4 Runga ga Mbori Mangapai te Ya Mo Rengo Du?

Gupai aboro agumbaha furoni: “Mbori du nazoga gi zegino re, na agu apai dunduko namanga, si namanga kina ku sangba gupai yo ko akpinyemuhe. Wa duhe nga zegino hi be kparakaro, iraira mangaapai, na arungosi, kina Mbori du nasa agi apai re si niimangi wo.”

Gupai Ziazia Kekeapai ayugoho: Anga Mbori nga mburu gu iraira mangaapai du rogo zegino areme te. Ziazia Kekeapai nayaa tipa Yekova wee: “Gako manga sunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai.”​—Pa Fu Rugute ni Ue he 32:4.

Mbori ni weneringi ko fu aboro dunduko, kodihe na aguyo arẽnga na gako weneringise ya. Nikpiapai, “ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.” (Matayo 5:45) Ko namangapai fu ngbatunga aboro dunduko kina sa a wa Amokedi 10:34, 35 ayugoho kini yaa: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”

Gine tie nasa gbegberẽ apai si niimangi? Badungu aboro nasia ka manga irairapai zanga pekafuo ga Mbori ruru mangaapai. (Pa Fu Rugute ni Ue he 32:5) Ziazia Kekeapai nayugo gupai nga Mbori du mbugene fu vurako nga Bakitingbanga ko du na pagbia kurii zegino.a (1 Yoane 5:19) Ono tie, Mbori ambunga ko ambu gi gako gbegberẽ zogarago re nimangi kindi te. Ko ima ringbisapa gu rago ‘ko nika gbarasa ga bakitingbanga mangaapai’ ti ni.​—1 Yoane 3:8.

Wai ino rengo narengbe ka undo roni: Kina iriwo rago rengbe ka ti tironi ka gia agu apangbanga du tipa iraira mangapai, rungo, na iraira sarangbanga. Pa ino oni gupai nasa gbegberẽ apai si niimangi rengbe ka undo roni oni rugutironi na ndu gupai du apai ti ni nigbegberẽhe, na ndu gupai aboro avura kaa manga ome ti ni tipa ka sa zegino niwene ba ka i arengbanga ya. (Atambuahe 146:3) Kuba gupai nga oni naagbarasa gaoni regbo gbiati omeroni tipa kaa manga gu ariapai du tipa bete regbo watadu gu ariapai kaa manganga ya, oni rengbe kadu naa mabangirise kumbatayo nikido oni kuti ga Mbori akidohe.​—Yugoti 21:3, 4.

Pa ruga ani tirani na ndu gupai nasa gbegberẽ apai si niimangi rengbe ka undo rani ho ani agbiatirani ni na kere kpakaraapai. Ho boro amanga rani ni ngba gbegberẽ gene, ani rengbe ka kpara wakina gu ga Mbori moyambu nangia Abakuka nakpari ki yaa: “Rugute zere ka rurupai andu nga ku mbata yo wa sa ya.” (Abakuka 1:4) Mbori aazinganga na Abakuka tipa gipai ko agumbaha re te. Kuba gure, Mbori akido Abakuka nga Ko ima ringbisa regbo tipa ka rugusa agu apai re, na ki undo ko ko gbia ngbarago rogo agu akpakarapai yo ko aagbia tiko nani. (Abakuka 2:2-4; 3:17, 18) Teketeke a, kido kuti ga Mbori kidohe tipa ka rugusa iraira mangaapai rengbe ka undo roni oni gbia pazereda na kidu zezeredi berã roni yo rogo gi zegino duna iraira mangaapai rogoho re.

[Gu rukutu kekeapai du bandu kpewaraga yo]

[Gu sura du ti kpewaraga 7]

Ya mo Mbori du nzunzu nasa arungo na irairapai si niimangi?

[Gu sura du ti kpewaraga 7]

© Sven Torfinn/​Panos Pictures