Ani bérẽpa Akuarani Ka Nyakasa Yó

1, 2. Ginihe naundo agu aDezire Yekova naadu 230 tipa i bati be gu nunguro imo aboro naadu ti regbo Ue Vura Nga ga Zegino?

FUO gburuwa ga aNazi zogarago ti regbo gu Ue Vura Nga ga Zegino, zinahe adu tipa ka nyasa riipa gu yangara akutu zizi aboro naadu rogo gayo abataya. I adi gu zizi aboro naadu rogo gu bataya re ki moi yó kurogo bakurungba tipa ka ndu ka rindosi yó ku bebere baime yo. Gere angia gu buro i ayambu rimoho kusa nga gu nunguro nga ga imo aboro.

² Gu zizi aboro re bangeyo angia 33,000, na i amangiyo ngbaome tipa i ndu nunguro nga akirometere 250, kurogo gu gbata nga Lübeck Germani yo. Dagba agi aboro re, aDezire Yekova adu dagbayo nga 230 naaye rogo aringara sita, na i dunduko naandu gi nunguro re. Gomoro aima nyasa riipa omeyo gbiati akaza. Agi awirinarani re aru wai ka bata be gi nunguro re? Gu kura ko sa aya, “Ani anaangarasa tirani angarasa tipa ka omerani batinga ya tipa wa ka ani ndu gi nunguro re.” Mbiko gu ome nga ga Mbori du na “bakere tandu susi,” gbiati gu nyemuse i adu na ni tipa akurayo nga agu apai naundo yó tipa i bati be gipai re.​—2 Kor. 4:7.

3. Tipagine si aida ani naangarasa akuarani angarasa ti ni?

³ Areme, anga ngbatunga gu nunguro nga ga imo aboro re ani andu he te, ono dungu akpakarapai kinaho ani agbiatirani na ni. Fuo i sigira ga Mbori Kindo rogo 1914, i ado Satana ngbangbaturũ yo ki bako ku auru kpotosende ane na ko “na bakere zinga, bambiko ko ini he ya kina bete rago nye fu ko.” (Yugo. 12:7-9, 12) Wa gi zegino re ambeda kada ti regbo Aramegido, Satana namangasunge na aˈasada gbiati asoapai tipa ka rungburasi gaani idapase. Gu kurapai berewe nakoda tihe kutini nga, ani ni fudifudi rani berãrani yo be agu apai ani agbiatirani na ni na aˈuru dũ. (Eyo. 14:1; Batu. 2:23) Ti gu kura aregbo, gu fudifudiapai ani agbiatirani na ni rengbe arengba ka nyasa omerani, na ka ani vura manga kina gini ome vurũ tipa ka nyakasa gaani idapase, si nadu wa gene berani tipa ka sovura kuti gaani zerakpotoseyo te. Ani bingo gupai naadu tipa gu wirina namangi ome tipa dungu agarã ka undo awirinako i nyakasi gayo idapase. Ho ko atona ka gbinza ni, ko na diako ati na kaza, na ko ki tona kadu na bakere gberarago. Ani dunduko ni naida na “gu bakere tandu susi” be Yekova na kini idi akuarani ni ngarasi rani kina wai si adu tipa gu wirina re.

4. Kangia ani naida ka ngarasa akuarani, gini ga Pauro rugute si aida ani dihe kugume?

⁴ Kangia ani nangarasa akuarani, si naida ani di gu zinahe Pauro afuhe fu agu aKristano naadu Ebere yo kugume. Ko aya: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.” (Eb. 10:24, 25) Wai rengbe ani ka mangasunge na gu rugute du rogo agi afugo re?

“ANI BÉRẼ PA AKUARANI”

5. ‘Berãpa akuarani’ nakoda gine, na ginipai si aidaha berani?

