Oni Mangisunge na Fugo Mbori—Si ni Ungaha!

“Gu pai nga ga Mbori du na unga, ki du na tandu.”—EB. 4:12.

1, 2. Gini sunge Yekova afuhe fu Moize, na gini kido ko afuhe fuko?

MO BERẼNGA gupai nga mo gu ru barangba nyanyaki bakindo auru kpotosende ane ka fura kuba ga Yekova aboro. Si nawira wa mo duadu na gunde, bakabangirise, na kini bi tiro nga mo arẽnga te. Wai rengbe mo ka mbakadatiro tipa ka pe gupai mo andu ka gumbaha? Ginipai rengbe mo ka mangaha tipa fugoro du na ome rogoyo wa mo andu ka fura kuba gu Mbori du na tanduapai dũ?

² Gere nga gupai naadu tipa Moize. Yekova aima ya fuko wẽ, ko nga “bayee boro ni rengo, ki susi agu aboro nadu ri kpotosende dunduko,” na Mbori akedi ko fuo Faro ko ndu ka kusa gako aboro Ezipeta yo be rungosi na sunge kanga. (Geda 12:3) A wa agu apai namangi ayugoho, Faro azanga irisa na kingia irarukö. (Gate 5:1, 2) Ono wa si avura du wo, Yekova aida Moize fura fu Faro tipa ko mbu gu dungu amirioni aboro nangia gako akanga i guari rogo gako ringara. Si aruaru tie Moize sana Yekova nga: “Da nga mi, ka ndu koyo du Faro ni, ka kusa awiri aYisaraere Ezipeta yo?” Si nawira wa Moize aabi tiko nga ko arẽnga te. Ono Mbori akidoko nga ko adunga ni sa ko te. “Mi adu na mo ni rengo.”—Gate 3:9-12.

3, 4. (a) Ginipai Moize aagunde behe? (b) Ngba gini gene rengbe apai kadu tipa rani wakina gu naadu tipa Moize?

³ Tipagine Moize aagunde ti ni? Si ziazia nga, ko aagunde nga Faro adianga gu boro Yekova nakedi ni kugume watadu ka degatuko funi te. Ko aagunde berewe a nga aYisaraere aidanga kuti gupai nga Yekova du kedi ko ko ye ka kusayo Ezipeta yo te. Si du Moize aya ti ni fu Yekova wẽ: “Ono, mo ngére i aída nga pare te, i adéga nga tuyo sa sangbare a te, bambiko i ayá, ‘Yekova ayugo nga ti ko foro te.’”—Gate 3:15-18; 4:1.

⁴ Gu karagapai Yekova afuhe fu Moize na agu apai namangi nayugo nyanyakipai furani areme. Rengo ngaha nga, si nawira wa he ho rengbe ka saro mo ru barabangiri kikindigi abazogo areme te. Ono ya mo si nidu foro ni kpakarapai ka fura tipa Mbori na gako Kindo fu kura aboro? Ka si du wo, ani bingo gupai rengbe ani ka wirikaha ti gupai namangi Moize.

“GINE NGA GU DU BE RO?”

5. Ginihe Yekova amoihe ku bee Moize, na wai si adi gunde tiko kusayo? (Oni bi gu sura du ti tonatonaha.)

⁵ Ho Moize ape gupai ni nga aYisaraere adeganga tuyo kuti gupai ko nika gumbaha te, Mbori ambakadi ko tipa gupai naadu ku mbatayo. Gu pangbanga du ni kekehe rogo Gate naya: “Yekova ki ya fu [Moize], ‘Gine nga gu du be ro?’ Ko ki ya, ‘Ngbondo du.’ Ko ki ya, ‘Mo bá ha ku sande.’ Mose ki baha ku sande, si ki sa tihe ni wo; Mose ki oro be ru. Ono Yekova ki ya fu Mose, ‘Mo táĩ bero, ki zadi ru ti saru’ si du ko ki táĩ beko, ki zadi ru, u ki sa tiru ni ngbondo ku beko yo ‘Ya i íni he ya Yekova . . . nayugu tiko foro.’” (Gate 4:2-5) Mbori amoi guhe ku be Moize narengbe ka yugo gupai nga gu pangbanga re aye be Yekova. Guhe aboro abihe nga kungbo ngbondo aye kada ni ungaha mbiko gu ome nga ga Mbori. Gu iriwopai re aima du na ome kugii gupai Moize apehe, na si aayugo gupai nga Yekova du naaundo ko. Si du Yekova aya ti ni fuko wẽ: “Mo anidí gi ngbondo re ku be ro, mo ki nimangi yuguyugupai na ni.” (Gate 4:17) Ni du Moize na gu goapai nayugopa ga Mbori pagbia beko, ko aima rengba ka ndu ka ru kuba Mbori barabangiri gako aboro na barabangiri Faro a.—Gate 4:29-31; 7:8-13.

