Mo Mangi Diaberã Na Tatamana

1, 2. Ya mo mo naaida kaa manga diaberã, na gini bipai du mo na ni tipa agu adiaberã mo amangihe?

DIABERÃ! Diaberã! Aˈuru dunduko ani naamanga diaberã. Gini bipai mo nidu na ni ho mo aida ka manga diaberã ni? Kura aboro naidanga ka sana akurayo ho i aida ka diaberã ni te. I nabihe nga kina gayo pai ru tipa ka diaberã kutini na kini bihe nga i aidanga gu berãpai kura aboro afuhe fuyo te. Ono tie, kura aboro kinaho nagunde agunde ti manga diaberã tipa agu apai nabipa gayo raka. Aguyo nangera kurogo abuku tipa arugute, watadu kaa gbarasa bakere marã tipa agu arugute i aidaha.

² Si ima kpakara fu agurani ani mangi diaberã. Ani nabihe nga gu kurapai kinaho omerani arẽnga na ni ya na gene berani tipaha te; ono wa vura duhe wo, ani naamanga adiaberã amanga rogo gu kura apai rogo gaani raka nibipa gupai ani akpinyemuhe. (Gara. 6:5) Wa vura duhe wo, ani ima inoho nga anga agu adiaberã dunduko ani naamangaha du ni wenehe watadu na tatamana te.

3. Gini rugute du berani tipa manga diaberã, na gini kpakarapai ani naagbia tirani na ni?

³ Wangia ani ga Yekova amoyambu, ani na ngbarago nga ko ima fu dungu arugute furani tipa gu nyanyakipa apai du tipa gaani raka. Ka ani pekefuo agu arugute re, ani mangi gu diaberã amanga rengbe ka undo rani na ki fu ngbarago fu Yekova. Wa vura duhe wo, ani ima rengbe ka gbiatirani na agu apai Fugo Mbori afuranga zukazuka tipaha ya. Ani naadiaberã wai tipa ngbatunga apai wa gure? Ni kpiapai, ani ima inoho nga si aidanga ani dĩ he te. (Ef. 4:28) Ono dĩ nzunzu nga gine? Kura aboro naya si agberãnga boro di guhe angianga gani ya te ka si du nga nyakingo paha te watadu ní nzunzu na nyemuhe. Wai rengbe ani ka diaberã riipa gupai aboro abihe nga dĩ ngaha te? Ginihe rengbe ka undo rani?

ONI DU NA RURU BERÃ

4. Gini undo ani agbiaha ho ani aida ka manga diaberã ni?

⁴ Ho ani aya ni fu kuarani Kristano wẽ, ani na nyanyakipa diaberã si aida ani mangihe, ní ima rengba ka ya furani ani mangihe na rugatinapai. Nirengo, wene arugute du ngaha. Ziazia Kekeapai naza rani ti gu sa mangapai niya: “Agu aboro dunduko namanga pai gburungagburunga nandu sa kina zingohe.” (Snz. 21:5) Ono ginihe nga mangapai na rugatinapai? Ya mo si gbua nga ani di regbo ka berãkurii pai, kidu na rugatinapai, na ki asadi ka rugatirani na agu apai nabipa ha dunduko? Agi apai re dunduko du ni wenehe ka si du nga ani naida ka manga wene diaberã, ono rugatinapai nakoda dungu apai.​—Rom. 12:3; 1 Pet. 4:7.

5. Tipagine duhe ti ni nga i abatikanga rani na ruru berã te?

⁵ Si naida ani ini gupai nga ani dunduko i abatikanga rani na ruru berã ya. Tipagine duhe ti ni wo? Mbiko ani dunduko i abatika rani kurogo ingapai, si du nga ndu gupai adunga ani ti ni ni rengberengbe rani ti kpotorani na berãrani yo ya. (Tam 51:5; Rom. 3:23) Kurigure, badungu rani nangia agu aboro Satana “akisi gayo aberã”; ani anaaberãnga pa ga Yekova ruru arugute te. (2 Kor. 4:4; Tito 3:3) Sidu, ka ani moi mbura gaani diaberã riipa gupai bi ani he ni ruruhe bangirani, gure nga ani nananga tirani ananga, ka ani vura berã aberã wai vuru kuriihe.​—Snz. 14:12.

