“Oni Ngere, Mi na Oni Ti Arago Dũ, Ki da Ti Digida Zegino”

1. (a) Oni penga pa ga Yesu sanza tipa rende na morũ? (b) Yesu asakirogo gu sanza re yo wai?

SANZA sa dagba ga Yesu asanza yo nafura tipa gu kumba nami wene tunga morũ, ono vurako ki ye ki mi tunga rende dagba gi wene tunga re. Rende asono ki fu ri morũ, ono gu kumba namihe ki ya fu gako abamangisunge “oni he he si sono wa sa dati rago ke he.” Ti regbo kehe, i nika gbarasa rende na ki dungura morũ. Yesu nitiko asakirogo gu sanza re. (Oni gedi Matayo 13:24-30, 37-43.) Ginipai gi sanza re ayugoho? (Oni bi gu sanduki nga “Morũ na Rende.”)

2. (a) Ginipai namanga rogo gu ati nga ga bamitunga? (b) Gini papara gi sanza re ani nika wisigopai tipaha?

² Gipai naamanga rogo ga gi bamitunga ati re nayugo wai Yesu nika dungura agu aboro duwa morũ nga mbedimbedi aKristano nika zogarago naako rogo gako Kindo na gu regbo ko nika mangaha ti ni. Gi mi tunga re atona rago Pendekote. Gi sunge dungura ahe re nika digo tigu regbo i nika dikohe niyangaraha tigu mbedimbedi aKristano du niungayo awere tipa i ga ku ngbangbaturũ yo. (Mt. 24:31; Yugo. 7:1-4) Kina wai boro nibiti kurii gangara tipa ka bi rago wenengai, kinawo gi sanza re ayugo agu apai si adu nga si nika manga vuru gu regbo di agarã 2000 re. Nibi gu bipai du ani nani, gini apai du tipa Kindo ani naini he? Si nga gu sanza du tipa gu regbo nga ga mi tunga, sonaha, na dungura ahe. Gi kekeapai re nika fura gbe tipa regbo ke ahe.a

YESU NANGERA SIRISIRI

3. (a) Ginipai natona ka manga fuo bambata sa kama agarã? (b) Ringbisihe kuti Matayo 13:28, gini sanahe nakuru, na ada nasanaha? (Oni bi gu kekeapai du bandu waraga yo.)

³ Bara ti digido ue kama agarã, ‘rende akuru a tigaha’ tigu regbo agu aboro i aya tiyo aKristano ange rogo zegino nga ati. (Mt. 13:26) Bara rogo biama kama agarã, agu aKristano nangia rende aima nge kisusi mbedimbedi aKristano. Oni tingidi gupai nga rogo gu sanza re, abamangisunge asana bairayo tipa ko idihe fuyo i mo rende kusayo.b (Mt. 13:28) Ginipai bairayo akaragaha fuyo?

4. (a) Ga Yesu karagapai nayugo gine? (b) Gini regbo aboro atona ka ino agu aKristano duwa morũ ti ni?

⁴ Yesu afura tipa rende na morũ ki yaa: “Oni he he si sono wa sa dati rago ke he.” Gi zinahe re nayugo gupai nga tona ti bambata sa kama agarã kada ku areme, aboro aima duho wa mbedimbedi aKristano rogo zegino. Gupai Yesu apehe fu gako abawiriki nasa rani ani idi kuti gipai re. Ko ayaa: “Mi na oni ti arago dũ, ki dati digida zegino.” (Mt. 28:20) Sidu, si adu nga Yesu nika banda mbedimbedi aKristano ti agu aregbo dũ nikaa ndu sa yangara arame. Ono tie, wadu he nga agu aKristano nangia rende aima fu riyo, ani ainongo gini aboro nzunzu naadu dagba gu riko nga ga mbedimbedi aKristano vuru agu aregbo re te. Ono tie, gu dungu agarã nadumbata fu regbo ke ahe, morũ atona kadu nidunguhe na gbaiga. Gipai re aru wai ka manga wo?

