Agu Atingidapai Nga Ga Yekova Na Nyanyakipaha

1. Gini apai ani naawisigoho dedede, na gini undo ani agbia ti fugö ani he?

HO MO naambakada gu Ngbaõbambu Sinziri ni du tipa wisigoho ba dunguratise yo, ya mo mo aberẽnga pai nga, ‘Si nawira wa ani ima awisigo gipai re mbata?’ Ka si du nga mo aima digo nindu tipa adunguratise tipa bete aregbo, si nawira wa mo aima bi gupai nga gu kura apai kinaho ani awisigoho dedede. Ani naawisigopai dedede tipa ga Mbori Kindo, ga Yesu motumo, sunge sa aboro ni abawiriki, na agu asino duwa nyemuse na idapase. Ho ani afugöpai ni tipa agi apai re, si nanyakasa gaani idapase na kini sarani ani du ni ‘amangipai angianga agipai gbua’ ya.​—Yak. 1:22.

2. (a) Ga Mbori atingidapai nafura gbe tipagine? (b) Wai du ga Mbori atingidapai kia ti ga aboro?

² Gu pa-Ebere nga tingidapai, i fura tipaha rogo Ziazia Kekeapai dedede nga “dezirepai” na si rengbe kadu nga andiko, azinahe, na agu arugute Mbori afuhe fu gako aboro. Ga Mbori arugute wa ga wiri aboro si aida i naamanga ariapai ti ni dedede te, gako arugute dedede ni wenehe na ani ima rengba ka kido kutini. Wa vura duhe nga gu kura arugute kinaho ko afuhe bakuru kusayo amanganga sunge areme ya, anga si wo mbiko gupai nga si ni irairaha te. Bake papara Atambuahe aya: “Gamo adezirepai du ni ruru he nye anye kindi.”​—Tam. 119:144.

3, 4. (a) Ga Yekova atingidapai na koda gini apai? (b) Gini aundo aYisaraere arengbe ka gbiaha ka i aadegatuyo fuko?

³ Si nawira wa mo aima bi gupai nga ga Yekova atingidapai nakoda zahe. Mbori anaafu zahe fu aYisaraere vurube gako anebi. Ni kpiapai, mbata fu aYisaraere rimi kurogo Ringara Mokido, Moize aza yó ki ya: “Oni bánda tironi gupai ka nanga kpotoroni yo, oni ki sa tironi ku bani, ka manga pa kura ambori, ka irisa ha, ga Yekova zinga ki rungudi kuti roni.” (Pa Rug. 11:16, 17) Ziazia Kekeapai nayugo gupai nga Yekova afu wene arugute fu gako aboro.

⁴ Dedede, Yekova anaangarasa aYisaraere i nigunde tiko, i nidegetuyo fuko, na i ni ziasi rimoko. (Pa Rug. 4:29-31; 5:28, 29) Mbori akido yó nga, ka i degetuyo fuko ko nika fu amaku afu fuyo.​—Pa Mot. 26:3-6; Pa Rug. 28:1-4.

GU GENE AYISARAERE AKARAGAPAI NGBAHA KUTI GA YEKOVA ATINGIDAPAI

5. Tipagine Yekova asovura ti ni tipa Bakindo Izikiya?

⁵ Rogo gu pangbanga du tipa aYisaraere, Yekova aima kakuti gako kidohe. Ni kpipai, ho Saneriba nangia Bakindo aAsuro aru nguru ni pati Yudo na ki gundesi bakindo Izikiya nga ko nika dia gako Kindo beko, Yekova akedi gako maraika ko ye ka undo gako aboro. Rogo yuru sa, ga Mbori maraika agbarasi gu ga aAsuro abanzengere nangia “airanyaka” si ki sa Saneriba ko ga ku kpuko yo ngbaome na zee. (2 Peka 32:21; 2 Aba. 19:35) Tipagine Mbori asovura ti ni tipa Bakindo Izikiya? “Bambiko ko [Izikiya] akakuti Yekova. Ko ambunga peka ko a te, ono ko akakuti agu arugute” nga ga Yekova.​—2 Aba. 18:1, 5, 6.

