Oni Nakpinyemu Ga Yekova Atingidapai Kisusi?
‘Mbisimore nakakuti gamo atingidapai, mi nakpinyemuhe kisusi.’—ATAMBUAHE 119:167.
YEKOVA naida gako aboro duna ngbarago. Rengo ngaha, tipa ka duna ndikidi ngbarago, ani du wa ka ani aata rogo ga Mbori ndika na kini banda gako arugute. Tipa ka manga gere, ko nafu gako atingidapai fu rani. I nafura tipa gere dedede rogo Kekeapai, gbe rogo Atambuahe 119, nga gu si awiraha nga Izikiya nakehe, nangia paranga Wiri Bakindo nga ga Yuda ko. Gi bawene bia re natona na agu afugo nga: “Aboro maku nga agu yo du gayo apai ziazia, nata rogo ga Yekova rugute! Aboro maku nga agu yo naka kuti gako adezirepai [atingidapai, NW ], ninagbata ko na kpotoyo yo dũ.”—Atambuahe 119:1, 2.
2 Ani ‘nata rogo ga Yekova ndika’ nidia ani ruru inohe tipa Fugo ko na kini mangihe rogo gaani raka. Ono tie, wa duhe nga ani nga kpakpa aboro, ani naida atingidapai. Gu pa-Ebere sa yo ho nga “atingidapai,” si nayugo gupai nga Mbori nasa rani ani tingidipa gako ndika, azinahe, arugapai, na arugute. (Matayo 10:18-20) Ani adu na ngbarago kinagu ka ani andu kumbatayo kindi kaa manga agu atingidapai re, mbiko si naundo rani ani ne agu agbina nga ga toro nga gu sangbanaha akura rogo gberango na gberarago.
Oni Kakuti ga Yekova Atingidapai
3 Ga Mbori atingidapai angba gbe ti gu bake Atambuahe nabi bia ki ya: “Mi naipisa tire, mi aima nga te ka ka kuti sangbaro. Ka ga gbegberẽ aboro agire vura voda re vurũ, bangire ago nga tipa ga rugute te.” (Atambuahe 119:60, 61) Ga Yekova atingidapai naundo rani ani hi rungosi mbiko ani na kido nga gu Barani nga ga ngbangbaturũ ko rengbe arengba ka kata agu agire nga ga zahe nga gu avurarani avoho kirikiri pati rani. Ti wene regbo, ko nabatasa rani be ngbatunga agu aũkota re tipa ani nindu kumbatayo kindi na gu sunge nga ga tungusapa Kindo.—Marako 13:10.
4 Ti kura aregbo, ga Yekova atingidapai naruga rani. Ani dunga tie na tambuahe tipa ngbatunga gu rugute re, a wa bake Atambuahe adu nani. Rogo kparakpee, ko aya fu Mbori wee: “Gamo adezirepai [atingidapai, NW ] du ni gi pa ngbarago, . . . mi nakpi nyemu gamo [atingidapai].” (Atambuahe 119:24, 119) Ani na ga Mbori atingidapai ho berani susi gu nadu be bake Atambuahe. Gu dungu agumbapai i adi fugoho rogo gu Kekeapai du rogo pa-Ebere ka kehe kurogo gu Kekeapai du rogo pa-Giriki atingidanga rani na kina pa agu arugute Yekova afuhe fu gako aboro nga aguyo nadu tii Ndika sa te, ono si natingida rani a na pa gako ringbisaapai tipa gu dungurati nga ga aKristano. Ho Mbori abihe ni nga si gu daada ko tingidi rani na agu apai du tipa gako andika, ani na tambuahe tipa ngbatunga gu rugute re. Na ni ‘zia ani tirani kuti ga Yekova atingidapai,’ ani nane gu nyemu ingapai nabirika rani, nga gu nasa gberarago ti Bakusirani na kini di gaani ngbarago kusayo.—Atambuahe 119:31.