BANDUSUNGE ‘AMBAKADI GENE’

5. Ga Maraki sangbanebi adigisitihe wai rogo bambata sa kama agarã?

⁵ Kama agarã mbata fu Yesu pe gu sanza du tipa rende na morũ, ga Yekova toro adu kugii gu nebi nangia Maraki tipa ko gumba agu apai nawira kina agu pai du rogo ga Yesu sanza yo. (Oni gedi Maraki 3:1-4.) Yoane Bapatiza nangia gu ‘bandusunge nambakadi gene.’ (Mt. 11:10, 11) Ho ko adani rogo gu garã nangia 29, regbo sapangbanga aYisaraere aima mbeda kada. Yesu nangia ue bandusunge. Ko agirisi yekaru Yerusarema yo bara ue. Bambataha adu tigu regbo ko atona gako tungusapai na uehe kidu bara ho ko aambeda ni ka digisoho. (Mt. 21:12, 13; Yo. 2:14-17) Sidu, pa giriso Yesu yekaru amanganga ti bangisa regbo sa te si adi regbo adia.

6. (a) Gini regbo gu ga Maraki sangbanebi re adigisitihe nibakere? (b) Gini regbo Yesu aye ti ni tipa ka wisigo gu yekaru nga ga toro? (Oni bi gu kekeapai du bandu waraga yo.)

⁶ Gini regbo gu ga Maraki sangbanebi re adigisitihe nibakere? Vuru gu dungu agarã naandu sa 1914, C. T. Russell na wene abadiangbako amangisunge wakina gu nangia ga Yoane Bapatiza. Gu nyanyakipa sunge re aakodapa karaga gu rengo nga ga Ziazia Kekeapai. Agu abawiriki Ziazia Kekeapai re ayugu ndikidi rogo ga Kristo motumo yo, i akusi gu ziree nga ga zo aboro rogo we iferno, na ki tungusipai nga Regbo aGendiria ima mbeda ka digo. Wa si avura duwo, dungu apambori adu kinaho naata ngbaduyo nga i nga apefuo Kristo. Sidu, si aida i karagapai sa nyanyaki sanahe nga: Ada dagba agi aboro re nzunzu nga morũ? Tipa ka karagapai kuti gu sanahe re, Yesu atona ka wisigo gu yekaru nga ga toro rogo 1914. Si adi ko adia na bete regbo tipa ko wisigi yekaru na ka girisoho, ko atonaha ti 1914 ki digisihe bara ti tonatona 1919.c

AGU AGARÃ NANGIA GA WISIGO YEKARU NA GIRISOHO

7. Ginihe Yesu agbiaha ho ko atona wisigo yekaru ni rogo 1914?

⁷ Ginihe Yesu agbiaha ho ko atona wisigo yekaru ni? Ko agbia badona nga ga abawiriki Ziazia Kekeapai naafu tiyo kakaka na gayo ahe tipa ka manga tua nga ga tungusapai rogo zegino dunduko tipa agarã naima susa 30.d Nairiwo gu ngbarago Yesu adu nani na amaraika ka bi gupai nga gu umba aboro naadu wa morũ re, ga Satana rende aanyasanga riipa yó te! Wa si avura duwo, gipai re asa gupai nga i ‘gírisi awiri Revi’ nga mbedimbedi aKristano. (Mara. 3:2, 3; 1 Pet. 4:17) Tipagine si adu ti ni wo?

8. Ginipai namangi fuo 1914?

⁸ Bara ti digido 1914, rago agberẽ ti gu kura abawiriki Ziazia Kekeapai mbiko i aganga ku ngbangbaturũ yo te. Rogo 1915 kuti 1916, aboro atona ka sovura kuti gayo riigbu na si ki karaga gayo tungusapai kusayo. Gu nagberẽ gbe amangi fuo kpio C. T Russell rogo Tanvuo 1916, aboro akuru rogo riigbu ki tona ka sovura kuti akurayo. Aboro biama dagba agu awirina naangerafuo sunge rogo riigbu asamungu kuti gu diaberã Rutherford amangihe nangia bairayo. I asadi ka kusa kparakaro dagba awirina, ono rogo Banzinga 1917, i akuru Betere yo, nirengo, gure nangia gu regbo i agirisihe! Berewe a, kura abawiriki Ziazia Kekeapai ambu irisombori mbiko gunde be aboro. Ono dungu abawiriki Ziazia Kekeapai aduna nyemu ka manga ariapai rogo gayo raka tipa kadu gigiri bangiri Mbori. Sidu, Yesu asaringbanga yó ti ni nga ndikidi aKristano nga morũ, ono ko asogo agu aboro i aya tiyo aKristano, kodihe na agu aboro dunduko naadu rogo ziree pambori. (Mara. 3:5; 2 Tim. 2:19) Ginipai namangi berewe kumbatayo? Tipa ani ini gupai namangi, ani karaganga tirani berewe kuti gu sanza nga ga morũ na rende.

GINIPAI NAMANGI FUO TONA REGBO KE AHE?

