Biata Sanahe: Tipagine Mbori Ambu re ti ni Mi Nirungo?

BA IAN angia kere bambiri buda. Wa si avura du nga Ian asono kidu na agu ahe dunduko beko ko aida nani, ko azanga gu nunga nga ga bagude koyo du wirini ni. Ian ayaa: “Mi aadunga na nyemu ko te mbiko gu kere mbira buda naadu tiko na wai ko anaamanga nina.” Ho Ian aasona ni, ko atona kaa sanahe singia Mbori kina ti ni. “Mi atona kaa berã nga, ‘Ka sidu nga Mbori kina ti ni nzunzu, tipagine ko ambu aboro ti ni i nirungo.’”

Tipagine aboro asana gu sanahe re ti ni? Ka si vura du nga kpakarapai ho rogo ga raka te, ngbaduro rengbe arengba ka ima ho mo abi aboro-wenesa ni i nirungo. A wa si adu tipa Ian, mo rengbe ka bi gu sanahe du tipa arungo na nyanyakipaha ka si du nga mo gbiatiro na kpakaraapai watadu gu boro mo akpinyemuni nawoka watadu nikpi.

Ginipai kura aboro aberãha ya si nga karagapai? Kura aboro naberãha nga Mbori nambu aboro i nirungo bambiko gupai nga ko naida aboro duna umbasitise na ki duna nunga aboro tiyo. Kura aboro naberãha nga, aboro narungo bambiko gu ingaapai i amangihe mbata kusayo.

Ginipai gu karagapai re ayugoho? Mbori aberãnga pa agu arungo nga ga aboro te, na si ima mbu aboro duna nyemuse bambiko ko angeranga fuo rani te. Mbori nga gbegberẽ boro.

Ginipai Ziazia Kekeapai ayugoho? Ziazia Kekeapai nayugo gupai ziazia nga, si aidanga i bira Mbori tipa agu arungo namanga aboro te. “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” (Yakoba 1:13) Nirengo, gu bipai nga si naida i bira Mbori tipa agu arungo namanga aboro, si andunga sa na wai Ziazia Kekeapai afura tipa Mbori te. Wai duhe wo?

Nyemuse nga bangua sino Mbori. (1 Yoane 4:8) Tipa ka nyakasa gupai re, Ziazia Kekeapai nagumba gupai tipa Mbori nga ko wakina nagude. Mbori nasanahe ki yaa: “Ka bangiri de go ti gari gude ngbamai, ya ka nunga gu wiriri nga ga rukumburi du nga ti ri ya? Ii, bangiri agi yo re rengbe na go, ono bangire nga Gbia agó nga ti ro te.” (Yesaya 49:15) Ya mo nagude rengbe ka imisa wiriri rogo wia yo? Kuba gure, gu vungugude na kpinyemu wirini rengbe ka asada ka sa gupai nga ka wirini rungo nga ya. Teketeke a, Mbori asanga aboro-wenesa i nirungo te.—Bambata Pai 18:25.

Wa vura duhe wo aboro-wenesa narungo arungo. Oni rengbe ka bakabangironi nga, ‘Ka sidu nga Mbori nangera angerafuo rani kidu na ome tiko, tipagine ko adianga agu apai naye na arungo ti ni kusayo ya?’

Wene nduapai kina be Mbori ko ambu arungo ti ni si naandu kumbatayo tigi gaani regbo re. Ani makia nga gu sa: Dedede, aboro du nasa akurayo i nirungo. Dungu agu aboro na rungosi aboro na agu abazogo na imisa aboro aidanga ka sa berãyo te. Sidu, tipa Mbori di gupai kusayo naye na arungo, si naida ko gbarasi agu aboro re.

Gu mokedi nangia Petero asakirogo ndu gupai Mbori ata gberesanga agu aboro namanga gbegberẽ apai ti ni ya ki yaa: “Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:9) Ga Yekova Mbori hipai nayugopa gu sinoko nga nyemuse na inapai.

Ono tie, Yekova Mbori nika mangapai barambeda. Ko nika “fú gberãngbi ni mosoro fu agu yo namanga” aboro-wenesa. Agu aboro nasa aboro i nirungo, i nika ‘gbarasayo nyeanye’ kindi.—2 ATesaroniko 1:6-9.

Ian ani nifura tipa ko mbata, aima gbia ndikidi akaragapai kuti gako asanahe tipa arungo. Gupai ko awirikihe aʹaria gako bipai tipa raka. Oni gedi gako pangbanga ti kpewaraga 13 nga ga gi waraga re.

Ka oni aida ka ino gu kura apai tipa ndu gupai Mbori nambu arungo ti ni si nimangi na gupai ko nika mangaha tipaha, oni bi kapita 11 nga ga gu buku nga Gini Apai Nzunzu Ziazia Kekeapai Ayugoho? Oni ima rengba ka kusaha rogo gu bangiriba nga ga Internet nga www.jw.org

[Box on page 9]

Ginipai Yesu Agumbaha Tipa Rungo?

Yesu aabiranga Mbori tipa gu rungo aboro aarungo ho ti ragoko te. Kuba gure, ko amangi agi apai re.

Yesu ayugu gupai nga Mbori ambusanga aboro-wenesa kaa sayo i nirungo te. Yesu ahusi aboro kaza, gbarĩgbarĩ aboro, na airavurari. (Matayo 15:30) Gu iiriwoapai Yesu amangihe nayugo nyanyakipa arengo furani ue: Bambataha nga, Yesu amangisunge na ga Mbori ome tipa ka dia arungo kusayo ti aboro angianga ka ye na arungo kuriyo ya. Uehe nga, Yesu ahusa nga aboro zanga duna nyemuyo tiko te. Ho ko abi aboro ni i nirungo, “nungayo ki mangi” ko. (Matayo 20:29-34) Yesu ayugukpia ga Bako berãpai tipa arungo. Sidu, afugo Yesu gbiati gako mangaapai nayugo gupai furani nga rago nagberã agberã ti Mbori ho ko abi gu fudifudiapai ni namanga aboro na ko kini idi ka diaha kusayo.—Yoane 14:7, 9.

Yesu ayugu gupai nga Satana Bakitingbanga nga gu ndikidi boro naye na arungo kuti aboro. Yesu ayaa: “Ko adu ni baimiaboro ho rago ainge ni.” (Yoane 8:44) Yesu ayugu Satana Bakitingbanga a ni “gbia gi zegino re” na ‘nibanangi aboro auru kpotosende dunduko.’—Yoane 12:31; Yugoti 12:9.

Yesu afu maabangirise furani tipa gu regbo arungo ka digo ti ni dunduko. Ko ayugupai fu apefuoko i nikpari niyaa: “Barani du ngbangbaturũ yo. . . . Ga ngbi yé, ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:9, 10) Ho ga Mbori Kindo nika yé ni, arungo adunga ho berewe auru kpotosende te, a wa adunga arungo ngbangbaturũ yo ya.

Rogo gu yugoti Yesu ayuguhe fu gu mokedi nangia Yoane, ko aringbisipa wai raka nikadu fu agu aboro nika raka tii ga Mbori Kindo. Ti gu regbo re, Mbori nika “wéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”—Yugoti 1:1; 21:3, 4.