5 Da kuti gini bakioho si aida ani nikpinyemu ga Yekova atingidapai? ‘Mbisimore nakakuti gamo atingidapai, mi nakpinyemuhe kisusi,’ wogu bake Atambuahe abibia. (Atambuahe 119:167) Ani aye ka kpinyemu ga Yekova atingidapai kisusi ka ani abihe na kini dihe ni gu rugute naye be gu Barani nga guko naberã aberã nirengo tipa rani. (1 Petero 5:6, 7) Ani naida gako atingidapai, na gaani nyemuse tipaha asona wa ani kaa bi wai si afu undo fu rani.
Ndu Gupai Ani Aida ga Mbori Atingidapai Tini
6 Ndupai sa nga gu ani aida ga Mbori atingidapai tini nga bangirani nago ago. Gu buku nga The World Book Encyclopedia nayaa: “Dedede, bangiri aboro nago ago ti apai wa regbo asusa. . . . Isoke bangironi avura go ti rimo kura boro watadu ti kura tingidapai nga gu naadunga ni mbumbuhe ka tingidaha ya. . . . Ngbatunga gu gobangirise ngbutuko re, nga gu ninaamanga dedede, i nayambaha nga tibudungu ngbutuko. Aboro birĩ-inohe naringbisaha kuti asada ka bi guhe i namaanga ha rogo baha ya rogo gu bambu du ahe rogo nzaa. . . . Wene gene ka tingidapa pai nga ka wisigoho berewe gbanga regbo nasusi fuo gu regbo oni aberãha ya oni ima ino gupai re wenengai.” Wisigopai zanga nyomoro na fugö ga Mbori atingidapai berewe nika undo rani paha ye ku berãrani yo na ani kini raki ringbisihe kuti agu atingidapai re, si kini fu undo fu rani.
7 Ani naida ga Yekova atingidapai areme susi gu nidu mbata mbiko gbegberepai ima maapai kisusi gu nidu mbata rogo gu pangbanga nga ga aboro. Ho ani amaaberãrani ni sa ga Mbori atingidapai, ani nagbia gu dudungurobipai ani aidaha tipa ka ne tigo kurogo gu gbegbere agene nga ga zegino. Bake Atambuahe ayaa: “Mi du na rugatinapai susi gimi abayugupai dunduko, bambiko wa mi nabaka bangire tipa gamo adezirepai [atingidapai, NW ]. Mi rugu tire na pai susi gbinza aboro, bambiko wa mi naka kuti gamo andika. Mi di ndure ti gene gbigbitapai dunduko, ya mi nibérẽ kina ga pai.” (Atambuahe 119:99-101) Ni manga ani ga Mbori atingidapai, ani abanda tirani ti “gene gbigbitapai dunduko” na ki ne da wa gu ndurumo aboro “du na bitimo ti gayo rugatise na pai, . . . [duni kpara]kpara yo ti ga Mbori unga.”—AEfeso 4:17-19.
8 Ani naida ga Mbori atingidapai a mbiko si nanyakasa rani ani hi gu dungu gaani a’asada ani agbia tirani nani rogo gi ‘digida rago’ re. (Daniere 12:4) Ni zanga ani ngbatunga agu atingidapai re, ani rengbe ka da ni ‘agipai zanga tingidaha.’ (Yakoba 1:25) Ono wisigo Kekeapai nisase na rogo dungurati mbiko gu undo naye be agu abuku nga ga ‘ruru kangara moyambu’ nika undo rani ani ru nyanyakii barabangiri agu a’asada nga ga idapase. (Matayo 24:45-47) Ngbatunga agu ambakadapai nga ga toro re naundo rani ani bi gupai si aida ani mangihe tipa ka sa ngbarago ti Yekova ho ani abi tirani ni rogo agu apai namaa rani ngba asada.
