Vovo Atrakte!
1. Gini kura aũsunge tungusapai i nambakadihe ngba vovo gene?
1 I akusi vovo atrakte bisue ti regbo gu Bakere Dunguratise Nga ga Aˈuru Biata nga ga 2013, riihe adu nga “Ga Mbori Pai Nga Rengo!” Kurigure, Gu Pangbanga Nga ga Kindo nga Na. 38 du riihe nga “Ya Mo Agu Aboro Naima Kpi Araka Berewe?” i ima kodaha kuti agu atrakte re. Agi atrakte re dunduko i mbakadihe ngba kura vovo gene kia. Tipagine i nambakadihe ti ni ngba vovo gene? Ho ani amangasunge ni na ni ho ani atungusapai ni kporo na kporo, waigu rengbe ani ka mangasunge na gu vovo apaparaha re?
2. Tipagine i nambakadi gi vovo atrakte re ti ni ngba vovo gene?
2 Tipagine I Nambakadihe ti ni Ngba Vovo Gene?: Wene tungusapai kporo na kporo nakoda agi apai biama du kusende re: (1) Sanahe tipa ga boro bipai tipa ka tona fugodagbase. (2) Sakapai tipa veresi. (3) Fu waraga fu irakporo tipa ni gedihe. (4) Sana gu sanahe mo nika ye ka karagapai kuti ni ti kura regbo, na manga mbakadapai tipa ka karagatise. Gu gene i nambakadi gi vovo atrakte re ngbaha, si nasaha taata furani tipa ani mangi agi apai biama re.
3. Wai rengbe ani ka fu gu vovo atrakte re gene tungusapai yo?
3 Wai ka Mangasunge Na Ni: (1) Fuo fu mo sene fu irakporo, mo yugu agu asanahe du ti kpotoho fu irakporo na ki sana ni tipa gani bipai. (2) Mo zaki vuru gu trakte re na ki saki “Gupai Ziazia Kekeapai Apehe” na ni. Ka gene du mo gedi agu averesi re kina boro rogo Ziazia Kekeapai. Ka regbo du beni, mo saki “Gupai Rengbe ka Manga Foro ka Mo Idi Kuti Gupai Re” na ni. (3) Mo fu gu trakte re funi, na ki ngarasi ni tipa ni gedihe dunduko ti gani regbo. (4) Mbata fu mo ndu, mo yugu gu sanahe funi du giihe yo tii gu riipai nga “Mo Berẽnga Kurii Gipai Re” na ki mangi mbakadapai tipa ka sakapai tipa agu akaragapai Ziazia Kekeapai afuhe kuti agu asanahe re.
4. Wai rengbe ani ka mangasunge na gu vovo atrakte re ho ani akaraga tirani ni fuo boro?
4 Si a taata ka mangasunge na ni ho mo akaraga tiro ni fuo boro. Gupai gbua si aida mo mangihe nga ka mangasunge na agu averesi gumbayo paha giihe yo ka karagapai kuti gu sanahe mo asanaha ti digido gu bambata regbo mo agbia gu boro re. Mbata fu mo ga, mo ya bero kuti sura gu burosua nga Wene Pangbanga, mo yugu gu burosua re funi na gu wirikapai nafura tipa gupai oni nasakihe na ni, na ki fu gu burosua re funi. Ka ni idi na ni, mo mangi mbakadapai ka ye ka sakapai na ni rogoho berewe. Ka mo mangi gipai re wo, gure nga mo ima tona wisigo Ziazia Kekeapai na boro! Watadu kuba gupai nga ka fu burosua, mo rengbe ka fu gu kura trakte funi na ki mangi mbakadapai ka karagatiro ka sakapai na ni rogoho.
5. Waigu nyakipa atrakte gene gaani sunge tungusapai yo?
5 Ani ima mangasunge na atrakte gene tungusapai yo tipa agarã naima susa 130. Wa vura duhe nga angbatungaha nibakiakia na bakindigoho nibakia kia, si nga bawene ũsunge gene tungusapai yo. Ani mangingo sunge amanga na gi vovo ũsunge re tipa kaa gbandaka gu inohe nga ga Ziazia Kekeapai auru kpotosende dunduko.—Snz 20:13.