“Ruru Aboro Ahasa Rago Wa Kina Uru”
“Ruru aboro ahasa rago wa kina uru rogo ga Bayo ngbi.” —MT. 13:43.
1. Gini apai du tipa ga Mbori Kindo Yesu amangisunge na asanza ka yugoho?
YESU KRISTO anaamangasunge na akpiapai watadu asanza tipa ka sakapai nani tipa agu apai du tipa ga Mbori Kindo. Ko “[anaagumbapai] fu rimbasa aboro ni asanza; pai ho sa ko ahe gumba ha fu yo ni sanza te.” (Mt. 13:34) Rogo gu sanza du tipa mi tunga nga ga Kindo, Yesu anyakasipa wai ngbadu boro yo adia gu pangbanga nga ga Kindo kugume na gu sunge Yekova amangaha tigako tipa ka sa boro ní sono rogo toro yo. (Mk. 4:3-9, 26-29) Yesu afura a tipa wai agu apai nga ga Kindo asona rogo zegino kina kumbatayo wa vura duhe nga aboro abingo gu sona kumbatayo re nibangiriyo te vurũ. (Mt. 13:31-33) Kurigure, ko anyakasi gupai nga, anga agu aboro dunduko nadia gu pangbanga nga ga Kindo kugume nga wene avuru gu Kindo re te.—Mt. 13:47-50.a
2. Nibi gu ga Yesu sanza du tipa morũ na rende, wene tunga narukuba gine?
2 Ono tie, Yesu agbeberã aboro kuti gu sanza naafura tipa dungura agu aboro si adu nga i nika zogarago naako rogo gako Kindo. Gu sanza re tipa morũ na rende na si nikekehe rogo Matayo kapita 13. Na rogo gu kura sanza, Yesu afura tipa pa gu tunga re ki ya si nga “gu pangbanga nga ga ngbi” watadu kindo, ono rogo gi sanza yo re, ko nayawee gu tunga re narukuba ‘awiri ngbii.’ (Mt. 13:19, 38) Avuru ga Mbori Kindo nga agi yó re te, ono i nga “awiri” gu Kindo re watadu adikumbo gu Kindo re.—Rom. 8:14-17; Oni gedi AGaratio 4:6, 7.
Gu Sanza Du Tipa Morũ na Rende
3. Oni sakingo pai tipa gu kpakarapai nagbia kumba rogo gi sanza re na wai ko adiberã ka mangapai sani.
3 Gi sanza re gere: “I aringbisi gu ngbi nga ga ngbangbaturũ kuti gu ni nami wene tunga rogo gani ati; ono ho i ara ni, vurani ki ye ki mi rende dagba morũ, ni ki ga. Ono ho morũ akuru ni, ki zu rindihe, rende ki kuru a tigaha. Ga irakporo aboro sunge aye ki ya fu ko, ‘Baira, a nga wene tunga mo ami rogo gamo ati te? mangi he wãi gbegberẽ rende akura ti ni?’ Ko ki ya fu yo, ‘Vurare nimangi gere’. Aboro sunge ki ya fu ko, ‘Ka si du were mo nakpi nyemu ani ndu ka mo ho?’ Ono ko aya, ‘Oó; ka oni mo rende, oni mo morũ amo na ni a. Oni he he si sono wa sa dati rago ke he. Ni gu rago i ka ke he mi aya fu abakehe, Oni rógodi rende mbata, ki vodi he avoda ka zo ho; ono oni rógodi morũ ku rogo gi gbamu.’ ”—Mt. 13:24-30.
4. (a) Da nga gu bamitunga Yesu afura tipa ko? (b) Ti gini regbo Yesu atona ka mi tunga na wai ko amihe?