6. Waigu Bakindo Yosiya ayugu gupai nga ko akido kuti Yekova?

⁶ Bakindo Yosiya nga gu kura boro nagi ga Yekova zinahe. Tona kinaho garãko adu ni muambe, ‘ko amangi gupai naru aru bangiri Yekova; ka ko akparanga kubani ku kumbabe watadu ku garebe yo ya.’ (2 Peka 34:1, 2) Ko ayugu gako kido kuti Yekova ni gbarasa ko agu akpiahe naadu rogo ringara dunduko na ki karaga ndikidi irisombori kubaha. Ni mangako ho wo, Yekova afu maku fuko na fu aboro dunduko.​—Oni gedi 2 Pekapai 34:31-33.

7. Ho aYisaraere anaabasa sangba Yekova ni, sangbanaha aningia ginihe?

⁷ Si nafu kina gberarago nga, aYisaraere anaakidongo kuti agu apai Yekova anaatingida yó na ni te. Tipa dungu kama agarã, wo i anaabasa sangba Yekova. Ho gayo idapase ani rungbura ni, i ‘anaawo kubani na kubani, na yuge yugopai dunduko kini yanga nayo’ a wa Pauro agumbaha. (Ef. 4:13, 14) Ho i anaakidongo ni kuti ga Yekova atingidapai ya, i anaambu ni kerehe.​—Pa Mot. 26:23-25; Yere. 5:23-25.

8. Wai rengbe ani ka wirikapai be ga aYisaraere kpiapai?

⁸ Wai rengbe ani ka gbia undo ti ga aYisaraere kpiapai? A wa si adu tipa yó, ga Mbori amoyambu areme nagbia arugute agbia. (2 Pet. 1:12) Agu aregbo dunduko ani ageda Fugo Mbori, si natingida rani na pa gako arugute. Wa duhe ani na ranirii, ani rengbe arengba ka sia ka pekafuo ga Yekova arugute watadu ka pekafuo gupai ru bangirani. (Snz. 14:12) Ani wisigingo bete agu apai rengbe ka sarani ani kido kuti ga Yekova atingidapai na wai rengbe ani ka gbia undo behe.

ONI GISANGBA MBORI NA KI RAKI

9. Ho aYisaraere adu ni ngbakungba yo, waigu Yekova akido yó nga ko nika ngera angerefuo yó?

⁹ Ho aYisaraere atona gu nunguro ni nadiyo na agarã 40 rogo “bakere iiriwo ngbakungba,” Yekova aapenga wai fuyo ko nika ngerefuo yó na kini banda yó te. Wa si avura duwo, ko aima yugo gupai fuyo bara dunguhe nga i kido kutiko na kuti agu arugute ko afuhe fuyo. Gu bakamikami dubo Yekova anaamangasunge na ni uru na gu we naanidu yuru, ayugu gupai fu aYisaraere nga ko nika ngera angerafuoyo rogo gu kpakarakpakara nunguro i andu he re. (Pa Rug. 1:19; Gate 40:36-38) Ko aundo yó a na agu ahe i aidaha. “Gayo aroko akpatakanga te ka nduyo ahinga a ya.” Nirengo, “he akpanga beyo te.”​—Nem. 9:19-21.

10. Waigu Yekova abanda gako aboro areme?

¹⁰ Barambeda, ga Mbori amoyambu nika rimo kurogo vovo zegino. Ya mo ani nakido kuti Yekova nga ko undo rani tipa ani bati ti rago “bakere gberãngbi”? (Mt. 24:21, 22; Tam. 119:40, 41) Nirengo, Yekova afunga dubo areme watadu we tipa si ngbe furani kumbatayo kurogo vovo zegino te. Ono ko namangasunge na gako riigbu si ni tingidi rani na gupai si aida ani mangihe. Ni kpiapai, wo i nangarasa rani ani nyakasi gaani idapase ni geda ani Ziazia Kekeapai dedede, gu Irisombori Nga ga Aborokporo, kodihe na nduge dedede tipa adunguratise na tungusapai. Ya mo ani namanga agi apai re? Manga ani he wo nika sa gupai nga ani du na gu idapase nika banda rani ani rimi kurogo vovo zegino.

11. Gini apai nayugo gupai nga Yekova naberã parani aberã?

¹¹ Ga Mbori riigbu nafu wene arugapai naundo rani ani mangi wene diaberã. Ni kpiapai, ka ani du na wene bipai tipa aũzegino na ki mbu bangirani si du taata, si rengbe ka dia bakere bakabangirise kusayo tirani. Ani ima gbia undo a tipa agu arugute nabipa vodatise, wene ambaro, na bakere wirikapai. Na oni berẽnga kurii wai i atingida rani na pa mbakada kpurani, gaani aũnduge, aBambu Kindo, na gu tunguotunguopai ka kuru. Ngbatunga agi atingidapai re nayugo gupai nga Yekova naberã parani aberã.

