Ndikidi Idapase Nga ga AKristano Gbua Kina Sa Nga Ndikidi Rengo

YESU KRISTO asigira kina bangisa kanisa sa gbua, watadu dungurati. Gu dungurati re angia gu riigbu nga ga toro, nga agu awirina nangia ga toro yo. Ni gumba ani gipai re, ani naida ka pe gupai nga, gu riigbu re angia gu dungurati nangia ga agu aboro ga Mbori ziazia toro asia yo, ni agu aboro Mbori asia yo i duni ‘awiriko.’—ARomo 8:16, 17; AGaratio 3:26.

Yesu ayugupai ya gene aduho gbua kina sa nga gu Mbori aamangasunge nani ka ruga aboro ngbaha kuti rengo na tipa i gbia nyenye unga. Tipa ka yugo gu nyanyakipa rengo re na kpiapai, nga gupai nika ndu na boro ni gbia nyenye unga, Yesu aringbisipaha kuti gene. Ko ayaa: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.”—Matayo 7:13, 14; Yoane 14:6; Amokedi 4:11, 12.

Gu Dungurati Duni Kpamiakpamiaha

Si aidanga ani berẽpa gu dungurati nadu rogo bambata sa kama agarã re nigu “riko nangia ga aboro narengbe na arago dunduko rogo zegino na ki du nimbakadimbakadihe wa gu ani naaberãpa gu kanisa nga ga katoriko areme te,’ wo gu gu buku nga The New Dictionary of Theology apehe. Tipagine adunga ha wo ti ni ya? Si nayaa: “Mbiko gu kungbo nduhe nga, . . . ngbatunga gu riko nga ga aboro du nimbakadimbakadihe na ki rengbe na arago dunduko re adunga ti ni te.”

Anga boro ho rengbe ka tikango gu rengo nga, gu dungurati nangia ga bambata aKristano adu kia ti gu mbakadimbakadiapai nga ga agu akanisa ani abihe areme re te. Ono, wa si avura du wo, gu dungurati re adu adu nimbakadimbakadihe ngba kura gene. Adungurati nibasasa anamanganga sunge nisaha zanga kodabee na agu akuraha te, si dunduko naima idapa gu pagbia nangia ga gu riigbu bipasunge nadu Yerusarema yo na kini ra kutii behe. Gu riigbu re, nga gu nakodi amokedi na agu abaakumba nadu rogo gu dungurati nadu Yerusarema yo, anabanda adungurati si du nikpamiakpamiaha ni “borose sa” nga ga Kristo.—AEfeso 4:4, 11-16; Amokedi 15:22-31; 16:4, 5.

Ginipai namangi tipa gu bangisa ndikidi dungurati re? Ya mo si asatihe nigu nyanyakipa Kanisa nga ga Katoriko du areme? Ya mo si azugo ki satihe nigu pambori nga ga Purusitanti du nikparakakparakaha ani abihe areme? Watadu kurapai kia namangi?

“Geme” na “Rende”

Tipa ka bi akaragapai kuti agi asanahe re, ani makianga gupai wenengai Yesu Kristo nitiko agumbaha ya si amanga gizo. Si rengbe ka iriwo tironi ka ino gupai nga, Yesu aima ino gupai nga, gako dungurati ago ago kusayo ka pangbangaaha adunga ti ni rogo zegino ya, na ko aima ida ka mbu ngbatunga gu gbegberepai re si naandu kumbatayo tipa dungu agarã.

Niringbisa Yesu pa gako dungurati kuti “gu ngbi nga ga ngbangbaturũ,” ko ayaa: “I aringbisi gu ngbi nga ga ngbangbaturũ kuti gu . . . [boro] nami wene tunga rogo gani ati; ono ho . . . [aboro] ara ni, vurani ki ye ki mi rende dagba morũ [geme, NW], ni ki ga. Ono ho morũ [geme, NW] akuru ni, ki zu rindihe, rende ki kuru a tigaha. Ga irakporo aboro sunge aye ki ya fu ko, ‘Baira, a nga wene tunga mo ami rogo gamo ati te? mangihe wãi gbegberẽ rende akura ti ni?’ Ko ki ya fu yo, ‘Vurare nimangi gere’. Aboro sunge ki ya fu ko, ‘Ka si du were mo nakpi nyemu ani ndu ka mo ho?’ Ono ko aya, ‘Oó; ka oni mo rende, oni mo morũ [geme, NW] amo na ni a. Oni he he si sono wa sa dati rago ke he. Ni gu rago i ka ke he mi aya fu abakehe, Oni rógodi rende mbata, ki vodi he avoda ka zo ho; ono oni rógodi morũ [geme, NW] ku rogo gi gbamu.’”—Matayo 13:24-30.

