Oni Oro Ato Abaangirã Na Hipai

“Ani ki oro gu oto du fu rani ku mbata yo kindi.”​—EB. 12:1.

1, 2. Ginipai Pauro aringbisi gu raka nga ga Kristano kutini?

ROGO agarã nibasasa, aboro naaora gu ato abaangira du tipa dungu amairo rogo dungu arago. Wene abaoro ato naandu tipa gu abaangira re na gu sásá nga ka gbehe rii akurayo. Agu akurayo nidu na gu bipai du kia ti gure. Tipa yó tigayo, ka i oro ki dati digido gu abaangira re, rago nangba tiyo nibakerehe.

² Rogo Ziazia Kekeapai, i ringbisi gu raka nga ga Kristano kuti gu ato nga ga abaangira. Pauro atingidi agu akurako aKristano naadu Korinda yo na gipai re ti gu regbo ko ake gako bambata waraga fuyo. Ko ake gupai nga: “Oni aina nga ya agu yo nazo abangirã i naora dunduko, ono gu ni sa nadia mosoroho te? Oni óro wa ka oni da ada.”​—1 Kor. 9:24.

3. Tipagine Pauro agumba gupai ti ni nga kina bangisa boro sa nagbia mosoro?

³ Ya mo gure nga Pauro ape gupai nga kina boro sa dagba agu aKristano re narengbe nadia mosoro aguyo ki kuru tigayo na beyo bawe? Wagusa te! Agu aboro dunduko ninaaora abaangira, i naambakadatiyo nyanyaki na kini mangi asadatise na omeyo dunduko tipa ka gbehe rii akurayo. Kina gu bangisapai re Pauro aida akurako aidipase mangihe rogo gu gayo gbanga kpakarakpakara abaangira nga ga nyenye unga. Mbiko mangayo ho wo narengbe nasa yó i gbia gu mosoro du tipa nyenye unga. Nirengo, agu aboro dunduko nanyasa gu abaangira nga ga aKristano nika gbia mosoro.

4. Ginipai si aida ani wisigihe tipa gu ato abaangira du barabangirani?

⁴ Agu afugo re nangarasa aboro angarasa, ono kini sa agu aboro dunduko naora abaangira tipa raka areme i naaberã. Tipagine? Bambiko gu mosoro du tipa raka ngbangbaturũ yo watadu raka rogo paradizo auru kpotosende ane, he ho rengbeyo ka ringbisaha nani te. Nirengo, gu abaangira re ima gizo na si naida na bakere asadatise; dungu akpakarapai, agu apai nagbe berã aboro kusayo, gbiati kereapai du ngba gu gene re. (Mt. 7:13, 14) Si nafu kina gberarago tie nga, dungu aboro aima zera, aguyo ki mbu ato, watadu ki titiwi gene. Gini ngbatunga kpakaraapai na kereapai du ngbagene gu ato abaangira unga re? Wai rengbe oni ka nekaha? Ginipai rengbe oni ka mangaha tipa ka nyasa gu ato abaangira re na ki di mosoroho?

Si Naida Hipai Aida tipa Ka Gbehe

5. A wa keyo ho rogo AEbere 12:1, ginipai Pauro apehe nibipa ato abaangira?

⁵ Rogo gu ga Pauro waraga ko akehe fu agu aKristano nangia aEbere naadu Yerusarema yo na Yuda yo, ko afura tipa agu apai ninaamanga rogo mbaro ato abaangira. (Oni gedi AEbere 12:1.) Ko afuranga sa kina tipa ndu gupai boro naora ato abaangira ti ni te, ono gupai rengbe ní ka mangaha tipa ka gbehe. Mbata fu wisigo ani gi ga Pauro arugute ko akehe fu agu aKristano nangia aEbere re na ki bi gupai rengbe ani ka wirikaha ti ni, ani wisigingo ndu gupai naasa ko ko ke gi waraga re na gupai ko aasada ka ngarasa yó i mangihe.

