AGU ASANAHE ZIAZIA KEKEAPAI AKARAGAPAI KUTINI
Ginipai Yesu nika mangaha ku mbatayo?
Rogo gu garã nangia 33 Fuo Batika Kristo, Yesu akpi na ki zingi be kpio na ki ga ku ngbangbaturũ yo. Fuo dungu agarã kusa, Mbori afu pagbia fuko tipa ko zogarago ni Bakindo. (Daniere 7:13, 14) Barambeda ku mbatayo, ko nika mangapai na gu pagbia du ko na ni re tipa ka ye na zereda ku rogo zegino na ki di arungo kusayo.—Oni gedi Atambuahe 72:7, 8, 13.
Yesu na roko beko yo si ki du wa ko naida ka wega zegino na ni
Yesu nika manga dungu iiriwoapai ho ko nika zoga aboro ni. Ko nika mangasunge na gu ome Bako nafuhe fuko tipa ka dia ingapai ti aboro kusayo. I nika gbia ngbarago auru kpotosende zanga gbinza na kpio.—Oni gedi Yoane 5:26-29; 1 AKorindo 15:25, 26.
Ginipai Yesu amangaha awere?
Ko naruga gu sunge tungusapai ndikidi apefuoko amangaha rogo zegino dunduko. I nandu fuo aboro tipa ka yugo gupai Ziazia Kekeapai apehe tipa ga Mbori kindo. Yesu aya ko nika songoda gu sunge gako abawiriki amangaha daho ga Mbori Kindo ka nyasa ni riipa ga aboro zogarago kusayo.—Oni gedi Matayo 24:14; 28:19, 20.
Yesu nangbembatayo fu aboro ku rogo wene gene nga ga raka vurube gu dungurati nga ga ndikidi aKristano. Ko nikaa ndu ku mbatayo kindi na manga gipai re daho i nika gbarasa gi zegino re ni na ki ye na ga Mbori vovo zegino kubaha.—Oni gedi 2 Petero 3:7, 13; Yugoti 7:17.