Rengo Ima Rengba Ka Aria Gaoni Raka

ISOKE, oni avura giapa watadu i avura yugo ziree sa furoni tipa Mbori dagba agu ziree gi zungudizungudi kekeapai re nakusihe kuyangura. Si ki vura duwo, oni ki bihe kindi nikparakapai tipa ka aria gaoni idapase, gbe, ka si du nga oni aima ida kutini tipa gbanga regbo.

Anga gbegberẽpai nga ha ka si duwo te. Dungu akanisa aidanga gupai nga i ringbisi gayo yugopai kuti gupai Ziazia Kekeapai agumbaha te. Agu akurayo naasada ka songoda gayo ziree yugopai niya yó wee, Ziazia Kekeapai navundo tihe avundo ka aboro rugunga tiyo na agu apai du rogoho nzunzu te. Nirengo, badungu ga Yesu abawiriki angia agu aboro payo adu kusende, i awirikanga pai nibakerehe te, ono i akakuti agu apai Yesu ayuguhe fuyo.​—Amokedi 4:13.

Oni rengbe ka bihe nga ka oni aawisigopai ka ino singia agu apai oni aidi kutini nga rengo, si nika du wa idapase tironi te. Ono ya mo ka oni ageda Ziazia Kekeapai nga Fugo Mbori du na gako pangbanga rogo fu aboro tipa i rugutiyo na gupai ko aidaha beyo, rago gberẽ agberã tiko nani wo? Oó. Kuba gure, Fugoko nangarasa roni oni wisigi Ziazia Kekeapai nisaroni, si nayaa: “Oni kpária pa gu he nga ga Mbori nyemu he du ni wene he, nzunzu, ni ziazia ha.”​—ARomo 12:2.

Wirika oni rengo tipa Mbori na nyanyakipaha angianga mbiko gupai gbua nga oni nika wirika vovo apai tipa ko ya, ono mbiko si rengbe ka aria gaoni raka si du niwenehe. (Yoane 8:32) Deanne, i nigumba pa ri rogo bambata kekeapai ima sonosa idapase kuti Fugo Mbori awere. Sangbari nga: “Mi aainongo mbata nga Ziazia Kekeapai gu duadu zukazuka te da kinaho mi atona ni kaa wisigoho. Mi ima ino Yekova awere, angianga ni kungbo Mbori ya, ono ni gu Buba nakpinyemure akpi. Mi ima gbia ndu gupai nzunzu si aida mi naaraka ti ni.”

Isoke, oni awisigi Ziazia Kekeapai mbata zanga oni gbia undo behe. Kangia wo si adu, ka oni mbunga gedaha ya. Asadatise ka ino agu apai du rogo Ziazia Kekeapai ho oni naima wirika ziree ni tipa Mbori wakina nduge ngba iraira gene kurogo gu ba oni aadanga mbata rogoho ya. Oni ima rengba ka tonaha ni ipo wenengai, ono kina rago rengbe ka gberã tironi ho oni ka inga ni ngba gu gene si naida oni ndu ngbaha. Ka oni aida ka da rogo gu ba oni andunga mbata kurogoho ya, oni ndu ngba ruru gene na kidu na ruru inohe tipa gu gene nandu kurogo gu ba re.

Ya mo oni naida ka ino gu ruru gene nandu koyo du Mbori ni na ki wiriki rengo tipa ko? Ani nahõpai beroni oni ndu fuo agu aDezire Yekova kadu rogo gaoni dagbarago watadu oni kepai ti gu adresi du ti kpewaraga 4 nga ga gi magazini re tipa wisigo Ziazia Kekeapai na oni gbua zanga oni tumo marã tipaha.

[Gu sura du ti kpewaraga 9]

“Oni kpária pa gu he nga ga Mbori nyemu he du ni wene he, nzunzu, ni ziazia ha.”​—ARomo 12:2