AGU ASANAHE ZIAZIA KEKEPAI AKARAGAPAI KUTINI
Tipagine duhe ti ni nikpakarapai zereda du rogo zegino?
Kina gu zogarago sa rengbe ka aria ga aboro bipai, si rengbe ka ye na zereda kurogo zegino
Ziazia Kekeapai nafu nyanyaki nduapai ue. Nibambataha, wa vura duhe nga aboro ima duna diabese rogo dungu apai yo, Mbori aakusanga yó tipa i ninungusi gayo raka nitiyo te. Uepai nga, agu ambakadapai nga ga aboro arengbanga kadu na diabese te mbiko “zegino dunduko du ni zogozogo ho be gbegberẽ ko” nga Satana Bakitingbanga. Si du nga ndu gupai gu ome aboro amangaha arengba ka ye ti ni na zereda kurogo zegino ya.—Oni gedi Yeremaya 10:23; 1 Yoane 5:19.
Gu gbangbati na gu nyemu pagbia du ti aboro ima sa gupai a nga ka zereda du nga rogo zegino ya. Kinagu zogarago sa rengbe ka yugopai fu aboro i kpinyemu rurupai na kini berẽpa akurayo si rengbe ka ye na zereda kurogo zegino dunduko.—Oni gedi Yesaya 32:17; 48:18, 22.
Da nika sigira zereda rogo zegino?
Gu Mbori Duna Tanduapai Dũ ima kidohe nga ko nika sigira bangisa zogarago nga gu nika zogorago kurii aboro dunduko. Ti nika diaba gu zogarago nga ga aboro. (Daniere 2:44) Wiri Mbori nga Yesu nika zogarago ni Bakindo Zereda. Ko nika dia gbegberẽ apai dunduko kusayo rogo zegino na ki yugupa zereda fu aboro.—Oni gedi Yesaya 9:6, 7; 11:4, 9.
Awere, rogo zegino dunduko vurube gu rugapai nga Yesu, amirioni aboro namangasunge na Fugo Mbori tipa ka undo aboro i duna zereda dagbayo na akurayo. Barambeda, zereda nikadu rogo zegino dunduko.—Oni gedi Yesaya 2:3, 4; 54:13.