Gu Nyanyakipa Sunge Gaani Adunguratise Amangaha
9 Ni betehe, i nazeresa gu gomoro du ani nani tipa ga Mbori atingidapai pati agu adunguratise nga ga aKristano, nga gu ba agu awirina i aima sia yo afu rugute ni. Gu mokedi nangia Pauro akepai ki ya ho Yesu “adakpa ni ku ari yo, ko atindi zizi aboro; ko afu agamahe rogo aboro yo.” Pauro agbia gupai kuti ni nga: “[Kristo] afu agu yo i du ni amokedi; agu yo ni anebi; agu yo ni abatungusipai; na agu yo ni amoyambu na abayugupai; sa du ga Mbori aboro nzunzu, sa gu sunge nga mangaapai, sa sonosa boro Kristo.” (AEfeso 4:8, 11, 12, “oni ringbisingaha na NW.” ) Nga gu tambuahe rengbe ani ka du nani tipa gupai nga agi “agamahe rogo aboro yo” re—nga agu abaakumba i nasia yo—nagbe berãrani sa ga Yekova atingidapai ho ani nidungura tirani ni kurogo ba sa tipa iriso ko!
10 Duna tambuahe tipa gu mbakadaapai nga ga Mbori nika fõngbaduraniyo ani du pati gaani adunguratise bisue nga gu ani naamangaha na aposo dunduko. Pauro anyakasi gupai nga si naida ani nidungura tirani dedede kurogo ba sa. Ko akepai ki ya: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.”—AEbere 10:24, 25.
11 Oni na tambuahe tipa agu apai gaani adunguratise naamanga tipa rani? Wisigo Ngbaõbambu Sinziri na aposo dunduko nanyakasa gaani idapase, kini undo rani ani mangipai ringbisihe kuti ga Yekova atingidapai, na kini nyakasi rani ani sovura kuti gu “toro . . . nga ga zegino.” (1 AKorindo 2:12; Amokedi 15:31) Pati gu Dunguratise du tipa aboro dunduko, abagumbapai nafu rugute rogo Fugo Mbori yo, kodihe na ga Yekova atingidapai na ga Yesu bawene ‘afugo nga ga nyenye unga.’ (Yoane 6:68; 7:46; Matayo 5:1–7:29) I nambakada gaani abirĩ yugopai rogo Sukuru Sunge Siokrasia. Gu Dungurati nga ga Sunge na nyanyakipaha rogo undo rani ani mbakadi gaani sunge yugo wene pangbanga ho ani atanga ni ti akporo, ho ani akaraga tirani ni berewe kaa biko aboro, ho ani awisigo Baibiri ni na aboro rogo akpuyo, na ho ani amanga kura papara gaani sunge tungusapai ni. Gu wiri umba rimbasa aboro du pati Wisigo Buku nga ga Dungurati nafu bakere mamu fu rani ani fura, nga agu afugo dedede nakoda ga Mbori atingidapai.
12 Du pati adunguratise dedede naundo rani ani tingidipa ga Mbori arugute na kini undo rani ani nye nyanyakii rogo toroyo ti regbo vura, ti regbo zingo mosoro, na ti regbo kura a’asada nga ga gaani idapase. Rogo kura ringara sa Asia yo, agu aKristano 70 i akusiyo kusayo rogo akpuyo na ki sa yo ngbaome i niraki rogo tapio bure aini wai du gaani adunguratise na nyanyakipaha. Ni dia yo berã kaa dunguratiyo kindi dedede kurogo ba sa, i akaragatiyo kurogo gu gayo gbata nga gu vura aima gbarasaha re, ki zazaki gu yangara ahe nanye ti gayo Bambu Kindo, na ki dua kuraha berewe nani gbukuti yo.
13 Fuo hi yo dungu agarã nga ga vura rogo kura papara gu bangisa ringara re, gu ga Yekova aboro re nandu sunge ko kindi zaaza. I asana bakumba sa dagba aguyo du rogo gu rago re ki ya: “Ginipai ninaaundo awirina tipa i duni kpamiakpamiayo?” Gako karagapai angia gine? “Tipa agarã 19, ani ahenga manga dunguratise kandara bara sa te. Ti kura aregbo, mbiko agu abundu i abafaha kurii aboro na gu kura kpakarakpakaraapai, gu kura awirina aarengbanga ka ndu ku ba adunguratise yo te, ono ani ahenga manga dunguratise kandara bara sa te.” Nirengo, gi weneringi awirina re na tambuahe tipa pa wai nyakipa gu gumbapai nga “ka ani hé nga dungura tirani na akuarani” ya.
