Ya Mo Oni Nayugokpia ga Yekova Taarimo?
“Ani nayugo gu taarimo nga ga Gbia wa ngana.”—2 KOR. 3:18.
GAONI KARAGAPAI NGA GINE?
Wa vura duhe nga ani nga aboro ingapai, wai gu rengbe ani ka fu taarimo fu Yekova?
Wai gu kparakpee na padu ani pati agu adunguratise nga ga aKristano aundo rani ani yugukpia ga Mbori taarimo?
Gini he rengbe ka undo rani ani naafu taarimo afu kindi fu Yekova?
1, 2. Tipagine rengbe ani arengba ti ni ka wirika asino Yekova?
ROGO pai sa watadu gu kuraha, ani dunduko naima wira avungurani. Sidu, ngbarani azeranga ho boro agumba gupai ni fu paranga kumbagude nga, ‘Boro mo wakina bamo’ te. Boro rengbe ka ya fu degude wee, ‘Ho mi abiro ni, mi natingida kina ba namo.’ Dedede, agude nawirika kina gupai i abi avunguyo i nimangihe. Ginipai tigaha du tipa rani? Ya mo ani rengbe ka wirika gu Barani du ngbangbaturũ yo nga Yekova? Wa vura duhe nga ani abingo ko te, ani rengbe arengba ka inopai tipa gako wene asino ka ani wiriki Fugoko, ki bi agu ahe ko akusihe, na ka ani aberã kurii averesi, gbe agu nafura tipa agu afugo gbiati mangaapai nangia ga Wiriko, nga Yesu Kristo. (Yo. 1:18; Rom. 1:20) Ani rengbe arengba ka yugokpia ga Yekova taarimo.
2 Mbata fu Mbori kusi Adamu na Eva, ko aima du na gu kido nga aboro rengbe arengba ka manga gupai ko akpinyemuhe beyo, ka yugokpia asinoko, na ki ye na taarimo fuko. (Oni gedi Bambata Pai 1:26, 27.) Wa ani akakuti sinombori, si naida ani naayugokpia asino gu boro nakusi rani. Ka ani mangihe wo, ani nikadu na momu berani ka yugokpia ga Mbori taarimo zanga bipa gaani sino mangaapai, bakio wai ani awirikipai, na gu ngbatunga ani aenge rogoho. Tipagine gumba ani he ti ni wo? Bambiko “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amo. 10:34, 35.
3. Wai gu aKristano nidu ho i amangasunge ni fu Yekova?
3 Mbembedi aKristano nayugokpia ga Yekova taarimo. Gu mbembedi Kristano nimokedi nangia Pauro akepai ki yaa: “Ono ani dunduko, na kpakpurani ni dadidadi he te ani nayugo gu taarimo nga ga Gbia wa ngana, ani ki ye ka wira Gbia ti taarimo ku ri taarimo.” (2 Kor. 3:18) Ho gu nebi nangia Moize azoro ni rii bagangara yo na gu seke-seke ambia naadu na Agu Arugute Nadu Bawe riihe, kpakpuko yo akiko akiko mbiko wa ko afura na Yekova. (Gate 34:29, 30) Wa vura duhe nga pai wa gure amanganga furani ho ani afura ni na aboro te, na kpakpurani akikongo te, i nabi wai abi ani angi na ngbarago ho ani afura ni fuyo tipa Yekova, asinoko, na gu wene ringbisapai du ko nani tipa rikaaboro. Singia ani nga mbedimbedi aKristano watadu ani nga kura akandoro, ani nakiko wa bitirobi rogo gu gene nga ani nayugokpia ga Yekova taarimo rogo gaani raka yo na rogo gaani sunge tungusapai yo. (2 Kor. 4:1) Ya mo oni nayugokpia ga Yekova taarimo niraka oni ngba gu gene ko akpinyemuhe na nitungusa oni pa Kindo ti aregbo dũ?
ANI NA NYEMU KA YUGOKPIA GA YEKOVA TAARIMO
4, 5. (a) Wakina gu mokedi nangia Pauro, gini he ani asovura nani? (b) Ginipai ingapai amanga rani nani?
