Agu Atingidapai Nga Ga Yekova Nafu Ngbarago Ku kpotoraniyo

1. (a) Gini agene aboro namangapai kuti atingidapai ngbaha, na tipagine? (b) Rukö rengbe ka sa boro ní nibi arugute wai?

ABORO nakaragapai kuti arugapai ni bakiakia. Kura aboro namangapai wenengai kuti gu rugapai naye be gu boro du na pagbia beni, ono i kini ká gu naye be gu boro du pani kusende watadu kurayo. Aguyo nakaragapai ni bakiakia kuti arugute watadu zahe. Si rengbe ka sayo i du na gberarago, watadu na zee tipa ka mangapai kutini, watadu i sogoho. Tipagine du gipai re ti ni wo? Ndupai sa nga rukö. Nirengo, rukö ima rengba ka gbarasa berã boro ki sa ní ní sogo arugute na ki zanga gu wene undo ka si nifuhe funi.​—Snz. 16:18.

2. Tipagine ndikidi aKristano abi agu arugute du rogo Fugo Mbori ti ni na nyanyakipaha?

² Ono tipa ndikidi aKristano tigayo, i nadia arugute kugume gbe ho duhe ni nga mburuhe rii Fugo Mbori. Ga Yekova atingidapai naundo rani ani du na dudunguro giarogopaiyo, kini yugupai furani na kini undo rani ani ne agu agbina du wa bakere nyemu aũzegino, wasiwasi kodaba, na vu gundö watadu kpibuda. (Snz. 20:1; 2 Kor. 7:1; 1 Tesa. 4:3-5; 1 Tim. 6:6-11) Kurigure, ani na ‘ngbarago kpotorani’ yo mbiko manga ani pai kuti agu arugapai nga ga Mbori.​—Yes. 65:14.

3. Gini wene bipai nga ga bake papara Atambuahe si aida ani wirikihe?

³ Tipa ka banda gu wene pagume du dagbarani na gu barani du ngbangbaturũ yo, si naida ani mangipai kuti gako arugute. Si angba gbe ka gaani bipai du wa ga bake papara Atambuahe naya: “Gamo adezirepai du wa ũkumbo nye anye kindi; ii, si nga ga kpotore yo pa wasa.” (Tam. 119:111) Ya mo ani nagbia ngbarago be ga Yekova arugute, watadu ani nabihe ti kura aregbo nga si wa tindiro? Ka si vura dunga si ima kpakara ti kura aregbo ka mangapai kuti arugute, ka rago gberẽnga tirani ya. Ani rengbe arengba ka kido kuti Yekova ni manga ani gako arugute. Ani bingo agene biata.

KPARAKPEE NASARANI ANI DU NA KIDO

4. Ginipai Davide amangaha amanga kindi rogo gako raka yo?

⁴ Dungu wene apai na gbegberẽ pai aima manga Bakindo Davide rogo gako raka yo, ono pai sa ko anye kuti mangaha nga ka kido kuti Bakusiko. Ko aya: “Ako Yekova, mi natumba mbisimore koyo du mo ni. Ako gi Mbori, mi nakida kina kuti ro.” (Tam. 25:1, 2) Ginipai naundo Davide tipa ko du na kido kuti gu Bako du ngbangbaturũ yo?

5, 6. Fugo Mbori nape ginipai furani tipa gu pagume naadu dagba Davide na Yekova?

⁵ Dungu aboro nakpara fu Mbori kinaho du yó ni rogo kpakaraapai. Ginipai rengbe ka manga ka si du nga bakureamo watadu gumero nafura namo kina tigu regbo ní aida marã bero? Mo ima rengba ka tona bakabangiro singia ní naida na mo nzunzu. Davide aadunga wa gure te. Gako pagume na Yekova ayugu gu idapase na nyemuse ko adu na ni tipa ko rogo gako raka nabaha wa ko avura kaa gbia tiko na wenepai na gbegberẽhe.​—Tam. 40:8.

⁶ Oni bingo afugo Davide wa ko aatambua Yekova niya: “Ako Yekova, gaani Gbia, na ngba rimoro auru kpotosende dũ! Mo naamoi ga taarimo auru angbangbaturũ.” (Tam. 8:1) Ya mo oni abingo gu wene pagume naadu dagbako na gu Bako naadu ngbangbaturũ te? Davide ayugu gako tambuahe tipa ga Yekova kusikusi ahe ki ya ko atambua ko na “uru pitipiti.”​—Tam. 35:28.