6. Ginihe rengbe ka undo rani tipa ani du na ruru berã?

⁶ Wa vura duhe nga ani ni ruru rani te, gu Barani du ngbangbaturũ yo nga Yekova ko ni rengberengbe ko. (Pa Rug. 32:4) Ani na ngbarago nga ko ima mbakadapai tipa ka sarani ani du na rugatinapai. (Oni gedi 2 Timoteo 1:7.) Wangia ani aKristano, si naida ani berẽ wenengai tipa ka ruho ka mangapai ni ruruhe. Si naida ani wiriki wai ka ruga berãrani na kini wiriki wai du ga Yekova berãpai gbiati mangapai.

7, 8. Oni penga gu kpiapai nayugo wai rengbe boro ka manga ruru diaberã aboro ki vura ka sosoda ní vurũ?

⁷ Ani bingo gi kpiapai re. Agu aboro ni naaga kurogo gu kura aringara, sinoyo ningia kekeda agu agude i abatika ra fu agumeyo i ngerefuo ra tipa wa ka si mbugene fuyo i nigbata marã.a Dee sa naraka rogo kura ringara abatika kumbagude. Ti kina gu bangisa regbo re, ri atona ka wirika Ziazia Kekeapai na kini mangi sonakumbatayo. Anakureari gbiati agumeri asosodi ri nga ri kedi gu gude re fu avunguri kurogo gari ringara. Ono tie, wa ri aawirika Ziazia Kekeapai, ri aye ka inoho nga, gari sunge du nga ka ngerafuo gu gude re u sono. (Tam. 127:3; Ef. 6:4) Ya mo si aaida ri pekefuo gu sino naaru bangiri dungu aboro? Ya mo si aida ri mangi gupai ri awirikaha rogo Ziazia Kekeapai wa si avura du nga si nika mbu ambu furi ri raki rii wiri tooni marã na kura aboro nika bira ri tipa gupai mangi rihe re? Ka si angia mo nangia ri, ginipai ka mo amangihe?

⁸ Gi paranga dee re adu ni fudifudi berã riyo be gu sosodapai naye be akurari. Ri akpari fu Yekova na ki zungodi ko tipa ko undo ri. Ri afura fu gu wirina naayugo Ziazia Kekeapai furi na kura aboro rogo dungurati, na i ki undo ri tipa ri nibi apai wai Yekova abihe. Ri abihe a nga si ima rengba ka sa wiiri ka ko dunga wenengai ya ka si du nga ko nika sona zanga avunguko du patiko. Fuo ri wisigi gipai re ringbisihe kuti Ziazia Kekeapai, ri abihe nga rẽnga ha ri kedi wiiri fuo agume ri te. Ho kumbari abi gu undo awirina afuhe ni na wai si aundo wiriyo u du wenengai, ko atona ka wirika Ziazia Kekeapai na ki tona kaa ndu tipa adunguratise na diako.

9, 10. Du na ruru berã nga gine, na wai rengbe ani kadu na ni?

⁹ Gi kpiapai re nayugo gupai nga, anga ruru berã nga manga gupai ru bangirani watadu gu aboro abihe nga si ru na du ni taataha te. Gu berãpai na ngbaduse nga ga zangarengba du tirani, si wakina gu saa namangasunge ni ipo watadu gu namangasunge yee. Kangia ngbatunga saa wa gure ani amaaberã rani fuani tipa regbo, si ima rengba ka ingisa rani. (Yere. 17:9) Si naida ani rugu berãrani gbiati ngbaduraniyo ringbisihe kuti ga Mbori arugute.​—Oni gedi Yesaya 55:8, 9.

¹⁰ Wene ndupai kinaho Ziazia Kekeapai azungodi rani ti ni nga: “Mo kída kuti Yekova na kpotoroyo dunduko, ka mo nikídanga kuti gamo rugatinapai ya. Mo rá fuko rogo gamo apai dunduko, Ko arúga gamo apai foro nzunzu.” (Snz. 3:5, 6) Oni bi gupai si apehe nga “ka mo nikídanga kuti gamo rugatinapai ya.” Kura fugo berewe ngbefuoho nga “mo rá fuko [Yekova].” Ko du du na ndikidi ruru berã. Sidu, agu aregbo dunduko ani aida ka manga diaberã, si naida ani wisigi Ziazia Kekeapai tipa ka ino gu bipai du ko na ni tipa gupai ani nadiberã tipaha. Fuani, ani ki mangi gaani diaberã kutini. Gure nika sarani ani wiriki ga Yekova ruru berã.

