Oni Bandatironi Ti Ga Bakitingbanga Agbina!

‘Oni batasi tironi be ga bakitingbanga gbina.’—2 TIM. 2:26.

GAONI KARAGAPAI NGA GINE?

Ka si du nga ani nabisirapa akuarani dedede, ginipai si aida ani mangihe?

Nibi gu kpiapai naadu tipa Pirato na Petero, ginipai rengbe ani ka wirikaha tipa gunde be aboro gbiati soapai?

Wai rengbe oni ka bandatironi be bakere rungo be gu ingapai oni amangihe?

1, 2. Gini ga Bakitingbanga agbina ani nika wisigopai tipaha rogo gi kekeapai re?

BAKITINGBANGA naˈasada ka zio ga Yekova amoyambu. Anga boro gupai ko aidaha nga ka imoyo wai bamangi anya naimo anya te. Kuba gure, Bakitingbanga naida ka zioyo niungayo tipa ka mangasunge nayo wai ko akpinyemuhe.—Oni gedi 2 Timoteo 2:24-26.

² Ka bamangi anya aida ka zio nya niunga ru, ní namangasunge na ngbatunga gu gbina du kia. Ní ima rengba ka mangasunge na gu kura birĩ tipa ka kusa nya rogo gu ba u nigbu rogoho wa ka ní ruho ka zio ru. Watadu ní ima rengba ka rẽ gbina niˈigiˈigihe tipa ka zio gu nya re zanga u inihe. Bakitingbanga namangasunge na ngbatunga agbina wa gure tipa kaa zio ga Yekova amoyambu niungayo. Ka ani aidanga ko zi rani ya, si naida ani ningere angera na kini degeturani kuti agu azahe nayugo gupai furani nga ga Satana gbina gu du bara ane. Gi kekeapai re nika sakapai tipa wai rengbe ani ka bandatirani be agu agbina biata Bakitingbanga amangasunge nani nga gu si awira wa ko na diabese rogoho. Agu agbina re nga, (1) fura bau, (2) gunde gbiati soapai be akurase, na (3) bakere rungo be gu ingapai boro amangihe. Gu kekeapai ngbefuo gere nika sakapai tipa gu kura agbia ue Satana amangasunge nani.

ONI BISI GU WE NAKÍ BE FURA BAU

3, 4. Ka ani abandanga mirãrani ya, sangbanaha rengbe kangia gine? Oni funga kpiapai.

³ Tipa ka kusa anya rogo gu ba gbu ami rogoho, bamangi anya ima rengba ka zo nvuo tipa ka ruho ka zio anya baraho ami aida ka ora ni. Ka pepai nimasaku, Bakitingbanga naida ka zo gu dungurati nga ga aKristano. Ka ko tadu na diabese kindi, ko rengbe ka do agu aboro du rogoho rogo gu wene ba du yó rogoho tipa ka ruho ka zioyo. Wai rengbe ani ka undo ko zanga ani inihe tipa ko ruho ka zio rani?

⁴ Gu mokedi nangia Yakobo aringbisi mirãse kuti we. (Oni gedi Yakoba 3:6-8.) Ka pepai nimasaku, ka ani abandanga mirãrani ya, ani ima rengba ka ba we ti dungurati. Wai rengbe gipai re ka manga? Oni kparianga gi kpiapai re: Ti regbo dunguratise, i mangi tingidapai nga wirina sa nidee ima da ni nazakigene. Fuo nyasa dunguratise, awirina ue ni adee tona ka fura tipa gipai re. Guri sa na ngbarago tipa gipai re na ri naida Yekova undo gu wirinari re kuti ngba gi sunge re. Ono gu kurari bihe nga sunge rukö du ri amangaha, ri naida rimori naawo gbua rogo dungurati. Da dagba agu abatungusipai ue re oni aida ní du ni nakurearoni? Si taata ka ino gu boro dagbayo yo naida ka ba we ti dungurati rogo gani afugo yo.