7. Wai ani agbia undo ti mbeda ani na Mbori rogo kparakpee yo?

⁷ Wakina Davide, si naida ani nifura na Yekova dedede tipa kaa kido kutiko. Ziazia Kekeapai naya: “Oni mbédi na Mbori, ko ki mbedi na oni.” (Yak. 4:8) Mbeda na Mbori rogo kparakpee nga gu kura nyanyakipa gene rengbe ani ka gbia ziazia toro ngbaha.​—Oni gedi 1 Yoane 3:22.

8. Tipagine si aida ani ne dogoda bangisapai ti ni rogo gaani kparakpee yo?

⁸ Ho mo nakpara ni, ya mo mo naadogoda kina bangisa pai sa dedede? Ka si duwo, mbata fu mo kpari, si naida mo di wiri bete regbo ka berãkurii gupai mo aida ka gumbaha. Ka ani aape kina bangisapai dedede fu bakurearani watadu gumerani, ya mo rago ngba tiní? Ní arengbanga ka degatuni furani te. Rengo ngaha nga, Yekova arengbanga ka ká gu kpee nga ga gako ruru amoyambu te. Ono si aidanga ani naadogoda kina bangisapai sa te.

9, 10. (a) Gini apai rengbe ani ka rimisoho kurogo gaani akparakpee? (b) Ginipai rengbe ka undo rani ani mangi wene kparakpee?

⁹ Si tie ziazia nga, ka ani aida ka mbeda na Mbori si aidanga gaani kparakpee du ngbarangbara gbua te. Ka ani pe agu apai du ngbaduraniyo fu Yekova, ani mbedi ambeda na ko na kini kido kutiko. Gini apai si aida ani pehe rogo gaani kparakpee yo? Fugo Mbori naya: “Oni yúgu gaoni sanahe fu Mbori dunduko rogo kpe na zungaditise ni tambuahe.” (Frp. 4:6) Gu rengo duho nga, agu apai dunduko rengbe ka gbarasa gaani pagume na ko, si aida ani kpari tipaha.

¹⁰ Ani ima rengba ka wirikapai be gu kparakpee nga ga gu ruru akumba na adee du ni kekehe rogo Ziazia Kekeapai. (1 Sam. 1:10, 11; Amo. 4:24-31) Atambuahe na dungu akparakpee na abia rogoho fu Yekova. Agu akparakpee re nayugopa gu gberarago watadu ndikidi ngbarago gu ruru akumba na adee re adu na ni. Wisigo ani he rengbe ka undo rani ani pe gu kparakpee du na wene rogoyo ti ni fu Yekova.

ANI BERẼKURII GA MBORI ATINGIDAPAI

11. Tipagine si aida ani berẽkurii ga Mbori arugute ti ni?

¹¹ Davide aya: “Gu dezirepai nga ga Yekova du ni nyanyaki he, ki nisa azangainahe i du ni airatatamana.” (Tam. 19:7) Rengo ngaha nga, ka ani vurangia agu aboro ainongo pai ya, ani rengbe arengba kadu ni airatatamana ni manga ani ga Mbori arugute. Gu kura arugute kinaho nga ga Ziazia Kekeapai si aida ani berẽ aberã kuriihe wenengai. Gere nakoda agu apai nabipa du ani ni ruru rani ho ani agbiatirani ni na asoapai sukuru yo, basunge yo, watadu ka kuo gu ga Mbori arugute du tipa kure, zanga rimisotise kurogo birĩ zogarago, na votise. Berã ani kurii wai Mbori abi agi apai re nika undo rani ani mbakaditirani tipa gupai ka kuru. Si rengbe ka undo rani a ani diberã tipa gupai rengbe ani ka mangaha ka ani gbiatirani na pai wa gure. Ngbatunga gi berãkuriipai re naundo rani ka ani rimisingo tirani kurogo kerepai ya.​—Snz. 15:28.

12. Berãkurii gini apai rengbe ka undo rani ani bandapa ga Mbori atingidapai?

¹² A wa ani asungudo agu apai Mbori nakidohe tipaha, ya mo gaani sino raka nayugo gupai nga ani nangera angera kindi? Ni kpiapai, ya mo ani idi kuti gupai nga i nika gbarasa Bakere Babera barambeda? Ya mo pa raka ani nyeanye kindi rogo paradizo kpotosende bangirani kina wai si adu tigu regbo ani atona wirikapai? Ya mo ani natungusapai kindi kakaka zanga mbu gaani apai si du ni bambatapai rogo gaani raka yo? Na ginipai tigaha du tipa gu maabangirise nga ga zinga bekpio, ziasi rimo Yekova, na pa dia gbarasarimo ti gako bakere pagbia? Ya mo agi apai re kindi na nyanyakipaha bangirani? Berãkurii ngbatunga asanahe wa gere rengbe ka undo rani ani mangipai wakina bake papara Atambuahe naya, mo banda ga Mbori “adezirepai du wa ũkumbo nyeanye kindi.”​—Tam. 119:111.

