Tipagine Si Aida Ani Raki Ti Ni Ringbisihe Kuti Agu Arugute Nga ga Ziazia Kekeapai?

GU BIPAI nga ga Ziazia Kekeapai tipa kodaba, ya mo regboho ima susa watadu si naká aká na aboro ti mangayo gupai ngbatiyo? Oó. Kuba gure, gu bipai nga ga Ziazia Kekeapai tipa kodaba rengbe ka undo rani ani ne:

▪ Agu akaza boro adiaha ti kodaba

▪ Du na vuse fu gu kumba angianga gaani badiarogatise ya

▪ Gu gbegberẽ sangbanapai naye be kparaka

▪ Gbegberẽ sangbakpotoseyo

▪ Gu imisiri namanga boro ho ní abi gupai ni nga aboro amangisunge na kpotoni tipa ka mbisa gayo nyemupai

Gu Bakusirani nga Yekova Mbori, ko naida ani gbia ngbarago gbiati undo ti wai ani amangasunge na agu agamahe ko afuhe furani.a Mbori du ‘nayugopai furani sa u.’ (Yesaya 48:17) Gu boro naraka ringbisihe kuti gupai Ziazia Kekeapai agumbaha nibipa kodaba, agu amaku ní agbiaha nga:

▪ Mbori naida na gani pai

▪ Ní nadu na zereda berãni yo

▪ Ní nadu na wene pagume dagbani na gani aborokporo

▪ Ní nadu na wene rimoni dagba aboro

▪ Ní nadu na irisa tipa tiní

Ono tie, na ka si du nga oni arakanga awere ringbisihe kuti gupai Ziazia Kekeapai agumbaha nibipa kodaba te? Ya mo oni rengbe ka aria gaoni gene raka? Ya mo ka oni aria gaoni gene raka, Mbori niberẽ kindi kuriipa gu sino mangaapai naanidu tironi mbata?

Oni makianga gi rengo re: Agu aboro naadu rogo agu adungurati nangia ga aKristano rogo bambata sa kama agarã, mbata fu i gi rengo, i angia aboro meteka, airabäri na ni agu akumba nanaakodaba na akurayo. I aria gayo gene raka na ki gbia amaku. (1 AKorindo 6:9-11) Areme, badungu akutu aboro rogo zegino dunduko mangi ariapai wa gure. I ima mbu gu wasiwasi raka i naarakaha ki gbia gu undo boro agbiaha ti raka ní ringbisihe kuti gupai Ziazia Kekeapai agumbaha. Nikpiapai, oni bingo gu kpiapai nga ga Sarah nga guri furayo tipa ri rogo bambata kekeapai.

“Mi Agbia Bakere Zereda Berãre yo Niipo”

Sarah abi gupai nga gu gene ri araka gari raka ngbaha re, si ayengo na gu ranirii gbiati ngbarago furi ri aaidaha te. Ri agumba gupai nga: “Mi aye kadu na gbegberẽ sangbakpotoseyo. Si adu fere nibakere pa zee na mi aberẽ gupai nga mi nikadu adu na vuse watadu mi nika dia kere kaza. Bangire agonga ti gupai nga Mbori kina ti ni te, mi aima ino gupai a nga gu gene mi aaraka gi raka ngbaha re, si angbanga tiko te. Mi abi tire nga mi nga kere bibiriko boro, na si ki batasi omere wa pai.”

Niyangaraha, Sarah agbia ome tipa ka manga ariapai rogo gari raka yo. Ri agbata undo be avunguri du nga aDezire Yekova gbiati agu aKristano nga abaakumba du rogo dungurati. Sangbari nga: “Kina ngbare nazere ka bi gu dawedawe nyemuse avungure gbiati abaakumba ayuguhe fere. Mi agbia bakere zereda berãre yo niipo.”

Awere, Sarah na awiri ue ri asonosa ra. Sangbari nga: “Mi naafura fu awire gbaiga tipa gu siapai mi amangihe rogo raka yo. Mi naida i ini wai pa basa mi agu arugute nga ga Mbori adu na maapai kurire. Gi sásá nga ka undo yó i ini gu undo rengbe boro ka gbiaha ti kpotoni na berãni yo ka ní aaraka ringbisihe kuti agu arugute nga ga Ziazia Kekeapai nibipa kodaba. Mi ima inoho awere nga Mbori nafu arugute furani nibipa kodaba bambiko ko aidanga gbegberẽpai mangi rani te.”

Oni ima rengba a ka gbia agu aundo naye ti pekafuo ga Mbori arugute. Ziazia Kekeapai nafu gu kidohe nga: “Gu ndika nga ga Yekova du ni ruru he, ningiisi kpotoyo yo; sangba Yekova du ziazia, ni hasi bangirise. . . . Bakere mosoro du tipa ka kuti ni.”​—Atambuahe 19:8, 11.b

[Gu rukutu kekeapai du bandu kpewaraga yo]

[Gu sura du ti kpewaraga 8]

Gu boro nabasa sangba Ziazia Kekeapai, ní naba rungo ku kpoto gani badiarogatise yo

[Gu sura du ti kpewaraga 9]

Agu aboro naraka ringbisihe kuti gupai Ziazia Kekeapai agumbaha, i na gigiri sangbakpotoseyo na kidu na wene pagume dagbatiyo na gayo aborokporo