fu zio ani bapatiza, kinawo a rengbehe ka undo rani awere ani mangi ariapai rogo gaani raka. Rogo gu waraga Pauro akehe fu agu aKristano nangia aEbere, ko aya fugo Mbori “narú boro dati kparaka mbisimo na toro, na ngbazunga na nzeme meme, si ki ipi ka ina agu aberã nga ga ngbaduse na gaha nyemuhe.” (Eb. 4:12) Ka pehe rogo kura afugo, ka ani vura gia tirani na ga Mbori ringbisapai wenengai, gu gene ani amangapai ngbaha kutini du nika yugo gupai du ngbaduraniyo. Ya mo kura aregbo ho du kparakparapai dagba wai aboro abi rani na gupai nzunzu du ngbaduraniyo? (Oni gedi Matayo 23:27, 28.) Oni makianga pa gupai rengbe oni ka mangaha ka agi apai du kusende re gbia roni.

Oni Niindu Na ga Yekova Riigbu Wa Sa

7, 8. (a) Ginipai nasa kura aYudo i kakuti bete kura apai rogo ga Moize aNdiko? (b) Wai gu gi gayo mangapai re aandu kia ti ga Yekova ringbisapai?

⁷ Dungu aboro dagbarani naaima zio afugo Asanza 4:18 kuriyo yo nga gu nagumba gupai nga: “Ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.” Gipai re nayugo gupai furani nga gaani mangaapai nikaa aria tihe tooni tooni na gaani giarogopaiyo kini dunguro yee.

⁸ A wa ani awirikihe rogo gu kekeapai nasusi, tifuo kpio Yesu, si adu nikpakarakpakaraha fu gu kura aboro i mbu pekafuo ga Moize aNdiko. (Amo. 21:20) Wa Pauro avura saka gupai fuyo wenengai nga aKristano aadunga berewe tii ga Moize aNdiko te, gu kura aboro dagbayo aidanga kutini te. (Koro. 2:13-15) Isoke, i aberẽ gupai nga ka i aamanga bete apai rogo ga Moize aNdiko, i gbianga tiyo na rungosi be kura aboro te. Wa i avura kaa bihe wo, Pauro agumba gupai fuyo ziazia nga ka i amanganga pai ringbisihe kuti gu ga Yekova gene mangapai nga gu nadu ti gu regbo re ya, i rimingo kurogo gako ongoda yo te.a (Eb. 4:1, 2, 6; oni gedi AEbere 4:11.) Tipa Yekova idi naayo, si aaida i idi kuti gupai nga Yekova aanungusa gako aboro ti gu regbo re ngba kura gene kia.

9. Gini bipai si aida ani du nani ho i amanga ariapai ni rogo gu giarogopai nga ga Ziazia Kekeapai?

⁹ Ti gi gaani regbo re, ariapai kinaho i naima mangaha rogo gu giarogopai ani anidu nani mbata tipa kura ayugopai rogo Ziazia Kekeapai. Si aidanga gipai re fudi rani te, ono si naida si nyakasi gaani kido kuti ruru kangara moyambu. Ho ruru kangara moyambu abi gupai ni nga kura yugopai kinaho si aida i mangi ariapai rogoho, i naadunga na ndundu tipa ka mangaha te. Gupai ngba ti ruru kangara moyambu gbe nga kaa ndu wa sa na ga Yekova ringbisapai, sidu i naadunga ti ni na ndundu tipa ka manga ariapai rogo gayo yugopai mbiko gupai nga aboro nika bisirapa yó ya. Gini berã oni nidu nani ho oni abi gupai ni nga i mangi ariapai rogo gu yugopai du tipa kura averesi?​—Oni gedi Ruka 5:39.

10, 11. Ginipai kura awirina amangihe bakuru kusayo ho i agi gupai ni nga si naida i tungusipai ngba kura vovo gene kia? Ginipai ani awirikaha ti gayo kpiapai?

