Oni Niraki Wa Avuru Ga Mbori Kindo!

‘Gaoni raka rẽarẽ.’—FRP. 1:27.

GAONI KARAGAPAI NGA GINE?

Ada rengbe kadu ni avuru ga Mbori Kindo?

Ginipai si aida ani mangihe tipa ka gumba gu fugo nga ga Kindo, gaha pangbanga, gbiati gaha andiko?

Wai gu avuru ga Mbori Kindo ayugo gupai nga i nakpinyemu gako arugute?

1, 2. Tipagine gu rugute Pauro afuhe fu gu dungurati naadu Firipoi yo adu ti ni na nyanyakipaha?

GU MOKEDI nangia Pauro angarasi gu dungurati naadu Firipoi yo nga ‘gayo raka rẽarẽ na wene pangbanga.’ (Oni gedi AFiripoio 1:27.) Gu pa-Giriki Pauro amangisunge nani nga ‘gaoni raka rẽarẽ,’ rogoyo nga ‘oni raki wa avuru ringara.’ Gipai re adu na nyanyakipa rogoyo fu gu dungurati naadu Firipoi yo. Tipagine? Bambiko si nawira wa Firipoi adu dagba gu siasia agbata ga aRomo ngbii aidihe fu agu aboro naaraka rogo i du ni avuru gayo ringara. Si adu nimomu fu aFiripoio i duni avuru ga aRomo ringara bambiko gipai re afu gu undo fuyo kina bete aboro agbiaha nga aguyo naadu ti gu regbo re.

² Agu aKristano naadu rogo gu dungurati naadu Firipoi yo adu na ndupai beyo tipa kadu na ngbarago. Pauro atingidi gu mbedimbedi aKristano re ki ya, ‘gayo ngbii du ngbangbaturũ yo.’ (Frp. 3:20) I angianga avuru gu zogarago nga ga aboro te, ono avuru ga Mbori Kindo. Ga Mbori Kindo afu bandahe fuyo na agu aundo kura zogarago arengbanga ka fuhe fuyo ya.—Ef. 2:19-22.

3. (a) Ada du na gu momu beyo nga kadu ni avuru ga Mbori Kindo? (b) Gini apai ani nika wisigoho rogo gi kekeapai re?

³ Gu rugute Pauro afuhe nga aboro raki wa ‘avuru ringara,’ si gbe fu agu aboro nika zogarago na Kristo ngbangbaturũ yo. (Frp. 3:20) Ono si ima rengba kadu a fu agu aboro nika raka auru kpotosende ane kutiibe ga Mbori Kindo. Tipagine? Bambiko agu aKristano dunduko kpara gayo raka fu gu bangisa Bakindo nga Yekova, i duwa ka i raki ringbisihe kuti gako arugute. (Ef. 4:4-6) Areme, aboro namanga ome nyanyaki tipa kadu ni avuru gu ringara kumuko akumuko. Nairiwo wai si aida ani bi gu momu na nyanyakipaha nga ka duni avuru ga Mbori Kindo! Tipa kadu na bakere tambuahe tipa gu momu re, ani wisigi gu bete awiratise du dagba agu apai si aidaha tipa gu boro naida kadu nivuru gu zogarago nga ga wiri aboro na guni naida kadu nivuru ga Mbori Kindo. Ani nika wisigo apai biata nga gu si aida ani mangihe ka ani aida kaa raka kindi ni avuru ga Mbori Kindo.