6. (a) Ginihe si aida si du berani ho ani atungusapai ni, na tipagine? (b) Oni sakingo pa wai du ‘gupai nga ga Mbori ni ungaha’ na “ki du na tandu” ti ni.

⁶ Ho ani andu ni ka tungusapai fu kura aboro, i ima rengba ka sana rani na kina gu bangisa sanahe re nga: “Gine nga gu du be ro?” Dedede guhe nidu berani nga Ziazia Kekeapai tipa ka mangasunge na ni. Wa vura duhe nga gu kura aboro nabi Ziazia Kekeapai wakina kungbo buku gbua, Yekova nafura furani rogo Fugoko gako toro adu kugiipa kehe. (2 Pet. 1:21) Si na ga Mbori akidohe rogoho tipa agu apai nika manga tii gako zogarago rogo gako Kindo. Si nga ndu gupai gu mokedi nangia Pauro ake gupai ti ni nga: “Gu pai nga ga Mbori du na unga, ki du na tandu.” (Oni gedi AEbere 4:12.) Agu akidohe nga ga Yekova na nyanyakipa ha bambiko ko namangapai amanga ka digisoho. (Yes. 46:10; 55:11) Ho boro aino gipai ni re tipa Fugo Yekova, gupai ni agedaha rogo Ziazia Kekeapai ima rengba kadu na bakere ome kurii gani raka.

7. Wai rengbe ani ka ‘yugo rengo nzunzu’?

⁷ Nirengo, Yekova ima maa Fugoko ku berani na ani rengbe ka yugoho fu kura aboro nga gaani pangbanga na nyanyakipa ha na si naye beko. Si airiwongo te ka bi gupai nga fuo Pauro ke waraga fu agu awirina naadu Ebere yo, ko azungadi Timoteo nangia gu boro naapekafuo gako kpiapai ko ‘ké na mbakada pa tiko niyugu rengo nzunzu.’ (2 Tim. 2:15) Wai rengbe ani ka mangapai kuti ga Pauro rugute? Ani rengbe ka mangaha ni geda ani agu averesi rengbe ka zio ngbadu agu aboro yo nadegatuyo furani na fugo rani kuari. Agu atrakte naakuru rogo 2013 naundo rani tipa ani mangi gipai re.

ONI GEDI SIASIA AVERESI!

8. Ginipai gu kura babiapai sa agumbaha tipa atrakte?

⁸ I mbakadi gu vovo atrakte re kina kubani sa. Ka ani ini mangasunge na gu sa, gure nga ani ima ino mangasunge na ni dunduko. Ya mo si ni taatapai ka mangasunge na ni? Gu kura babiapai sa du rogo gu gbata nga Hawaii, Amerika yo aya: “Ani aainongo wai gi vovo ũsunge re nika ngba gene tungusapai yo kporo na kporo na bangiri agene te.” Ko bi gupai nga gu gene i na keke agu atrakte re ngbaha nasa aboro i karagapai nibasa, na gipai re naye na wene sakapai na aboro. Ko nabihe nga si wo mbiko gu sanahe duti kpotoho gbiati agu akaragapai kina boro asiaha nisani. Irakporo abakanga bangirini nga ni nikafu gu karagapai du ni irairaha te.