13. Agu aKristano naadu rogo bambata sa kama agarã, tipagine i agianga tiyo ti ni na kura apai ya? Oni funga kpiapai.

¹³ Gu kura apai kinaho rogo Ziazia Kekeapai ani arengbanga ka giatirani na ni awere ya bambiko regboho atadanga be Yekova ko yuguhe furani te. Yesu ape gupai fu gako abawiriki bara dunguhe nga i nika mbusa ko na ki imiko. (Oni gedi Matayo 12:40; 16:21.) Ono gako amokedi agianga rogo gupai re yo te. I agirogoyo kina fuo zinga ko bekpio na ki yugu tiko fu dungu abawiriki na ko “ki uru gayo berã, i ki rugu tiyo na Ziazia Kekeapai.” (Rk. 24:44-46; Amo. 1:3) Wakina gure a, ga Kristo abawiriki aagianga tiyo na pa sigira ga Mbori Kindo ngbangbaturũ yo te da kinaho ziazia toro ye ni kuriyo ti rago Pendekote rogo 33.​—Amo. 1:6-8.

14. Ti tonatona 20 kama agarã, gini wene kpiapai dungu awirina amoihe wa si avura du nga i adu na iraira bipai tipa yangada arame vurũ?

¹⁴ Wakina gure a, ti tonatona 20 sa kama agarã, ndikidi aKristano adu na iraira maabangirise tipa “kusa rago.” (2 Tim. 3:1) Ni kpiapai, rogo gu garã nagia 1914, bete aboro aberẽ gupai nga i nika dia yó ku ngbangbaturũ yo. Gu maabangirise re adanga ti rengo te. Sidu, i awisigi Ziazia Kekeapai dudunguro na ki bi gupai nga bakere tungusapai fuyo kindi kumbatayo. (Mk. 13:10) Rogo gu garã nangia 1922, J. F. Rutherford, naangbe mbatayo tigu regbo re apepai fu agu aboro naadu pati gu bakere dunguratise namangi Cedar Point, Ohio, U.S.A nga: “Oni bi Bakindo nazogarago! Oni nga gako abandusunge. Sidu tie, oni takipande, oni takipande, oni takipande, Bakindo na gako zogarago.” Natona tigu regbo re ka ndu kumbatayo, ga Yekova amoyambu atona ka tungusapa gu “wene pangbanga nga ga ngbi” kakaka.​—Mt. 4:23; 24:14.

15. Wai rengbe ani ka gbia undo ti berã ani kuriipa wai Mbori amangipai na gako aboro bakuru kusayo?

¹⁵ Berãkurii gu iiriwo gene Yekova amangipai ngbaha kusayo na gako aboro gbiati gu ko amangaha tigi gaani regbo re naundo rani ani du na bakere kido kuti gako ome mangapai, na tipa gupai ko ka mangaha kumbatayo. Ga Mbori atingidapai naundo rani tipa ani berẽpa gu gako sangbaanebi ata manganga ya. Ani rengbe kadu nakido nga berã ani paha nika undo rani ani du na kido kuti gako akidohe.

ANI SONOSI GAANI KIDO ROGO IRISOMBORI YO

16. Gini amaku ani agbiaha mbiko manga ani sunge fu Mbori kakaka?

¹⁶ Gaani Mbori nga Yekova na bakere ome tiko na ni gu Mbori nga bamangi apai. Bake papara Atambuahe asanahe nga: “Da du ni iranyaka wa mo?” Ko agbia kurapai kutini nga: “Kpatabero du na ome, kumbabero ki du kuari.” (Tam. 89:8, 13) Sidu, Mbori nafu maku furani tipa gu ome ani amangaha tipa ka songoda agu apai nga ga Kindo. Ko aidanga gako amoyambu nga akumba, adee, na rukutu agude niri “gu riahe nga ga nyomoro” te. (Snz. 31:27) Si naida ani wiriki Bakusirani ni manga ani gako sunge kakaka. Mbori afu maku afu furani tipa mangasunge fuko na kpotoraniyo dunduko na ko na ngbarago tipa kafu maku kuriihe.​—Oni gedi Atambuahe 62:12.

