Agu Aboro Nakpinyemu Yekova, ‘He ho Sa ka Kotosi Yó Te’

1. Waigu naoro ato abaangira sa ayugu gupai nga ri ambunga ato abaangira te?

GARÃ Mary Decker adu wa bawe na biata ho ri atona ora ato abaangira ni. Rogo gu garã nangia 1984, ri angia wene naoro ato abaangira na badungu aboro aaberãha nga ri nika gbehe. Ono tie, pai amangi ri ka ri aoranga ki dati digidoho yo ya. Ri akoto ti ndu kurari ki ti ka ri anyasanga ato abaangira ya. Ri aigira nikerehe na ki guari kusayo ngbagene. Wa si avura du wo, ri aambunga ato te. Mbata fu garã sa, ri akaraga tiri berewe ki tona ato na ki gbehe rogo gu ato abaangira nangia ga zegino namangi rogo gu garã nangia 1985.

2. Rogo gini gine ndikidi aKristano aora ato abaangira ngbaha, na ginipai si aida ani moiberã rani fuoho?

² Wangia ani aKristano, ani naora ato abaangira nga ga nyenye unga. Si naida ani moiberã rani tipa ka gbehe. Anga gaani ato abaangira wa guru ato si aidaha boro oroho niipo tipa ka gbehe te. Na anga si gbua nga kungbo mbaro ato boro adia regbo kupati ni te. Kuba gure, i rengbe ka ringbisaha kuti gbanga ato abaangira nga gu naida na hipai tipa ka gbehe. Gu mokedi nangia Pauro amangisunge na gu masaku nga ga ato abaangira rogo gako waraga fu agu aKristano naadu Korinda yo, nangia gu gbata aboro anaaora ato abaangira rogoho. Ko akepai ki yaa: “Oni aina nga ya agu yo nazo abangirã i naora dunduko, ono gu ni sa nadia mosoroho te? Oni óro wa ka oni da ada.”—1 Kor. 9:24.

3. Waigu duhe nga agu aboro dunduko naora rengbe arengba ka gbia nyenye unga?

³ Ziazia Kekeapai naya ani oro ato abaangira. (Oni gedi 1 AKorindo 9:25-27.) Mosoroho nga nyenye unga, singia fu mbedimbedi aKristano ku ngbangbaturũ yo watadu fu agu aboro nika raka auru kpotosende. Gi ato re kia, agu aboro dunduko naoraha rengbe arengba ka gbia mosoro ka i hipai ki da ti digidoho. (Mt. 24:13) Gu boro naora gi ato abaangira re, ní rengbe ka kpa ti dia mosoro sa, kina gu ka ní adanga ti digidoho ya watadu ní aoranga ringbisihe kuti arugute te. Kurigure, gere nga gu bangisa ato du gaha mosoro nga nyenye unga.

4. Ginipai nasa gaani ato abaangira nga ga nyenye unga nikpakarakpakaraha?

⁴ Anga si nitaatapai kada ti digido gi ato re te. Si naida ani pekefuo gaha arugute gbiati gaha ringbisapai. Kina Yesu Kristo sa nangia gu boro naoro gi ato re ki digisihe zanga ko koto kandara bara sa. Ono gako bawiriki nangia Yakoba ake gupai nga apefuo Kristo “nakota dunduko rogo dungu apai.” (Yak. 3:2) Nairiwo wai du gipai re nirengo! Gaani zangarengba watadu ga kura aboro rengbe ka sarani ani zere ti ngba gi ato re watadu ani mbu ato tipa wiri guru regbo. Ka pai wa gure mangi, si rengbe kadu nga ani naida undo tipa ka tona gi ato re berewe. Si aidanga iriwo gupai ti tirani nga ani nakota akota dedede te.—1 Aba. 8:46.

KA ONI KOTO, ONI NYE KINA ROGO ABAANGIRA

5, 6. (a) Waigu duhe nga he ho sa rengbe ‘ka kotosa’ Kristano te, na ginipai rengbe ka undo ní ní ‘guari kuari’? (b) Tipagine kura aboro naguari nga ti i ho i ati ni ya?

⁵ Isoke oni aima mangasunge na agu afugo nga ‘kota’ na ‘ti’ bara dunguhe tipa ka sakapai tipa agu apai nga ga toro. Agi afugo Ziazia Kekeapai re rengbe arengba ka rukuba agu apai nga ga toro, ono anga si ti aregbo dunduko na bangisa rogoyo te. Nikpiapai, ani bingo gu fugo du rogo Asanza 24:16 nayaa: “Ruru boro nati bara saba, ki niguari berewe; ono gbegberẽ aboro nitiwi atiwa be gberãngbi.”