ONI RABA GAONI BERÃPAI

11. Ginihe rengbe ka undo rani tipa ani mangi gu diaberã nga ga tatamana?

¹¹ Anga taatapai ngaha tipa ka manga gu diaberã nga ga tatamana na tipa gupai si aida ani mangihe te. Gipai re ima rengba kadu ni mbumbuhe gbe fu agu aboro ye ni vovo yó kurogo rengo watadu aguyo tona ka manga sona kumbatayo rogo toro yo. Ono tie, i rengbe arengba ka manga sonakumbatayo rogo toro yo. Oni makianga pai tipa wai tooni gude nawirika nduge zanga u ni titiwi kusande. Gupai u naamangaha nga ka tona dia nduru tooni tooni. Agu aboro du ni vovo yó rogo rengo, kina gu bangisapai re i amangaha tipa ka diaberã. Oni tingidi gupai nga Pauro afura tipa kuru aboro nga “aguyo rengbe gayo berã na wisiga pa wenepai na gbegberẽpai, mbiko manga yo pai na ni.” Agi afugo re nayugo gupai nga ome du si aida boro ni mangihe dedede, na wodu si aida ani mangihe.​—Oni gedi AEbere 5:13, 14.

12. Wai rengbe ani ka sonosa gu sino nga ga manga gu diaberã nga ga tatamana?

¹² A wa ani nifura tipaha mbata, aˈuru dunduko si ni idi ani mangi gu diaberã du ni toonihe watadu kikiihe. Ringbisihe kuti wisigopai sa, 40 rii kama nga ga agu adiaberã ani naamangaha naruriipa sinorani angianga rii wene berãpai ya. Ni kpiapai, awiso dunduko boro nadiaberã tipa ka sia gu ngbatunga roko ní aida ka voho. Ani rengbe ka bi gipai re wa tooni pai, na si nawira wa ani naamanga gipai re zanga berãkuriihe gbe ka si du nga ani naipiso tirani aipiso. Ono, ngbaha angba ka aberã singia gu roko ani avoho asa aboro i inihe nga ga Yekova amoyambu nga ani. (2 Kor. 6:3, 4) Ho mo angbe roko ni, mo rengbe ka berã kina pa ngbanyaha na gu ngbatungaha du ti dungu aboro ono zanga mo berẽ singia si ni wenehe tipa ro watadu marãha kuari. Tipa ani mangi ruru siapai rogo ngbatunga abangiriba wa gere, si naida ani raba gaani berãpai tipa si undo rani tipa ani mangi ruru diaberã rogo nyanyaki apai.​—Rk. 16:10; 1 Kor. 10:31.

ONI MANGI RURUPAI

13. Ginihe si aida ani mangihe tipa ka manga gu diaberã ani nadihe?

¹³ Ani ima rengbe ka manga gu diaberã du ni ruruhe, ono si ima mbu tipa ka mangipai kuti gu diaberã di anihe re. Ni kpiapai, si ima kpakara fu agu aboro naida ka mbu gundö mbiko pai ho nafõ yó i mangihe te. Gupai si aida i mangihe nga ka diaberã tipa gupai i aida ka mangaha. Ginihe tie rengbe ka undo rani tipa ani nye kuti gu diaberã mangi anihe tipa gupai ani aida ka mangaha? Ka ani kpari fu Yekova, ko undo rani aundo.​—Oni gedi AFiripoio 2:13.

14. Tipagine Pauro adu ti ni na ome tipa ka manga gupai si aida ko mangihe?

¹⁴ Gipai re aima manga Pauro. Ko aya: “Kpi nyemu he du na mi sa, ono manga gu pai ngba angba adunga ya.” Ko aima ino gupai si aida ko mangihe, ono ti kura aregbo, gu kurapai aniká aká na ko ti mangaha. Ko aya: “Bambiko rago nangba ti re na ga Mbori rugute ku kpotore yo. Ono mi bi kura rugute rogo apare yo, si nisovura na gu rugute du berãre yo, ki ye na mi nizizi boro kutii gu rugute nga ga ingapai du rogo apare yo.” Ya mo gene aadunga beko berewe te? Oó. Ko aya: “Mi natambua Mbori mbiko Yesu Kristo gaani Gbia.” (Rom. 7:18, 22-25) Ko akepai rogo gu kura ba nga: “Mi rengbe na manga apai dunduko rogo gu ko nanyakasa re.”​—Frp. 4:13.