AGU APAI SI AIDAHA TIPA BORO DA NIVURU RINGARA

4. Ginihe nga ziazia fugo, na wai gu ani agumba gu ziazia ‘fugo’ re?

⁴ Oni wiriki fugo gu ringara re. Bete abazogo naaida gupai nga agu aboro naida kadu ni avuru gayo ringara, si naida i wiriki gu fugo i agumbaha rogo gu ringara re. Ka i vura idaha fuyo i du ni avuru gu ringara re, i ima rengba ka manga asadatise nyanyaki tipa dungu agarã ka ino gu vovo fugo re. I ima rengba ka wirika agu arugute du tipa tangara fugo nibeedihe niipo ono si rengbe ka dia yó na bakere regbo i ini ka gumba gu fugo re watadu kaa yamba kura apai wenengai. Wakina gure a, agu aboro naida kada ni avuru ga Mbori Kindo, si naida i wiriki ‘ziazia fugo.’ (Oni gedi Zefania 3:9.) Gini fugo du nga gu ziazia fugo re? Si nga gu rengo du rogo Ziazia Kekeapai yo tipa Mbori na gako aringbisapai. Ani nagumba gu ziazia fugo re, ho ani amangapai ni ringbisihe kuti ga Mbori andiko na gako arugute. Avuru ga Mbori Kindo ima rengba ka wirika gu bangua yugopai nga ga Ziazia Kekeapai niipo na ki zi bapatiza. Zavura tifuo zioyo bapatiza, si naida i mangi ome nyanyaki tipa ka gumba gu ziazia fugo re wenengai. Rogo gini gene? Si naida ani nibasasa naamanga ome kindi tipa ka manga gupai ani awirikaha rogo Ziazia Kekeapai rogo gaani raka.

5. Tipagine si aida ani wirikapai ti ni wenengai tipa gu pangbanga du tipa gu ga Yekova riigbu?

⁵ Oni wiriki apangbanga tipa gu ringara re. Gu boro naida ka da nivuru gu zogarago nga ga wiri aboro ní duwa ka ní wirikipai tipa gu pangbanga du tipa gu zogarago re. Teketeke a, agu aboro naida kadu ni avuru ga Mbori Kindo i duwa ka i wirikipai tipaha. Ani wisigingo gu kpiapai nangia ga awiri Kora namangisunge rogo gu ringara aYisaraere nadumbata. I akpinyemu Yerusarema gbe na gaha bairisombori na kini tangara agu apangbanga naadu tipa gu gbata re. Anga pa ngbanyaha gbua nasayo i mangihe wo te, ono gu he gu gbata na gu bairisombori re aarukubaha. Yerusarema angia “ga bakere Bakindo bakporo,” nga Yekova, bambiko si nangia ba ndikidi irisombori. Si nangia gu ba i anaayugo ga Yekova aNdiko rogoho fu aboro. Agu aboro naadu kutiibe gu Bakindo naazogarago Yerusarema yo, i Yekova ayugu gako weneringise nga ga nyemuse fuyo. (Oni gedi Atambuahe 48:1, 2, 9, 12, 13.) Ya mo oni naida ka wirikapai na kini tangara agu apangbanga du tipa gu ga Yekova riigbu du auru kpotosende wa yó? Wa oni kaa wirikapai nibakerehe tipa ga Mbori riigbu na wai Yekova asongoda gako aboro, kinawo a oni kaa bi ga Mbori Kindo nindikidi zogarago. Gu nyemu tungusa gu wene pangbanga nga ga ga Mbori Kindo du tironi nikaa maapai amaa kindi.—Yere. 9:24; Rk. 4:43.

6. Tipagine Yekova aida gupai ti ni berani nga ani wirikipai na ki irisi agu andiko na arugute du tipa gako Kindo?

⁶ Oni ini agu andiko du tipa gu ringara re. Abazogo naaida gupai nga agu aboro du kutiibe yó wirikipai na kini giasangba andiko nga ga gayo ringara. Teketeke a, gupai Yekova aidaha be agu aboro dunduko naida kadu ni avuru gako Kindo nga i wirikipai tipa gako andiko na ki gi sangba gako bangua arugute. (Yes. 2:3; Yo. 15:10; 1 Yo. 5:3) Ga wiri aboro andiko na kina ingahe rogoho na si rengbe kadu niˈirairaha. Ono “gu rugute nga ga Yekova si ziazia.” (Tam. 19:7) Ya mo ani naagbia ngbarago be ga Mbori andiko na kini gedi Fugoko naaˈuru dunduko? (Tam. 1:1, 2) Ani nibasasa si aida ani mangi asadatise tipa ka wirika ga Mbori andiko. Boro ho rengbe ka wirikaha furani te.