6. Gini soapai aKristano adu ngbaha be abarumbatayo rogo pambori?

⁶ Agu aKristano naadu rogo bambata sa kama agarã, gbe aguyo naaraka Yerusarema yo na Yuda yo, i agbiatiyo na dungu fudifudiapai gbiati aʹasada. Agu abarumbatayo rogo pambori nangia ga aYudo yó adu na bakere soapai kuriyo, nga aguyo naima duna bakere maapai kurii aboro. Mbata kusayo, agi abarumbatayo re aima duna diabese wa i asaringbanga Yesu Kristo ki ya ko asamungu kuti gayo zogarago na ki imiko kina wai i aimo amangi gbegberẽ apai. Na ki diberã nga i nika ndu kumbatayo kindi na gi sogote re. Rogo gu kitabu nga Amokedi, ani nagedapai yo tipa wai i aserekpo aKristano na kini zubõ yó gu ti mburu kuraha, nga gu natona nibasa tingbafuo gu iiriwopai namangi rago Pendekote 33 F.B.K. Gipai re aima sa raka nikpakarakpakaraha fu ruru aKristano.​—Amo. 4:1-3; 5:17, 18; 6:8-12; 7:59; 8:1, 3.

7. Gini gbegberẽ regbo naaye kurii agu aKristano Pauro akepai tipa yó?

⁷ Agu aKristano re araki bara ti agu aregbo pa gbarasa Yerusarema aambeda. Yesu aima gumbapa gu gberãngbi fuyo si adu nga si nika ye kurii gu gbegberẽ riko aYudo naadu ti gu regbo re. Ko aima gumbapa agu apai fuyo si adu nga si nika manga mbata fu gu gberãngbi re da na ki fu arugute fuyo tipa gupai i arengbe ka mangaha tipa ka bata. (Oni gedi Ruka 21:20-22.) Gini kurapai tie ka i mangihe? Yesu afu zahe fuyo nga: “Oni bánda tironi, oni ka hisa kpotoroni yo na bakere riahe, na kpibuda, na berã pa gi unga re, gu rago ki da re ni ba sa wa kina gbina naza.”​—Rk. 21:34.

8. Ginipai narengbe ka sa agu aKristano nangia aEbere i zere watadu i mbu ato?

⁸ Gu regbo Pauro ake gi gako waraga re fu aEbere, agarã aima susa wa 30 wa Yesu afu gi zahe re. Sangbana susa gi zegino agarã re angia gine fu agu aKristano re? Aguyo aima mbutiyo fu asoapai na agu apai nga ga raka si gbeyo kusayo na ki mbu manga sonakumbatayo rogo toro yo nga gu narengbe ka nyakasa yó. (Eb. 5:11-14) Si nawira wa aguyo abihe nga peka yó fuo gu mangaapai nga ga agu aYudo i aaraka dagbayo narengbe ka sa gayo raka si du wenengai. Isoke, i aberẽ gupai nga wa agu aYudo re aida kindi kuti Mbori na kini pekefuo bete agu apai kindi naadu rogo ga Moize aNdiko, si agberãnga i koditiyo naayo te. Gu kura aboro adu kina rogo dungurati nga aguyo naazomia akurayo aKristano i nye kuti manga ga Moize aNdiko na agu andiko naadu tipa asino atitase. Ginipai Pauro arengbe ka gumbaha nga gu narengbe ka undo awirinako aKristano i ningere angera rogo toro yo kindi na kini hipai rogo ato abaangira?

9, 10. (a) Bara ti digido kapita 10 nga ga AEbere, gini ngarasaro ani agedaha be Pauro? (b) Tipagine Pauro akepai ti ni tipa gu ruru mangaapai nangia ga agu adezire nadumbata?