9, 10. (a) Ginipai ani nika wisigoho tipa regbo ke ahe? (b) Ginipai namangi ti regbo ke ahe?

⁹ Yesu ayaa: “Rago ke he nga ho zegino ka nyasa ni.” (Mt. 13:39) Gu regbo ke ahe re atona rogo 1914. Ani nika wisigo apai bisue nga gu Yesu ayaa si nika manga tigu regbo re.

¹⁰ Bambataha nga, rogoda rende. Yesu ayaa: “Ni gu rago i ka ke he mi aya fu abakehe, oni rógodi rende mbata, ki vodihe.” Fuo 1914, amaraika atona ka ‘rogoda’ agu aKristano naadu wa rende ki kpara yó ti mbedimbedi aKristano nga “awiri ngbi [watadu Kindo].”​—Mt. 13:30, 38, 41.

11. Da ku areme, ginihe nakpara ndikidi aKristano ti agu aboro naya i nga aKristano?

¹¹ Ti regbo ke ahe, kparakparapai aima du ziazia dagba agu abadona ue re. (Yugo. 18:1, 4) Rogo 1919, si aima du ziazia nga Bakere Babera ima ti. Ginihe naasa ndikidi aKristano i du kia ti aguyo namangi tiyo wa aKristano? Tungusapai. Agu aboro naangbembatayo rogo apai atona ka nyakasa gupai nga si naida boro na boro nitungusi pa Kindo. Nikpiapai, i akusi waraga rogo 1919 naazungadi mbedimbedi aKristano dunduko i tungusipai kporo na kporo. (To Whom the Work Is Entrusted) Gu waraga re ayaa: “Si nawira wa gi sunge re ima kpakara, ono ga Gbia sunge du, na gako ome nika sa gupai nga ani nyasihe. Oni na momu beroni tipa ka mangaha.” Ga aboro karagapai angia gine kuti gipai re? Natona ti gu regbo re ka ndu kumbatayo, gu Ngbaõbambu Sinziri nangia ga 1922 ayaa abawiriki Ziazia Kekeapai ima kuto kuti tungusapai. Fuoho aturongo te tungusapai kporo na kporo ki da nigupai aboro aini gu ruru aKristano re ti ni kina wai duhe areme.

12. Gini regbo i atona dungura agu aboro duwa morũ ti ni?

¹² Uehe nga, rogoda morũ. Yesu azinahe fu amaraika ki yaa: “Oni rógodi morũ kurogo gi gbamu.” (Mt. 13:30) I aima digo nidungura mbedimbedi aKristano kurogo gbamu tona rogo 1919. Gu mbedimbedi aKristano nikadu niungayo ti digido gi sino raka re, i nika dungura yó niyangaraha ho i nika gbia gayo mosoro ni nga ga ngbangbaturũ.​—Dan. 7:18, 22, 27.

13. Yugoti 18:7 nayugo ginipai tipa gu bipai du gu debäri nani nga ziree pambori?

¹³ Biataha nga, kpee na ri ngba rinde. Ginipai nika manga fuo amaraika dungura rende? Yesu afura tipa rende ki yaa: “Yo kpe ka du ni na ri ngba rinde.” (Mt. 13:42) Ya mo gupai re namanga awere? Oó. Areme, agu akanisa i aya ti ni ga aKristano nga papara debäri, si naya wee: “Mi nasunga ni nakindo, dekurugbo nga mi te, mi abí nga rungo te.” (Yugo. 18:7) Nirengo, agu akanisa re nabihe nga i duna pagbia beyo, kini bi tiyo nga i ‘sungu ni nakindo’ kurii abazogo. Ziree pambori duwa rende, i nata ngbaduyo kindi angianga ka kpara ya. Ono ariapai nika manga amanga.

14. (a) Gini regbo ziree pambori nika ‘ri ngba rindiyo’ na tipagine? (b) Gu vovo gene saki yó Matayo 13:42 ngbaha, wai duhe sa na gupai du rogo Atambuahe 112:10? (Oni bi gu kekeapai du bandu waraga yo.)

¹⁴ Ti regbo bakere gberãngbi, fuo gbarasayo ziree pambori dunduko, agu aboro du rogoho nika gbata bagbuko ka i abingo ho ya. (Rk. 23:30; Yugo. 6:15-17) Sidu, fuo biyo gupai nga ba ho rengbeyo ka ora kurogoho te, i nika kpara gbegberẽ tipa gupai nika mangayo na kini ‘ri ngba rindiyo.’ A wa Yesu apehe rogo gako sangbanebi tipa bakere gberãngbi, ti gu kere regbo re, i nikadu ‘nirungo rungo’ yó.e​—Mt. 24:30; Yugo. 1:7.