4 Da nga gu kumba nami wene tunga rogo gako ati re? Yesu afu karagapai kusa ho ko asaki rogoyo ni fu gako abawiriki ki yaa: “Gu ni nami wene tunga ni nga Wiri boro.” (Mt. 13:37) Yesu nga “Wiri boro” aima giriso ati tipa mi gu tunga re rogoho vuru agu agarã biata na beberehe ko amangi gako sunge tungusapai rogoho auru kpotosende ane. (Mt. 8:20; 25:31; 26:64) Ko atona ka mi gu wene tunga “nga awiri ngbi” tona ti rago Pendekote rogo gu garã nangia 33 F.B.K. Gi mi he re atona ho Yesu nga gu boro narukuba Yekova akedi ziazia toro ni kurii gako abawiriki na ki mbedi yó i da ni awiri Mbori.b (Amo. 2:33) Gi wene tunga re asono ki da ni wene morũ. Sidu, ndu gupai i ami gi wene tunga re ti ni angia ka dungura agu aboro nika da ni adikumbo na ni abazogo wa sa na Yesu rogo gako Kindo.
5. Da nga vura gu bamitunga furayo tipa ní rogo gu sanza re, na ada narukuba gu rende re?
5 Da nga vura gu bamitunga re, na ada nga gu rende re? Yesu nape gupai furani nga, vura gu bamitunga re nga “Bakitingbanga.” Gu rende re nga “awiri gbegberẽ ko.” (Mt. 13:25, 38, 39) Nirengo, rimo gu ngbatunga nvuo i asaha kurogo pa-Zande nga rende re, si nga gu nvuo nawira kina morũ ho si asona ni mbata fu si kpaya. Gi ringbisapa pai re nga bawene kpiapai tipa agu aboro ninaatangbaduyo ya i nga awiri Kindo ono ka zuzuhe adunga tiyo ya! Agu aKristano nga airabiriki naya tipa tiyo wee i nga apefuo Kristo re, i nzunzu nga ‘atita’ Satana Bakitingbanga.—Bam. P. 3:15.
6. Gini regbo gu rende re atona ka kura, na wai aboro “ara” ti gu regbo re?
6 Gini regbo agu aKristano duwa rende re akuru ti ni? Yesu ayaa: “Ho [bamitunga] ara ni.” (Mt. 13:25) Gini regbo gipai re amangi ti ni? Ani nagbia karagapai kuti gi sanahe re rogo gupai gu mokedi nangia Pauro agumbaha fu agu abaakumba nadu Efeso yo. Ko ayaa: ‘Mi ini ya fuo ga mi gbegberẽ awaru aríma ku dagba roni yo, ami ahenga akandoro te. Akumba agúari dagba roni tigaoni a, kini gumba irairaapai, ka gbefa abawiriki fuoyo.’ (Amo. 20:29, 30) Ko azungodi agu abaakumba re i naangera angera rogo toro yo. Fuo agu amokedi ‘nanaadingisa’ aboro ti gbarasa ndikidi pambori kpiki, badungu aKristano atona ka ti nirame rogo toro yo. (Oni gedi 2 ATesaroniko 2:3, 6-8.) Gu regbo re du abasamungu kuti ndikidi pambori atona.
7. Ya mo kura morũ asatihe asa nirende? Oni sakingo rogoyo.
7 Yesu ayanga wee gu morũ re nika satihe nirende te, ono rende du i amihe dagba morũ. Sidu, gu sanza re arunga kuba gu ndikidi aKristano naambu rengo te. Kuba gure, si nafura tipa gu bakere asadatise Satana amangaha ka ye na gbegberẽ aboro kurogo gu dungurati nga ga aKristano tipa ka gbarasaha. Ti gu regbo gu yangara mokedi nangia Yoane adu nigbinzako, agu abasamungu kuti ndikidi pambori re aima du gbaiga.—2 Pet. 2:1-3; 1 Yo. 2:18.
“Oni He He Si Sono Wa Sa Dati Rago Ke He”
8, 9. (a) Tipagine ga bairasunge karagapai fu gako akanga aruaru ti ni bangiri agu aboro nagi gu ga Yesu sanza re? (b) Ti digidoho, wai rende na morũ asono kina sa?
