Oni Ru Nyanyaki na ki Ne ga Satana Agbina!

“Oni ki rengbe ka ru aru sa ga bakitingbanga birĩ.”—EF. 6:11.

GAONI KARAGAPAI NGA GINE?

Wai rengbe ga Yekova moyambu ka banda tiní ka ní zingo ti gu gbina nga ga nyemu aũzegino ya?

Ginipai rengbe ka undo gu Kristano nga rogotise ka ní tinga kurogo gu due nga bäri ya?

Tipagine idi oni ti ni kuti gupai nga si niwenepai boro ru nyanyaki ka sovura kuti nyemu aũzegino gbiati wasiwasi kodaba?

1, 2. (a) Tipagine adunga Satana ti ni na nunga mbedimbedi aKristano gbiati “kura akandoro” ya? (b) Gini ga Satana agbina ani nika wisigopai tipaha rogo gi kekeapai re?

SATANA BAKITINGBANGA na nunga aboro tiko te, gbe aguyo namangasunge fu Yekova. Nirengo, Satana nasovura kuti mbedimbedi aKristano. (Yugo. 12:17) Agu aKristano re nangbembatayo areme rogo sunge tungusapa ga Mbori Kindo ti gi gaani regbo re na ki niyugu Satana nibazogo gi zegino re. Bakitingbanga na nyemuse koyo du “gu kura akandoro” ni nasongoda mbedimbedi aKristano na kidu na maabangirise tipa nyenye unga te mbiko ko ima zangaha. (Yo. 10:16) Zanga kapa, si nga ndu gupai du ko ti ni na bakere zinga. Singia ani na gu maabangirise nga ka ga ngbangbaturũ watadu ka raka auru kpotosende ane, wenepai ho Satana aidaha tipa rani te. Gupai ko aidaha nga ka zio rani.—1 Pet. 5:8.

² Tipa ka digiso gipai ko akpinyemuhe re, ko moi agbina nibakiakia. Wadu he nga ko ima kiso berã azanga idapase, i arengbanga ka dia wene pangbanga kugume te na i arengbanga ka bi agi agbina re te. Ono tie, Bakitingbanga nazio agu aboro azio a nadia gu wene pangbanga nga ga Kindo kugume. (2 Kor. 4:3, 4) Gu kekeapai ye mbata fu gere yugu wai rengbe ani ka bandatirani be agu agbina biata Satana amangasunge nani nga: (1) fura bau, (2) gunde gbiati soapai be akurase, na (3) bakere rungo be gu ingapai boro amangihe. Ani wisigingo pai awere tipa wai rengbe ani ka ru nyanyaki sa gu ga Satana agbina du ue ko azio aboro nani nga nyemu aũzegino gbiati du ngba asada ka manga bäri.

NYEMU AŨZEGINO—GU GBINA NAKANDASI HE

3, 4. Wai rengbe bakabangirise tipa gi unga re ka sa boro ní merefuo nyemu aũzegino?

³ Rogo kura ga Yesu kpiapai sa, ko afura tipa gu tunga i amihe ku dagba akiwe. Ko ape gupai nga boro ima rengba ka gia gipa re, ono “berã pa zegino, na gu nanga he nga ga ũkumuko, ki kandasi gu pai re, ka ni azu nga ya.” (Mt. 13:22) Ii, nyemu aũzegino nga gu kura gbina gu vurarani nga Satana amangasunge nani.

⁴ Apai gu du ho ue rengbe ka kandasi gipai re. Bambataha nga ‘berãpa aũzegino.’ Rogo gi “kusa arago” du nigbegberehe re, dungu apai gu duho rengbe ka ye na bakabangirise furoni. (2 Tim. 3:1) Nibi wai geno ahe asona kumbatayo gbiati pa kpakara bi sunge marã, oni rengbe ka bihe nga, si ima kpakara ka ye na agu ahe ku kporo nasongoda raka. Oni ima rengba ka bakabangironi tipa raka kumbatayo nga, ‘Ya mo gene adu bere kumbatayo mi gbia marã ka mi mbu sunge?’ Ngbatunga gu bakabangirise re asa dungu aboro i merefuo aũkumuko na gu berã riyo yo nga marã nika mbakada bayo kumbatayo.