4 Wa du ani niga Yekova amoyambu, ani naida ka yugo irisa fu Bakusirani na ki taasirimo ko rogo agu apai yo dunduko ani amangaha. Ono tie, dedede anga gu ruruapai ani aida ka mangaha ani amangaha te. Gure nga gupai gu mokedi nangia Pauro asovura nani. (Oni gedi ARomo 7:21-25.) Pauro asakipai ziazia tipa ndu gupai gipai re amanga rani ti ni ki yaa: “Aboro aingi ainga dũ, ki ti bungudu ti ga Mbori taarimo.” (Rom. 3:23) Bambiko gu zangarengba ani adihe be Adamu, ani dunduko du ni akanga fu gu ‘Bakindo nga Ingapai.’—Rom. 5:12; 6:12.
5 Gini he nga ingapai? Si nga ai gu he adunga na ngbanya dagbaha na asino Yekova, gako gene mangaapai, agu apai ko naima sigiraha fu gako aboro, gbiati gupai ko akpinyemuhe ya. Ingapai nagberesa pa ga boro pagume na Mbori. Kina wai boro nizumu guanza ki gusi he, kinawo a ingapai asa rani ani gusi gupai Yekova akpinyemuhe berani. Ani rengbe kita inoaino nimangi ingapai watadu ani rengbe ka mangaha zanga ino. (Geda 15:27-31) Ingapai nga gu he du kina boro rogo kure rani yo na si naturuso rani ti Bakusirani. (Tam. 51:5; Yes. 59:2; Koro. 1:21) Rogo gi gene re, ngbatunga aboro dunduko adunga gayo mangaapai na ngbanya dagbaha na gupai Yekova akpinyemuhe ya na si nasa gupai nga ka i yugungo kpia gako taarimo ya. Zanga kapa, ingapai nga gu kere gbárã nambusa aboro dunduko.
6. Wa vura du ani nikpakpa aboro, wai gu rengbe ani ka yugokpia ga Mbori taarimo?
6 Wa vura du ani nikpakpa aboro, Yekova furani ni “gu Mbori nga ga maabangirise ko.” (Rom. 15:13) Ko aima fu gu motumo tumorii furani nga ga Yesu Kristo nga gu nadia ingapai kusayo. Ka ani du na idapase kuti gu motumo re, ani dunga berewe “ni zizi aboro fu ingapai” te ono ani duadu na rengba berani ka yugokpia ga Yekova taarimo. (Rom. 5:19; 6:6; Yo. 3:16) Ka ani banda gu pagume re dagbarani na Yekova awere, ko fu amaku afu furani awere na ani kidu na maabangirise tipa kadu nirengberengbe rani kumbatayo na ki raki nyeanye kindi. Nairiwo gu ngbarago du ani nani ka bi gupai nga Mbori nabi rani ni agu aboro rengbe arengba ka yugokpia gako taarimo si ki vura du vurũ nga ani kindi nga kpakpa aboro!
YUGOKPIA GA MBORI TAARIMO
7. Ginipai si aida ani inihe tipa tirani tipa wa ka ani ruho ka yugokpia ga Mbori taarimo?
7 Wa du ani ni aboro ingapai, ani dunduko du na gaani arungbura. Ka ani aida ka yugokpia ga Mbori taarimo, si naida ani ini agu arungbura aino du tirani nibasasa dunduko. (2 Peka 6:36) Si naida ani inipa gu gbegberẽ nyemuapai du rogo rani yo, na ki mangi ome tipa ka diabehe tipa wa ka ani ruho ka yugokpia ga Mbori taarimo wenengai. Nikpiapai, ka si du nga ani ti kurogo gu wasiwasi ingapai nga ga bi agu ahe nayugokpia kundiri aboro, si naida ani ini gupai aino nga si naida i fu undo furani rogo toro yo na ani ki mangi ome tipa ka gbia gu undo re. (Yak. 5:14, 15) Gere ka ngia bambata diandue tipa ka tona raka gu raka nayugo irisa fu Mbori. Wa du ani ni airisi Yekova, si naida ani naamanga wisigotise amanga dedede ka bihe singia ani namangapai kindi kuti gu ruruapai ko nasigiraha tipa rani. (Snz. 28:18; 1 Kor. 10:12) Ka gaani arungbura vura duadu wai vurũ, si naida ani mangi nyanyaki asadatise tipa ka diabehe tipa wa ka ani ruho ka yugokpia ga Mbori taarimo wenengai.