5. Gini ngbatungapai si aida ani mangihe ka si dunga ani naida ka biso gu we nakí be fura bau?

⁵ Wai rengbe ani ka biso gu we nakí be fura bau? Yesu ayaa: “Ngba boro nagumba gu pai du kpotoni yo.” (Mt. 12:34) Gu bambatapai si aida ani mangihe nga ka wisigo ngbaduraniyo. Ya mo ani nane agu aberãpai rengbe ka sarani ani kusi gbegberẽ afugo? Nikpiapai, ho ani agia gupai ni nga wirina namanga ome tipa ka gbia momu sunge rogo dungurati, ya mo ani nabihe nga ní namangaha tipa wene ndupai watadu ani nabihe nga ní namangaha tipa rimoni niwo? Ka ani aberãha nga awirinarani amanganga sunge fu Mbori tipa wene nduhe te, ani tingidi gupai nga kinawo Bakitingbanga abihe nga gu ga Mbori moyambu nangia Eyobo ko amanganga sunge fuko tipa wene nduhe te. (Eyo. 1:9-11) Kuba gupai nga ani nitikö atikö kuti wirinarani, si adu niwenepai ani wisigi ndu gupai ani atikö ti ni kuti ní. Ya mo wene ndupai ho tipa ani du wa gure? Watadu gu zanga nyemuse du rogo gi yangara arame re ima gbarasa ngbaduraniyo?—2 Tim. 3:1-4.

6, 7. (a) Gini nduapai rengbe ka sarani ani tona ka bisirapa kura aboro? (b) Ginipai rengbe ani ka mangaha ka si du nga boro gberẽ ngbani yo furani?

⁶ Ani kparianga gu kurapai rengbe ka sarani ani tona ka bisirapa kura aboro. Si rengbe kadu nga ani naida aboro inipai tipa agu adiabese du ani nani. Gure wa ka i ya, ani naˈasada ka yugo nani nga apai furani niwenehe kisusi kura aboro. Watadu ani ima rengba ka ho mbupai tipa zanga manga ani gupai si aida ani mangihe. Kangia rukö, kpihe, watadu pa zanga ngba barani du nasa rani ani nimangi agi apai re, sangbanaha nikadu furani nigbegberẽhe.

⁷ Si rengbe kadu nga ani abingo ho nigbegberepai tipa ka fura gbegberẽ bara boro te. Isoke, mbiko ní aima manga rani na pai wagu re mbata watadu ní aima fura bara rani gbegberẽ. Kangia wo duhe, anga pa karaga ani gbegberẽpai funi nga wenepai te. Manga ani he wo wakina kusuko bagawu ku bangiri we yo, na ga Bakitingbanga mangapai du ga Mbori ngaha te. (2 Tim. 2:26) Si naida ani wiriki Yesu rogo gi bangiriba re. Ho aboro agberẽ ni ngbayo yo fuko, “ko agberã nga ngbako yo fu yo te.” Kuba gure, “ko afu tiko ku be gu ko nasapa ngbanga nzunzu.” (1 Pet. 2:21-23) Yesu aima du naa kido nga Yekova nika mangapai amanga kuti gupai re ngba gako gene na tigu regbo ko ka idaha. Si naida ani du na kina gu bangisa kido re kuti Mbori. Ho ani agumba agu afugo ni nangarasa aboro, gure nga ani nabandapa “gu ũkpamiatise nga zereda” rogo gaani dungurati.—Oni gedi AEfeso 4:1-3.

KA ONI MBUNGA GUNDE GBIATI SOAPAI BE AKURASE SI DI BERONI YA

8, 9. Tipagine Pirato asaringbanga Yesu ti ni sa kpio?

⁸ Ho nya azio ni ti gbina, u nazanga gu ranirii du beru nga kaa ta. Teketeke a, gu boro mbu tiní fu gunde gbiati gu soapai naye be akurase, ní nadu na kina wiri tooni ranirii rogo gani raka yo. (Oni gedi Asanza 29:25.) Ani wisigingo akpiapai ue tipa agu akumba nambutiyo fu soapai gbiati gunde si di beyo na ani ki bingo gupai rengbe ani ka wirikaha ti gayo kpiapai.