⁹ Si ima ngba ka bi wai ga Mbori toro aundo Pauro ko gbata gene tipa ka nyakasa agu aKristano nangia aEbere re. Rogo kapita 10 nga ga ga Pauro waraga, ko ape gupai nga aNdiko angia “kirima gu wene apai nikaye” na si ayugupa nyaka gu motumo tumorii nga ga Kristo. Bara ti digido gu kapita re, Pauro azungodi yó ki yaa: “Si rengbe oni du na hipai, ya, fuo manga oni sangba Mbori, oni ki di gu mosoro i akido roni tipa ha. ‘bambiko rago koyo ngbutuko, gu ko nikaye ki ye, ko aima nga kindi te.’”​—Eb. 10:1, 36, 37.

¹⁰ Rogo AEbere kapita 11, Pauro amangisunge na birĩ ka sakapai tipa gu he nga ndikidi idapase kuti Mbori. Na ko ayugu kpiaha kuti gu pangbanga du tipa agu akumba na adee nga aguyo naadu na idapase tiyo. Ya mo gure nga ko aima bitikpa ti gupai ko afura tipaha? Wagusa te. Gu mokedi re aima ino gupai nga si naida agu awirinako aidipase re ini gupai nga, tipa boro du na idapase, ní duwa ka ní duna wingbaduse gbiati hipai. Gi bawene kpiapai nga ga ga Yekova ruru amoyambu naraki bakuru kusayo re arengbe arengba nanyakasa aEbere i sovura kuti agu aʹasada na gu fudifudiapai i agbiatiyo nani. Fuo tangada Pauro gi gayo mangaapai nangia ga idapase re, si asako ko yaa: “Wa bi ani he ya adezire du pati rani kirikiri ni ngenge yo wa ndurõ, ani mói rõrõi he ku sa yo dunduko, na gu ingapai ninaye dedede ka manga rani ani ki oro gu oto du fu rani ku mbata yo kindi.”​—Eb. 12:1.

‘Adezire Wa Nduro’

11. Pa berã ani kurii pa agu adezire naadu wa nduro re rengbe kadu na gini sangbanaha kurirani?

¹¹ Agi adezire Pauro afura tipa yó re, i adunga wa agu aboro ninaaru pangba gene kaa bi agu aboro naora ato abaangira watadu wa aguyo niru kaa ngana kina gu boro ngbatiyo i aida ní gbehe te. Kuba gure, kina boro yó nitiyo naaora gu ato abaangira re. Na i aima ora gu ato re na diabese na ki digisihe. Wa vura duhe nga i aima kpiko, ani rengbe ka biyo wa gu wene abaoro ato abaangira rengbe ka ngarasa gu vovo aboro tona ato barambeda. Oni berãnga pa gu bipai ka gu vovo aboro re du nani, ka i inihe nga, agu aboro naima wi rogo ato gu susungu ho kaa ngana yó wa i aora, ya mo i mangingo nyanyaki asadatise watadu ka manga ome ka susa kura aboro te? Ka pepai nimasaku, agu adezire re aima ino gupai nga ka abaangira vura faa afa wai vurũ, i rengbe arengba nagbehe. Sidu, pa maa agu aKristano nangia aEbere gu kpiapai nangia ga agu adezire naadu wa nduro re ku berãyo yó arengbe nangarasa yó i ‘oro gu oto naadu fuyo kumbatayo kindi’ a kina wai rengbe ani ka mangaha areme.

12. Agu akpiapai Pauro afura tipaha, wai duhe na nyanyakipaha furani?

¹² Badungu gu ruru aboro Pauro afura tipa yó apai adu tipa yó wakina gu du tipa rani areme a. Nikpiapai, Noa araki ti gu regbo Ime Akangbii aambeda ka gbarasa gu zegino nadumbata. Ani naraka a mbembedi na digido gi zegino re. Mbori aya fu Abarayama na Sara wee i mbu kpuyo ki ndu kurogo gu kura rago tipa ka manga ndikidi irisombori na ki sungu yo ka pido gako kidohe si digisitihe. Mbori nazungodi rani nga ka ani rakinga fu tirani ya tipa ko ruho ka ida na gaani pai na ani ki gbia agu amaku ko nakido rani tipaha. Moize andu nunguro rogo kere ngbakungbo tipa ka ndu kurogo Ringara Mokido. Ani naraka a rogo gi kere zegino re tipa ka ndu kurogo gu vovo zegino Mbori nakido rani nani. Si ninyanyakipa pai furani tipa ani berẽkurii gu raka nangia ga gi ruru aboro re na ki wiriki agu apai i amangihe tipa ka sa ngbarago ti Yekova na ki wirikipai a be agu apai i amangihe nga gu naasanga ngbarago ti Yekova ya.​—Rom. 15:4; 1 Kor. 10:11.

