Ya Mo “AKristano” Dunduko Nga Ndikidi AKristano?

BANGE aKristano wai rogo zegino dunduko? Ringbisihe kuti gu buku nga Atlas of Global Christianity, rogo gu garã nangia 2010, bangeyo aima susa abirioni ue zegino dunduko. Ono gu bangisa buku re nagumba gupai a nga, agu aKristano re na gayo abe pambori bangehe naima susa 41,000. Si dunduko du na gaha aida nga ga pambori gbiati andiko tipa sino mangaapai. Mbiko gi badungu abe pambori nga ga gu pambori nga ga “aKristano” re, badungu aboro si avundo yó ka nyemu pambori adunga berewe tiyo ya. I nabaka bangiriyo nga, ‘Ya mo agu aboro dunduko naya “aKristano” nga yó re nga ndikidi aKristano?’

Ani furanga tipa gipai re ngba kura gene kia. Gu boro nandu nunguro kurogo kura ringara kia, ho ní ada ni ti ngbanda ringara, i nasana ní tipa gani ringara. Si naida ní fu waraga afu nga gu nayugo gupai nga ní nzunzu nga boro gu ringara ya ní ní naye rogoho re. Wakina gure a, si naida Kristano mangi kura apai amanga angianga ka gumba gupai gbua nga ní na idapase kuti Kristo ya. Gu kura apai kinaho si aida ní mangihe ka yugo gupai nga Kristano nga ní. Gini ngbatunga apai ngaha?

Gu fugo nga “Kristano,” i amangisunge nani nibambataha tifuo gu garã nangia 44 F.B.K. Gu bakeke kuru apangbanga nga ga Ziazia Kekeapai nangia Ruka ayaa: “I ayambu gu rimo abawiriki nga Akristano mbata kina Andiokia yo.” (Amokedi 11:26) Oni makia gupai ane nga agu aboro i anaayamba yó nga aKristano, i angia ga Kristo abawiriki. Ginihe nasa boro ni ga Yesu Kristo bawiriki? Gu buku nga The New International Dictionary of New Testament Theology nasaka rogoyo niyaa: ‘Pekafuo Yesu nibawiriki nakoda fu boro gani raka dunduko tipa ka pekafuo Yesu.’ Sidu tie, ndikidi Kristano nga gu boro napekafuo agu ayugopai na arugapai nga ga Yesu na kpotoni yo dunduko. Yesu nga gu boro naenge gu pambori nga ga aKristano.

Ya mo si taata tipa ka gbia ngbatunga agu aboro re dagba gu zegino aboro naya areme i nga aKristano? Ginipai Yesu nitiko agumbaha nga si i nika ino ndikidi apefuoko ti ni? Ani nahõpai beroni oni makianga wai Ziazia Kekeapai akaragapai kuti agi asanahe re. Rogo gu kekeapai naye fugo gere, ani nika wisigo afugo Yesu bisue nga gu nika undo rani ani ini ndikidi apefuoko. Ani nika bi wai agu aKristano naadu rogo bambata sa kama agarã amangi agu apai re. Na ani nika asada ka ino ada dagba gu dungu aboro naya areme aKristano nga yó namanga agu apai re.