¹⁰ Ani makianga pai tipa kura kpiapai. Agarã kama kusayo, agu abagumbapai gbaiga nanaamanga agumbapai aberẽ gupai tigayo nga gure nangia wene gene tungusapai fuyo. Gupai nangba tiyo gbe nga kaa fura barabangiri dungu aboro. Fuo nyasa yó gumbapai aboro ki ye ka tambua yó, rago aningba tiyo nikerehe. Ono kusa, si ada nga Yekova naida gako aboro nimangisunge tungusapai ngba dungu agene kodihe na gu nga ga tungusapai kini tanga nani ti akporo. Ono gu kura aboro dagbayo aká aká pekafuo gu vovo gene tungusapai re. Agu agumbapai i anaamangaha asa aboro i berẽ gupai nga i nakpinyemu Yekova kini gisangbako, ono pa ka yó ka tungusapai ngba gi vovo gene re ayugu gupai nga i aagianga sangba Yekova te. Rago angbanga ti Yekova na gayo mangapai te. Ko afunga maku fuyo te. Tifuo bete regbo, i ambu ga Yekova riigbu.​—Mt. 10:1-6; Amo. 5:42; 20:20.

¹¹ Agu aboro nanye rogo ga Yekova riigbu, si aadunga fuyo taata tipa i tungusipai kini tanga nani ti akporo te. Si adu fuyo nikpakarakpakaraha gbe ti tonatonaha. Ono i adu na giasangba. Tifuo bete regbo, i adibe gu bakabangirise i adu nani na Yekova ki fu maku kurii gayo sunge. Ginipai oni naamangaha ho ruru kangara moyambu agumba gupai ni nga oni tungusipai ngba kura vovo gene kia? Ya mo oni nidu na giasangba tipa ka mangaha si ku vura du nga gu gene tungusapai re nikpakarakpakaraha?

Ho gu Boro Ani Akpinyemuni Ambu Yekova Ni

12, 13. (a) Tipagine duhe ti ni niga Yekova ringbisapai nga i kusi gu boro rogo dungurati kusayo mangi irairapai zanga saberã? (b) Gini asada agu aKristano nga avunguagude agbiatiyo nani, na tipagine duhe ti ni nikpakarakpakaraha?

¹² Zanga kapa, ani dunduko naima ida kuti gupai nga tipa ani irisi Yekova ngba wene gene, si naida ani du gigiri berã rani yo, rogo gaani mangaapai, na ti kpotorani. (Oni gedi Tito 2:14.) Ono kura apai kinaho rengbehe kadu furani rogoho nikpakarakpakaraha tipa ani mangi gipai re. Nikpiapai, si rengbe ka dunga arogotise ni aKristano na gude beyo gbua sa, gu gude re kini sia gupai nga ka mbu rengo. Ki sia gupai nga ka “ngi tipa rago ngbutuko rogo gu ngbarago nga ga ingaapai” kuba gupai nga kadu na pagume dagba ní na Yekova gbiati avunguni, nisangbana gipai re, i ki kusi ní kusayo rogo dungurati.​—Eb. 11:25.

¹³ Avungu gu gude re du na bakere gberarago! I ima ino gupai nga Ziazia Kekeapai nagumba gupai nga ‘gu boro i niya ti ni wirina du ni irabari, du ni irakpihe, du ni irisikpiahe, du ni irasengahe, du ni irakpibuda, du ni irasokpekpe, ka oni kódi nga tironi na ni ya, oó, tipa ri riahe a te.’ (1 Kor. 5:11, 13) I ima ino gupai a nga gu fugo du rogo gi veresi re nga “gu boro,” si nakoda gu wiriyo i naima kusa ní arakanga naayo kporo wa sa ya. Ono i ima kpinyemu wiriyo! Gi nyemuse nga ga nunga rengbe ka sayo i berẽ gupai nga: ‘Si naida ani naafura afura na wirinani dedede tipa ka undo ko ko karagatiko fuo Yekova. Ka ani ongo aonga kaa biko, ko akaraganga tiko te.’b

14, 15. Gini wene diaberã si aida agu avunguagude nga aKristano i nakusi wiriyo rogo dungurati kusayo mangihe?

