Ya Mo Oni Ambupa Kura Gaoni Apai Tipa Kindo?

1. Gini ngbatunga apai aboro naambupa gayo apai tipaha, na tipagine?

ABORO nidu na nyemu ka mbupa kura gayo apai tipa agu apai nyakipaha bangiriyo. Avunguagude nadia regbo na awiriyo, na kini mangisunge na marã gbiati gu ome du yo na ni tipa ka undoyo. Agu aparanga aboro du na maabangirise tipa ka ora ato abaangira fu gayo ringara, i nadia bakere regbo tipa ka wirika ato nyanyaki baraho akurayo angi kina ambaro ni tigayo. Yesu ambupa kura gako apai tipa agu apai paha anyaki gbe bangiriko. Ko aagbatanga gene tipa ka raka fiõfiõ raka te, na ko aavunganga agude a te. Kuba gure, ko amoiberãko fuo agu apai nga ga Kindo. (Mt. 4:17; Rk. 9:58) Apefuoko aima mbupa kura dungu apai tipa ka songoda ga Mbori Kindo. Pa songoda yo agu apai nga ga Kindo angia gupai paha anyaki bangiriyo gbe. (Mt. 4:18-22; 19:27) Ani ima rengba ka sana tirani nga ‘Ginipai nyakipaha rogo gimi raka yo?’

2. (a) Gini nyanyakipa apai si aida aKristano dunduko mbupa kura gayo apai tipaha? (b) Gini kura apai duho kura aboro nambupa gayo apai ka mangaha?

² Kura nyanyakipa apai kinaho si aida ndikidi aKristano mbupa kura gayo apai ambu tipaha tipa ka nyakasa gayo pagume na Yekova na kini sonosihe. Agi apai re nakoda kpara regbo tipa kparakpee, geda Ziazia Kekeapai, gu irisombori nga ga aborokporo, ndu tipa adunguratise, na tungusapai.a (Yos. 1:8; Mt. 28:19, 20; Eb. 10:24, 25) Gu ome ani amangaha na gu maku Yekova afuhe, si nasa sunge tungusapai si nindu kina ku mbatayo, na dungu aboro na tiria kurii “gu bagangara nga ga Yekova bambu.” (Yes. 2:2) Dungu aboro ambupa kura gayo apai ka mangasunge Betere yo, dudua aBambu Kindo gbiati aba kikindigi adunguratise, mbakada agu apai du tipaha, watadu undo rogo agu aba gberango namangi rogoho. Anga agi asunge re tipa ka gbia nyenye unga te ono si tipa ka songoda pa Kindo.

3. (a) Gini undo ani agbiaha ho ani afu tirani ni tipa agu apai nga ga Kindo? (b) Gini asanahe si aida ani wisigihe?

³ Awere nga gu regbo si aida ani undo agu apai nga ga Kindo nyanyaki. Si ni pa ngbarago ka bi gupai nga dungu aboro nambupa kura gayo apai tipa ka mangasunge fu Yekova. (Oni gedi Atambuahe 54:6.) Ngbatunga gu toro re naye na bakere ngbarago furani wa ani apido ga Mbori Kindo. (Pa Rug. 16:15; Amo. 20:35) Ani dunduko si aida ani wisigi tirani wenengai. Ya mo agene ho rengbe ani ngbaha ka mbupa kura gaani apai tipa Kindo? Waigu ani amangasunge na gaani regbo, marã, ome gbiati gu birĩ du ani na ni? Ginipai si aida ani du na rubangirise tipaha? Ani wisigingo gu kpiapai rengbe ka sarani ani mangi agi apai re na kidu na bakere ngbarago.

MOTUMO TI RAGO AYISARAERE

4. Gini undo aYisaraere anaagbiaha ti fu amotumo?

⁴ AYisaraere anaafu motumo i nimbupai fuyo tigayo aingapai. Motumo anidu a na nyanyakipa ha tipa Yekova idi na gayo pai. Agu anidu kinaho ndiko anaaida boro fuhe, ono agu akuraha kina boro nitini anaaida ka fuhe. (Pa Mot. 23:37, 38) Si aniidi i fu zozo motumo a ni gamahe fu Yekova. Wene kpiapai tipa fu motumo amangi ti gu regbo i akpara yekaru na pumbo ti rago Soromo.​—2 Peka 7:4-6.