15. Ginipai nika manga rende, na gini regbo gupai re ka manga ti ni?

¹⁵ Biamaha nga, bafa ha ku gbigiwi we yo. Ginipai nika manga tipa vodivodi rende? Amaraika ‘nika bafa yó ku gbigiwi we yo.’ (Mt. 13:42) Gure nayugo gupai nga i nika gbarasayo nyeanye kindi. Sidu, agu aboro nayugo ziree yugopai i nika gbarasayo ho bakere gberãngbi nika digo ni ti regbo Aramegido.—Mara. 4:1.

16, 17. (a) Gini apai Yesu afura tipaha niyangaraha rogo gako kpiapai yo? (b) Tipagine ya ani ti ni wee gipai re nika digiso tihe kumbatayo?

¹⁶ Bisuehe nga, i nika hasa rago wa uru. Yesu adigisi gako sangbanebi niyaa: “Ni gu rago re ruru aboro ahasa rago wa kina uru rogo ga Bayo ngbi yo.” (Mt. 13:43) Gini regbo gupai re ka manga ti ni na wari si ka manga ni? Gipai re nika digiso tihe kumbatayo. Yesu ayaa, anga si nga gupai namanga awere auru kpotosende te, oni si nika manga kumbatayo ngbangbaturũ yo.f Oni bingo gu nduapai ue sa rani ani dakuti gi digisopai re.

¹⁷ Bambataha nga gu sanahe nga “nigini rago.” Yesu ayaa: “Ni gu rago re ruru aboro ahasa rago.” Gu fugo nga “ni gu rago” si nayugopa gupai Yesu apehe mbata fu gure nga i nika ‘bafa rende kurogo gbigiwi we yo.’ Gipai re nika manga ti digido papara bakere gberãngbi. Sidu, pa hasa mbedimbedi aKristano rago wa uru nika manga kumbatayo. Ue sanahe nga, “wari?” Yesu ayaa ruru aboro nika ‘hasa rago rogo ngbi watadu kindo.’ Rogo gupai re nga gine? Fuo bambata papara bakere gberãngbi susi, yangara mbedimbedi aKristano dunduko auru kpotosende nika gbia gayo mosoro mbata fu gu regbo re. A wa Yesu ayuguhe rogo gako sangbanebi yo, i nika rogoda yo ku ngbangbaturũ yo. (Mt. 24:31) I nikaa hasa rago “rogo ga Bayo ngbi [watadu Kindo],” na ngbutuko fuo gu vura nga ga Aramegido, i nikadu na ngbarago “rago diade nga ga Wiri Kandoro.”​—Yugo. 19:6-9.

GU UNDO GBIA ANI HE

18, 19. Rogo gini agene gu ga Yesu sanza du tipa morũ na rende afu undo furani ngbaha?

¹⁸ Gini undo gbia ani he ti wisigo ani gupai gi sanza re apehe? Ani bingo agene biata. Bambataha nga, si ima kiiso gaani giarogopaiyo. Gi sanza re ima yugo gu nyanyaki ndupai Yekova ambugene ti ni fu gbegberẽ apai. Ko na “hipai nigbangaha fu guhe du fu zinga” tipa ka mbakada gene fu “gu he du fu inapai” nga agu aboro duwa morũ.g (Rom. 9:22-24) Uehe nga, si nanyakasa rani ani du nakido. Wa digido zegino ambeda, avura rani nikaa manga ome tipa ka zubo rani, ‘ono i adía nga be rani te.’ (Oni gedi Yeremaya 1:19.) A wa Yekova aima digo nibanda morũ tipa dungu agarã, kinawo Ko gbiati Yesu na amaraika nikadu ‘na ani ti arago dũ.’​—Mt. 28:20.

¹⁹ Biataha nga, gu sanza re undo rani tipa ani ini agu aboro duwa morũ. Tipagine du gupai re ti ni na nyanyakipaha? Pa ino ani agu aKristano duwa morũ na nyanyakipaha ka ani aida ka gbia karagapai kuti gu sanahe du rogo ga Yesu bakere sangbanebi nafura tipa yangara arame re. Ko asanahe ki yaa: “Da nga gu kangara moyambu tie du na tatamana?” (Mt. 24:45) Gu kekeapai du ue kumbatayo nika karagapai furani kuti gi sanahe re.