⁹ Gu ga ARomo Banyaki nangia Pondio Pirato aima ino gupai nga wiri ingapai adunga ti Yesu te na si nawira wa ko aidanga ka manga gbegberẽpai fuko te. Nirengo, Pirato ape gupai nga Yesu “amanga nga pai rengbe na kpio te.” Wa si avura duwo, Pirato asaringbanga ko sa kpio. Tipagine? Mbiko Pirato ambu tiko fu gu soapai naye be ndurumo aboro-zuũ. (Rk. 23:15, 21-25) Agu asogo Yesu re ape gupai nga: “Ka mo kusi gu kumba re, badia Kaisara nga mo te,” si kini mo ka sa gupai nga Pirato degetuko kuti sangbayo. (Yo. 19:12) Si rengbe kadu nga Pirato aagunde nga, ka ko ngbe na Kristo, i nika do ko ti sunge watadu ki imiko. Sidu, ko ambu tiko tipa ka manga gupai Bakitingbanga akpinyemuhe.

10. Ginihe nasa Petero ko tikango Kristo?

¹⁰ Gu mokedi nangia Petero angia mbembedi bakurea Yesu. Ko ape gupai gbaiga nga Yesu angia Masiya. (Mt. 16:16) Petero anye niruruko ti gu regbo kura abawiriki ambu Yesu tipa gupai Yesu agumbaha i aruganga tiyo nani ya. (Yo. 6:66-69) Na gu regbo avura Yesu aye ka zioko, Petero amangisunge na gako basape tipa ka banda Bairako. (Yo. 18:10, 11) Ono kusa, ko ambu tiko fu gunde na ki tikango nga ko ainongo Yesu Kristo te. Gu mokedi re aima zio ti gu gbina nga ga gunde be aboro vuru umba regbo yo, na si azako ti gu mangapai nga ga wingbaduse si aida ko mangihe.—Mt. 26:74, 75.

11. Gini apai rengbe ani ka sovura kutini?

¹¹ Nidu ani ni aKristano, si naida ani sovura kuti gu soapai naye be akurase tipa ka ruho ka manga gupai rengbe ka sa ngbarago ti Mbori. Gaani abaira sunge, watadu kura aboro ima rengba ka asada ka sarani ani pe ziree watadu ka rimiso rani kurogo wasiwasi kodaba. Agude sukuru ima rengba ka sovura kuti wai akurayo asosoda yó i dĩ asada, ka bi agu ahe nazingisa nyemu kodaba ti boro, ka vugundö, ka mangasunge na angua ngba iraira gene, ka kpibuda, watadu ka kodaba. Gine rengbe ka undo rani ani oro be gu gbina nga ga gunde gbiati soapai be akurase ka manga gupai afunga ngbarago fu Yekova ya?

12. Ginipai rengbe ani ka wirikaha ti aPirato na Petero?

¹² Ani bingo gupai rengbe ani ka wirikaha ti gu kpiapai nga ga Pirato na Petero. Pirato adu na inohe gbua tooni tipa Kristo. Wa si avura duwo, ko aima inoho nga kungba boro nangia Yesu gbua te na ingapai adunga tiko a te. Ono Pirato adunga na umbasitise gbiati nyemuse tipa ndikidi Mbori te. Bakitingbanga aima zioko niungako. Petero aima duna ndikidi inohe gbiati nyemuse tipa Mbori. Ti kura aregbo, ko adunga nibayee ko te, ko ada na gunde, na ki mbupa tiko fu soapai. Mbata fu i zi Yesu, Petero ata ngbaduko nga: “I navura manga agu yo i koto akota dunduko, ka mi akota nga ya.” (Mk. 14:29) Ka Petero akido kuti Mbori wa bake papara Atambuahe, ka ko aima mbakada tiko wenengai tipa gu asada ka ko agbia tiko nani kusa. Gu bake Atambuahe re ayaa: “Wa du Yekova tipa re; mi agunde nga wa sa te. Gini pai boro ka manga re na ni?” (Tam. 118:6) Rogo gu yangara yuru Yesu adu auru kpotosende ane, Yesu adi Petero na gu kura amokedi ue i ndu kurogo gu ati nangia Getesemane. Ono tie, kuba gupai nga Petero na abakureako ningere angera kindi, i ati nirame. Yesu azingisi yó na ki yaa: “Oni ngere ki nikpari, oni ka rima ku rogo asada.” (Mk. 14:38) Ono Petero ati nirame berewe na kusa, ko ki mbu tiko fu gunde gbiati soapai be akurase.