AVURU GA MBORI KINDO NAKPINYEMU GAKO ARUGUTE

7. Tipagine avuru ga Mbori Kindo airiso gako bangua arugute ti ni?

⁷ Tipa ani niraki kindi ni avuru ga Mbori Kindo, si naida ani ini gako arugute na kini kpinyemuhe. Badungu avuru agu aringara wiri aboro azogaha naaya wee, i ima ida kuti agu andiko na arugute nga ga gu ringara i araka rogoho. Ono tie, ho i abi gupai ni nga ndiko gudu ho angbanga tiyo ya na boro ho nabiyo na gupai i aida ka mangaha te, i nakuo gu ndiko re akuo. Agi aboro re dedede ‘nambakada tiyo ka ngba bangiri aboro.’ (Koro. 3:22) Avuru ga Mbori Kindo naraka ringbisihe kuti gako bangua arugute. Ani na ngbarago ka irisa ga Mbori andiko ka si vura du vurũ nga kura aboro abingo rani te. Tipagine? Si wo bambiko ani nakpinyemu Yekova nga bafu andiko.—Yes. 33:22; oni gedi Ruka 10:27.

8, 9. Wai rengbe oni ka ino singia oni nzunzu nakpinyemu ga Mbori andiko?

⁸ Wai rengbe oni ka ino singia oni nakpinyemu ga Mbori andiko nzunzu? Oni wisigingo gu gene oni amangapai ngbaha ho i afu rugute ni furoni tipa gupai oni abihe nga gaoni siapai du ngaha. Nikpiapai, si rengbe kadu tipa vorokoo na mbakada rii. Mbata fu oni da ni avuru ga Mbori Kindo, oni anaambakadanga tironi wenengai te watadu oni anaavo rokoo ngba gu gene nazingisa nyemu kodaba ti boro. Wa gaoni nyemuse tipa Mbori asono, oni awiriki ka vorokoo ngba gu gene nafu irisa fuko. (1 Tim. 2:9, 10; 1 Pet. 3:3, 4) Oni rengbe kaa berã gupai awere nga oni navo rokoo rogo iriiri gene. Ono ginipai ka mangi ka bakumba ya furoni wee, gu gene oni avo rokoo ngbaha nafuda ga aboro sangbakpotoseyo rogo dungurati? Wai ka oni mangipai kuti gipai re? Ya mo rago gberẽ tironi oni ki zingi watadu oni ki ká ka manga ariapai? Gu nyanyakipa rugute duho tipa agu aboro naida kadu ni avuru ga Mbori Kindo nga i wiriki ga Kristo kpiapai. (1 Pet. 2:21) Pauro akepai tipa Yesu ki yaa: “Ani mongo nimangi gu pai ngba angba ti akuarani sa wenepai, sa pa nyakasa he. Bambiko Kristo a, ko amanga nga gu pai ngba ti kina ko te.” (Rom. 15:2, 3) Tipa ka banda zereda rogo dungurati, si naida gu Kristano naima nyaka mangi ome ka ne agu apai rengbe ka fuda ga kura aboro sangbakpotoseyo.—Rom. 14:19-21.

⁹ Ani makianga nyanyakipa apai ue: nga gaani bipai tipa kodaba na rogatise. Agu aboro atadanga ni avuru ga Mbori Kindo ya rengbe ka bi gupai nga si agberãnga kumba kodiba na kurani te, bi agu ahe nayugokpia kundiri aboro wa wenepai, na kini berẽ gupai nga bäri gbiati mbutise nga ga boro siapai. Ono avuru ga Mbori Kindo naberãpa wai rengbe sangbana gayo mangapai kadu na maapai kurii aboro. Wa vura duhe nga badungu aKristano aima raka wasiwasi raka mbata, ono i nabi kodaba awere na rogatise wa gamunihe be Mbori. I nakpinyemu ga Yekova arugute na i ini gupai nga agu aboro nabasa agu andiko du tipa kodaba na rogatise, ka i du nga ni avuru ga Mbori Kindo te. (1 Kor. 6:9-11) Ono tie, i ima rugatiyo na gupai nga kpotoboro yo nangihe kisusi. (Yere. 17:9) I na ngbarago tipa ka gbia agu azahe naundo yó i kakuti ga Yekova arugute.

AVURU GA MBORI KINDO NABI AZAHE NA NYANYAKIPAHA

10, 11. Gini nyanyakipa azahe ga Mbori Kindo afuhe, na wai gu oni abi agu azahe re?

