Asanahe be Agedihe

Ginipai si aida mi mangihe ka si du nga mi na sanahe ngbare tipa gupai gedi mi he rogo Ziazia Kekeapai watadu ka si du nga mi naida na rugute tipa gimi kpakaraapai?

Asanza 2:1-5 nazungodi rani nibasasa ani nye kuti ‘gbata’ rugatinapai kina wai i naagbata “okooko ũkumuko.” Gipai re nayugo gupai furani nga si naida ani mangi nyanyaki asadatise tipa ka gbata akaragapai kuti agu asanahe du ngbarani rogo Ziazia Kekeapai na ki gbia ziga kuti gaani kpakaraapai. Wai rengbe ani ka manga gipai re?

Gu buku nga Benefit From Theocratic Ministry School Education nasakapai ti akpewaraga 33 dakuti 38 tipa “Wai Rengbe Boro ka Manga Wetekapai” nimanga ní sunge na agu aũwetekapai ‘ruru kangara moyambu’ akusihe. (Mt. 24:45) Kpewaraga 36 nayugo wai rengbe boro ka mangasunge na gu buku nga Watch Tower Publications Index, gu buku re na apaparaha ue, gu sa nayugo bara riiapai kurogo Ngbaõbambu Sinziri na gu kuraha kini yugu bara averesi. Gipai re nasaha taata tipa ka wetekapai singia ka mangasunge na bangua fugo sa watadu veresi rogo Ziazia Kekeapai, nga gu nafu tangaratangara rimo agu awaraga dunduko si aida oni gbata gupai re rogoho. Oni du na kina zerangbaduse wa oni agbata karagapai watadu rugute kuti gupai oni aidaha. Oni tingidi gupai nga, oni nagbata “okooko ũkumuko,” nga gu nika dia bakere regbo adia beroni gbiati ome.

Kina rengo du nga, gu kura riiapai kinaho gbiati averesi gaani awaraga afuranga tipaha ya. Na zavura rogo agu aba ani nafura tipa veresi rogoho, anga kina boro gu sanahe du ngbaroni karagayo pai kutini te. Berewe a, gu kura apangbanga kinaho rogo Ziazia Kekeapai nga gu aboro aruganga tiyo nani wenengai ya mbiko Ziazia Kekeapai afuranga sirisiri tipaha te. Rogo gi gene re, ani arengbanga ka gbia karagapai kuti agu asanahe dunduko nakura te. Ho du pai ni wa ngbatunga gure, si naida ani mbu rungba berãpa gupai ani arengbanga ka gbia karagapai kuti ni ya, na ki ne agu asakapai “nakusa kina sakapai, adu nga na pa Mbori rogo idapase yo ya.” (1 Tim. 1:4; 2 Tim. 2:23; Tito 3:9) Rengba be be-basunge watadu riibasunge nga ga zegino ka wisigopai na ki karagapai kuti ngbatunga agu asanahe re dunduko nga gu i afuranga tipaha rogo gaani awaraga ya te. Ani na ngbarago tie ka bi gupai nga Ziazia Kekeapai na badungu apai rogoho nga gu rengbe nangbe furani kumbatayo rogo raka yo, ono si rogodi gu kura dungu apai kusayo a tipa ka sa rani ani du na nyanyaki idapase kuti gu boro naenge kehe nga Mbori.​—Oni bi akpewaraga 185 dakuti 187 nga ga gu buku nga Draw Close to Jehovah.

Ono ginipai rengbe ka manga ka si du nga oni ima manga bakere ome tipa ka gbia karagapai kuti gupai nafuda roni ono ka oni agbianga arugute watadu ziga tipaha ya? Kangia wo duhe, ka oni gundenga ti gumbaha fu nyanyaki wirinaroni Kristano ya, isoke boro wa bakumba rogo gaoni dungurati. I na bakere inohe rogo Ziazia Kekeapai gbiati gu raka nga ga aKristano. Gu undo ka i fuhe furoni, si rengbe arengba ka undo roni kangia oni naida na rugute tipa gaoni kpakaraapai watadu adiaberã, mbiko inga agu aboro ini roni wenengai gbiati agu apai nafuda roni, na i nga agu aboro a du mbembedi na oni. Ka bangironi gonga ti kpara fu Yekova tipa agu apai oni abakabangironi nani na ka sanako ko fu gako ziazia toro furoni wa ka si banda gaoni berãpai ya, “bambiko Yekova nafu tatamana; . . . na rugatinapai.”​—Snz. 2:6; Ruka 11:13.