13. Wai rengbe ani ka sovura kuti gu soapai naye be akurase tipa ka manga gbegberẽpai?

¹³ Gu kpiapai nga ga aPirato na Petero rengbe ka yugo gu kurapai berewe furani nga, Tipa boro sovura na diabese kuti gu soapai naye be akurase, si nakoda du boro na ndikidi inohe, umbasitise, du nibayee, kpinyemu Mbori, na kini gunde tiko angianga aboro ya. Kangia mburu gaani idapase rii ndikidi inohe, ani nikaa fura tipa gaani ida na wingbaduse. Si nika undo rani ani sovura kuti soapai na ani ki di be gunde be aboro. Rengo ngaha nga, si aidanga ani duna bakere kido kuti tirani te. Kuba gure, si naida ani kparia gupai nga ani naida na ga Mbori ome tipa ka ruho ka sovura kuti asoapai. Si naida ani kpari tipa ga Yekova toro na ki mbu nyemuse tipa si fõngbaduraniyo ani bi gako arugute na nyanyakipaha. Kurigure, si naida ani mbakaditirani tipa aˈasada mbata fu si gbia rani. Nikpiapai, mbakadatise mbu regbo koyo kindi gbiati kparakpee rengbe arengba ka undo awirani i karagapai wenengai fu agu akurayo naˈasada ka sayo i mangi gbegberẽpai.—2 Kor. 13:7.a

ONI NE GU GBINA NAFITIKA HE—BAKERE RUNGO BE GU INGAPAI BORO AMANGIHE

14. Nibi gu ingapai ani amangihe kusayo, ginipai rengbe Bakitingbanga ka sarani ani berẽhe?

¹⁴ Ti gu kura aregbo, abamangi anya narẽ gu gbina nga dongbo ti gu bira-anya ami ata ngbaha dedede. Gu nya ainongo pai tipaha ya, ka u ta fõ gu nzingiri gbina re kindi, si nati kurii ru nibasa. Ani rengbe ka ringbisapa bakere rungo be gu ingapai boro amangihe kuti gu dongbo re. Ho ani aberã ni kurii gu gbegberẽpai ani amangihe kusayo, ani rengbe ka bi tirani nga ani “rurungbura ki mburu ambura gbe.” (Oni gedi Atambuahe 38:3-5, 8.) Satana rengbe ka sarani ani bi tirani nga ani arẽnga berewe tipa Yekova inipai furani te na ani arengbanga ka manga gupai ko akpinyemuhe berewe a te.

15, 16. Wai rengbe oni ka bandatironi be gu gbina nga ga bakere rungo be gu ingapai oni amangihe?

¹⁵ Wai rengbe oni ka ne gu gbina nafitika he re? Kangia oni aima manga kere ingapai mbata kusayo, oni mangi ome awere tipa ka mbakada gaoni pagume na Yekova. Oni ndu fuo abaakumba na ki sanayo tipa undo. (Yak. 5:14-16) Oni mangi ome tipa ka mbakada gu gbegberẽpai re. (2 Kor. 7:11) Ka i fu rugute furoni, ka rago gberẽnga tironi ya. Gu rugute re nayugo gupai nga Yekova nakpinyemu roni akpi. (Eb. 12:6) Oni mangi ome tipa ka zanga manga gu ingapai re berewe na ki bandatironi ti gupai naasa roni oni mangihe. Fuo sa oni berã na ki mbu gupai re, oni duna idapase nga gu motumo tumorii nga ga Yesu Kristo nika zunda roni azunda ti gaoni irairapai.—1 Yo. 4:9, 14.

