Agu Apai Du Rogo Ziazia Kekeapai yo​—Gine Nika Undo Roni Oni Girogoyo?

‘MO AOKO agi apai re be airatatamana na airainahe, ono ki yugu he fu kina rukutu agude.’ (Ruka 10:21) Agi afugo Yesu agumbaha fu Bako du ngbangbaturũ yo re, si nayugo gupai nga, si naida ani duna wene sino berã tipa ka giarogo agu apai yo Ziazia Kekeapai ayugoho. Ga Yekova tatamana niyuguyuguhe rogo gu gene nga, ko afu gu buku furani nga gu kina agu aboro duna umbasitise gbiati nyemu i yugupai fuyo narengbe ka giarogoyo.

Si nikpakarapai fu badungu rani tipa ka sonosa gu sino nga ga umbasitise. Bambiko ani dunduko naima dia gu sino nga ga rukö be atitarani nigaani ũkumbo. Kurii gure, ani naraka rogo “kusa rago [watadu yangara arame],” dagba agu aboro ‘nakpi kina nyemu tiyo, nga airanyakari, airaabiatise.’ (2 Timoteo 3:1-4) Agi apai re nga agu asino naká na boro ti giarogo agu apai Fugo Mbori ayugoho. Nibirapai, ti kura aregbo, sino agu aboro-rukö du pati rani rengbe arengba ka rimo kurogo rani yo. Wai tie rengbe oni ka gbia gu sino berã si aidaha tipa ka giarogo agu apai du rogo Ziazia Kekeapai yo?

Mbakada Ngbaduseyo Gbiati Berã

Ezara, nangia bangbembatayo fu gu ga Mbori aboro nadu bakuru kusayo, “arugu kpotoko yo [watadu ngbadukoyo] ya ko agbata ga Yekova rugute.” (Ezara 7:10) Ya mo bete agene ho rengbe ani ngbaha ka mbakada ngbaduraniyo? Ii. Ani rengbe ka tonaha nidu ani na ruru bipai tipa Ziazia Kekeapai. Gu mokedi nangia Pauro akepai fu akurako aKristano ki yaa: “Wa oni adi gu pai oni agi ku gume berani nga kina ga Mbori pai, oni adia nga a wa ka si angia ga aboro pai te, ono niga Mbori pai, a wo du he ni rengo.” (1 ATesaroniko 2:13) Wa vura duhe nga akumba nakeke Ziazia Kekeapai, agu apai i akekehe dunduko aye be Yekova. Pa ruga ani tirani naapa gu nyanyakipa rengo re nika sa rani ani duna nyemu agu apai ani agedaha.—2 Timoteo 3: 16.

Gu kura gene rengbe ani ka mbakada ngbaduraniyo ngbaha nga kparakpee. Wa duhe nga ga Mbori toro nadu kugiipa ke Ziazia Kekeapai, ani rengbe ka giarogo gu pangbangaa du rogoho yo a mbiko kina gu ome nga ga ziazia toro. Ani duwa ka ani kpari fu Mbori tipa ko fu gako ziazia toro furani. Oni kparianga pa wai gipai re angia gupai bake apapara Atambuahe anaabaka bangiriko tipaha, ho ko akepai ni ki yaa: “Mo fú rugatinapai fere, si mi ka ka kuti ga rugute ti ni; ki berẽ pa ha na kpotore yo dunduko.” (Atambuahe 119:34) Si aidanga ani kparikpee tipa kina giarogopaiyo sa te, ono si naida ani kparikpee a tipa ngbaduraniyo du niwenehe tipa ka ida na agu apai ani agedaha rogo Ziazia Kekeapai. Tipa ani rengbe ka giarogo agu apai du rogo Ziazia Kekeapai yo wenengai, ani duwa ka ani duna nyemu gia agu apai nga rengo.

Ho oni kaa berã ni kurii agu apai oni agedaha tipa ka tona mangasunge nani, oni makia wai rengbe Ziazia Kekeapai ka undo roni. Ani na babeedi nduapai berani tipa ka geda Fugo Mbori, ono gu nyakipaha gbe nga si nambedisa rani koyo du Mbori ni. (Yakoba 4:8) Wa ani agedapai tipa wai Yekova amangapai sa agu apai naamanga aboro nibasasa, wai ko abi aguyo nakpinyemu ko na kikiipayo, na wai ko amangapai fu aguyo nambu ko, ani narugatirani naapa gu ngbatunga boro nga ko. Gu nyanyakipa pai si aida ani moihe ku berã rani yo ti aregbo dunduko ho ani ageda Ziazia Kekeapai ni nga ani naida ka inido tirani na Mbori, na ngba gi gene re, ani ki nyakasi gaani pagume dagbarani naako.