8. Wa vura duhe nga ani nga kpakpa aboro, ginipai si aida ani mangihe?
8 Yesu nga gu bangisa boro naraki ki kpi zanga manga gupai nagberẽ ti Mbori, na ko ki yugukpia ga Mbori taarimo. Ono ani tie wa Yesu te, ani nga kpakpa aboro. Wa vura duhe wo, ani rengbe arengba na si naida ani mangi ome amanga tipa ka wirika gako kpiapai. (1 Pet. 2:21) Yekova nawisigo gu ome ani amangaha na gu sonakumbatayo ani amangaha na kini fu maku kurii gu asadatise ani amangaha tipa ka ye na taarimo fuko.
9. Wai gu Ziazia Kekeapai aundo aKristano i yugukpia ga Mbori taarimo wenengai?
9 Fugo Yekova rengbe ka undo rani ani ini wai rengbe ani ka yugokpia gako taarimo wenengai. Agu apai rengbe ka undo rani nga wisigo Ziazia Kekeapai dudunguro na berãkurii agu apai ani agedaha rogo Ziazia Kekeapai. (Tam. 1:1-3) Geda Ziazia Kekeapai naˈauru dunduko rengbe ka undo rani ani mangi sonakumbatayo. (Oni gedi Yakoba 1:22-25.) Ino Ziazia Kekeapai nga mburu gaani idapase na si nga gu he rengbe ka nyakasa gaani diaberã ka ne manga kere ingapai na ki nimangi gupai ngba ti Yekova.—Tam. 119:11, 47, 48.
10. Wai gu kparakpee narengbe ka undo rani ani mangisunge fu Yekova wenengai?
10 Tipa ka yugokpia ga Mbori taarimo, si naida gupai a nga ani “kpatagara kuti kpe.” (Rom. 12:12) Ani rengbe arengba na si naida ani kpari akpara fu Yekova tipa ko undo rani ani mangisunge fuko ngba gu gene du niruruhe. Tipa ka mangaha wo, si naida ani sanako tipa ziazia toro, idapase, ome tipa ka diabe asada ka manga gbegberẽpai, gbiati rengba tipa ka ‘yugo ga rengopai nzunzu.’ (2 Tim. 2:15; Mt. 6:13; Rk. 11:13; 17:5) Kina wai gude naangera kina koyo du bai ni, kinawo a si aida ani naangera koyo du gu Barani ni du ngbangbaturũ yo, nga Yekova. Ka ani sanako tipa ko undo rani ani mangisunge fuko wenengai, ani na gu kido nga ko undo rani aundo. Ka ani berẽnga gupai nga ka ani akpara fuko, gure gbua nga ani nafuda ko afuda ya. Kuba gure, rogo gaani kpee yo, ani taasirimoko, kini tambuako, kini gbata gako rugapai ho du ani ni rogo asada, na kini sana ko tipa ko undo rani ani mangisunge fuko ngba gu gene nika fu taarimo fu ziazia rimoko.—Tam. 86:12; Yak. 1:5-7.
11. Wai agu adunguratise nga ga dungurati aundo rani ani yugukpia ga Mbori taarimo?
11 Mbori aima fu gu sunge fu ‘ruru kangara moyambu’ nga ga ngerafuo gako akandoro. (Mt. 24:45-47; Tam. 100:3) Ruru kangara moyambu na nyemu ka undo rani tipa ani yugukpia ga Yekova taarimo. Gene sa i amanga gipai re ngbaha nga vurube adunguratise. Gaani adunguratise naundo rani ani mangi ariapai rogo gaani raka yo na ki mbakadi agu asino rani nga ga aKristano, wakina gu barungu arokoo nirungu rokoo kina kuti bakio boro tipa si ngba angba na ní. (Eb. 10:24, 25) Sidu tie, ani moingo ho nigaani sásá tipa kaa ndu mbata fu dunguratise tona, ka ani saha nisino rani kaa da kusa, ani zanga bete agu apai azanga rengbe ka ‘rungo’ rani rogo toro yo tipa ani mangi ariapai rogo gaani raka yo wangia ani ga Yekova amoyambu.