¹⁰ Agu abazogo nga wiri aboro rengbe ka fu zahe fu avuruyo tipa riahe na dawa. Si tie ziazia nga, anga ariahe dunduko na adawa du nigbegberẽhe te. Ono ho du he ni nigbegberẽhe, bazogo nabanda gani azogo nifu ní zahe fuyo tipa ha. Ono ka bazogo afunga zahe ya, si du ni bape kurii ní. Wakina gure a, ga Mbori Kindo nafu zahe fu avuruhe tipa kura mangapai na agu apai rengbe ka gberesapa yó rogo toro yo. Nikpiapai, badungu aboro namangasunge na Internet tipa fugo dagbase, wirikapai, gbiati aũngbarago. Ga Mbori riigbu namangasunge na Internet tipa ka manga dungu wene apai. Ono tie, badungu agu abangiri ba du rogo Internet nigbegberẽhe tipa agu aboro naida kadu gigiri ti boroyo na rogo toro yo. Agu abangiri ba nga ga Internet nayugokpia kundiri aboro nigbegberẽhe tipa avuru ga Mbori Kindo rogo toro yo. Tipa badungu agarã awere, kangara moyambu aima digo nifu zahe tipa ngbatunga agu abangiri ba re. Nairiwo wai duhe nipa ngbarago tipa ka gbia agu azahe naundo rani ani du wenengai rogo toro yo re!

¹¹ Vuru agu agarã susi barambeda kusayo, gu kura ngbatunga bangiri ba nga ga Internet kinaho badungu aboro amangasunge nani, nga gu rengbe kadu niwenehe ka i amangasunge nani ngba wene gene. Agi abangiri ba nga gu badungu aboro amangasunge gbe nani re, si rengbearengba ka gberesa yó. Si rengbe ka sa boro ní tona koda tiní na gbegberẽ aboro. (1 Kor. 15:33) Zanga kapa, si du ga Mbori riigbu afu zahe ti ni tipa ngbatunga agu abangiri ba re. Ya mo oni gedinga gu vovo kekeapai kangara moyambu akusaha tipa mangasunge na gu bangiri ba aboro amangasunge nani gbe rogo Internet re? Nairiwo wai duhe nipa mungo ka mangasunge na gi bangiri ba re zanga geda gu kekeapai nga ga kangara moyambu!a Gure duwa ka boro adia kerengua zanga ní kedi agu azahe du tipaha ti kpotoho.

12. Tipagine duhe ti ni nipamungo ka zanga mangapai kuti ga Yekova azahe?

¹² Agu aboro amanganga pai kuti agu azahe kangara moyambu afuhe re ya, i na imisa tiyo gbiati agu aboro i akpinyemuyo. Agu akurayo, biko agu ahe nazingisa nyemu kodaba ti boro ima ziobaha tiyo watadu i namanga wasiwasi kodaba kini berẽ gupai nga Yekova abingo yó nani te. Nairiwo wai duhe nipamungo ka berã gupai nga ani rengbe arengba ka oka agu apai ani amangaha ti Yekova! (Snz. 15:3; oni gedi AEbere 4:13.) Mbori naida ka undo ngbatunga agu aboro re na ko namangasunge na agu aboro narukuba ko auru kpotosende tipa i ni undoyo. (Gara. 6:1) Wa vura duhe wo, Yekova aidanga na agu aboro amanganga gupai ko akpinyemuhe ya i du ni avuru gako Kindo te, kina wai a ka abazogo aidanga na agu aboro namanga zuũ i du ni avuru gayo ringara ya.b (1 Kor. 5:11-13) Wa vura duhe wo, ko nainapai. Ka agu aboro re saberã ki mbu gbegberẽ mangapai, i ima rengba kadu na wene pagume dagbayo na Yekova na kidu ni avuru gako Kindo. (2 Kor. 2:5-8) Nairiwo wai duhe nipa ngbarago ka iriso gu Bakindo nga ga nyemuse ko re!