Agu Aũkota Rengbe ka sa Rani ka Ani Dunga na Ruru Sino Berã Ya

Gine rengbe ka bengeta rani ti giarogo Fugo Mbori yo? Gu bambata ũkota nga, pa ka ani kina kuti agu aida nga ga agu aboro du ani kutii beyo. Nikpiapai, oni rengbe ka ka kina kuti agu aida na aberã nga ga gu iriiripa aboro du payo kuari. Ono tie, ginipai rengbe oni ka mangaha ka si du nga ngbatunga agu aboro re arakanga kuti agu apai du rogo Fugo Mbori te, watadu i abingo gu rengo nga ga Fugo Mbori na kikipaha te? Ho du ngbatunga apai ni wa gure, si rengbe kadu nikpakarakpakaraha tipa ka giarogo agu apai nzunzu Ziazia Kekeapai ayugoho. Si ki ta du were, Ziazia Kekeapai nangarasa rani ani wisigi agu apai i ayugoho furani sirisiri.—1 ATesaroniko 5:21.

Maria, navungu Yesu, agbia tiri na kina ngbatunga gu kpakarapai re. I asonosiri ringbisihe kuti agu asino atitase nangia ga aYuda. Ri anaairisa ga Mose aNdiko airisa wenengai, na zanga kapa, ri anaandu andu ku bambutiria yo. Kusa rogo gari raka, ri akparia gupai nga, gu gene irisombori avunguri ayuguhe furi aima da nigupai Mbori aidanga nani berewe ya. Si ki ta du were, Maria aidi na ga Yesu yugopai na ri adu dagba agu aboro nangia bambata aboro gu dungurati nga ga aKristano. (Amokedi 1:13, 14) Anga gipai ri amangihe re aayugo zanga irisa koyo du avunguri ni watadu koyo du asino atitayo ni te; kuba gure, si ayugu gari nyemuse koyo du Mbori ni. Ka ani aida ka gbia undo be gu yugopai nga ga Ziazia Kekeapai, ani duwa ka ani peresi padu ani niruru rani fu Mbori kumbatayo fu padu ani niruru rani fu kura boro, a wa Maria amangihe. Si nafu kina gberarago nga, badungu aboro abingo gu rengo nga ga Ziazia Kekeapai na kikiipaha te. Gu kura aboro rengbe be kina pekafuo agu asino atitase nga ga gayo apambori nga gu du mburuhe rii kina ziree. Gu kurayo ayugonga irisa tipa rengo te rogo agu afugo i agumbaha na rogo gayo gene raka. Sidu, tipa boro idi na gu rengo nga ga Ziazia Kekeapai, si naida ni mbupa kura apai ambu: Bambiko si rengbe ka sa roni oni duna zanga giatise na abakurearoni, na gaoni amurakporo, gbiati gaoni abadiasunge, na zavura gaoni aborokporo a. (Yoane 17:14) Wa vura duhe wo, gu tatamanatatamana kumba nangia Soromo akepai ki yaa: “Mo ngbé rengo, ka mo bági nga ha ya.” (Asanza 23:23) Ka oni abi rengo na kikiipaha gbe, Yekova nika undo roni aundo oni girogo Ziazia Kekeapai yo.

Gu kura ũkota berewe rengbe ka sa rani ka ani gedinga gu pangbangaa nga ga Ziazia Kekeapai kini girogoyo ya nga zanga ida ka manga agu apai si apehe. Yesu aya fu gako abawiriki wee: “I fu he [fu] roni oni ini gu gbugbu pai nga ga gu ngbi nga ga ngbangbaturũ, ono i afu ngaha fu yo te. Bambiko kpoto gi rika aboro yo re asa tihe ni dokoyo ho, tuyo ni ngbangbangba ha.” (Matayo 13:11, 15) Badungu agu aboro Yesu anaatungusapai fuyo aima kiso tuyo ka i aidanga ka giasangba ko ya, sidu, ka i aidanga ka sa gayo berã ya. Nairiwo wai i adu kia ti gu babagiahe nandu nunguro Yesu afura tipa ko rogo gako yugopai na kpiapai! Ho gu babagiahe re abi gu mbia fongo ni nadu na bakere genoho, ko abagi gako ahe dunduko, ki ngbe gu mbia fongo re na marãha. Pa gia ani rogo gu rengo yo nga ga Ziazia Kekeapai rengbe kadu na kikiipaha bangirani teketeke wa kina wai gu kikiipa mbia fongo re adu bangiri gu babagiahe re.—Matayo 13:45, 46.