ATINGIDAPAI AUNDO AGU AKRISTANO NAADU MBATA I NYE NIRURUYO

12. (a) Ginipai Yesu anaafura dedede fu gako amokedi tipaha? (b) Gini mangapai nga ga umbasitise nazi ngbadu Petero yo, na wai si aida si du na ome kurirani?

¹² Rogo bambata sa kama agarã, ga Mbori amoyambu anaagbia atingidapai dedede. Yesu anaatingida gako abawiriki dedede i du na umbasitise. Ono tie, anga ko anaape kina pepehe sa fuyo te, ono ko ayuguhe fuyo rogo mangapai yo. Rogo gu yangara yuru ko adu auru kpotosende ane, ko adungura amokedi dunduko tipa ri Pumbo Susiri. Wa gako amokedi ari riahe, ko aguari ki zundu nduyo nga gu sunge kina kanga anaamangaha. (Yo. 13:1-17) Gipai ko amangihe re aima zio ngbaduyo yó. Tingbafuo agarã 30 kusa, gu mokedi nangia Petero naadu pati gu riahe re, ko afu arugute fu akurako aidipase tipa umbasitise. (1 Pet. 5:5) Si naida ga Yesu kpiapai undo rani ani du na umbasitise ho ani amangapai ni na akuarani.​—Frp. 2:5-8.

13. Yesu atingidi gako abawiriki na pa gini nyanyakipa sino?

¹³ Padu na nyanyaki idapase angia gu kurapai Yesu anaasakapai tipaha na gako abawiriki. Ti kura regbo sa, ga Yesu abawiriki arengbanga ka husa gu kumbagude naadu na adaimona te. I asana Yesu ki ya: “Tipagine ani arengbanga ka danda ru ti ni ya?” Yesu akaragapai ki ya: “Bambiko gaoni idapase toni. Bambiko ya mi fu roni ni rengo, ka gaoni idapase du wa tunga musutada, . . . a nga pai sa ka gasi roni te.” (Mt. 17:14-20) Ho Yesu adu ni auru kpotosende ane, ko anyakasi gupai fu gako abawiriki nga i du na idapase. (Oni gedi Matayo 21:18-22.) Ya mo ani namangasunge na gu momu du berani tipa ka nyakasa gaani idapase ti regbo bakere adunguratise, na agu adunguratise nga ga dungurati? Anga agi adunguratise re nga regbo ngbarago gbua te, ono si nga gu regbo ani ayugu gaani kido kuti Yekova ti ni.

14. Tipagine si aida ti ni ani sonosi gu nyemuse naadu ti Yesu areme?

¹⁴ Vovo Ndiko na dungu atingidapai rogoho tipa ka undo rani ani yugu nyemuse fu akuarani. Yesu aya gu ue bakumba rugute nga, “mo ni kpínyemu kuaro wa mo akpinyemu tiro.” (Mt. 22:39) Wakina gure a, gu wirina Yesu nangia Yakoba aya nyemuse nga “bakindo rugute.” (Yak. 2:8) Gu mokedi nangia Yoane aya: “Abadiangba, vovo rugute mi ake fu roni te, kina gu kuru he nadu be roni ho pai aenge ni: kuru rugute nga gupai oni agi.” (1 Yo. 2:7, 8) Gini rugute Yoane aafura tipaha nga “kuru rugute”? Ko aafura tipa gu rugute nga ga nyemuse. Si adu ni “kuruhe” rogo gu gene nga Yesu aima fura tipaha bete agarã kusayo. Na si adu a ni ‘vovoho’ rogo gu gene nga si aida abawiriki du na gu nyemuse nika sayo i mbupa kura gayo apai ho i nika gbiatiyo ni na kpakaraapai. Wangia ani ga Yesu abawiriki, si naida ani bi agu azahe naundo rani ani zanga berã kina pa tirani na nyanyaki mbiko si nga sino gi zegino re, na si rengbe ka gbarasapa gu nyemuse du ani na ni koyo du akuarani ni.