14 Gu dekurugbo nangia Ana garãri adu 84 ‘anakpanga yekaru yo te.’ Ni sangbanaha, ri adu kina yo ho i aye ni na fogo Yesu koyo ngbutuko fuo batika yo ko. (Ruka 2:36-38) Oni ima diaberã ya oni aidanga ka kpa pati adunguratise tee? Oni na’asada tironi ka du pati apapara gaani kikindigi adunguratise dunduko? Gu rugute nafu undo rogo toroyo nga gu ani agbiaha pati agi adunguratise re nafu gopai ziazia nga, gu Barani nga ga ngbangbaturũ ko naberãpa gako aboro aberã. (Yesaya 40:11) Regbo ngbatunga agu adunguratise re nafu ngbarago a, na padu ani pati ni nayugopa gaani tambuahe tipa ga Yekova atingidapai.—Nemaya 8:5-8, 12.
Ani Nikparakpara Rani Mbiko ga Yekova Atingidapai
15 Manga ga Mbori atingidapai naundo rani ani duni kparakpara rani ti gi gbegbere zegino re. Ni kpiapai, duna irisa tipa ga Mbori atingidapai naka na ani ti manga wasiwasi kodaba. (Pa Fu Rugute ni Ue he 5:18; Asanza 6:29-35; AEbere 13:4) Boro rengbe arengba ka diabe agu a’asada wenengai naida boro pezire, naida ni rimisi ti ni kurogo iraira mangapai, watadu ni dĩ he, ka ni amangapai ringbisihe kuti agu atingidapai nga ga Mbori. (Gate 20:15, 16; Pa Amotumo 19:11; Asanza 30:7-9; AEfeso 4:25, 28; AEbere 13:18) Manga ga Yekova atingidapai naza rani a ti irabape, ti kpikapai, watadu peziree ti rimo aboro.—Pa Amotumo 19:16, 18; Atambuahe 15:1, 3.
16 Ni du ani na irisa tipa ga Mbori atingidapai, ani nanye ziazia, watadu ni kparakpara rani tipa gako sunge. Nga gu banyanyakipa pai ngaha ka duni kparakpara rani ti gi zegino re! Rogo gu kparakpee ko amangihe fu Yekova rogo gu yangara yuru nga ga gako raka auru kpotosende, Yesu amangi gi zungadihe re tipa apefuo ko: “Mi fu ga pai fu yo; aboro zegino asogo yo asoga, bambiko aboro zegino nga yo te, wa kina re adu nga ni boro zegino ya. Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. Aboro zegino nga yo te, wa kina re adu nga ni boro zegino ya, Mo kpára yo rogo rengo yo; ga pai nga rengo.” (Yoane 17:14-17) Ani nibinga Fugo Mbori tie kindi na nyanyakipaha, nga guhe nakpararani tipa gako ziazia sunge.
17 Ni ga Yekova amoyambu, ani naida ka nye ni agu aboro ko naima ida na yo tipa gako sunge. Ono tie, kangia ani ka basa ga Mbori atingidapai, gu toro nga ga gi zegino re rengbe ka maapai rirani, nga gu nayugotihe gbe rogo fugo aboro zegino, rogo gaha abuku, gaha ambaro, na mangapai. Na nirengo, ani aidanga ka dani akpinyemu marã, airaruka, airarekangose, agu aboro atambuangahe ya, azanga kakuti rurupai, airasakparakpa, airanyakarii, airaabiatise, na ni agu aboro nakpinyemu ngbarago susi nyemu Mbori te—agi asino re nga betehe gbua dagba gu dunguhe agu aboro ayugoho kparatiyo ti Mbori. (2 Timoteo 3:1-5) Wa duhe nga ani naraka dudunguroo gbe rogo gu yangara auru nga ga gi gbegbere sinoraka re, ani kakuti kparakpee kindi tipa gu undo nga ga Mbori tipa wa ka ani rengbe kaa ndu kumbatayo kindi na manga ga Yekova atingidapai na were, kini ‘makiapai kuti fugo ko.’—Atambuahe 119:9.