5. Gini mbakadapai Yekova amangihe tipa agu aboro naadunga na rengba beyo ya?

⁵ Yekova aima ino gupai nga aboro arengbanga kafu gamahe kina kubani sa te, na ko anaaida i fu kina guhe rengbe na omeyo. Ga Yekova ndiko adunga i kusuko kure anya kusende mbiko si angia “kirima gu wene apai nikaye” vurube Wiriko nga Yesu. (Eb. 10:1-4) Ono tie, agu andiko Yekova afuhe tipa motumo re aadunga ni gbegberẽhe te. Ni kpiapai, ko anaadia gu gamahe adia nga ga mbipo ka si du nga boro arengbanga kafu kandoro te. Zavura rungorungo boro, ní aima rengba kafu motumo fu Yekova na ngbarago. (Pa Mot. 1:3, 10, 14; 5:7) Wa vura duhe nga agu anya i afu ra ni motumo adu ni bakiakia, apai aduho ue si aaidaha be gu boro naafu motumo.

6. Ginipai si anaaidaha be gu boro nanaafu motumo, na tipagine si anaaida i nimangipai ti ni ringbisihe kuti andiko?

⁶ Bambata pai nga, si aniidi gu boro re fu kina boro gu wenehe. Yekova ape gupai fuyo nga si naida i fu kina gu nya du ni wene ru tipa ko ‘idi na pa ru.’ (Pa Mot. 22:18-20) Ko aarengbanga ka ida na gbarigbari nya te. Uehe nga, gu boro naafu gu motumo re du wa ka ní du ni gigiri ní zanga wiri biriko tiní. Kangia gu boro re ni bibiriko ní, si aniidi nifu motumo ingapai watadu motumo tiandika ka mbakada gani pagume na Yekova mbata fu ní fu motumo gamahe. (Pa Mot. 5:5, 6, 15) Gipai re angia nyanyakipa pai. Yekova ape gupai nga, ka bibiriko boro ri gu zozo motumo re, i duwa ka i imi ní kusayo. (Pa Mot. 7:20, 21) Ho gu boro naafu motumo anidu ni na wene pagume na Yekova na gani motumo kidu ni wenehe, ní anidu na bakere ngbarago.​—Oni gedi 1 Pekapai 29:9.

FU MOTUMO AREME

7, 8. (a) Gini ngbarago dungu aboro agbiaha mbiko mbuyo pa kura gayo apai tipa Kindo? (b) Gini ahe du berani rengbe ani ka fuhe fu Yekova?

⁷ Areme a, dungu aboro kinaho du na nyemu kafu tiyo tipa ga Yekova sunge, na ko nagbia bakere ngbarago beyo. Si ni pangbarago ka mangasunge tipa awirinarani. Wirina ninaaundo sunge meka aBambu Kindo na kini undo agu aboro du rogo agberango aya ko ainonga wai ka sakapa gu ngbarago boro agbiaha be manga ngbatunga gi sunge re te. Ko ape gupai nga, “Bi gu ngbarago na tambuahe du awirina na ni ho du yo ni rogo vovo Bambu Kindo watadu ho i agbia undo ni fuo gberango nasa boro nibi gu sunge ní amangaha na nyanyakipa ha.”

⁸ Ga Yekova riigbu aima digo nigbata agene tipa ka songoda ga Yekova sunge. Rogo gu garã nangia 1904, C. T. Russell akepai nga: ‘Si naida boro na boro bi tiní nga Gbia du sia ní tipa ní mangisunge na gani regbo, ome na marã tipa ka taasarimoko.’ Pai kinaho si aidaha berani tipa ani mbupa kura gaani apai ka gbia dungu amaku. (2 Sam. 24:21-24) Ya mo ani rengbe ka mangasunge ngba wene gene na agu ahe du berani?