¹⁶ Kura aboro rengbe kaa rungo be gu ingapai i aima mbupai fuyo ti ni. Kangia wo duhe tipa roni, oni tingidi gupai nga Yekova aima mbupai fu Petero na gu kura amokedi nga aguyo nambu Bangisa Wiriko nga Yesu ti kere regbo. Yekova ambupai fu gu kumba i akusi ko rogo dungurati Korinda yo tipa kere wasiwasi kodaba fuo sako berãko. (1 Kor. 5:1-5; 2 Kor. 2:6-8) Fugo Mbori nafura tipa agu aboro namangi kere ingapai ki sa gayo berã i ki mbupai fuyo.—2 Peka. 33:2, 10-13; 1 Kor. 6:9-11.

17. Ginipai rengbe motumo tumorii ka mangaha furani?

¹⁷ Yekova nika mbupai furoni na bangiriko ki go ti gaoni ingapai ka oni sa gaoni berã nzunzu na ki di gako inopai kugume. Ka oni berãnga gupai nga, ga Yesu motumo tumorii arengbanga ka dia gaoni ingapai kusayo te ya. Ka oni aberã wo, gure nga oni naida ka zio tiga Satana agbina. Bakitingbanga naida ka saroni oni bihe nga Yekova arengbanga ka mbupai fu boro mbiko motumo tumorii te. Ono agu aboro ingipai ki saberã yó, i rengbe arengba ka mbupai fuyo. (Snz. 24:16) Idapase kuti motumo tumorii rengbe ka dia bakere rungo be ingapai kusayo na ki fu ome furoni tipa oni rengbe ka mangasunge fu Mbori na ngbaduroniyo dunduko, berãroni, gbiati mbisimo roni.—Mt. 22:37.

ANI IMA INO GA SATANA BAWAGI

18. Wai rengbe ani ka ne ga Bakitingbanga agbina?

¹⁸ Satana abakanga bangiriko tipa gu ngbatunga gbina nazio rani te, gupai ko aidaha sa nga ka zio rani. Wadu he nga ani ima ino ga Satana bawagi, si naida ani ne ko ka ko zingo rani ya. (2 Kor. 2:10, 11) Ka ani kpari tipa tatamana ka sovura kuti aˈasada, ani zingo ti gako agbina te. Yakobo ayaa: “Ono ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yak. 1:5) Si naida ani mangipai ringbisihe kuti gaani kparakpee, wisigopai nisase gbiati manga gupai Fugo Mbori agumbaha. Agu awaraga kangara moyambu akusa tipa si undo rani tipa wisigo Ziazia Kekeapai rengbe ka undo rani ani rugutirani wenengai naapa agu agbina Satana arẽhe na ani ki nehe.

19, 20. Tipagine si aida ani sogo gupai ti ni du nigbegberehe?

¹⁹ Kparakpee gbiati wisigopai nisase naundo rani ani kpinyemu gupai du niwenehe. Ono si a ninyanyakipa pai ani wiriki ka soga guhe du nigbegberẽhe. (Tam. 97:10) Ani ima rengbe ka bandatirani ti nyemu manga gbegberẽpai kina gu ka ani berãkurii gu gbegberẽ sangbanaha rengbe ka ye kurirani. (Yak. 1:14, 15) Ho ani awirika ka soga gupai ni du nigbegberehe na kini asadi ka kpinyemu gu du niwenehe, agu ahe Satana amangasunge nani tipa ka zio rani, si dunga na sunge ti ni furani te mbiko ani nasogaha asoga.

²⁰ Nairiwo gu ngbarago du ani nani nga Mbori naundo rani ka Satana zingo rani ti gako agbina ya! Yekova nika mangasunge na gako toro, Fugoko, gbiati gako riigbu ka batasarani be ‘gbegberẽ ko.’ (Mt. 6:13) Rogo gu kekeapai naye fuo gere, ani nika wirikapai tipa wai rengbe ani ka ne gu kura agbina ue Bakitingbanga nabihe nga si ngba tipa ka zio ga Yekova amoyambu nani niungayo.

[Footnote]

[Gu sura du ti kpewaraga 24]

Fura bau rengbe arengba ka sa dungurati si gbi be apai

[Gu sura du ti kpewaraga 27]

Oni rengbe arengba ka dia gu tindiro du rironi nga ga bakere rungo be gu ingapai oni amangihe