Yesu asakirogoyo ki ya ko angia gu boro “nami . . . tunga.” Gu “wene tunga” re narukuba gako ndikidi abawiriki. ‘Vurako’ angia Satana Bakitingbanga. “Rende” angia gu zire aKristano narimi kurogo gu bambata adungurati nangia ga aKristano re. Ko aya wee ko nika mbu “geme” na “rende” si sono kina sa dati “rago ke he,” nga gu nika du “ho zegino ka nyasa ni.” (Matayo 13:37-43) Agi apai dunduko re, rogoyo angia gine?

I aima Gbarasa gu Dungurati Nangia ga AKristano

Nikina ipo tingbafuo kpio amokedi, agu abayugupai nangia aboro mungu kuti ndikidi pambori naduku rogo adungurati atona ka maapai kurii agu aboro naduku rogo adungurati. I anagumba ‘irairaapai ka gbefa abawiriki nani fuo yo.’ (Amokedi 20:29, 30) Nisangbana gipai re, dungu aKristano ‘natiwi kusayo ti idapase.’ I a’aria yo kusayo i “ki nidege tuyo sa kungba gumbagumba apai.”—1 Timoteo 4:1-3; 2 Timoteo 4:3, 4.

Bara rogo biama kama agarã ti Gaani Regbo, gu buku nga The New Dictionary of Theology ayaa, “Gu ga aKristano pambori nangia ga Katoriko ada nigu pambori gu zogarago nangia ga aRomo aidipaha kuti ndiko si du . . . rogo gaha ngbii.” Fuo gure, i ki “kodi gu pambori re kuti gu sino nangia ga aboro,” nga ka koda Kanisa kuti Zogarago, ono si angia gupai natagbagatihe na agu aida nangia ga bambata aKristano. (Yoane 17:16; Yakoba 4:4) Gu bangisa buku re naya wee fuo bete regbo kusa, gu mangaapai dunduko nangia ga kanisa, kodihe na dungu bangua gaha aida, i a’ariaha nikere ariapai “mbiko gu mangapai nadu kia naangbanga ya, nga ka koda sangba Kuru Ndiko na agu aberã nangia ga gu kumba nangia Plato.” A wa Yesu Kristo agumbaha kumbatayo, gako ndikidi abawiriki adunga gbaiga ku bangiri aboro baraho zire aKristano aazugo ni te.

Agu aboro naadegatuyo koyo du Yesu ni aima ino wai si adu nikpakarakpakaraha fu boro ni kpara ndikidi geme ti rende, nga gu ngbatunga nvuo du wa kina geme ho si asona ni kindi. Sidu, gupai Yesu aayugoho na kpiapai nga, si adu nikpakarakpakarapai tipa boro kpara ndikidi aKristano kusayo ti gu dungu ngbatunga yo du nibakiakia naya tipa tiyo wee i nga aKristano. Gipai re ayugonga gupai nga, gu dungurati nangia ga aKristano aima go kusayo dunduko te, bambiko Yesu akidohe ya ko nikaa ruga agu awirinako nga ga toro yo kindi kumbatayo ti “[aregbo] dũ, ki da ti digida zegino.” (Matayo 28:20) Yesu aya wee wene tunga nikaa sona kindi. Wa si avura du wo, vuru agu agarã dunduko naye, ndikidi aKristano, singia nibasasa watadu nibadona, zanga kapa, a’asadi ka zio tiyo kuti agu apai Kristo anayugoho. Ono tie, i adunga nigu riigbu aboro arengbe ka ino pai tipaha watadu ka bihe te. Nirengo, i adunga wa agu aboro mungu kuti ndikidi pambori nga aguyo naamanganga wiri wenepai ya ono kini ye na kina zee kuti rimo Yesu Kristo zanga fu irisa fuko te.—2 Petero 2:1, 2.