5. Rogo gini gene rengbe “ũkumuko” ka nanga boro?

⁵ Yesu afura tipa gu kurapai nga, ‘gu nangahe nga ga ũkumuko.’ Gu nangahe nga ga aũkumuko gbiati berãpa aũzegino rengbe arengba ka sarani ani zi ti gi gbina re. Ziazia Kekeapai ima ida kuti gupai nga “marã nabanda boro.” (Batu. 7:12) Ono tie, si nipatatamana ka merafuo aũkumuko te. Badungu aboro bi gupai nga, manga ome ka gbia aũkumuko, nasa boro nizi ti gu gbina nga ga nyemu aũzegino. Aguyo aima da ni akanga fu aũkumuko.—Mt. 6:24.

6, 7. (a) Ginipai rengbe ka manga ba gaoni sunge yo nga gu rengbe ka sa roni oni tona ka kpinyemu aũzegino? (b) Ginipai si aida Kristano berẽkuriihe ho momu sunge asu ni funi tipa ní naamangasunge kugii regbo yo?

⁶ Boro ima rengbe ka tona kaa kpinyemu aũkumuko zanga ní inihe. Nikpiapai, oni wisigingo gipai re. Gaoni bairasunge ye fuo roni na ki ya furoni wee: “Mi na wene pangbanga ngbare foro! I ima fu bakere sunge fu gaani basunge. Si nika ida aboro tona kaa mangasunge awere kugii regbo yo dedede tipa bete adiwi. Ono mi rengbe ka kido ro nga, gu marã nikadu tipa gi sunge re, si nika kio kisusi gu nidumbata.” Boro gaoni karagapai ngia gine tipa gi momu re? Rengo ngaha nga, si ninyanyakipa pai tipa oni ngerafuo gaoni aborokporo rogo borose yo, ono anga si nga gu yangarapai si aida oni mangihe te. (1 Tim. 5:8) Dungu apai kinaho si aida oni berẽ aberã tipaha. Bakio regbo wai si aida oni dihe tipa mangasunge kugii regbo yo? Ya mo gu gaoni sunge re atagbagatihe na agu apai nga ga toro, kodihe na agu adunguratise nga ga dungurati gbiati Gu Irisombori Nga ga Aborokporo?

⁷ Ho oni aberã ni kurii gaoni diaberã, ginipai oni aperesa paha mbatayo? Pa gbia oni marã nibakerehe watadu gaoni pagume na Yekova? Ya mo padu oni na nyemu ka gbia bakere marã rengbe ka sa roni oni mbu peresapa Kindo mbatayo rogo gaoni raka? Ya mo oni berẽnga kurii wai rengbe nyemu aũzegino ka gbarasa paroni rogo toro yo gbiati gaoni aborokporo? Kangia wo du pai tipa roni awere, wai rengbe oni ka ru nyanyaki na ki bandatironi ka nyemu aũzegino kandasinga roni ya?—Oni gedi 1 Timoteo 6:9, 10.

8. Gini kpiapai nga ga Ziazia Kekeapai rengbe ka undo rani ani wisigi gaani raka?

⁸ Tipa ka bandatironi ka nyemu aũzegino kandasi nga roni ya, si naida oni wisigi gaoni raka dedede. Ka oni dunga wa Esau nayuguhe rogo gako mangapai nga ko abingo agu apai nga ga toro na nyanyakipaha te. (Bam. P. 25:34; Eb. 12:16) Na nirengo, ka oni dunga wa gu kumukokumuko kumba Yesu aya ko bagi gako ahe na ki kparakaha fu airarungo na ki ye ka pekafuoko ya. Kuba gupai nga ko mangi gupai Yesu apehe, Ziazia Kekeapai naya, “ko ki guari nirungo arungo; bambiko ko adu ni boro kumuko gbe.” (Mt. 19:21, 22) Gi kumba re azanga gu bawene momu nangia ka pekafuo gu babakerepa kumba kisusi naraki re mbiko ko aima zio ti gu gbina nga ga aũkumuko! Oni bandatironi oni andu ka zanga gu momu nga kadu niga Yesu Kristo bawiriki.