9. Ginipai ani awirikaha rogo Ruka 10:2-4 nibi wai si aida ani mangisunge na gaani regbo?

⁹ Gaani regbo. Taata sunge ngaha ka sa gaani awaraga ku rogo kura afugo na ki ni kusihe, meka aba irisombori, aba kikindigi adunguratise, undo ti regbo gberango, na manga kura apai te mbiko kina bete asaa du berani rogo uru sa. Yesu amoi wene kpiapai rengbe ka undo rani. Ho ko akedi gako abawiriki ni ku gene tungusapai yo, ko aya fuyo wẽ ka i “poi nga kuti boro gene ya.” (Rk. 10:2-4) Tipagine Yesu ape gipai re ti ni? ‘Ti rago Yesu, aboro anaafunga sene wa gu duhe areme nga ka taa kina be fu boro sa te, ono i anaadungo tiyo bara dunguhe na kini kuku sande. Agi apai re anaadia bakere regbo.’ Yesu aangarasanga apefuoko i zingi kuti aboro te. Ono gupai ko aaida ka undoyo i inihe nga i na kina bete regbo gbua beyo si aida i mangisunge na ni wenengai. (Ef. 5:16) Ya mo ani rengbe ka mangapai kuti gi rugute re tipa kadu na regbo berani ka manga gu sunge nga ga Kindo?

10, 11. (a) Gini bete agene i amangasunge ngbaha na agu agamahe ani naafuhe? (b) Wai rengbe gupai du rogo 1 AKorindo 16:1, 2 ka undo rani?

¹⁰ Gaani marã. Si naida marã aida ni bakerehe tipa ka undo gu sunge nga ga Kindo. Agarã dunduko i amangasunge na amirioni dorari tipa kaa ngerafuo agu ababiapai ninaata ata, kparakpara abazakigene, na amokedi. Natona rogo 1999, i ima meka aBambu Kindo niima susa 24,500 rogo agu aringara du nazingo. Ono tie, agu kindi koyo nga 6,400 si aida i duduaha. Rogo adiwi dunduko i akusa Ngbaõbambu Sinziri na Awake! nga amirioni 100. Agi apai re dunduko namanga mbiko gaoni agamahe.

¹¹ Gu mokedi nangia Pauro ape gupai si aida boro mangihe tipa kafu gamahe. (Oni gedi 1 AKorindo 16:1, 2.) Ga Mbori toro adu kugii ko ko ngarasi agu awirina naadu Korinda ka i pidingo kina digido poso tipa kafu kina gu yangada he du beyo ya, ono si aaida i kparahe ti tonatona poso ringbisihe kuti omeyo. A wa si adu rogo bambata sa kama agarã, awirina naambakada tiyo mbu regbo koyo tipa ka fu gamahe ringbisihe kuti omeyo. (Rk. 21:1-4; Amo. 4:32-35) Yekova nabi gu toro nga ga gamahe re na kikiipaha.

12, 13. Ginipai rengbe kura aboro ka bakabangiriyo na ni tipa gu birĩ na ome du yo na ni, ono wai Yekova nika undo yo?

¹² Gaani ome gbiati birĩ. Yekova naundo rani aundo ho ani amangisunge ni na gu ome gbiati gu birĩ du tirani tipa agu apai nga ga Kindo. Ko nakido rani nga ko nika undo rani aundo ka omerani bati. (Yes. 40:29-31) Ya mo ani nabi tirani nga gaani birĩ tooni? Ya mo ani nabi tirani nga gu kura aboro inipai kisusi rani? Ani tingidi gupai nga, Yekova ima rengba ka kiiso gaani birĩ inohe kina wai ko amangihe tipa Besarere na Oriaba.​—Gate 31:1-6; oni bi tonatona sura.

¹³ Yekova nangarasa rani ani fu kina guhe ngbaangba gbe fuko. (Snz. 3:27) Ti regbo bungia yekaru, Yekova aya fu agu aYudo naadu Yerusarema yo wẽ i berẽkurii gupai i amangaha tipa me yekaru. (Agai 1:2-5) I adu ni fudifudiyo na ka i amaanga berãyo fuo sunge ya. Si naida ani wisigi tirani singia agu apai nyakipaha bangirani kinaha nyakipaha bangiri Yekova. Ya mo oni rengbe ka ‘berãpa gaoni apai’ tipa ka manga bakere sunge rogo gi yangara arame re?