AVURU GA MBORI KINDO NABI WIRIKAPAI NA NYANYAKIPAHA

13. Wai avuru ga Mbori Kindo ayugo gupai nga i nabi wirikapai na nyanyakipaha?

¹³ Badungu abazogo naamangasunge kakaka tipa ka yugopai fu avuru gayo ringara. I nameka asukuru tipa aboro wiriki ka gedapai na kini yugu kura abirĩ-sunge fuyo. Avuru ga Mbori Kindo nabi sukuru na nyanyakipaha na i namanga asadatise kakaka tipa ka wirika gedapai, kepai, na ka undo tiyo rogo borose yo. Ono i nabi gu wirikapai i agbiaha tipa kadu ni avuru ga Mbori Kindo na kikiipaha. Yekova nayugo wai furani ka gedapai vurube gu dungurati nga ga aKristano. I nangarasa avunguagude i nigedipai fu awiriyo. Rogo adiwi dunduko, kangara moyambu naakusa Ngbaõbambu Sinziri na Awake!, agi awaraga du biata re, na badungu akpewaraga rogo nga gu nasakarogo Ziazia Kekeapai yo. Ka oni ageda akpewaraga rogo auru dunduko rogo diwi, oni nyasi gedaha anyasa rogo diwi sa na ki gbia undo be gu yugopai nga ga Yekova.

14. (a) Gini rabahe ani agbiaha? (b) Gini aberãpai tipa Gu Irisombori Nga ga Aborokporo oni nabihe niwenehe ka mangisunge nani?

¹⁴ Rogo aposo dunduko, avuru ga Mbori Kindo naagbia rabahe ba agu dunguratise yo nga ga dungurati. Nikpiapai, agarã awere susi wa sita bawe gu Sukuru Nga ga Siokrasia ima undo abawiriki Ziazia Kekeapai i du niwene abayugu Fugo Mbori. Ya mo oni rogo gi sukuru re? Barambeda kusayo, kangara moyambu amangi mbakadapai tipa Gu Irisombori Nga ga Aborokporo. Gi mbakadapai re nanyakasa gu kodatise du dagba aborokporo. Ya mo oni amangingo sunge na agu aberãpai fuyo ho rogo gaani awaraga?c

15. Gini bakere momu du berani?

¹⁵ Avuru gu zogarago nga ga wiri aboro naasada ka songoda gayo abazogo na kini gbata aboro kporo na kporo. Avuru ga Mbori Kindo rogo zegino dunduko nayugo gupai nga i nasongoda ga gako Kindo nitungusa yó pai fu aboro bangiri agene na rogo akporo na kporo. A wa i nigumbaha rogo gu kekeapai ye mbata fu gere, nga Ngbaõbambu Sinziri natakapande ga Yekova Kindo, na waraga ho i akparakaha rogo zegino dunduko waha te! Bakere momu du ngaha furani ka gumbapa ga Mbori Kindo fu aboro. Ya mo oni namangasunge tungusapai kakaka?—Mt. 28:19, 20.

16. Wai rengbe oni ka yugo gupai nga oni nga wene avuru ga Mbori Kindo?

¹⁶ Barambeda, kina ga Mbori Kindo sa nikangia gu bangisa zogarago nika zogarago auru kpotosende. Agu andiko nga ga Kindo nikangia gu bangisa andiko nikaa nungusa ga aboro raka. Ya mo oni adu niwene avuru ga Mbori Kindo ti gu regbo re? Awere nga gu regbo si aida oni mbakaditironi tipa ka rẽ tipa gu Kindo re. Agu adiaberã oni amangaha naˈauru dunduko, oni mangihe sa taasarimo Mbori na kini raki wa avuru ga Mbori Kindo.—1 Kor. 10:31.

[Footnotes]

[Blurb on page 21]

Ya mo oni nadia agu azahe kugume i afuhe rogo agu awaraga du mburuhe rii Ziazia Kekeapai tipa Internet?

[Gu sura du ti kpewaraga 19]

Ya mo oni nagbia ngbarago be ndikidi irisombori na agu apangbanga du tipaha wa awiri Kora?

[Gu sura du ti kpewaraga 22]

Gaoni Irisombori Nga ga Aborokporo rengbe ka undo roni na gaoni aborokporo oni du niwene avuru ga Mbori Kindo