9, 10. (a) Wai gaani atrakte asa rani ani mangisunge na Ziazia Kekeapai? (b) Gini trakte ngba mangasunge na ni gbe tiro gene tungusapai yo, na tipagine?

⁹ Agu atrakte re nasarani ani gedi wene siasia averesi. Ni kpiapai, oni bingo gu trakte nga Ya Mo Rungo Atingidi Nyasi? Ka irakporo vura sia gu karagapai nga ‘si anyasa anyasa,’ ‘si anyasanga te,’ watadu ‘ni ainongo gu nika manga te’ ni karagapai kuti gu sanahe re, oni ndu nibasa ku vuruhe yo zanga pe gu kura pai, oni ki ya, “Gere nga gupai Ziazia Kekeapai agumbaha.” Na fuo gure, oni ki gedi Yugoti 21:3, 4.

¹⁰ Wakina gure a, gu regbo oni amangasunge na gu trakte nga Mo Nabi Ziazia Kekeapai Wai? si aidanga oni bakibangironi na gu karaga irakporo nika siaha dagba agu du biata re te. Oni ndu ku vuru gu trakte re yo ki ya, “Ziazia Kekeapai naya ‘Ziazia Kekeapai dunduko si aye be ga Mbori Toro.’” Oni ima rengba ka gbia kurapai kutini nga, “Nirengo, gu veresi re nafura tipa kura dungu apai.” Oni ki zaki gaoni Ziazia Kekeapai, ki gedi 2 Timoteo 3:16, 17.

11, 12. (a) Gini ngbarago oni agbiaha gene tungusapai yo? (b) Wai rengbe atrakte ka undo roni oni mbakadi tironi tipa karagatise berewe?

¹¹ Gu gene irakporo nika fura na oni ngbaha nika undo roni oni ini bakio gupai si aida oni gedihe na ki sakipai tipaha. Kupati gu ngbarago oni agbiaha ti kparaka atrakte fu aboro, oni nadu a na ngbarago mbiko geda oni Fugo Mbori fuyo ka si vura du nga oni gedi veresi sa watadu ue fuyo ti gu bambata regbo oni na gbia yo. Oni ima rengba ka ndu na gaoni sakapai ku mbatayo berewe ti kura regbo.

¹² Sanahe gu du gii kpoto agu trakte re tii gu riipai nga “Mo Berẽnga Kurii Gipai Re” na agu averesi rengbe oni ka sakaha ho oni nika karaga tironi ni berewe. Rogo gu trakte nga Mo Nabi Raka Kumbatayo Wai? gu sanahe du tipa karagatise berewe nga: “Waidu Mbori nika sa zegino nibawenehe?” Na i ke Matayo 6:9, 10 na Daniere 2:44 tiihe. Tipa gu trakte nga Ya mo Agu Aboro Naima Kpi Araka Berewe? gu sanahe du tipaha nga “Tipagine ani agbinza ti ni na kini kpiki?” I ke Bambata Pai 3:17-19 na ARomo 5:12 tiihe.

13. Oni sakingo wai rengbe oni ka mangasunge na atrakte ka tona wisigo Ziazia Kekeapai na aboro.

¹³ Oni mangisunge na atrakte tipa ka tona wisigo Ziazia Kekeapai na aboro. He gudu ti kpoto gu trakte re ka boro moi gu masini ti ni nagedaha si nazaka gaani bangiriba nga ga Internet rengbe ka ngarasa ni ní tona wisigo Ziazia Kekeapai. Agu atrakte re nafura a tipa gu burosua nga Gu Wene Pangbanga Naye be Mbori na kini yugu riipai rogoho rengbe gu boro re ka inopai tipaha. Ni kpiapai, gu trakte nga Da Nzunzu Nazoga gi Zegino Re? nayugo bara 5 wirikapai rogo gu burosua re. Gu nga Gine Rengbe ka sa Ramukporo si du na Ngbarago? nayugo bara 9 wirikapai. Ka oni mangisunge na agu atrakte re wai si aida i mangisunge na ni, si nika undo roni oni ini mangasunge na Ziazia Kekeapai ti gu bambata regbo gbia oni boro na ho oni akaraga tironi ni ka bi ni berewe. Kurigure, si ima rengba ka undo roni oni tona wisigo Ziazia Kekeapai na dungu aboro. Gini kurapai rengbe oni ka mangaha tipa ka mangasunge wenengai na Fugo Mbori gene tungusapai yo?

