Ya Mo Mbori Naberãpa Ro?

Ya mo si aruaru fu Davide ko nimoi bangiriko nga Mbori nika berãpa ko aberã? Ya mo Mbori naberãpa ro? Si ima kpakara fu dungu aboro i idi kuti gupai nga gu Mbori Du na Tanduapai Dũ naberãpa yo aberã. Tipagine?

Si wo mbiko gupai nga Mbori nga gu boro niima du na pani kuari kisusi ga aboro dunduko. A wa du ko ngbangbaturũ yo, rikaaboro dunduko “wa kina gu he natoga akoro yo, i gedi yo wa kina gu nvutu nye ri ũringbisahe yo.” (Yesaya 40:15) Gu kura ba-bisira agu apai nga ga apambori sa aya, “si ni bakerepa rukö boro idi kuti gupai nga Mbori kina ti ni naberãpa aboro aberã na kini idi ka undo yo.”

Ono tipa kura aboro tigayo, i nabihe nga gayo mangapai nasa gupai nga ka Mbori berẽnga payo ya. Ni kpiapai, kumba sa nga Jim aya: “Wo mi naakpara dedede tipa zereda na zatise, ono fuoho naaturongo te mi ki su na paya. Ni yangaraha, mi nabi tire nga gimi rungbura ima kio si du Mbori arengbanga ti ni ka undo re ya.”

Ya mo Mbori ima turo ti aboro si du ko aberãnga parani ti ni ya? Ko nabi rani wai nga aboro du na ingapai tirani? Ka Mbori naayugonga patiko furani ya, boro ho ka rengbe ka fura tipa Mbori na kini karagapai tipa agu apai du tipa ko te. Ono tie, Fugoko nga Ziazia Kekeapai nakido rani nga ko nga gu Mbori aturongo ti aboro ya na ko naberãpayo aberã. Ziazia Kekeapai naya: “Ko aturã nga na ani wa sa te.” (Amokedi 17:27) Rogo gu kekeapai du biama re, ani nika wisigopai tipa gupai Mbori apehe furani tipa wai ko aberãpa aboro na gu gene ko amanga gipai re ngbaha fu aboro wa mo were.