8 Ga bamitunga amoyambu agumba gupai namangi fuko na ki sanako ki yaa: “Mo nakpi nyemu ani ndu ka mo [gu rende re]?” (Mt. 13:27, 28) Kina iriwo rago nazi yó be gako karagapai. Ko aya fuyó wee i mbu morũ na rende si sono sa daho regbo ke ahe ka da ni. Ga Yesu abawiriki aima giarogo gu ga bamitunga zinahe re. Si nawira wa i aima rugatiyo naapa wai mbuhe ka kparaka morũ ti rende. Asopo bino ima rugatiyo wenengai naapa wai tarã rende naavundotihe na tarã morũ sa.c Si du nga gupai nasa bamitunga ko ya fuyó i pidihe mbata si sono!
9 Wakina gure a, rogo gu pangbanga nga ga aboro, agu apambori i aya tipaha wee si nga ga aKristano, si aima kusa badungu apai duwa kina gu rende re, tona ti aKatoriko, Orthodox, gbiati Agarasisi. Ti kina gu bangisa regbo re, i ami bete ndikidi tunga morũ rogo gu ati nga zegino. Gu bamitunga du rogo gi sanza re asungu nizerangbaduse tipa gbanga regbo ka pido gu guru regbo nga ga ke ahe.
Maabangirise Tipa Regbo Ke Ahe
10, 11. (a) Gini regbo nga regbo ke ahe? (b) Rogo gini gene i aye na agu aboro narukuba morũ kurogo ga Yekova gbamu yo?
10 Yesu naya furani wee: “Rago ke he nga ho zegino ka nyasa ni; akehe nga amaraika.” (Mt. 13:39) Rogo gi yangara arame nga ga gi gbegberẽ zegino re, i nadungura awiri Kindo kini kparayo kusayo ti rende. Nibi gipai re, fugo Petero nayaa: “Ragoho da, sapangbanga tona ti ga Mbori bambu, ono ka si tona ti rani mbata gini pai [nikadu] ni digida ha fu agu yo agia nga sangba gu wene pangbanga nga ga Mbori ya?”—1 Pet. 4:17.
11 Ngbutuko fuo tona yangara arame, watadu “digida rago,” sapangbanga atona na agu aboro natangbaduyo ya ndikidi aKristano nga yó, singia i angia ndikidi awiri kindo watadu i angia “awiri gbegberẽ ko.” Nibambataha, Babera Duna Bakere Ome Ti Ni ati, fuani, i ki tona ka dungura awiri Kindo ho regbo ke ahe atona ni. (Mt. 13:30) Ono wai du i aye na agu aboro narukuba morũ kurogo ga Yekova gbamu yo? I aye na agi aboro re kurogo gu gbamu nga dungurati, yo i ainipai ni fuyó na kini banda yó, watadu i gbia gu gayó mosoro nga ka ga ku ngbangbaturũ yo.
12. Bagizo regbo wai sunge ke ahe nika diaha?
12 Gu sapangbanga re adi bagizo regbo wai? Yesu afura tipaha ya si nika manga dati “rago” ke ahe, si kini yugu gupai nga, si nika dia gbanga regbo si kini mo ka nyasa. (Yugo. 14:15, 16) Gu sapangbanga du tipa mbedimbedi aKristano nibasasa, si namanga awere kindi rogo gi yangara arame re. Gu sapangbanga re nika ndu daho i nika nogoda he ni tiyo dunduko.—Yugo. 7:1-4.