GAMAHE RINGBISIHE KUTI OME RANI

14, 15. (a) Gini ngarasaro ani agbiaha ti gu kpiapai nga ga agu awirina adunga na aũkumuko beyo ya? (b) Ginipai si aida ani du na nyemu ka mangaha?

¹⁴ Dungu aboro naraka rogo agu arago du na bakere rungo. Gaani riigbu namanga ome tipa ka “gama ahe” tipa agu azingo nga ga agu awirina du rogo agu aringara re. (2 Kor. 8:14) Ono tie, agu awirina adunga na gene beyo ya, i nabipa gamahe na nyanyakipa ha a. Yekova na ngbarago ka bi gu rungorungo awirina re i nifuhe fuko esuesu.​—2 Kor. 9:7.

¹⁵ Rogo kura rungorungo ringara sa vuru Afirika, kura awirina akpara papara gayo ati tipa ka baga agu ahe nakuru yo ka undo agu apai nga ga Kindo na ni. Riigbu amangi mbakadapai tipa ka meka aBambu Kindo rogo gu ringara re. Agu awirina du yo ki bihe nga si naida i undo. Ono tie, si adu nga gu sunge re nika tona ti regbo rũ ahe. Wa si avura duwo, i adiberã nga i nikaa undo sunge me Bambu Kindo wiso na ki ni ndu nyemu kaa rũ gayo ahe. Nairiwo gu toro nga ga futise i adu na ni re! Gipai re natingida rani na pa agu awirina naadu rogo bambata sa kama agarã Makedonia yo. Wa i avura du rogo “bakere rungo,” i asanahe tipa ka undo awirinayo na marã. (2 Kor. 8:1-4) Ani ni basasa ‘gamunga he agama a wa rengbe omerani na ni, kina ku sangba gu maku nga ga Yekova gaani Mbori nga gu fu ko furani.’​—Oni gedi Pa Fu Rugute ni Ue he 16:17.

16. Wai rengbe ani ka ino singia Yekova naida aida na gaani amotumo?

¹⁶ Ono tie, si naida ani du na rubangirise. A wa si adu tipa aYisaraere, si naida ani mangi ome tipa Mbori idi na gaani motumo gamahe. Ginipai rengbe ka sako ko káha? Si aidanga ani mbu gu nyanyakipa sunge du berani nga ka ngerafuo gaani aborokporo gbiati iriso Yekova te. ‘Si aidanga’ ani mbu ngerafuo gaani aborokporo rogo toro yo na rogo borose yo, mbiko ani fu tirani tipa ga Mbori sunge te. Gure du wa ka i ya ani nagama guhe adunga berani ya. (Oni gedi 2 AKorindo 8:12.) Kurigure, si naida ani du nyanyaki rogo toro yo. (1 Kor. 9:26, 27) Ani du na gu maabangirise nga, ka ani araka ringbisihe kuti agu arugute nga ga Ziazia Kekeapai, gaani amotumo nika ye na ngbarago furani na ‘Mbori aidapaha’ aida.

GAANI AMOTUMO NA KIKIPAHA

17, 18. Gaani bipai nga ginihe tipa agu awirina nambupa kura gayo apai tipa Kindo, na ginipai si aida ani dunduko wisigihe?

¹⁷ Dungu awirina ‘nafú tiyo zaaza’ tipa ka songoda agu asunge nga ga Kindo. (Tam. 110:3) Ani na ngbarago tipa ka bi agu aboro du na ngbatunga gu sino re tiyo. Ani natambua agu adee na agude nga aguyo nambu regbo fu gayo abariikporo i ningbembatayo rogo agu pai nga ga Kindo.

¹⁸ Si naida na nyanyaki asadatise tipa ka songoda agu apai nga ga Kindo. Ani dunduko kparingo fu Mbori na ki wisigi wai rengbe ani ka kiiso gaani sunge. Oni rengbe kadu na kido nga dungu amaku kinaho ani agbiaha awere na gu bakerehe ni kadu “rogo gu ngbi nikadu yo.”​—Mk. 10:28-30.