Wai Rengbe Ani Kadu Nindikidi AKristano na Kidu Adu A Niwene Aboro-ringara?

GINI apai ue Yesu amangihe ti regbo gako tungusapai? Gu bambatapai Yesu amangihe nga, ko agbatagene ka aria ngbadu aboro yo, angianga agu ariigbu nga ga birĩ-zogarago ya. Nikpiapai, ani bingo gupai Yesu anyakasihe rogo gu Gako Tungusapai Naadu Rii Bagangara yo. Mbata fu ko pe gu masaku naadu tipa tikpo na imarago, ko aya fu agu aboro naadegatuyo fuko wee, agu aboro “inipa gu gayó azingo nga ga toro,” (NW) nagbia ndikidi ngbarago. Ko agbia kura pai kuti ni nga: “Aboro maku nga bayee aboro, . . . du ziazia kpotoyo yo, . . . nga aboro azarõ.” (Matayo 5:1-11) Yesu aundo apefuoko i rugutiyo naapa wai si aaida i mangi ariapai berãyo yo ringbisihe kuti ga Mbori bangua rugute nibipa wene mangapai na gbegberẽ mangapai, gbiati nyakapa irisombori na ngbaduseyo dunduko.

Uepai nga, ho Yesu abi aboro ni i nirungo, nunga afõ ko ko undo yó. Ono tie, anga gako sásá nangia ka dia arungo kusayo dunduko te. (Matayo 20:30-34) Ko ahusi aborokaza, ono ko adianga kaza kusayo te. (Ruka 6:17-19) Ko aundo agu aboro naadu rogo rungo, ono iraira mangaapai aandu kindi si kini ye na arungo. Ko arigi aboro gomoro, ono ko adianga angbongi kusayo te.—Marako 6:41-44.

Ko Asa Aboro I Mangi Ariapai na ki Akpurasi Gayo Arungo

Tipagine Yesu agbeberã ko ti ni gbe tipa ka sa aboro i mangi ariapai ngbaduyo yo na ki akpurasi gayo akpakarapai ono ka ko aʹarianga gayo zogarago watadu ki di arungo kusayo ya? Yesu aima ino gupai nga Mbori adu na kina ringbisapai beko tipa ka mangasunge na gako Kindo kumbatayo tipa ka digiso ga wiri aboro zogarago dunduko na ki di agu apai kusayo naye na arungo dunduko. (Ruka 4:43; 8:1) Sidu tie, ho ga Yesu abawiriki aaida ko di bakere regbo ni tipa kina husa aboro , ko aya fuyo wee: “Ani ndú ku rogo kura akporo, mi tungusi pai yo a; bambiko si du mi nikuru ti ni.” (Marako 1:32-38) Yesu aima akpurasi gu rungo badungu aboro adu nani, ono gupai ko aperesipaha mbatayo nga pa tungusapai naapa yugo fugo Mbori fu aboro.

ADezire Yekova namanga asadatise areme nyanyakii tipa ka tungusapai wakina Yesu. I naʹakpurasi ga aboro arungo nifuyo gu undo fuyo si aidaha. Ono i amanganga asadatise ka dia gu iraira mangaapai du rogo zegino kusayo te. I idi kuti gupai nga kina ga Mbori Kindo sa nika dia agu apai kusayo naye na arungo. (Matayo 6:10) Wakina Yesu, i namanga asadatise ka aria ngbadu aboro yo angianga birĩ-zogarago ya. Gipai re daada bambiko gupai aboro aidaha gbe nga pazogarago te, ono pa manga rurupai.

Agu Aboro-ringara Rẽarẽ

Ti kina gu bangisa regbo re, aDezire Yekova idi kuti gupai nga gayo tindiro du ngaha nga kadu niwene aboro-ringara. Sidu, i nairisa ga abazogo pagbia airisa. I nangarasa gayo amurakporo rogo abuku gbiati gu tungusapai i amanga tipa aboro nairisa andiko. Ono tie, ho abazogo aho gupai ni natagbaga tihe na ga Mbori andiko, aDezire Yekova amanganga ha te. I ‘nagia sangba Mbori susi ga aboro.’—Amokedi 5:29; ARomo 13:1-7.

ADezire Yekova naata fuo agu aboro dunduko du rogo gayo dagbarago tipa ka wirika Ziazia Kekeapai naayo zanga i tumo marã tipaha. Amirioni aboro ima manga ariapai ngbaduyo yo nisangbana gi gayo yugopai re. Rogo agarã nibasasa, i naundo dungu kama akutu aboro i mbu gu gbegberẽ mangapai duwa vugundö, dia kere angua kutii kpotoseyo, baake, gbiati wasiwasi kodaba. I nga agu aboro-ringara du na wene sino mangapai bambiko i napekafuo gu bangua arugute nga ga Ziazia Kekeapai rogo gayo raka.

Kurigure, gu wirikapai nga ga Ziazia Kekeapai naundo aborokporo i kiisi gayo irisa koyo du akurayo ni, na si ki sa gupai nga wene fugodagbase du dagba arogotise, avunguagude na awiriyo na dagba agude nitiyo. Gere nga agu apai nanyakasa gu nyemuse du dagba aborokporo. Ho du aborokporo ni na wene pagume, si nasa agu aboro du rogo dagbarago i du wenengai.

Tifuo fugö oni gu memeapai nga gu oni nawisigihe rogo gi kekeapai re, ginipai oni aberãha: Ya mo Ziazia Kekeapai naida na agu aboro nakoda pambori na birĩ-zogarago? Karagapai ziazia nga oó. Ono ya mo si naida ndikidi aKristano du niwene aboro-ringara? Ii, si naida aida wo. Wai rengbe yó kadu wo? I rengbe ka duwo nipeka yó fuo gu ga Yesu zinahe du tipa duwa tikpo na wa imarago fu zegino.

Agu aboro naʹasada ka mangapai kuti gi ga Yesu arugute re nika gbia undo agbia nitiyo gbiati gayo aborokporo na zavura gu dagbarago i araka ho. Agu aDezire Yekova du rogo gaoni dagbarago nikadu adu na ngbarago ka wisigo dungu apai na oni tipa wai gu ringbisapai du tipa wisigo Ziazia Kekeapai amanga rogo gaoni dagbarago.a

[Footnote]

[Blurb on page 7]

Yesu agbatagene ka aria ngbadu aboro yo angianga birĩ-zogarago ya

[Blurb on page 8]

ADezire Yekova idi kuti gupai nga gayo tindiro du ngaha nga kadu niwene aboro-ringara