⁵ Ka ‘berãpa akuarani’ nga “ka ino agu azingo du yó na ni, na kini berẽ tipa yó.” Ya mo ani rengbe ka berãpa agu azingo du akuarani na ni ka si du nga gu yangarapai ani amangaha sa nga ka fu sene fuyo ni ipo Bambu Kindo yo watadu ka fura na yó tipa agu apai anyakanga paha ya? Wagusa te! Ni rengo, si naida ani du na rubangirise ki zanga ka ida ka inopai tipa boro kisusi gu si aida ani inihe. (1 Tesa. 4:11; 1 Tim. 5:13) Wa vura duhe wo, kangia ani naida ka ngarasa awirinarani, si naida ani ini yó wenengai, agu apai du tipa yó, asino yó, gayo idapase, agu apai rengbeyo ka mangaha, na agu i arengbanga ka mangaha ya. Si naida i nibi rani wa abakureayo na i inihe nga nyemuyo kina tirani. Gipai re naida ani di regbo adia na yó angianga kina ti agu aregbo du yó rogo akpakarapai na kidu na bakere gberarago ya, ono ti gu kura aregbo a.​—Rom. 12:13.

6. Ginipai rengbe ka undo bakumba tipa ní “berẽpa” agu aboro ní angerafuo yó?

⁶ Si naida abaakumba ‘mbú ti ga Mbori rimbasa akandoro du dagbayo,’ angianga ni zizi yó ya ono na nyemuhe. (1 Pet. 5:1-3) I rengbe ka mbu ti agi akandoro re wenengai kina gu ka i ini agu akandoro i angerafuo ra re. (Oni gedi Asanza 27:23.) Kangia si taata tipa awirinayo aidipase nifura na yó, si nawira wa si duadu fuyo taata tipa awirinayo sanayo tipa undo. Na si ima rengba kadu taata fu awirina tipa i pekepa agu apai namanga yó fuyo na agu apai i abaka bangiriyo na ni, gere nga gupai nasa abaakumba i “berẽpa” agu aboro du kutii beyo na kini fu undo fuyo.

7. Si naida ani bi gu fugo “auro” nga ga agu aboro du na bakere gberarago wai?

⁷ Ho Pauro afura ni fu gu dungurati naadu Tesaronike, ko aya: “Oni sóngodi aguyo narungbura.” (Oni gedi 1 ATesaroniko 5:14.) Gu fugo du ane nga “aguyo narungbura” re, si nakoda agu aboro du na bakere gberarago. Asanza 24:10 naya: “Ka he amaka ro ti uru gberãngbi, omero adu toni gbua.” Afugo gu boro du na bakere gberarago tiní ima rengba kada ni afugo “aura.” (Eyo. 6:2, 3) Ho ani ‘aberãpa’ ngbatunga agu aboro ni duwa gure, si naida ani ini gupai nga, gupai i agumbaha, si arengbanga ka yugo boro gu ndikidipai du ngbaduyo yo nzunzu te. Rechelle nari awoka be gu kaza nga ga bakere gberarago ima inopai tipa gipai re wenengai. Ri aya: “Wo Nina naape agu afugo angbanga giaha ya. Ti ngbatunga agu aregbo re, mi naasada ka tingida gupai nzunzu nga, Nina angia boro nyemuse, weneringise, na ni boro gamahe. Mi ima ino gupai nga agu aboro nawoka be gu kaza nga ga bakere gberarago, i nafura afura bau. Si aidanga boro karaga gbegberẽpai fuyo kuba gbegberẽpai te.” Asanza 19:11 naya: “Wene berã namanga boro ni du ni bayee ni tipa zinga, ngba ha angba ti ni ka mbu pa tiandika.”

8. Da du si aida ani yugu gaani nyemuse funi?

⁸ Wai rengbe ani ka ‘berãpa’ gu boro nabi tiní nga sunge tiní berewe te mbiko gu zee watadu gu gberarago du ní na ni mbitipa gu ingapai ní amangihe kusayo, si ki vura du vurũ nga ní namanga ome tipa ka mbakada gupai re? Pauro afura tipa gu boro namangi ingapai Korinda yo na ki saberã ní ki ya: ‘Oni vu ní ki fu wasa fu ní, ní ka gberã agberã be gani bakere rungo susi. Si du zungadi mi roni ti ni oni nyákasi gaoni nyemuse koyo du ní ni.’ (2 Kor. 2:7, 8) Si aidanga ani berẽ gupai rirani yo gbua nga gu boro re ima ino gupai nga ani nakpinyemu ní akpi na kini bakibangirani tipa ní te. Si naida ní bihe abi rogo asino rani gbiati gaani mangaapai.