13. Rogo gini gene agu aboro duwa rende asa aboro i koto, na wai du i amanga gbegberẽ apai?
13 Gini ngbatunga aboro i adungura yó kusayo rogo Kindo, na rogo gini gene i akotosa aboro na kini mangi gbegberẽ apai? (Mt. 13:41) Gu gbegberẽ abarumbatayo nga ga pambori yo duwa rende aima ingisa amirioni aboro tipa akama agarã. I amangi gipai re niyugo yó agu apai nasa aboro i naagberesa rimo Mbori, nga agu apai “aboro akota ti ni,” ngbatunga gu duwa zo aboro we yo gbiati gu yugopai du tipa Tirinita navundo rii aboro yo. Badungu abarumbatayo rogo pambori amoi gbegberẽ kpiapai fu gayó akandoro mbiko i nazio bakure na gi zegino re, na kini mangi wasiwasi kodaba. (Yak. 4:4) Kurigure, agu apambori i aya ti ni si nga ga aKristano abingo gu iraira kodaba gayó aboro amangaha nigbegberẽpai te. (Oni gedi Yuda 4.) Kurii agi apai re dunduko, i namanga nga ruru aboro nga yó. Nairiwo gu ngbarago du awiri Kindo nani mbiko i kparayo kusayo ti ngbatunga gu gbegberẽ apai re nga gu nakotosa aboro!
14. Rogo gini gene awiri rende akpara na kini ri ngba rindiyo?
14 Rogo gini gene agu aboro duwa rende ari ngba rindiyo? (Mt. 13:42) I narungosi “awiri gbegberẽ ko” rogo gu gene nga ‘awiri ngbii’ nakusapa gu gbegberẽ yugopai ku yangura agu aboro duwa rende ayugoho fu aboro. I nakpara a mbiko i agbianga gu undo i anaagbiaha be gayó aboro berewe te, na mbiko aboro berewe kutii beyo te.—Oni gedi Yesaya 65:13, 14.
15. Rogo gini gene i azo agu aboro duwa rende rogo we?
15 Rogo gini gene i adungura rende na kini zoho rogo we? (Mt. 13:40) Gipai re nika manga ho rende nika sona ni. Ho i ape gu fugo masaku ni nga i nabaha kurogo gbigiwi we, gure nayugo gupai nga i nika imo yó nyeanye kindi. (Yugo. 20:14; 21:8) Agu aboro nananga tiyo ya i nga aKristano, gbiati aguyo nga airaziree, i dunduko i nika dia yó kusayo ti regbo “bakere gberãngbi.”—Mt. 24:21.
I “Ahasa Rago Wa Kina Uru”
16, 17. Gini sangbanebi Maraki agumbaha nibipa ga Mbori yekaru, na waigu si atona ka da ti rengo?
16 Ti gini regbo agu aboro duwa morũ atona ka ‘hasa rago wakina uru’? (Mt. 13:43) Maraki ape sangbanebi tipa giriso ga Mbori yekaru ki yaa: “Ko akura rure ku rogo gako yekaru yo; gu bandusunge nga ga mokido ko, nga gu ko ngba pako bangironi, oni ngere, ko naye, wo poi Yekova nga ga arimbasa ko. Ono da rengbe na rago ye ko, na da ka ru bara bangiriko ho ko ka kura ni? ‘Bambiko ko wa gu we nga ga baukamarã na wa gu sazundu nga ga abazundu roko; ko asúnga wa baukamarã feda ni bagirisi he a, ko agírisa awiri Revi ziazia ki girisi yo wa i nagirisa dahabu na feda, daho i ka gama ruru amotumo ni fu Yekova.’ ”—Mara. 3:1-3.
17 Ti gi gaani regbo re, gi sangbanebi re atona ka da ti rengo ziazia rogo gu garã nangia 1918 ho Yekova ayeni na Yesu Kristo nga “gu bandusunge nga ga mokido ko” tipa ka wisigo gako yekaru nga ga toro. Fugo Maraki nape gupai furani namangi tingbafuo manga gi girisorago re. Ko ayaa: “Oni ayéga berewe ka kparaka dagba rurupai na gbegberẽpai, na dagba gu boro namanga pa Mbori na gu boro amanga nga pa ko ya.” (Mara. 3:18) Gu bakere sunge ndikidi aKristano amangaha, si nayugopa gu regbo gipai re amanga ti ni nitonatona regbo ke ahe.