⁶ Yekova ambunga agu aboro nakido kutiko i koto na ki ti kusayo watadu i gbiatiyo na agu arungo nga gu i arengbanga ka diabehe ya rogo gayo irisombori yo te. Ko nakido rani nga, ko nika undo rani ani ‘guari berewe’ tipa wa ka ani ndu kumbatayo na irisoko. Nairiwo wai gipai re afu wasa fu agu aboro dunduko nakpinyemu Yekova dudunguro ngbaduyo yo! Gbegberẽ aboro na nyemu ka guari kuari te. I agbatanga undo be ga Mbori ziazia toro na be gako aboro te, watadu i naká undo aká ho i afuhe ni. Ono tipa agu aboro ‘nakpinyemu ga Yekova rugute,’ mbia kota ho rengbe ka dia yó kusayo nyeanye kindi ngbagene ato unga te.—Oni gedi Atambuahe 119:165.

7, 8. Waigu rengbe boro ‘kati’ na Mbori ki inipai aino funi?

⁷ Ti kura aregbo, aboro naingapai bambiko rungbura. I rengbe ka manga gu ingapai re bara dunguhe. Ono i ima rengba kadu niruruyo bangiri Yekova ka i ‘guari kuari berewe,’ nga ka manga ndikidi saberã na ki tona ka manga rurupai. Ani rengbe ka bi gipai re rogo gu gene Mbori amangipai ngbaha na aYisaraere. (Yes. 41:9, 10) Asanza 24:16, ani nidipai rogoho mbata, si anyakasanga kina gu gbegberẽpai sa nga pa ‘ti’ ani te, ono gu wenepai a du tipa ‘guari’ ani berewe vurube gu undo nga ga gaani weneringi Mbori. (Oni gedi Yesaya 55:7.) Yekova Mbori na Yesu Kristo nayugo gayo kido kuti rani ningarasa yó rani ani ‘guari berewe.’—Tam. 86:5; Yo. 5:19.

⁸ Ka si vura du nga gu boro naora ato koto watadu ní ti tingba gbanga ato abaangira, ní ima rengba kadu na regbo beni tipa ka guari na ki mangipai niipo ka digiso gu ato re. Rogo gi gaani ato abaangira du tipa nyenye unga re, ani ainongo “gu uru na gu saa” si nika digo ti ni te. (Mt. 24:36) Ono tie, ka ani akotanga dedede ya, si nikadu furani taata ani oro gu ato re ki digisihe. Wai rengbe ani ka ne kotoka?

AGU APAI RENGBE KA SARANI ANI KOTO

9. Gini ambiakota ani nika wisigopai tipaha?

⁹ Ani wisigingo apai bisue nga gu du furani nimbiakota, gaani arungbura, gu nyemupai nga ga borose, gu irairapai akuarani amanga rani nani, gberãngbi watadu rungosiro, gbiati agu azangarengba nga ga kura aboro. Ani tingidi gupai nga, ka ani koto, Yekova na bakere zerangbaduse tiko. Ko abingo rani nibasa nga airasamungu te.

10, 11. Gini rungbura Davide asovura kutini?

¹⁰ Gaani arungbura rengbe kadu wakina gu mbia du ngbagene abaangira. Ho ani abi agu apai ni namangi rogo ga Bakindo Davide raka na ga Petero, ani nabi ngbatunga arungbura ue, nga zanga duna zatise gbiati gunde be aboro.

¹¹ Gupai Bakindo Davide amangihe na Bataseba ayugu gako rungbura nga ko adunga na zatise te. Na ho Nabara afura ni fuko gbegberẽ, Davide ambedi ka mangako gbegberẽ. Nirengo, wa si avura dunga ko aadunga na zatise te, ko aambunga sa ngbarago ti Yekova te. Kura aboro aundoko tipa ko du berewe wenengai rogo toro yo.—1 Sam. 25:5-13, 32, 33; 2 Sam. 12:1-13.

12. Waigu Petero anye kindi rogo ato abaangira wa ko avura kota vurũ?

¹² Petero agunde be aboro, kini kotoko nikerehe ti kura aregbo, ono wa si avura duwo, ko anye niruruko kindi fu Yesu na fu Yekova. Nikpiapai, ko aoro rimo Bairako bara biata. (Rk. 22:54-62) Kusa, Petero aingipai nga ka manga agu akristano nangia aGendiria wa payo kusende ti agu aYudo nangia ayeretise. Ono tie, gu mokedi nangia Pauro aima bi gupai ziazia nga dungurati nga ba kparakaro te. Ga Petero bipai adu niirairaha. Mbata fu gi ga Petero mangapai re gberesi awirina, Pauro arugu ko nibasa. (Gara. 2:11-14) Ya mo rukö asa Petero ko mbu gi ato abaangira re? Oó. Ko amakia gi ga Pauro arugute re na ki mangipai kutini ki tona ato abaangira berewe.