ONI ‘NYAKASI YÓ KUTI NYEMUSE NA WENE MANGAAPAI’

9. Nyakasa akuarani kuti nyemuse na wene mangapai nakoda gine?

⁹ Pauro aya: Oni ‘nyakasi yó kuti nyemuse na wene mangaapai.’ Si naida ani ngarasi awirinarani aidipase tipa i du na nyemuse na kini mangi weneapai. Ho we naabiso ni, si ni idi ani utudihe tipa si kí berewe. (2 Tim. 1:6) Wa kina gure a, si naida ani ngarasi awirinarani tipa i kpinyemu Mbori gbiati kura aboro. Ka ani atambua yó, si rengbe ka ngarasa yó tipa i mangi weneapai.

10, 11. (a) Ada si aida i tambua yó dagbarani? (b) Oni funga kpiapai nayugo wai rengbe tambuahe ka undo gu boro mangi ingapai?

¹⁰ Ka si vura du nga ani na gberarago watadu ani na ni te, ani dunduko ni naida i nitambua rani atambua. Bakumba sa aya, “Buba ayanga fere rogo uru sa wee mi mangipai ni wenehe te. Mi asono na gu bipai nga wenepai ho mi amangaha te. . . . Wa vura duhe nga garã re awere nga 50, mi nidu na ngbarago ho akuare nga abaakumba atambua re ni tipa gupai mangi mi he. . . . Gupai namangi re ima yugo gupai fere nga si ni nyanyakipa pai tipa ka ngarasa gu kura aboro, na wo mi naatambua gu kura aboro.” Tambuahe na ngarasa aboro dunduko kodihe na abazakigene, sosono aboro, gbiati aguyo du na bakere gberarago.​—Rom. 12:10.

¹¹ Si naida agu aboro du na gu inohe nga ga toro rugu gu boro mangi ingapai rogo nyemuse yo, na ki tambua ní tipa wa ka si ngarasi ní ní karaga tiní sa wene mangaapai. (Gara. 6:1) Gipai re nga rengo, na si aima manga tipa gu wirinarani nga Miriam. Ri aya: “Regbo adu kinaho gimi raka adu ngbapai ho wene nakureami ambu dungurati ni na ti kina gu bangisa regbo re, kaza ki mangi buba nga kure niga riko yó. Mi adu na bakere gberarago. Tipa ka dia gimi gberarago kusayo, si asa re mi zi bakure na gu paranga nangianga Kristano ya.” Gipai re asa Miriam ri nibi tiri nga Yekova akpingo nyemu ri berewe te, na ri ki bihe nga si naida ri mbu rengo ambu. Ho bakumba atingidi ri na pa gu wene sunge ri anaamangaha fu Yekova, si azi ngbaduriyo. Ko atingidi ri na gupai nga Yekova nakpinyemu ri akpi kindi. Ni sangbana gipai re, ri anyakasi gari nyemuse berewe na Yekova. Ri ambu gi paranga re na ki ndu kumbatayo na iriso Yekova.

12. Ginipai rengbe ka manga ka si du nga ani na ringbisa awirinarani na kura aboro na kini sayo i nibi tiyo nga gayo sunge ni kina wiri toonihe?

¹² Si naida ani du na rubangirise nibi wai ani angarasa awirinarani tipa i ni mangisunge fu Yekova zaaza. Si aidanga ani asadi ka ringbisa yó na kura aboro te, ka bisirapa yó mbiko wa i apekanga fuo agu arugute moi ani ya, watadu ka sayo i ni nibi tiyo nga gayo sunge ni wiri tooni he a te. Ono ka ani atambua yó na kini asadi ka sayo i nikpinyemu Yekova, si rengbe kadu na wene sangbanaha kuriyo.​—Oni gedi AFiripoio 2:1-4.

ANI NGARASI AKUARANI

13. Ngarasa akurase nakoda gine? (Oni bi gu sura du ti tonatonaha.)

¹³ Si naida ani ngarasi akuarani wa bi ani he ya “gu uru re si nambeda.” Ngarasa akurase nakoda undoyo tipa i ni ndu kumbatayo na ga Mbori sunge. Ani rengbe ka ringbisa nyakasa akurase kuti nyemuse na wene mangapai kuti ziga gu we naima mbeda ka biso. Na si wakina ba sakiri kubangiri we yo tipa si rungudi wa ka we aikí akí kindi. Ngarasa akurase nakoda manga ome tipa ka undoyo na kini fu wasa fu agu aboro du na bakere gberarago. Ho gbia ani momu ni tipa ka ngarasa ngbatunga boro wa gu ní re, si naida ani fura funi zaaza na ngba wene gene. (Snz. 12:18) Kurigure, ani ki ‘ipisi tirani tipa ka giapai, na ki rõasi tirani tipa ka gumbapai.’ (Yak. 1:19) Ka ani adegaturani fuyo na nunga, si rengbe ka sarani ani ini gupai nafu bakere gberarago fuyo na ki sarani tipa ani pe gupai rengbe ka undoyo i sovura kutini.