18. Ginipai Daniere agumbaha ya si nikaa manga ti gi gaani regbo re?
18 Gu nebi nangia Daniere afura tipa gi gaani regbo re ho ko ayani wee: “Agu yo nga airatatamana akĩ imaima wa vuro ngbangbaturũ; agu yo nisa dungu yo sa rurupai i akĩ wa akerekuru nye anye kindi.” (Dan. 12:3) Ada nga agu aboro nahasa rago imaima re? I nga mbedimbedi aKristano, nga gu ndikidi morũ Yesu afura tipaha rogo gu gako sanza nga ga morũ na rende! Pa ‘dungura’ agu aKristano duwa rende kusayo dagba ndikidi aKristano niyuguyuguhe gbaiga rogo gi yangara arame re mbiko gu bakere rimbasa nga ga akandoro bangeyo akio kina kumbatayo. Ho agu aboro duna maabangirise ka raka tiibe ga Mbori Kindo akodatiyo ni na agu aYisaraere nga ga toro yo, i nasa gayó imarago si naahaasarago rogo gi zegino bitimo nadadihe re.—Zek. 8:23; Mt. 5:14-16; Frp. 2:15.
19, 20. Ginihe ‘awiri ngbii’ apidoho na nyemuhe, na ginipai ani nika wisigopai tipaha rogo gu kekeapai naye fuo gere?
19 Areme, ‘awiri ngbii’ nasungudo gayó mosoro nga ga ngbangbaturũ na nyemuhe. (Rom. 8:18, 19; 1 Kor. 15:53; Frp. 1:21-24) Daho gu regbo re ka da ni, i duwa ka i nye niruruyo fu Mbori na kini mbu gayó imarago si nihasi rago kindi na kidu nikparakparayo ti “awiri gbegberẽ ko.” (Mt. 13:38; Yugo. 2:10) Nairiwo gu ngbarago du ani dunduko nani wa ani abi sangbana gi dungura agu aboro duwa rende re!
20 Ono gini ngbatunga ngbanya du dagba awiri Kindo na gu bakere rimbasa bangeyo akio kina kumbatayo nga aguyo du na maabangirise tipa ka raka auru kpotosende ane nyenye kindi ni azogo tiibe gu Kindo re? Gu kekeapai naye fuo gere nika karagapai furani kuti gu sanahe re.
[Gu rukutu kekeapai du bandu kpewaraga yo]
a Ka oni aida kura sakarogopaiyo na afutufutuhe tipa gipai re, oni bi gu Ngbaõbambu Sinziri nga ga Bamburu 1, 2008, ti kpewaraga 20-29.
b Rogo gi sanza re, gu mi tunga re arunga kuba sunge tungusapai na sa aboro ni abawiriki te, nga gu sunge rengbe ka ye na vovo aboro nga aguyó rengbe kada nimbedimbedi aKristano. Nibipa gu wene tunga i amihe atiyo re, Yesu ayaa: “Wene tunga nga awiri ngbi,” angianga i nikadu ni awiri ngbii ya. Gu sunge nga ga mi tunga re, si narukuba mbeda awiri Kindo niziazia toro auru kpotosende.
c Ka i amo gu rende re ti gu regbo tarãha avundutihe na tarã morũ sa mbata fu regbo morũ da i kehe, ka i amongo moho amo sa na morũ.—Oni bi gu buku nga Insight on the Scriptures, Volume 1, ti kpewaraga 1178.
[Gu kpiahe du ti kpewaraga 25]
Rago Pendekote rogo gu garã nangia 33 F.B.K. nangia gu regbo i atona rũ wene tunga
[Gu kpiahe du ti kpewaraga 28]
I nadungura agu aboro narukuba morũ awere kurogo ga Yekova gbamu
[Gu kpiahe du ti kpewaraga 28]
Pictorial Archive (Near Eastern History) Est.
[Gu kpiahe du ti kpewaraga 27]
Oni Natingidaha?
Rogo gu ga Yesu sanza du tipa morũ na rende, gini ahe agi ahe du kusende re arukubaha?
• Wene tunga
• Bamitunga
• Mi tunga
• Vura Bamitunga
• Rende
• Regbo ke ahe
• Gbamu
• Kpee na ri ngba rinde
• Gbigiwi we