9, 10. Nibi gupai Ziazia Kekeapai agumbaha, gini bipai du oni nani tipa aũzegino?

⁹ Tipa ka sovura kuti bakere bakabangirise tipa aũzegino, oni ginga gi ga Yesu rugute re: “Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya. Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ.”—Mt. 6:31, 32; Rk. 21:34, 35.

¹⁰ Kuba gupai nga oni mbu tironi fu gu nangahe nga ga ũkumuko, si naida oni asadi kadu na gu bipai gu bake Ziazia Kekeapai nangia Agura adu nani, ko ayaa: “Ka mo fú nga rungo fere watadu aũkumuko a ya; ono mo rígi re ni kina gu riahe rengbe fere.” (Snz. 30:8) Nirengo, Agura aima ino wai marã abanda boro na wai rengbe aũkumuko ka nanga boro. Oni kparia gupai nga bakabangirise tipa gi unga re na gu nangahe nga ga aũkumuko rengbe arengba ka gbarasa paroni rogo toro yo. Bakere bakabangirise tipa aũzegino rengbe ka gbarasapa gaoni regbo, ome, na ki mbu roni zanga wiri nyemu agu apai nga ga Kindo tironi. Sidu, oni diberã kina awere nga oni aidanga Satana zi roni ti gu gako gbina nga ga nyemu aũzegino te!—Oni gedi AEbere 13:5.

BÄRI—GU DUE DUNA NGBAHA NIDADIDADIHE

11, 12. Wai rengbe Kristano ka ti kurogo bäri ba gani sunge yo?

¹¹ Agu abamangi anya naida ka zio kikii nya, i nage due ngba gu bira gu kikii nya re ata ngbaha dedede. I nadada gu due re na kpe na ki kusuko sende kuriihe haya haya. Gu kura ga Satana asada gudu ho sa du wakina gu gbina re, na si nawira wa ko na diabese rogoho. Si nga gu ingapai nga ga wasiwasi kodaba. (Snz. 22:14; 23:27) Dungu aKristano aima ti kurogo gu due re mbiko rimiso yó tiyo kurogo agu apai nasaha taata fu boro ní mangi wasiwasi kodaba. Kura agu aKristano nga arogatise amangi bäri mbiko i atona ka sonosa gu nyemuse arunga ya fu gu boro angianga gayo badiarogatise ya.

¹² Basunge ima rengba kadu niwene ba tipa boro tona ka sonosa gu nyemuse arunga ya. Nirengo, wisigopai sa i amangihe ayugu gupai nga bebere namba agu adee dunduko namangi bäri na gu dungu akumba dunduko namangi bäri, i amangihe na gayo badiasunge. Ya mo gaoni sunge nasa roni oni naakoda tironi na akumba gbiati adee? Kangia wodu he, gaoni mangapai nidu wai naayo? Ya mo oni naasada kadu na ngbanda dagba tironi naayo zanga mbu pa bakure si gu rii gaoni ngbanda? Nikpiapai, gu wirina nga dee ima rengba ka sa gu gari badiasunge nga kumba nigu boro ri agumba gari rukutu wiri apai funi zavura agu apai nabipa gari ramukporo. Singia gu wirina nga kumba rengbe ka zio bakure na gu gani badiasunge nga dee, na ki tona ka berã nga: “Ri nabi agu apai mi agumbaha furi na nyanyakipaha na kini degeturi wenengai baraho mi afura ni. Na ri natambua re atambua. Akoo, ka diare namanganga re wa gere kporoyo!” Oni nabi wai rengbe agu aKristano du rogo ngbatunga bangiriba wa gure ka ti kurogo bäri?