Gu Kpakarapai Duti Ida Boro Gupai Nga I Yugupai Funi

Gu bakere kpakarapai rengbe ka sa boro ka ni ginga rogo agu apai du rogo Ziazia Kekeapai yo ya nga pa ida ni i yugupai funi. Boro rengbe ka bihe nikpakarapai tipa ka ida na gu vovo apai gu boro du pani kusende apehe funi. Si tie nangia gupai nadu tipa ga Yesu Kristo abawiriki, ‘i adunga nitatamanatatamana aboro na ni airainahe te.’ (Amokedi 4:13) Pauro asakirogo ndu gupai yo ga Yesu amokedi ‘adunga ti ni nitatamanatatamana aboro na ni airainahe’ ya ho ko akepai ni ki yaa: “Oni ngére pa yamba roni, awirina, wa i ayamba nga agu yo du na tatamana wa du pa borose ni dungu yo te, agu yo nga bahe ni dungu yo te, agu yo nga irisiirisi yo ni dungu yo te. Ono Mbori asia gu mumungo ahe nga ga zegino, ko ba zee ti agu yo du na tatamana. Mbori ki sia gu rurungbura ahe nga ga zegino, ko ba zee ti agu yo du nyanyaki.” (1 AKorindo 1:26, 27) Ka oni bihe nga si nikpakarapai furoni oni yugu umbasitise ho gu boro du pani kusende ayugopai ni furoni, oni tingidi gupai nga, ni gbua nga gu gene Mbori amangasunge rogo ho yo ka yugopai furoni. Gini irisa duho kiipaha kisusi gu nga Yekova yugupai furani, nga gaani ‘Bakerepa Bayugupai’?—Yesaya 30:20, NW; 54: 13.

Gu ga Asurio barutiriivura nangia Namana angia gu boro nabihe nikpakarapai tipa ka gia rugute ngba gu boro pani adu kusende. Nigbata ko gene tipa ka husa gako ngbataka, ko andu ka bi gu ga Yekova nebi nangia Erisa. Ono Mbori afu gu rugute nadu tipa husa Namana ku vurube moyambu gbua. Agu arugute nebi afuhe na gu gene i agumbaha ngbaha asaha nikpakarapai fu Namana ko mangi agi arugute re, bambiko ko aidanga ka giasangba ga Mbori nebi ti bambataha te. Fuo bete regbo, Namana aʹaria gako berã na i ki husi ko. (2 Abakindo 5:9-14) Ani nagbia tirani na kina gu ngbatunga kpakarapai re a ho ani awirikapai ni rogo Ziazia Kekeapai. I rengbe ka gumba gupai furani nga, tipa ani rengbe ka hu rogo toroyo na ka mbakada gaani sino mangaapai, si naida ani pekefuo vovo sino raka. Ya mo ani adu na umbasitise tipa ka idaha fu kura boro ni yugu gupai furani si aida ani mangihe? Kina agu aboro duna nyemu boro yugupai fuyo, i rengbe ka giarogo agu apai du rogo Ziazia Kekeapai yo.

Gu banyaki nadu rogo gu zogarago nangia ga Kandake, nakindo Etiopia, ayugu wene sino berã. Ko aaga ku Afirika yo rogo gako ngbagida ho gu mokedi nangia Firipo aoro ni koyo du ko ni ki gbia ko. Firipo asana gu kumba re tipa ka ino singia ko agirogo gupai yo ko aagedaha. Gu banyaki re akaragapai nibakere umbasitise ki yaa: “Ka mi wiri pa ina ha wãi? Kina[gu ka] boro . . . yugu he fere.” Fuo gia ko rogo Fugo Mbori yo, i abapatizi ko. Fuo gure, “ko andu gako nunguro na ngbarago.”—Amokedi 8:27-39.

Badungu aDezire Yekova nga agu aboro akiongo payo ya. I nanungusa wisigo Ziazia Kekeapai na aposo dunduko rogo akporo nga ga agu aboro bangeyo nasusi amirioni sita. Wa duhe nga Ziazia Kekeapai nayugo bawene gene raka kisusi, kini saki rogo gu bangisa ndikidi maabangirise duho tipa ngbatunga aboro, na kini undo aboro i ini wai rengbe yo ka inido tiyo na Mbori, badungu amirioni aboro abi gupai nga, wisigo Ziazia Kekeapai na kini girogo gupai yo si apehe, si nga gu ngbarago adunga ba ringbisaha ti ni ya. Si nigupai rengbe oni arengba ka gbia ngbarago behe.

[Gu kpiahe du ti kpewaraga 7]

Namana abihe nikpakarapai tipa ka gia rugute ngba gu moyambu pako adu kusende

[Gu kpiahe du ti kpewaraga 7]

Pa gia ani rogo Ziazia Kekeapai yo nafu wasa ku ngbaduraniyo