“[Yugo] gu Boro Nga ga Gbegberẽpai Ni”

Gu mokedi nangia Pauro afura kumbatayo tipa gupai nika sa gi zire pambori re i inihe ti vuroho. Ko akepai ki yaa: “Ka boro nángi nga roni wa sa ya; bambiko si [ga Yekova uru] adu nga ho te, kina gu ka gu yangara samungu ye mbata, i ki yugu gu boro nga ga gbegberẽpai ni.” (2 ATesaroniko 2:2-4)

Gi “boro nga ga gbegberepai ni” re, ni nga gu riko nga ga abarumbatayo rogo pambori nga gu riko natumbatihe kuari ka duna pagbia kurii gu dungurati nga ga “aKristano.”a

Aboro atona ka samungu kuti ndikidi pambori rogo agu a’uru nangia ga gu mokedi nangia Pauro. Agu aboro mungu re azugo niipo tingbafuo kpio abawiriki mbiko abawiriki adunga ho ka dingiso agi boro mungu re ti gbandaka yo gayo yugopai te. Pauro aya i aino agu aboro mungu re ti “gu mangapai . . . nga ga Satana ni tandu dunduko na agu apai i aina pai ti ni na irazire iiriwo apai, na gu biriki dunduko nga ga irairapai.” (2 ATesaroniko 2:6-12) Agu afugo re naringbisapa gu mangaapai nzunzu nga ga dungu abarumbatayo nga ga pambori yo rogo agu aregbo nasusi kusayo!

Nisongoda yo gu gayo pai nga, gu kanisa nga ga aKatoriko naenge Roma yo, ya si nga bangisa ndikidi kanisa, agu abarumbatayo nga ga aKatoriko yo re naya wee “gu sunge nga ga amokedi atona ka tanga ngoro bambata amokedi [na ki kodi gayo abisopu] nigu ũkumbo i naadiaha natona ti kina gu regbo gu pambori nga ga aKristano aenge.” Nirengo, gupai abarumbatayo nga ga aKatoriko yo apehe tipa pa tanga gu sunge nga ga amokedi ngoro gayo abisopu re na goho ti ni rogo kuru pangbangaa te na mburuhe ti ni a rogo Ziazia Kekeapai te. Anga nyanyaki gopai ho nayugo gupai nga, ga Mbori toro nanarugapa gu mangaapai nangia ga kanisa natona tingbafuo kpio amokedi te.—ARomo 8:9; Agaratio 5:19-21.

Ginipai tigaha tipa gu kura akanisa nga gu natona niipo tingbafuo gu mbakadapai aPurusitanti amangihe ti gu pambori nga ga akatoriko? Ya mo i akaraga tiyo kuti gu kpiapai nangia ga gu bambata dungurati nangia ga aKristano? Ya mo i akaraga gu ziazia mangaapai nangia ga gu bambata dungurati nangia ga aKristano? Si nirengo nga, tingbafuo gu mbakadapai aPurusitanti amangihe re, Ziazia Kekeapai ada kube dungu aboro rogo afugo yo nibasasa. Ono, wa vura duhe wo, kuru pangbangaa nayugo gupai nga, agi akanisa re anye kindi kuti yugo agu apai nga zireeb.—Matayo 15:7-9.

Ono tie, oni kparianga gipai re. Yesu afura kumbatayo ya i akaraga gako bangisa ndikidi dungurati akaraga ti gu regbo ko ayambuhe nga digido zagino. (Matayo 13:30, 39) Gu sangbaanebi nga ga Ziazia Kekeapai du nidigisidigisihe nayugo gupai nga, ani naraka awere ti gu regbo re. (Matayo 24:3-35) Wa du wo tie duhe, si naida ani sasana tirani wa du ani nibasasa na gi sanahe re, ‘wari du gu bangisa ndikidi kanisa ni re?’ Si naida gupai nga, gu kanisa re du gbaiga ku bangiri aboro dunduko i ki rengbe ka kparaha kusayo ti akuraha.

Isoke si rengbe ka du nga oni naberã oni aima bi gu ndikidi kanisa re, watadu gu dungurati re. Si ni nyanyakipa pai tipa oni rugu tironi nani nzunzu. Tipagine? Bambiko a wa si adu rogo bambata sa kama agarã, si naida ndikidi kanisa du gbua kina sa. Ya mo oni adinga regbo ka wisigo gaoni pambori singia si namangapai teketeke nzunzu kuti gu kpiapai nangia ga gu dungurati nangia ga agu aKristano nadu rogo bambata sa kama agarã, na si nazio tihe kina kuti agu apai Yesu Kristo anayugoho? Tipagine ka oni amanganga gi wisigopai re ti ni awere ya? ADezire Yekova nika duna ngbarago ka undo roni oni mangihe.—Amokedi 17:11.

[Gu rukutu kekeapai du bandu kpewaraga yo]

[Gu kpiahe du ti kpewaraga 5]

Ya mo agu apai du rogo gaoni kanisa nawira gu kpiapai agu aKristano nadu rogo bambata sa kama agarã kusayo anamangaha rogo tungusapai na rogo wisigopai na aboro rogo Ziazia Kekeapai?