ONI SAKIPAI NA ABORO TIPA AGU APAI NAFUDA YO BERÃYO YO

14, 15. Wai rengbe oni ka wirika ga Pauro bipai gene tungusapai yo?

¹⁴ Pauro adu na nyemu ka tungusapai ‘fu dungu aboro.’ (Oni gedi 1 AKorindo 9:19-23.) Oni tingidi gupai nga Pauro aaida ka ‘zungadi aYudo nga aguyo naadu tii rugute, aguyo nazanga rugute na aguyo naadu ni rurungbura yo.’ Nirengo, ko aaida ‘kadu ni apai dunduko fu aboro dunduko, singia ka ko batasi aguyo.’ (Amo. 20:21) Wai rengbe ani ka wirika ga Pauro bipai ti gu regbo ani ambakada tirani tipa ka yugo rengo “fu aboro dunduko” rogo gaani dagbarago?—1 Tim. 2:3, 4.

¹⁵ Rogo adiwi nibasa, Gaani Sunge Nga ga Kindo naye na agu aberãpai du tipa wai ka tona wisigopai na aboro gene tungusapai yo. Oni asadihe. Ono ka si du nga gu kura apai kinaho nafuda aboro rogo gaoni dagbarago, oni sana yo na agu asanahe rengbe ka ba nyemupai tiyo wa ka oni fura na yo riipa agu apai nafuda yo. Oni berẽnga pa gu rago oni asungo rogoho, agu aboro naraka yo, na agu apai nabi yo. Na oni berẽpa gu veresi nafura tipa gayo apai. Kura babi adungurati sa afura tipa wai ko na diako naamangasunge na Ziazia Kekeapai ki ya: “Dungu aboro naida ani gedi veresi sa ka si du nga ani nika fura ni wiri guruhe na ki pe gupai ani aida ka fura tipaha. Fuo fu ani sene na gaani Ziazia Kekeapai berani ni zakizakihe, ani nageda veresi.” Ani wisigingo bete akpiapai tipa agu riiapai, asanahe, gbiati agu averesi rengbe ani ka mangasunge na ni rogo gaani dagbarago.

16. Oni sakingo wai rengbe oni ka mangasunge na Yesaya 14:7 gene tungusapai yo.

¹⁶ Kangia mo naraka rogo gu rago adunga zereda rogoho ya, mo ima rengba ka sana boro nga: “Ya mo mo aberẽnga gupai nga uru adu kinaho aboro nika ya: ‘Akpakarapai ima nyasa rogo zegino, na aboro kini bi bia ngbarago’? Gere nga gupai Ziazia Kekeapai agumbaha rogo Yesaya 14:7. Nirengo, Ziazia Kekeapai na dungu akidohe rogoho nga ga zereda ni kadu ku mbatayo.” Oni ki gedi veresi sa dagba agu averesi nafura tipa agu akidohe du rogo Ziazia Kekeapai yo.

17. Wai rengbe oni ka sakapai tipa Matayo 5:3 ho oni afura ni na boro gene tungusapai yo?

¹⁷ Ya mo si ni kpakarapai fu akumba rogo gaoni dagbarago tipa i gbia sunge ka ngerafuo gayo aborokporo? Ka si du wo, oni ima rengba ka tona fugo na gu sanahe nga: “Bakio marã wai si aida kumba gbiaha tipa ka sa gako aborokporo i du na ngbarago?” Fuo karaga ni pai, oni rengbe ka ya: “Dungu akumba nagbia marã susi gure, ono gayo aborokporo na ngbarago te. Ginipai nzunzu si aida i mangihe?” Fuo gure, oni ki gedi Matayo 5:3 na ki sana ni singia ni naida ka wisigo Ziazia Kekeapai.