13. Waigu rengbe kaza kadu nimbia kota?

¹³ Ti kura aregbo, kaza ima rengba kadu nga ga boro rungbura. Gipai re rengbe kadu a nimbia kota. Si rengbe ka gberesapa gaani ato nga ga toro na ki sarani ani zere. Nikpiapai, wirinarani sa du Japan yo awoki nikerehe tipa agarã 17 tifuo ziori bapatiza. Gi gari kaza re adi regbo beri naabaha ri ki tona ka rungbura rogo toro yo. Fuo bete regbo, ri azere rogo toro yo. Abaakumba ue andu ka ngarasa ri. Gayo wene afugo angarasi ri ri ki tona nduge berewe tipa adunguratise. Sangbari nga, “Mi akpari be nunga bambiko awirina afu sene fere na wasa.” Gi wirinarani re ima karaga tiri awere kutingba ato abaangira berewe.

14, 15. Gini nyanyakipa pai si aida ani mangihe ho gbegberẽ nyemupai amanga rani ni? Oni funga kpiapai tipa gipai re.

¹⁴ Gu nyemupai nga ga borose aima sa dungu aboro i koto. Ho du ani ni wa gure, si naida ani mangi ome kadu gigiri berãraniyo, rogo gaani mangapai, na rogo toro yo. Si naida ani tingidi gu rugute Yesu afuhe nga ani “ba” ai guhe kusa yo rengbe ka sarani ani koto, singia bangirani watadu bee rani. Gipai re nakoda gu wasiwasi aberã na mangapai naasa kura aboro i mbu ato abaangira.—Oni gedi Matayo 5:29, 30.

¹⁵ Wirina i asonosi ko rogo gu ngbadimo kporo nga ga aKristano aya gupai ko naatingidaha nga wai ko anaasota na nyemu kodaba na akurako. Ko ayaa: “Mi anaadunga ti aregbo dunduko wenengai te, bambiko mi anaabi tire wa mi arẽnga kadu dagba aboro te.” Ho garãko adani nga 20, ko adani bazakigene na kingia moundo abaakumba rogo dungurati. Ko akoto gbegberẽ, i ki rugu ko rogo toro yo, na abaakumba ki undoko. Kparakpee, wisigo Fugo Mbori, na dia regbo ka undo aboro, nga agu apai naundo ko ko guari kuari berewe sa gi ato nga ga toro re. Fuo susa agarã kusa, ko ayaa: “Ti kura aregbo, gu nyemupai re nidu adu tire, ono mi naambunga ha si furi re te. Gupai mi nainihe nga ka Yekova mbunga boro i asadi ní susi gu ka ní hihe te. Mi idi kuti gupai nga, Mbori ima ino gupai nga mi nika hihe ahi.” Yangada sangbako nga: “Agu akpakarapai dunduko mi ahihe mi agbia mosoroho rogo vovo zegino. Si nga gupai mi aidaha! Tona awere kaa ndu kumbatayo, mi nikaa sota kindi.” Ko ima diaberã ka nye rogo gi ato abaangira re.

16, 17. (a) Ginipai naundo gu wirina naberẽ gupai nga i amangiko ngba iraira gene? (b) Tipa ka ani kotonga ya, ginipai si aida ani gbeberã rani kutini?

¹⁶ Gu irairapai akuarani amanga rani nani rengbe arengba kadu nimbia kota. Wirina sa du France yo nadumbata nibakumba abihe nga i amangiko na irairapai ngbaduko ki imi, na ko ki zingi. Nisangbana gipai re, ko ambu nduge kuba adunguratise yo na ki zere rogo toro yo. Abaakumba ue andu ka biko na ki degetuyo wenengai zanga defugo ngbako wa ko aafura. I angarasiko ko ba agu apai naafuda ko ku auru Yekova na ki nyakasi gupai fuko nga, gupai nyakipaha gbe nga ka sa ngbarago ti Mbori. Ko adi gi gayo arugute re kugume na fuoho aturongo te ko ki karagatiko sa ato abaangira na kini mangi apai rogo dungurati berewe.

¹⁷ AKristano dunduko si aida i gbeberãyo gbe kuti gu boro Mbori nasia ní niri dungurati nga Yesu Kristo, angianga kuti kpakpa aboro ya. Yesu, du bangiriko “wa mirãwe” nabi apai dunduko wenengai kisusi gu rengbe ani ka bihe. (Yugo. 1:13-16) Nikpiapai, ko ima inoho nga gupai rengbe ani ka bihe niˈirairapai, si rengbe kadu nga ani du gihe ngba iraira gene watadu aruganga tirani nani ya. Ko nika ruga agu apai du rogo dungurati ngba ruru gene na ti wene regbo. Rogo gi gene re, si aidanga ani mbu gu mangapai watadu diaberã nga ga kuarani Kristano si du nimbiakota furani te.