18 Agu atingidapai nga ga Yekova asanga rani ani tingidi kina pa agu apai si aida ani mbu mangaha sa te, ono si natingida rani na kura apai susi gure. Manga gako atingidapai nika sa rani ani mangipai niwenehe, si kini sa rani ani moi gaani kido dunduko kina kuti Yekova na ani kini kpinyemu ko na ngbaduraniyo dunduko, na mbisimorani dunduko, na berãrani dunduko, na omerani dunduko. (Pa Fu Rugute ni Ue he 6:5; Atambuahe 4:5; Asanza 3:5, 6; Matayo 22:37; Marako 12:30) Ga Mbori atingidapai nafõngbaduraniyo a ani kpinyemu gaani amurakporo. (Pa Amotumo 19:18; Matayo 22:39) Gbe, ani nayugo nyemuse tipa Mbori na tipa gaani amurakporo nimanga ani gupai Mbori akpinyemuhe na ni fura fu kura aboro tipa gu “inahe nga ga Mbori.”—Asanza 2:1-5.
Manga ga Yekova Atingidapai Nga Unga!
19 Ka ani amanga ga Yekova atingidapai na kini undo kura aboro i mangihe kinawo, ani abatasa tirani na aguyo nadega tuyo kuti rani. (1 Timoteo 4:16) Waigu rengbe ani ka yugoho fu kura aboro nga duna irisa tipa ga Yekova atingidapai ni gupai ngbaangba nirengo na ni gupai mangaha afu undo afu? Ani rengbe ka mangaha wo ni manga ani agu andika nga ga Baibiri rogo gaani raka yo. Ka ani mangihe, agu aboro ‘duna ruru berã tipa nyenye unga’ adu tie na gopai beyo nga gu gene Fugo Mbori ayugoho, si nga gu bawene gene nirengo kisusi kaa ndu ngbaha. (Amokedi 13:48) I abi gupai a nga ‘Mbori gudu nirengo dagba rani’ na si kini mo ka fõngbaduyo yo i koditiyo kuti rani rogo iriso gu Gbia Bakindo nga Yekova.—1 AKorindo 14:24, 25.
20 Ni ndu ani kumbatayo kindi na wisigo Kekeapai, kini mangi agu apai ani awirikaha, na kini gbia undo wenengai be ga Yekova ambakadapai nga ga toro, ani aye ka kpinyemu gako atingidapai kisusi. Ka ani amanga agi atingidapai re, si aundo rani ani “ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” (AEfeso 4:20-24) Ga Yekova atingidapai na gako ziazia toro nika undo rani ani yugu nyemuse, ngbarago, zereda, gbanga hipai, weneringise, wene sino, idapase, zera, rugatise—nga agu asino du kia ti agu asino nga ga gu zegino du tii gu ome nga ga Satana! (AGaratio 5:22, 23; 1 Yoane 5:19) Sidu tie, ani rengbe ka duna tambuahe ho i atingida rani ni na pa ga Yekova andika ti regbo gaani wisigopai nisarani, ho abaakumba atingida rani ni nani, na pati gaani adunguratise, na kikindigi adunguratise.
21 Bambiko ani namanga ga Yekova atingidapai, ani rengbe arengba ka duna ngbarago, zavura ho i arungosi rani ni tipa manga rurupai vurũ. (Ruka 6:22, 23) Ani nangera kube Mbori ko batasi rani be agu apai nagundesi rani gbe. Gere wo gbe awere, nga gu regbo i adungura rikaaboro dunduko “sa gu vura nga ga gu bakere rago nga ga Mbori, nga gu ko du na tandu apai dũ” rogo Aramegido.—Yugoti 16:14-16.