ANI WIRIKI MBORI
12. Wai gu rengbe ani ka wirika Mbori?
12 Ka ani aida ka yugokpia ga Yekova taarimo, ani duwa ka ani “wíriki Mbori.” (Ef. 5:1) Gene sa rengbe ani ka wirika Yekova ngbaha nga kadu na gako bipai tipa apai. Ka ani amangapai ngba gaani gene kia, si ayengo na irisa fuko te, na si ima rengba ka gberesa rani. Wa duhe nga gi zegino ani araka rogoho re tii gu maapai nga ga gu gbegberẽ ko nga Satana Bakitingbanga, si naida ani sota asota gbe ka soga gupai Yekova asogaha na ki kpinyemu gupai ko akpinyemuhe. (Tam. 97:10; 1 Yo. 5:19) Si naida ani idi kuti gupai na kpotorani yo dunduko nga gu yangara gene rengbe ani ngbaha ka mangasunge fu Yekova nga ka manga agu apai naye na taarimo fuko.—Oni gedi 1 AKorindo 10:31.
13. Tipagine si aida ani sogo ingapai ti ni, na ginipai pa soga ani he narengbe ka sarani ani mangihe?
13 Yekova ima soga ingapai, na kina gu bangisapai re a si aida si du tipa rani. Nirengo, si naida ani du tuturũ ti agu apai rengbe ka sa rani ani mangi ingapai. Nikpiapai, si naida ani ne samungu kuti ndikidi pambori, nga gu ingapai rengbe ka sa gupai nga ka ani rẽnga tipa ka yugokpia ga Mbori taarimo ya. (Pa Rug. 13:6-9) Sidu tie, ka pai dunga dagbarani na agu aboro nasamungu kuti ndikidi pambori watadu agu aboro naya awirina nga yó ono namanga agu apai afunga irisa fu Mbori ya ya. Ka si vura duadu vurũ nga ní nigu boro ani araka na ní rogo kporo sa vurũ. (1 Kor. 5:11) Wiri undo ho rengbe ani ka gbiaha ti asada ani ka yugo gupai nga zire du agu aboro nasamungu kuti ndikidi irisombori watadu aguyo nafura gbegberẽ bara ga Yekova riigbu agumbaha te. Nirengo, si aidanga ani gbe berani fuo agu apai i agumbaha singia rogo gayo awaraga watadu rogo Internet yo te, manga ani he wo rengbe ka gbarasa gaani pagume na Yekova.—Oni gedi Yesaya 5:20; Matayo 7:6.
14. Ho ani amanga omeni tipa ka yugokpia ga Mbori taarimo, gini sino si aida si du tirani, na tipagine?
14 Yugo nyemuse nga gu wene gene rengbe ani ka wirika gu Barani du ngbangbaturũ yo ngbaha. Ii, wakina ko, si naida ani naayugo nyemuse fu akuarani. (1 Yo. 4:16-19) Gu nyemuse du dagbarani nasa gupai nga aboro ini rani ni ga Yesu abawiriki na ni ga Yekova amoyambu. (Yo. 13:34, 35) Wa du ani nikpakpa aboro, si rengbe kadu furani ti kura aregbo nimbumbuhe tipa ani yugu nyemuse, ono si naida ani nimangi nyanyaki asadatise ti aregbo dunduko kaa yugo nyemuse. Sonosa ani nyemuse rogo rani yo gbiati kura asino Mbori rengbe ka undo rani ani ne manga agu apai ayugongo nyemuse ya gbiati ingapai.—2 Pet. 1:5-7.
15. Wai gu du nyemuse na maapai kurii gaani pagume na akuarani?
15 Nyemuse nasarani ani mangi weneapai fu kura aboro. (Rom. 13:8-10) Nikpiapai, ka ani du na nyemuse koyo du gaani badiarogatise ni, ani mangingo bäri te. Nyemuse tipa abaakumba gbiati irisa tipa gayo sunge rengbe ka undo rani ani du na giasangba na kini pekefuo gayo rugapai. Agu agude nakpinyemu avunguyo, i nagiasangba yó kini irisi yó na ki zanga fura barayo gbegberẽ. Ka ani kpinyemu akuarani, ani bingo yó na umba pa yó te, ani furanga fuyo a zanga irisa te. (Yak. 3:9) Na agu abaakumba nakpinyemu ga Mbori akandoro namanga yó na nunga.—Amo. 20:28, 29.