18. Wai rengbe ani ka mangasunge na Yeremaya 29:11 ka fu wasa fu aboro?

¹⁸ Ya mo gberango mangi rogo gaoni dagbarago barambeda? Oni ima rengba ka tona fugo na gupai nga: “Mi niye ku kpuro ane ka fu wiri wasa foro. (Oni gedi Yeremaya 29:11.) Ya mo mo bi agu apai ue Mbori aidaha tipa rani? ‘Zereda’ na ‘maabangirise.’ Ya mo si ni wenepai ka ino gupai nga ko naida ani raki wene raka te? Ono wai rengbe gipai re ka manga?” Fuo gure tie, oni ki gbe berãni ku rogo wirikapai sa rogo gu burosua nga Wene Pangbanga.

19. Oni sakingo wai rengbe oni ka mangasunge na Yugoti 14:6, 7 ka fura na aboropambori.

¹⁹ Ya mo oni naraka rogo gu dagbarago du aboro na nyemu pambori? Ka si du wo, oni ima rengba ka tona fugo na gu sanahe nga: “Ya mo ka maraika fura foro mo rengbe ka degeturo ka gia gupai ni agumbaha? (Oni gedi Yugoti 14:6, 7.) Wa duhe nga gu maraika re naya ‘oni gúnde ti Mbori,’ ya mo si ni nyanyakipa pai tipa ka ino gu Mbori ni afura tipa ni te? Gu maraika re ima yugo gini ngbatunga Mbori du mbiko ko naya ‘gu ko naamangi ngbangbaturũ na kpotosende.’ Da du naadu?” Oni gedi Atambuahe 124:8, naya: “Gaani undahe du ti rimo Yekova, nga gu ko nafu ngbangbaturũ na kpotosende.” Fuo gure, oni pe gupai nga oni ima rengba ka saka kura apai funi tipa Yekova Mbori.

20. (a) Ngba gini gene rengbe ani ka mangasunge na Asanza 30:4 ka yugo rimo Mbori fu aboro? (b) Ya mo veresi ho bi oni he nga mangasunge na ni naye na wene sangbanaha?

²⁰ Oni ima rengba ka tona fugo na paranga boro niya: “Mi na kpinyemu ka geda veresi foro du na nyanyakipa sanahe rogoho. (Oni gedi Asanza 30:4.) Boro ho rẽ na gupai gu veresi apehe te, si na fura tipa Bakusirani. Wai rengbe ani ka ino rimoko? Mi adu na ngbarago ka yugo gu rimo re foro rogo Ziazia Kekeapai yo.”

FUGO MBORI DU NA OME KURII GAONI TUNGUSAPAI

21, 22. (a) Wai wene siasia averesi narengbe ka aria ga boro raka? (b) Ginipai oni nadiberã ka mangaha wa oni amanga sunge tungusapai?

²¹ Oni ainongo wai aboro nika karagapai kuti siasia averesi te. Ni kpiapai, awirina ue Australia yo angoka ga paranga dee ngbadimo. Gu kura ko sa asana ri ki ya, “Ya mo mo ini rimo Mbori?” na ko ki gedi Atambuahe 83:18. Ri aya, “Kina iriworago nati tire. Fuo ga yo, mi andu nunguro nga amairo 35 ku rogo ba abuku tipa ka gbata gu rimo re rogo kura aZiazia Kekeapai na ka gbataha rogo buku sakarogo afugoyo. Fuo bi mi gupai nga rimo Mbori nga Yekova mi aabaka bangire nga gini kurapai mi ainongoho ya.” Ngbutuko fuo gure ri na kumbari atona wisigo Ziazia Kekeapai na kusa i ki zi bapatiza.

²² Fugo Mbori naˈaria gu raka nga ga agu aboro na gedaha na kini sonosi idapase kuti ga Yekova akidohe. (Oni gedi 1 ATesaroniko 2:13.) Gu pangbanga nga ga Ziazia Kekeapai ima du na ome ti ni kisusi agu apai dunduko rengbe ani ka pehe si zi ngbadu boro yo. Si du nga ndu gupai si aida ani mangisunge ti ni na Fugo Mbori ho du momu ni berani. Si ni ungaha!