15. Tipagine si aida ani diberã ti ni tipa ka manga gupai du ni ruruhe?

¹⁵ Nirengo, si naida ani mangipai amanga ka si du nga ani naida ka fu ngbarago fu Mbori. Oni tingidi afugo Eriya fu agu airisi Bara gbiati agu abasamungu naadu ri Bagangara Karumera yo naya: “Rago adu waĩ oni nidu na berãpai ue? Ka ngia Yekova nga Mbori, oni peke ko; ka si ngia Bara, oni peke kina ko.” (1 Aba. 18:21) AYisaraere aima ino gupai si aida i mangihe, ono i adu na “berãpai ue” zanga i diberã. Yosua aadunga tigako wo te. Mbata kusayo, ko aya fu yó wẽ: “Ka si angbanga bangironi ka manga pa Yekova ya, oni sía gu ni areme oni ka amanga pa ni; . . . ono mi ni tire na gimi aborokporo, ani amánga kina pa Yekova.” (Yos. 24:15) Ginipai namangi mbiko gi gako diaberã re? Yosua na agu aboro nazi tiyo kutiko aima gbia maku mbiko i aima rimo kurogo Ringara Mokido nangia “gu ringara du adu na mamuanya na nzeme anyege kpaima.”​—Yos. 5:6.

ONI MANGI RURU DIABERÃ NA KI GBIA MAKU

16, 17. Oni penga gu kpiapai nayugopa gu undo du ti manga gu diaberã nandu sa na gupai Mbori akpinyemuhe?

¹⁶ Oni bingo gi kpiapai re. Wirina aye kurogo rengo ni vovo ko na ki zi bapatiza, ko na diako na rukutu agude beyo biata. Rogo kura uru sa, gako badiasunge ape gupai fuko nga i mbu gu basunge i amangasunge rogoho re tipa ka ndu kurogo gu kuraha nika fu bakere marã fuyo. Gi wirinarani re aberẽkurii gipai re na ki kpari fu Mbori tipaha. Gi sunge afunga bakere marã fuko re ya, ko asiaha tipa ka du na regbo beko ti digido aposo tipa kaa ndu kuba adunguratise yo, tungusapai na kadu na regbo tipa gako aborokporo. Ko aberẽkurii gipai re na ki bi gupai nga ka ko ndu tipa gi sunge re, ko adunga na regbo beko tipa agi apai re te. Ginipai rengbe mo tigamo ka mangaha rogo gi bangiriba re?

¹⁷ Fuo gi wirina re berẽkurii agu aundo rengbe agu apai nga ga toro ka ye na ni fuko, ko ambupa gi sunge re. Ya mo mo nabihe nga ko abira tiko tipa gu diaberã re? Wagusa te. Ko bihe nga agu amaku ko nika gbiaha si ima kio kisusipa gu marã ka ko ni gbiaha. Rago angba tiyo ka bi gupai nga wiriyo du garãri bawe aya ri nakpinyemuyo ni bakerehe, awirina rogo dungurati, na Yekova. Ri aya ri naida ka kpara gari raka fu Yekova na ki zi bapatiza. Si nawira wa ri aima du na ngbarago tipa gu diaberã bari amangihe nga ka peresapa iriso Yekova mbata fu apai dũ.

18. Tipagine duhe ti ni ni nyanyakipa pai nga ani mangi gu diaberã du na tatamana na aˈuru dũ?

¹⁸ Yesu Kristo aima digo ni nungusi ndikidi airisi Yekova rogo gi ga Satana zegino re tipa dungu agarã kina wai Moize anungusi aYisaraere ngbakungbo yo. Ko napido ka gbarasa gi gbegberẽ zegino re tipa ka nungusa apefuoko kurogo gu vovo zegino nga ga rurupai kina wai Yosua anungusi aYisaraere kurogo ringara mokido. (2 Pet. 3:13) Sidu, anga awere nga gu regbo si aida ani karaga tirani kuti gu kuru sinorani watadu agu apai ani anaamangaha mbata kusayo te. Si nga gu regbo si aida ani wisigipai ka ino boro gupai Mbori aidaha berani. (Rom. 12:2; 2 Kor. 13:5) Si naida agu adiaberã ani amangaha na aˈuru dunduko yugu gupai nga ani nga agu aboro ima rẽ tipa nyenye unga.​—Oni gedi AEbere 10:38, 39.