13. Wai rengbe gu nyemuse arunga ya ka tona ka sona rogo dungurati?

¹³ Boro ima rengba ka tona sonosa gu nyemuse arunga ya a rogo dungurati. Oni bingo gu ndikidi kpiapai namangi re. ADaniere na diako nga Saraha angia abazakigene. Daniere angia ‘gu bakumba naakanga sunge rogo dungurati ya.’ Ko anaadia agu asunge dunduko kugume i anaafuhe fuko. Daniere adu na aboro beko bisue ko anaawisigo Ziazia Kekeapai naayo na aguyo biata ki zi bapatiza. Gi vovo awirina biata nazi bapatiza re, i aida na undo nibakerehe. Ho Daniere anaamanga gu kura asunge ni nga ga toro, Sarah nanaafu gu undo re fuyo. Fuoho aturongo te gipai re ki tona ka manga, gi ga Daniere abawiriki Ziazia Kekeapai re aida na undo rogo nunga yo, na Sarah kini fu gu undo re fuyo. Sarah aida boro duadu ho ri nikaa fura nani, na agi abawiriki Ziazia Kekeapai re naafura nari. Gipai re ada wakina kere gbina. Daniere ayaa: ‘Diare aima dia dungu adiwi tipa ka undo agi aparanga re rogo toro yo, ri aida boro ningere angerafuo ri rogo toro yo na rogo nunga yo a. Vuru agu aregbo re dunduko, mi angeranga fuori te. Gipai re aye na gbegberẽpai. Diare amangi bäri na paranga sa dagba agi aparanga re. Ri ada nirurungbura ri rogo toro yo zanga mi inihe mbiko gu dungu asunge naadu bere.’ Wai rengbe oni ka bandatironi ti ngbatunga gberango wa gure?

14, 15. Ginipai rengbe ka undo agu aKristano nga arogotise i bandatiyo ti gu due nga bäri?

¹⁴ Tipa ka bandatironi be gu due nga bäri, si naida oni berẽkurii panye oni niruru roni fu gaoni badiarogatise. Yesu ayaa: “Gu Mbori akpamia re ka boro kpara nga ha ya.” (Mt. 19:6) Ka oni berẽnga gupai nga, gu gaoni asunge nga ga toro nyakipaha kisusi pa gaoni badiarogatise ya. Kurigure, oni ini gupai nga dia bakere regbo gene agu apai adunga sunge ti ni ya zanga du pati gaoni badiarogatise rengbe ka rungburasi gaoni ramukporo na ki sa gupai nga oni gbia tironi na asada watadu kere ingapai.

¹⁵ Kangia bakumba nga oni, ginipai rengbe oni ka mangaha tipa akandoro? Gu mokedi nangia Petero akepai ki yaa: “Oni mbú ti ga Mbori rimbasa akandoro du dagba roni, nimangi sunge barumbatayo, mbiko du oni ni zizi roni kuti ni te, ono ni nyemuhe fu Mbori; tipa gbegberẽ ũkumuko a te, ono ni idapaha kpotoroni yo.” (1 Pet. 5:2) Nirengo, si aidanga oni zanga ngerafuo agu aboro du kutii beroni rogo dungurati te. Ono tie, si aidanga oni mangi sunge abaakumba na ngbaduroniyo dunduko zanga berã oni gupai nga kumbakudee nga oni te. Ka si du nga bangironi ima go ti ngerafuo diaroni kporo mbiko gupai nga oni nangerafuo awirina rogo dungurati, sunge dunga ti ni te. Daniere ape gu kurapai ki yaa: “Si aidanga bangiri boro go ti gaani aborokporo mbiko dungu asunge du beni rogo dungurati te.”

16, 17. (a) Ginipai si aida agu arogotise nga aKristano mangihe ba gayo sunge yo ka yugo nani nga i na nyemu agu apai nabipa kodaba te? (b) Gini kekeapai nafura tipa rogatise rengbe ka undo aKristano i bandatiyo ti bäri?