18. Waigu rengbe ani ka ru nyanyakii barabangiri aˈasada watadu akpakarapai?

¹⁸ Gu kura ambiakota ue nga gberãngbi watadu rungosiro gbiati agu azangarengba nga ga kura aboro rogo dungurati. Rogo gu ga Yesu sanza du tipa bamitunga, ko aya agu aboro nika gbiatiyo na ‘gberãngbi watadu rungosiro’ tipa gako pai, si asayo i koto. Ka si vura du nga gu rungosiro re ye be gani aborokporo, amurakporo, watadu agbia ngbii, “ka tarãha adu nga kpotoni yo ya” watadu ka ní anyakanga rogo toro yo ya, si ima rengba ka mbusa ní. (Mt. 13:21) Ono tie, ka ani banda kpotorani yo niruruhe, gu pangbanga nga ga Kindo nika undo rani ani nyakasi tarã gaani idapase. Ho ani agbiatirani ni naˈasada, si naida ani kpari fu Mbori na kini berẽkurii agu apai nyakipaha. (Oni gedi AFiripoio 4:6-9.) Yekova rengbe arengba ka fu ome furani, ani ru nyanyakii barabangiri aˈasada ka ani ambunga akpakarapai si du nimbiakota furani ya.

19. Wai rengbe ani ka ne gupai boro naimisi rani nani ka si dunga nimbia kota ya?

¹⁹ Si nafu kina gberarago nga tipa dungu agarã, kura aboro aima mbu agu azangarengba nga ga kura aboro si sakadayo kusayo ti ato abaangira. Zanga giatise riipa agu apai nabi kina ga boro sangbakpotoseyo aima da nimbia kota fuyo. (1 Kor. 8:12, 13) Ka boro imisi rani, ya mo si naida ani mbu gipai re si du nigu riko bapai? Ziazia Kekeapai naruga aKristano ka i sapungo ngbanga akurayo ya, i mbupai fuyo, na ki mbu kpatakara kina kuti gupai ru bangiriyo. (Rk. 6:37) Ho ani agbiatirani ni na gu ngbatunga mbiakota re, ani sana tirani nga: ‘Ya mo mi nasapangbanga aboro ringbisihe kina kuti gupai mi akpinyemuhe? Pa ino mi gupai nga awirinami nga kpakpa aboro, ya mo mi ambu gayo azangarengba si sakada re kusayo ngbagene ato abaangira nga ga unga?’ Gu nyemu Yekova du tirani rengbe ka undo rani ka ani mbunga ai gupai boro amangaha si ká na ani ti nyasa gi ato abaangira re ya.

ONI ORO NA HIPAI NA KI NE KOTOKA

20, 21. Ginipai oni nadiberã ka mangaha rogo gu ato abaangira du tipa unga re?

²⁰ Ya mo oni diberã ka ‘digiso’ gaoni ato abaangira? (2 Tim. 4:7, 8) Oni du wa ka oni amanga wisigopai nisase. Oni mangisunge na Ziazia Kekeapai gbiati agu awaraga du mburuhe rii Ziazia Kekeapai tipa si undo roni na wetekapai, na berãkuriipai, wa oni ini agu ahe du nimbiakota. Oni sanahe tipa ziazia toro si fu ome furoni. Oni tingidi gupai nga, boro ho nika zanga mosoro abaangira nga ga unga mbiko ní anaakota ti kura aregbo watadu kini tiwi te. Ní rengbe ka guari berewe na ki tona gi ato re. Ní ima rengba ka mangasunge na agu ambiakota re tipa ka ru riihe ka ino gu nyanyakipa kpakarapai namaa gani idapase ngbapai.

²¹ Ziazia Kekeapai nagumbapa agu aboro naora gu ato abaangira nga ga nyenye unga re nga i du zaaza. Anga si wa dakpa gu tarambiri nandu na aboro sa diabese te. Ani duwa ka ani oro gi ato abaangira nga ga nyenye unga re nitirani. Wa ani kaa mangaha, gu “bakere zereda” nga ga Yekova duwa yuge nika songoda rani. (Tam. 119:165) Ani rengbe kadu naa kido nga ko nikaa fu amaku afu kindi furani awere gbiati nyenye amaku kumbatayo fu agu aboro dunduko nika nyasa gu ato re.—Yak. 1:12.