16. Wai yugo nyemuse narengbe ka undo rani gene tungusapai yo?
16 Si naida aida a ani yugu nyemuse gene gaani sunge tungusapai yo. Mbiko gu nyemuse du ani nani tipa Yekova, ani ambunga gu sakparakpa du aboro nani watadu gu gbegberẽ karagapai ani agbiatirani nani gene tungusapai yo si zeresi rani te. Kuba gure, ani nandu kindi kumbatayo na tungusa wene pangbanga. Nyemuse nika sarani ani mbakaditirani wenengai na ki asaditirani ka tungusapai wenengai. Ka ani du nirengo na ndikidi nyemu Mbori tirani na gaani amurakporo, ani bingo sunge tungusapai nigu he gbua si aida ani naamangaha te. Kuba gure, ani bi sunge tungusapai nibakere momu na ani mangihe na ngbarago.—Mt. 10:7.
ANI NIYUGUKPIA GA YEKOVA TAARIMO AYUGO KINDI
17. Gini undo ani agbiaha ti ino ani gupai nga ani na iraira nyemuapai rogo rani yo?
17 Badungu aboro rogo gi zegino ani araka rogoho re abingo ingapai nigbegberẽhe te, ono ani nabihe abi nigbegberẽhe. Si du nasa gupai nga ani nisovura kuti gaani iraira nyemuapai. Pa ino ani gaani iraira nyemuapai rengbe ka undo rani ani raba sangba kpotorani yo tipa wa ka si undo rani ani ne ingapai ho si ayeni ku berãrani yo na ngbadurani yo. (Rom. 7:22, 23) Rengo ngaha nga, ani ima rengba kadu nirurungbura rani, ono Mbori rengbe ka nyakasa rani tipa ani mangi gupai du niruruhe ti aregbo dunduko.—2 Kor. 12:10.
18, 19. (a) Gini he naundo rani ani du na diabese rogo gaani vura kuti gbegberẽ atoro? (b) Ginipai si aida si du nigaani diaberã?
18 Ka ani aida ka yugokpia ga Yekova taarimo, ani duwa ka ani sovura a kuti gbegberẽ atoro. Gu gaani ũvura nga ga toro Mbori nafuhe furani rengbe ka undo rani ani so gi vura re kidu na diabese. (Ef. 6:11-13) Satana namanga ome ti aregbo dunduko tipa ka dia gu taarimo kusayo be Yekova kina Ko sa narẽ nani. Bakitingbanga namanga ome a nyanyaki tipa ka gbarasapa gaani pagume na Yekova. Nairiwo wai rago agbera ti Satana ka bi gupai nga ani na badungu amirioni nga ga kura kpakpa akumba, adee, na agude nakakuti gaani ruru mangapai fu Yekova na kini fu taarimo fuko! Sidu tie, ani ndunga andu kindi kumbatayo kaa sambuo Yekova wakina gu agu amaraika du ngbangbaturũ yo asambuo ko niyaa: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.”—Yugo. 4:11.
19 Si dunga adu nigaani diaberã kaa fu taarimo fu Yekova ka ginipai vura manga amanga wai vurũ. Zanga kapa, ko na ngbarago ka bi gupai nga badungu agu aboro nakakuti gayo ruru mangaapai namanga ome tipa kaa wirika ko na kini yugukpia gako taarimo. (Snz. 27:11) Ani gumbanga kina gu bangisapai agumba Davide agumbaha ki yaa: “Ako gbia gi Mbori, mi natambua ro na kpotore yo dunduko, mi ataasa rimoro nye anye kindi.” (Tam. 86:12) Nairiwo wai ani apido gu uru ani nikadu na rengba berani ka yugokpia ga Yekova taarimo rogo rengberengbe gene yo na ki sambuo ko nyeanye kindi! Gure nga gupai ruru ngbatunga aboro nikaa mangaha. Ya mo oni nayugokpia ga Yekova taarimo awere na gu maabangirise nga wo oni nikaa mangaha kumbatayo nyeanye kindi?
[Pictures on page 30]
Ya mo oni nayugokpia ga Yekova taarimo rogo agi agene re?