22 Kangia ani naida ka gbia gu gamahe ani arẽnga tipaha ya nga ga nyenye unga, ani du wa ka ani kpinyemu ga Yekova atingidapai kisusi na kini mangihe na ngbaduraniyo dunduko. Ani dunga tie na gu berã nadu ti gu bake Atambuahe nabi bia ki ya: “Gamo adezirepai [atingidapai, NW ] du ni ruru he nye anye kindi; mo fú rugatinapai fere, mi ki nye ni ungare.” (Atambuahe 119:144) Na ani yugunga ngbatunga gu diaberã bake Atambuahe ayuguhe rogo agu afugo ko nayaa: “Mi nakpara foro [Yekova], mo bátasi re, ya mi nibérẽ pa gamo adezirepai [atingidapai, NW ].” (Atambuahe 119:146) Ii, ni gumbapai na rogo mangapai, ani funga gopai nga ani nakpinyemu agu atingidapai nga ga Yekova kisusi.
Waigu Ka Oni Karagapai?
• Waigu bake Atambuahe anabi ga Yekova atingidapai?
• Tipagine ani aida ga Mbori atingidapai tini?
• Gini sunge gaani adunguratise amangaha nibi ga Mbori atingidapai?
• Waigu ga Yekova atingidapai akpara rani ani du kia ti gi zegino re?
[Asanahe nga ga wisigopai]
1. Wari gbe i afura ni berewe na berewe tipa ga Yekova atingidapai?
2. Waigu du ga Mbori atingidapai na pagume dagbaha na ngbarago?
3. Nimaa ani mburupai rii Atambuahe 119:60, 61, gini kido du ani nani?
4. Waigu si aida ani karagapai sa ga Mbori atingidapai?
5. Waigu rengbe ani ka kpinyemu ga Yekova atingidapai kisusi?
6. Ndupai sa nga gu ani aida ga Yekova atingidapai tini nga gine, na ginihe nika undo rani ani tingidihe?
7. Tipagine ani aida ga Mbori atingidapai tini areme susi gu nidu mbata?
8. Waigu rengbe ani ka mbakada tirani ka ru wenengai nyanyakii barabangiri agu a’asada nga ga gaani idapase?
9. Ada nga “agamahe rogo aboro yo,” na waigu i aundo agu akurayo nga aidipase?
10. Memepai nga ga AEbere 10:24, 25 nga gine?
11. Waigu gaani adunguratise nibasasa nga gu ani naamangaha na aposo dunduko aundo rani?
12, 13. Waigu ga Mbori aboro rogo kura ringara sa Asia yo ayugu gayo tambuahe tipa agu adunguratise nga ga aKristano?
14. Ginipai rengbe ani ka wirikaha ti sino gu sosono dee nangia Ana?
15, 16. Waigu du manga ga Yekova atingidapai na ome kurii gaani mangapai?
17. Ginipai rengbe ka manga ka ani basa ga Mbori atingidapai, sidu ginipai si aida ani mangihe?
18. Manga ga Mbori atingidapai asa rani ani mangi gini wene apai?
19. Waigu rengbe ani ka yugoho fu kura aboro ya si gu ngba angba na ki duni gupai nafu undo ka manga ga Yekova atingidapai?
20, 21. Ga Mbori atingidapai na gako ziazia toro nika undo rani ani mangi ginipai?
22. Si naida gaani diaberã du nga gine tipa ga Yekova atingidapai?
[Gu kpiaahe du ti kpewaraga 25-28]
Bake Atambuahe akpinyemu ga Yekova atingidapai kisusi
Ni wirika ga Ana kpiapai, oni ima diaberã ya oni aidanga ka kpa pati adunguratise tee?
Duna irisa tipa ga Yekova atingidapai nakpara rani ani du kia ni agu aboro du gigirii na ko naima ida na yo tipa gako sunge