Wai Du I Adu na Diabese?

13. Gini kpakarapai Noa agbiatiko nani, na gini naundoko ko dibehe?

¹³ Ginihe naundo gi ga Yekova amoyambu re i hipai na kidu na diabese rogo gi gayo ato abaangira re? Oni kparianga gupai Pauro akehe tipa Noa. (Oni gedi AEbere 11:7.) Gu “ime akangbi [naye] ku auru kpotosende, ka ba tunga unga ahe dunduko” angia gupai Noa ‘abingo ho’ mbata ya. (Bam. P. 6:17) Si angia gupai naamanganga mbata ya, nga gu he naima du niʹiiriwoho. Ono Noa abingo ho wa gupai arengbanga namanga ya te. Tipagine? Mbiko ko adu na idapase nga gupai Yekova nagumbaha ko duwa ka ko mangihe. Noa aabingo ho nga gupai Mbori asana ko tipa ko mangihe si adu nikpakarakpakaraha te. Kuba gure, “kina wo ko amangi he dũ.” (Bam. P. 6:22) Oni makianga agu apai dunduko si aaida Noa mangihe nga ka dua kurungba, dungura anyaa, ye na riahe tipa aboro na anyaa, tungusapai tipa ka fu zahe fu aboro, na ngerafuo gako aborokporo i du nyanyaki rogo toro yo. Agi apai re dunduko angianga taatapai te, ono “kina wo ko amangihe.” Wa si avura duwo, ga Noa idapase gbiati hipai aima du niyuguyuguhe rogo gako raka yo, na si aye na amaku fuko na fu gako aborokporo.

14. Gini aʹasada aAbarayama na Sara ahi he, na ginipai ani awirikaha ti ni?

¹⁴ Gu ue aboro Pauro afura tipa yó angia aAbarayama na Sara. Mbori akusiyo kusayo rogo gu gayo wene raka i aarakaha Ura yo ka i ainongo gupai nikadu fuyo kumbatayo ya. I nga wene kpiapai furani tipa gu idapase awonga ya na giasangba ti regbo akpakarapai. Nibi wai Abarayama akpinyemu ka mbupa gako kura apai tipa ndikidi irisombori, si adaada i yambu ko nga ‘ba fu agu yo dunduko idi pa Mbori.’ (Rom. 4:11) Pauro afura tipa kina banguapai, mbiko agu aKristano re aima ino dungu apai tipa ga Abarayama raka. Ono wa si avura duwo, gupai Pauro aayugoho rogo gupai re ima nyaka, si nayaa: “Agi yo re nakpi rogo idapase, ka i adia nga akidohe ya, ono i abi he mbata yo ki nipoi kuti ni tuturũ, ki nikusi he ya aboro kura ringara nangia yo, ni tata aboro ri gi zegino re.” (Eb. 11:13) Si tie ziazia nga, gayo idapase kuti Mbori gbiati gayo pagume naako nangia agu apai naundo yó i hipai ka oro gi ato abaangira re.