14. Wai bakumba sa aundo gu kurako naadu na bakere gberarago?

¹⁴ Ani bingo wai bakumba sa aundo kura wirina gako idapase aima zera tipa dungu agarã. Ho gu bakumba re aadegatuko ni sa gupai gu wirina re aagumbaha, gu bakumba re aye ka ino gupai nga nyemu Yekova kina tiko kindi. Ko anaageda Ngbaõbambu Sinziri rogo adiwi nibasa na kini mangi ome tipa kaa ndu tipa adunguratise. Ono tie, gu mangapai nangia ga kura aboro rogo dungurati aba bakere gberarago tiko na ki imisi ngbaduko. Gi bakumba re adegetuko wenengai fuko zanga sarangbanga ko na ki asadi ka ngarasako nga awirina nakpinyemu ko akpi. Gi wirina re aye ka ino gupai nga ko ambu gu gbegberẽpai naima manga tipa si ká na ko ti mangasunge fu Yekova. Gi bakumba re ayambu ko tipa i ndu na ko ka tungusapai. Mbiko gu undo nga ga gu bakumba re, gu wirina re atona tungusapai berewe na ni yangaraha ko ki rẽ berewe tipa ka mangasunge ni bakumba.

15. Ginipai ani awirikaha be Yekova tipa ngarasa agu aboro du na bakere gberarago?

¹⁵ Gu boro du na bakere gberarago, rago arengbanga ka ngba tiní ni ipo watadu ní arengbanga ka dia undo kugume ni ipo te. Si naida ani undo ní aundo kindi. Pauro aya: “Oni sóngodi agu yo narungbura.” (1 Tesa. 5:14) Kuba gupai nga ani zanga undo agu aboro du ni rurungbura yó, si naida ani “sóngodi” yó asongoda na kini undoyo. Mbata kusayo, Yekova anaamangasunge nazera ngbaduse na gu gako amoyambu naadu na bakere gberarago tiyo. Ni kpiapai, Mbori adu na nunga Eriya na kini bi gako aberãpai na nyanyakipaha. Yekova afu guhe gu nebi re aidaha tipa wa ka ko mangi gako sunge. (1 Aba. 19:1-18) Mbiko ga Davide saberã, Yekova ambupai fuko. (Tam. 51:7, 17) Mbori aima undo gu boro nake Atambuahe 73, mbiko ko ambedi ka mbu mangasunge fuko. (Tam. 73:13, 16, 17) Yekova na nunga na kidu na weneringise koyo du ani ni, gbe, ho du ani ni na bakere gberarago. (Gate 34:6) Gako inapai “ni vovo ho na awiso dũ,” na si “adiga nga a te.” (Kpe 3:22, 23) Ko naida ani pekefuo gako kpiapai na ani mangi fu gu boro du na bakere gberarago rogo nunga yo.

ANI NGARASI AKUARANI TIPA I NYE NGBAGENE UNGA

16, 17. Wa digido zegino ambeda, gini diaberã si aida ani mangihe, na tipagine?

¹⁶ Dagba gu zizi aboro naguari rogo ga aNazi bataya naadu nga 33,000, na dunguyo nakpiki. Ono tie, dagba agu aDezire Yekova naadu nga 230 rogo gu bataya re, i dunduko naima bata. Gu ngarasaro gbiati gu undo i agbiaha be akurayo aima undoyo tipa i bati be gu nunguro nangia ga imo aboro re.

¹⁷ Areme, ani ngba “gu gene nangbe koyo du unga ni.” (Mt. 7:14) Barambeda, airisi Yekova dunduko nika kodatiyo tipa ka ndu kurogo vovo zegino nga ga rurupai. (2 Pet. 3:13) Ani dinga berã adia tipa ka undo akuarani wa ani andu ngbagene nyenye unga.