¹⁶ Ngbaõbambu Sinziri gbiati Awake! na dungu wene arugute rogoho tipa ka undo agu arogotise nga aKristano i sovura kuti gu gbina nga ga bäri. Nikpiapai, gu Ngbaõbambu Sinziri nangia ga Tanvuo 1 2006 afu arugute ki yaa: “Ho du oni ni basunge yo watadu rogo kura ba, oni duna rugatise ti gupai rengbe ka sa roni oni zi dawedawe bakure na gu boro angianga kumba wa oni watadu dee wa oni ya. Nikpiapai, pa dia oni bete regbo fuo nyasa sunge kaa mangasunge mbembedii na gu boro angianga kumba wa oni ya watadu angianga dee wa oni ya, si rengbe kadu ni asada furoni. Nidu oni nigu kumba naima diadee watadu gu dee naima dia kumba, si naida oni gumbaha ningbaroni na rogo gaoni sino mangaapai ya oni aidanga ka rimo kurogo nyemuse na kura boro te. Nidu oni nigu boro duna sinombori, si aidanga oni zingisi nyemuse ti kura aboro niba oni agu abuga nga ga nyemu kodaba te, watadu nivoda oni agu arokoo nga ga enda, na agu nagbida boro agbida te. . . . Pa maa oni sura diaroni watadu kumbaaroni gbiati awironi rii gaoni mbisa basunge yo nikaa tingida roni gbiati aboro naapa gini ngbatunga boro nga oni gbiati gupai nyakipaha bangironi. Ka oni mbunga gene wagu tooni fu gu zorã-ngbaayo nga ga kura boro si rimisi nyemuse kurogo roni yo ya.”

¹⁷ Gu kekeapai du rogo gu Awake! nangia ga Zerekpe 2009, riipai gudu yo nga, “Marital Fidelity—What Does It Really Mean?,” si nazahe tipa berãpa kodaba na gu boro angianga ga boro badiarogatise ya. Gu kekeapai re ayugu gupai nga, ka boro sungu kaa berãpa kodaba na gu boro angianga gani badiarogatise ya, si rengbe ka sa gupai nga ní kodiba na ní. (Yak. 1:14, 15) Kangia arogatise nga oni, si adu nipatatamana ka oni di regbo ka sungo tipa kaa wisigo agu apai du rogoho dedede wa sa. Rogatise nga guhe kina Yekova asigiraha, na si niziaziaha. Ka oni adia regbo na gaoni badiarogatise kaa fura tipa agu apai nabipa gaoni ramukporo, si yuguhe nga oni nabi rogatise na nyanyakipaha.—Bam. P. 2:21-24.

18, 19. (a) Gini gbegberẽ apai rengbe bäri ka kusaha? (b) Gini wenepai rengbe du niruruse fu badiarogatise ka ye nani?

¹⁸ Ka si du nga oni niˈasadi asadi roni tipa ka kpinyemu gu boro angianga gaoni badiarogatise ya, oni berẽkurii gu gbegberẽpai rengbe meteka na bäri ka ye nani. (Snz. 7:22, 23; Gara. 6:7) Agu aboro namanga bäri naba gberarago ti Yekova na kini imisi gayo badiarogatise gbiati kpotoyo. (Oni gedi Maraki 2:13, 14.) Kuba gure, oni berẽkurii gu weneapai namanga fu agu aboro nakakuti iriiri mangapai. Anga kina gu maabangirise nga ga nyeanye unga du yó nani sa te, i naraka wene raka araka awere kodihe na wene sangbakpotoyo.—Oni gedi Asanza 3:1, 2.

¹⁹ Bake papara Atambuahe abibia ki yaa: “Bakere zereda du fu agu yo nakpi nyemu ga rugute; he adu nga ho sa ka kotosi yo te.” (Tam. 119:165) Oni kpinyemu rengo na kini ‘ngére angera wenengaĩ wa oni ata, wa zanga tatamana te, ono wakina iratatamana’ rogo gi gbegberẽ regbo re. (Ef. 5:15, 16) Agu agene ani ata ngbaha, Satana ima rẽ agbina ngbaha tipa ka zio ndikidi airisimbori. Ono ani ima du na dungu ahe berani tipa ka bandatirani. Yekova ima fu agu ahe furani ani aidaha tipa ka ru nyanyaki “ka bisa gu siida we nga ga gbegberẽ ko na ni.”—Ef. 6:11, 16.

[Footnote]

[Gu sura du ti kpewaraga 29]

Nyemu aũzegino rengbe arengba ka kandasi boro rogo toro yo. Ka oni mbunga gupai re si mangi roni ya

[Gu sura du ti kpewaraga 32]

Gu babuga nga ga nyemu kodaba watadu karagapai kutini rengbe arengba ka sa boro niti kurogo bäri