15. Ginihe nangia ga Yesu banguapai?

¹⁵ Yesu adu na nyemu aboro tiko. Ani nabi gi gako nyemuse re rogo gu gene ko ahusi aborokaza ngbaha na ki zingisi aguyo nakpiki. Ono tie, ga Yesu banguapai angianga husa aboro te. Gako tungusapai gbiati yugopai adu na bakere ome kurii ga aboro raka kisusi. Ngba gini gene? Gupai ini anihe nga agu aboro Yesu ahusi yó na ki zingisi yó bekpio rogo bambata sa kama agarã aima kpiko, ono agu aboro nadegetuyo kuti gu pangbanga ko aatungusaha, i namaabangirise tipa nyenye unga.​—Yo. 11:25, 26.

16. Waigu tungusapa Kindo na sunge sa aboro ni abawiriki namoipai areme?

¹⁶ Gu tungusapai Yesu atonaha rogo bambata sa kama garã, si namanga areme kindi rogo zagino dũ. Yesu aya fu gako abawiriki we: “Oni ndú tie, ki sa arikaaboro dunduko ni abawiriki.” (Mt. 28:19) Nirengo gipai re aima tona manga na si namanga a kindi. ADezire Yekova bangeyo naima susa amirioni saba natungusapai tipa ga Mbori Kindo rogo aringara naima susa 230, na i nawisigopai na amirioni aboro. Gi tungusapai re nayugo gupai nga ani naraka ti yangara arame.

ONI KIDO KUTI YEKOVA AREME

17. Gini arugute aPauro na Petero afuhe?

¹⁷ Si tie ziazia nga, atingidapai naaundo agu aKristano naadu mbata tipa i ru nyanyaki rogo idapase yo. Oni berẽnga pa gu ngarasaro Timoteo agbiaha ho Pauro adu ni bambukiso Roma yo, ko atingidi ko na gupai nga ko ‘kakuti kpia gu weneapai, ko agi ngbako.’ (2 Tim. 1:13) Tingbafuo ngarasa Petero akurako aKristano i sonosi agu asino nga hipai, nyemuse, na zatise, ko aya: ‘Mi natingida agi apai re furoni dedede, wa vura ina oni paha, ki du ni nyakasinyakasi roni rogo rengo.’​—2 Pet. 1:5-8, 12.

18. Agu aKristano naadu rogo bambata sa kama agarã anaabi atingidapai wai?

¹⁸ Nirengo agu awaraga Pauro na Petero akehe adu wakina “agu apai ziazia anebi agumbaha mbata.” (2 Pet. 3:2) Ya mo rago agbere ti agu awirina nagbia agu arugapai re? Oó, si angia ga Mbori nyemuse tipa ka undo yó i “sóno rogo gu undahe nga ga gaani Gbia nga Batasirani Yesu Kristo.”​—2 Pet. 3:18.

19, 20. Tipagine si aida ani kido ti ni kuti ga Yekova atingidapai, na gini aundo ani agbiaha ti ni?

¹⁹ Areme, ani na dungu nduapai berani tipa ka kido kuti agu apai Yekova atingida rani na ni rogo Fugoko nga Ziazia Kekeapai. (Oni gedi Yosua 23:14.) Si nayugo wai furani Mbori namangipai na kpakpa aboro tipa akutu agarã. I ake agi apai re tipa si undo rani. (Rom. 15:4; 1 Kor. 10:11) Ani ima bi wai gu sangbaanebi du rogo Ziazia Kekeapai adigisotihe. Gu sangbaanebi re nga gu tingidapai nika manga kumbatayo. Ni kpiapai, dungu amirioni aboro ima ye kurogo ndikidi irisombori kina wai sangbaanebi apehe nga si amanga “rogo yangara arame.” (Yes. 2:2, 3) Gu gbegberẽ apai namanga areme rogo zegino naringbisa sangbaanebi a. A wa ani nifura tipaha, gu tungusapai namanga areme rogo zegino dunduko naringbisa sangba Yesu.​—Mt. 24:14.

²⁰ Apai kinaho Bakusirani amangihe nga gu nasarani ani kido kutiko. Ya mo ani nagbia undo behe? Si naida ani kido kuti gako atingidapai. Gere nga gupai Rosellen amangihe. Rii aya: “Wa mi atona ka kido kuti Yekova na ngbadure dũ, mi atona ka bi gako nyemuse tipa re na wai ko aanyakasa re.” Ani dunduko ani gbianga aundo agbia be ga Yekova atingidapai.