17, 18. Tipagine rengbe ani ti ni ka ya manga agu apai nga ga idapase na nyakasa gaani kido kuti ga Yekova arugute? Oni funga kpiapai.

¹⁷ Wai gaani mangapai nga ga idapase aundo rani ani kido kuti Yekova? Ani makianga gupai naadu tipa aYisaraere ho i arimo ni kurogo Ringara Mokido. Yekova aya fu agu aboromotumo natindi sanduki mokido i ndu ka ru bebere gu di nga Yaradene. Ono tie, fuo i da yo, i abi ime ni hihii he. Ginipai si aida i mangihe? Ya mo si aida i moi bataya pangba ime na ki sungu tipa aposo ime ugudi? Oó, i akido kuti Yekova na ki pefuo gako rugaapai. Sangbanaha angia gine? Gu pangbanga re naya: ‘Ho kpendu agu aboromotumo naatinda ga Yekova sanduki aru ni rogo gu ime nga Yaradene, ime Yaradene aru zaa. Agu aboromotumo natindi ga Yekova sanduki mokido ki ru aru zaa auru ugu sende bebere Yaradene yo, aYisaraere ki si asi dunduko ku mbiti yo auru ugu sende.’ (Yos. 3:12-17) Oni berẽnga pa gu ngbarago i adu na ho i abi gu ime re ni si nambu fu! Nirengo, gayo idapase aima nyaka mbiko i akido kuti ga Yekova rugapai.

¹⁸ Yekova amanganga iiriwoapai tipa gako aboro areme te, ono ko nafu maku afu kurii gu gayo mangapai nga ga idapase. Ga Mbori ziazia toro naundo yó i ni tungusapa Kindo rogo zegino dunduko. Na Yesu akido gako abawiriki nga ko nika undoyo aundo kutingba gi nyanyakipa sunge re niya: “Oni ndú tie, ki sa arikaaboro dunduko ni abawiriki . . . mi na oni ti arago dũ, ki da ti digida zegino.” (Mt. 28:19, 20) Dungu agu awirina naanidu na zee watadu gunde tipa ka fura na aboro gene tungusapai yo, ga Mbori toro aima undo yó i du na ngara.​—Oni gedi Atambuahe 119:46; 2 AKorindo 4:7.

19. Ka si vura du nga akpakarapai namanga rani, gini kido si aida ani du na ni?

¹⁹ Gu kura awirina kinaho adunga gene beyo tipa ka tungusapai wenengai ya mbiko kaza watadu gbinza. Ono tie, i rengbe arengba kadu nakido nga “Mbori wasa” ima ino agu apai du tipa yó. (2 Kor. 1:3) Ko nabi gu ome ani amangaha tipa agu apai nga ga Kindo na kikiipaha. Ani dunduko si aida ani ini gupai nga pa bata ani naruriipa gaani idapase kuti ga Kristo motumo tumorii.​—Eb. 10:39.

20, 21. Gini bete agene rengbe ani ka yugo gaani kido kuti Yekova ngbaha?

²⁰ Gaani irisombori nakoda mangasunge na gaani regbo, ome, na agu ahe du berani tipa ga Mbori sunge. Ii, ani naida na ngbaduraniyo dunduko ka manga “sunge batungusipai.” (2 Tim. 4:5) Ani na ngbarago ka mangaha wo mbiko si naundo kura aboro i “ye sa gu inahe nga ga rengo.” (1 Tim. 2:4) Si tie ziazia nga, taasarimo gaani Mbori nga Yekova nasarani ani du na bakere inohe tipa ko. (Snz. 10:22) Na si nasarani ani du na bakere kido kuti Bakusirani.​—Rom. 8:35-39.

²¹ A wa wisigi anihe, anga kido kuti ga Yekova wene arugapai naye nisaha te; pai kinaho si aida ani mangihe tipa kadu na gu kido re. Ani kido kutiko rogo kparakpee yo. Ani berẽkurii wai ko amangipai bakuru kusayo na gu ko nika mangaha kumbatayo. Ani ndunga andu kindi kaa irisoko na kini kido kutiko. Nirengo, ga Yekova atingidapai nika nyeanye kindi. Ka ani moi berãrani fuani, ani raki araka nyenye kindi!