¹⁴ Ho ani abi agu avunguagude re ni, rungoyo namanga rani amanga. Gu nagarakaha agaraka berewe gbe nga, gu wiriyo re aima du na siapai beni, ono ní ki sia ka merafuo gu sino raka angianga ga aKristano ya kuba gupai nga kaa koda tiní kindi na avunguni gbiati akurani aidipase. Tipa avunguni tigayo, gene adunga beyo wa ka i aria gu gani siapai re te. Si du du yó ti ni na bakere gberarago.

¹⁵ Ginipai rengbe agu avungugude re ka mangaha? Ya mo i apekafuo gu ga Yekova rugapai du gbaiga? Rengo ngaha nga kura apai kinaho nga ga kporo si aida i fura afura na wiriyo riipaha, ono ya mo i abihe nga dungu apai kinaho si aida i fura na wiriyo riihe? Ho i nikaa manga gayo diaberã ni tipa gipai re, si aidanga bangiriyo go ti gupai Yekova aida i mangihe te. Gako ringbisapai nga ka banda gako riigbu nigigirihe, na ka gene du, ki undo agu aboro namanga irairapai i saberã. Wai gu rengbe agu aKristano nga avunguagude ka songoda gi ga Yekova ringbisapai re?

16, 17. Ginipai rengbe ani ka wirikaha ka ani berẽkurii gu kpiapai nga ga Arona?

¹⁶ Gu wirina Moize nangia Arona agbiatiko na ngbatunga gipai re nibipa agu awiriko nadu ue. Oni makianga pa wai rago agberẽ tiko ka bi gupai nga Yekova akedi we ariyo si ki ye ki riti agu awiriko ue nangia Nadaba na Abiu mbiko i afu motumo fuko ngba gu gene ko aidanga ha ya. Gene adunga berewe beko wa ka ko bi awiriko te. Ono gu kurapai kinaho berewe namangi. Yekova aruguko na agu awiriko nadu niruruyo ki yaa: “Ka oni nimbú nga mangerironi ni zakizaki he ni gbanga ha ya, ka oni sípi nga gaoni aroko a ya, oni ka kpika, zinga ka ye be Yekova ku ri rimbasa aboro dunduko.” (Pa Mot. 10:1-6) Gupai Yekova agumbaha fuyo, si ziazia. Gu nyemuse du ani nani tipa Yekova si aida si du ninyanyakihe susi gu du ani nani tipa gu gaani aborokporo namanga irairapai zanga saberã.

¹⁷ Ti gi gaani regbo re, Yekova aimongo agu aboro nibasa nakuo gako andiko te. Ko nafu momu fuyo tipa i saberã ti gayo gbegberẽ mangaapai. Ono ginipai rengbe ka manga ka si du nga avunguagude nabasasangba Yekova kini fura na agu awiriyo i naima kusayo rogo dungurati kusayo riipa apai dunduko si kidu wa ka i ya i akusanga yó te?

18, 19. Gini amaku rengbe aborokporo ka gbiaha ka i ne kodatiyo zanga wene nduhe na gu borokporo i nakusi ní rogo dungurati kusayo ya?

¹⁸ Dungu agu aboro i akusiyo mbata kusayo rogo dungurati ono i ki karagatiyo nagumba gupai awere nga gu nyanyaki diaberã agumeyo gbiati abakureayo adihe ka zanga kodatiyo naayó naundo yó tipa i karagatiyo. Nikpiapai, paranga wirina sa agumba gupai nga pai sa dagba agu akuraha nasa ri ri idi ka karaga tiri kurogo dungurati nga gu gene kawiri ane ri ngbaha. Ko anye niruruko fu Yekova rogo gu bangiriba nga ga zanga kodatiko naari. Ri agumba gupai nga: “Gi gako kakuti agu arugute nga ga Ziazia Kekeapai re du nasa re mi idi ka karaga tire kurogo dungurati.”

