Ya Mo Ndupai Ho Boro Ini Gupai Ziazia Kekeapai Agumbaha Tipa Kodaba?

“Mi atona ta na akumbagude ho garãre aduni bawe. Ti tonatonaha, ani aanizadi berani ki nyoro ngbarani. Fuoho aturongo te ani ki tona kaa zapada tirani. Ho garãre adani 15, mi atona kaa mangasunge. Na agu akumba naadu basunge yo atona kaa pe sangbaa fere nga i naida ani kodi ba naayo. Mi aaida ka asada apai naabaha na ki kodi tire kuti gimi aboro basunge kaa manga agu apai i aamangaha. Mi aaida agu aboro mi aakoda tire naayo idi na mi. Gipai re asa gupai nga mi fu tire dudunguro sa kodaba.” SARAH,a AUSTRALIA.

YA MO ngbaroni rengbe ka zera ka oni ini gupai nga i asonosi Sarah kina rogo gu ngbadimokporo nga ga aKristano? Avunguri aasadi ka ruga ri ri raki ringbisihe kuti agu arugute nga ga Ziazia Kekeapai du tipa ruru mangapai. Ono ri asia gupai naadu kia ti gure.

Badungu aboro rengbe ka manga gu siapai ri amangihe re. I nabi ga Ziazia Kekeapai bipai tipa kodaba nigupai regboho aima susa. Kura aboro abingo ho nigbegberẽpai kadu niboro pambori na kini rimisi tise kurogo wasiwasi kodaba te.

Ya mo ndupai ho ka ino agu apai Ziazia Kekeapai ayugoho tipa kodaba na kini raki ringbisihe kutini? Ziazia Kekeapai naya tipa tihe wee, “si aye be ga Mbori Toro si ki rengbe tipa yugopai.” (2 Timoteo 3:16) Ka oni idi kuti gupai nga Mbori nakusi aboro, na gako toro du naadu kugiipa ke Ziazia Kekeapai, ndupai kinaho oni ini gupai si agumbaha tipa kodaba.

Badungu aboro aruganga tiyo na gupai Ziazia Kekeapai ayugoho tipa kodaba te. Agu abarumbatayo du rogo pambori namanga tiyo nga i nairisa Ziazia Kekeapai airisa, ono i nayugo agu apai du kia tipa kodaba tigu du rogo Ziazia Kekeapai. Nirengo, gipai re ima sa gupai nga apambori kparaka.

Kuba gupai nga oni naakido kina kuti gupai aboro agumbaha, si angba gbe, ka oni di regbo tipa ka wisigo gupai Ziazia Kekeapai ayugoho tipa kodaba nitironi. Rogo gu kekeapai naye fuo gere, ani nika wisigo asanahe bawe aboro asanaha tipa ga Ziazia Kekeapai bipai nibipa kodaba. Rogo gu kekeapai re, oni nika gbia ndikidi akaragapai nga gu du mburuhe kina boro rii gupai Ziazia Kekeapai ayugoho. Gu yangara kekeapai nga ga gi zungudizungudi kekeapai re nika fura tipa ndu gupai du gaani asiapai ti ni na kina sangbanaha kurirani.

[Gu rukutu kekeapai du bandu kpewaraga yo]