AGU APAI NANDU NA GUPAI DU TI KPOTOHO | WAI KA GBIA UNDO TI GEDA ZIAZIA KEKEAPAI
Tipagine si Aida Mo Gedi Ziazia Kekeapai ti Ni?
“Mi aberẽ gupai nga Ziazia Kekeapai nika du ni mbumbuhe tipa ka giarogo yo.”—Jovy
“Mi abihe nga mi agbianga ngbarago ti ni te.”—Queennie
“Ho mi abi kpakuto ngba Ziazia Kekeapai ni, nyemu gedaha kini gbataka ti re.”—Ezekiel
Ya mo mo aberẽnga pa geda Ziazia Kekeapai ono mo ki mbuhe mbiko agi pai naadu tipa agu aboro du payo kuari re? Geda Ziazia Kekeapai ima kpakara fu kura aboro. Ono na ka mo ini gupai nga Ziazia Kekeapai ima rengbe ka undo ro mo du na ngbarago rogo gamo raka yo? Na ka si du nga, kura agene kinaho rengbe mo ka geda Ziazia Kekeapai ngbaha si ki fu ngbarago foro? Ya mo mo adu na nyemu ka geda agu apai Ziazia Kekeapai narengbe ka mangaha foro?
Mo bingo bete fugo agu aboro natona geda Ziazia Kekeapai si ki ye na dungu amaku fuyo.
Ezekiel du garãko 20 aya: “Mbata kusayo mi adu wakina gu ba gbe tarambiri nandu zanga ino gu ba ni andu ku rogoho. Ono pa geda mi Ziazia Kekeapai ima undo re tipa gimi raka du na rogo yo ti ni. Si na arugute rogoho rengbe mi ka mangasunge na ni rogo aʹuru ni basasa.”
Frieda, du garãri nga 20, aya: “Dedede mi anaazinga ni ipo. Ono mbikopa tona mi geda Ziazia Kekeapai, mi ima wirika wai ka za ti re. Gere ima saha fere taata mi naamangapai na kura aboro, na mi ima du na dungu abakure awere.”
Eunice du garãri nga 50 apepai tipa Ziazia Kekeapai ki ya, “Si naundo re mi du ni wene boro, na tipa mi aria agu asino re adunga ni wenehe ya.”
Agi agedi Ziazia Kekeapai re gbiati kura dungu amirioni aboro ima wirika gupai nga, geda Ziazia Kekeapai ima rengba ka undo ro tipa mo raki gu raka du na ngbarago. (Yesaya 48:17, 18) Dagba kura dungu apai, si rengbe ka undo ro (1) mo mangi wene adiaberã, (2) mo gbia wene abakure, (3) mo di be gberãrago, na (4) Gu ngba ki susi nga, mo wiriki rengo tipa Mbori. Agu arugute du rogo Ziazia Kekeapai naye be Mbori, si arengbanga na ingisa ro te. Ka Mbori fu nga iraira arugute a te.
Gupai si aidaha nga, mo tona gedaha. Ono gini bete apai rengbe ka undo ro mo tona geda Ziazia Kekeapai na kini gbia ngbarago ti ni?