15. Ginihe nafõngbadu Moize ko raki gu ngbatunga raka ko arakihe re?

¹⁵ Moize nga gu kura ga Mbori moyambu dagba agu adezire naadu wa nduro re. Moize ambu gu bawene momu ko adu nani nga ka raka gu beedi raka, ki sia “kina gu pai nga i mangi ko gbegberẽ dagba ga Mbori aboro.” Ginihe nafõngbadukoyo ko mangi gipai re? Pauro akaragapai ki yaa: “Ko angere tipa gu mosoro i ka fu he. . . . ko aru nyanyaki, nibi gu ko ka bangirise abi nga ko ya.” (Oni gedi AEbere 11:24-27.) Moize aadunga nifudifudiko be gu “ngbarago nga ga ingaapai” nika imanga ya te. Ko aima ino Mbori wenengai gbiati agu akidohe nangia ga Mbori na si asako ko yugu bakere wingbaduse na hipai. Ko afu tiko nyanyaki ka ngbembatayo fu awiri aYisaraere tona Ezipeta yo ka ndu naayo kurogo Ringara Mokido.

16. Tipagine rago agberãnga ti ni ti Moize ho Mbori agumba gupai ni fuko nga ko adanga Ringara Mokido yo te?

¹⁶ Wakina Abarayama, Moize abingo ga Mbori akidohe si niringbisitihe ti ragoko te. Ho aYisaraere aambakada tiyo ni tipa ka rimo kurogo Ringara Mokido, Mbori ape gupai fu Moize nga: ‘Mo abi gu ringara re ku barangba ro; ono mo andu nga ku rogo gu ringara nga gu mi nafu fu awiri aYisaraere te.’ Gipai re aduwo mbiko mbata kusayo, ko gbiati Arona ngbaduyo aimi be gu samungu nangia ga aboro si ki sayo i ‘ti ndiko kuti Mbori dagba awiri aYisaraere pati aime Meriba yo.’ (Pa Rug. 32:51, 52) Ya mo rago agberẽ ti Moize watadu ko akpipai? Oó. Ko afu maku fu aboro na ki digisihe na agu afugo nga: “Ako aYisaraere! oni na ngbarago! Da du wa oni, nga agu aboro Yekova abatasi yo, nga vurakube tipa undo ro, nga gu basape nga ga ga iriwo!”​—Pa Rug. 33:29.

Agu Apai Ani Awirikaha

17, 18. (a) Nibipa gaani abaangira unga, ginipai rengbe ani ka wirikaha be agu adezire naadu wa nduro? (b) Ginipai ani nika wisigoho rogo gu kekeapai naye fuo gere?

¹⁷ Nibi gu fugöpai mangi ani he tipa gu raka nangia ga agu “adezire du pati rani kirikiri ni ngenge yo wa ndurõ” re, si ziazia nga, ka ani aida ka ora ato abaangira dati digidoho, ani duwa ka ani duna idapase kuti Mbori na gako akidohe. (Eb. 11:6) Si naida gi idapase re du niyuguyuguhe rogo gaani raka awere mbiko wenepai kinaho Mbori nakido rani tipaha kumbatayo. Ono gu kparakparapai du dagba ga Yekova amoyambu na agu aboro zanga idapase nga, ga Yekova amoyambu nangera tipa gu raka du kumbatayo. Ani rengbe nabi “gu ko ka bangirise abi nga ko ya” na ki oro gu ato abaangira re na hipai.​—2 Kor. 5:7.

¹⁸ Taatapai ngaha ka ora gu ato abaangira nga ga aKristano te. Ono wa vura duhe wo, si kindi taata furani ani nyasi agu abaangira re na diabese. Rogo gu kekeapai naye fuo gere, ani nika wisigopai tipa gu kura apai rengbe ka undo rani rogo gu ato abaangira re.

Oni Rengbe ka Sakarogoyo?

• Tipagine Pauro adi regbo ti ni ka kepai nigbangaha tipa gu ruru adezire nadumbata?

• Wai gu gu kpiapai nga ga agu “adezire du pati rani kirikiri ni ngenge yo wa ndurõ” angarasa rani ani oro ato na hipai?

• Ginipai wiriki oni he ti wisigo oni pai tipa gu ngbatunga ruru adezire duwa Noa, Abarayama, Sara, na Moize?

[Gu sura du ti kpewaraga 22]

Abarayama na Sara aidi ka mbu gu bawene raka i aarakaha kpuyo yo Ura yo