¹⁹ Ginipai tie si aida ani mangihe? Si naida ani sovura kuti gu sino zangarengba du tirani nga ga samungu kuti agu arugute nga ga Ziazia Kekeapai. Si naida ani idi kuti gupai na kpotorani yo dunduko nga, agu agene Yekova amanga gako apai ngbaha, si dedede tipa kina gaani undo.

“Gu Pai Nga ga Mbori Du na Unga”

20. Ngba gini agene ue rengbe ani ka giarogo AEbere 4:12? (Oni bi gu kekeapai du bandu waraga yo.)

²⁰ Ho Pauro ake gupai ni nga “gu pai nga ga Mbori du na unga,” ko aafuranga sa tipa kina Ziazia Kekeapai te.c Gu kura averesi du rogo gu kapita re nayugo gupai nga ko aafura tipa ga Mbori amokido. Gupai ko aagumbaha nga Mbori akidongo he bangiriko ki go ti gako mokido te. Gupai Yekova agumbaha rogo gu nebi yo nangia Yesaya nayugo gupai nga rengo du nga gipai re. Ko ayaa: “Gimi apai . . . akáraga nga tihe fere gbua te, ono si anyása gu pai ngba ti re, ki kpatare rogo gu pai mi akedi he tipa ha.” (Yes. 55:11) Sidu tie, si aidanga ani naabakabangirani ho duhe ni nga apai amanganga ngba gu gene ani akpinyemu si mangi ngbaha te te. Yekova ‘namangasunge kindi’ tipa ka digiso gako ringbisapai ngba wene gene.​—Yo. 5:17.

21. Wai gu rengbe AEbere 4:12 ka nyakasa gu idapase nga ga agu aboro naima ima kurogo rengo?

²¹ Dungu agu awirina du rogo gu bakere rimbasa ima mangasunge fu Yekova tipa dungu agarã. (Yugo. 7:9) Aguyo kinaho naaberãnga gupai nga i agbinza apai kidu kindi wa gu duhe awere re ya. Wa vura duhe wo, i azeranga kpotoyo yo te. (Tam. 92:14) I ima ino gupai nga gupai Mbori akidoho, ko duwa ka ko mangihe, na ko namangapai awere tipa ka digiso gako ringbisapai. Wa duhe nga ga Mbori ringbisapai na nyanyakipaha bangiriko gbe, ani nasa ngbarago tiko ho ani amaa gako ringbisapai ni rogo bambata ba berãrani yo. Rogo gi saba uru nga ga Yekova uru ongoda re, ko ima ino gupai nga gako ringbisapai nika digiso tihe adigiso na gako aboro nika songodaha asongoda. Ginipai du tipa roni nibasasa tigaoni? Ya mo wa du oni nibasasa dunduko, oni rimi kurogo gu ongoda nga ga Mbori?

[Gu rukutu kekeapai du bandu kpewaraga yo]

Oni Natingidaha?

• Ginipai si aida ani mangihe tipa ka rimo kurogo ga Mbori ongoda areme?

• Gini kodapai du dagba ga Mbori ringbisapai naapa gia ani agu arugute du mburuhe rii Ziazia Kekeapai?

• Rogo gini apai rengbehe kadu nikpakarakpakaraha tipa ani di agu arugute nga ga Ziazia Kekeapai kugume, ono tipagine duhe ti ni ninyanyakipa pai ani du na giasangba?

• Ngba gini agene ue rengbe ani ka giarogo AEbere 4:12?

[Gu sura du ti kpewaraga 31]

Agu avunguagude re nadu na bakere gberarago!