Da Nangbembatayo fu ga Mbori Aboro Areme?

1, 2. Fuo Yesu ga ku ngbangbaturũ yo, ginipai gako amokedi arengbe ka bakabangiriyo na ni?

GA YESU amokedi aru ri Bagangara Aeraya, kini ngere ku ariyo. I aangera ku ariyo kaa bi baira yo nangia bakurea yo nga Yesu wa ko aaga ku ngbangbaturũ yo kini ingi ku rogo rungbutorungbuto mai. (Amo. 1:9, 10) Tipa agarã wa ue, Yesu ayugupai fuyo, kini ngarasi yo na kini ngbembatayo fuyo. Ono awere ko kini ga. Ginipai i nika mangaha?

² Yesu agumba gupai fu apefuoko nga: “Oni adu ni adezirere, Yerusarema yo na Yuda yo a Somorona yo, na digida sende yo.” (Amo. 1:8) Wai du ka i arengbe ka manga gi sunge re? Rengo ngaha nga, Yesu aima kidoyo nga i nika gbia ziazia toro agbia barambeda. (Amo. 1:5) Ono wa si avura duwo, tipa ka tungusapai rogo zegino dunduko, si aaida gupai nga riigbu duho gbiati rugapai. Tipa Yekova rugu gu gako aboro naadu bakuru kusayo na ka mbakada yo, ko amangisunge na agu aboro naaru kubako. Sidu, amokedi aima rengba ka bakabangiriyo nga, ‘Ya mo Yekova nika maa vovo bangbembatayo awere?’

3. (a) Tingbafuo Yesu ga ku ngbangbaturũ yo, gini nyanyakipa diaberã ruru amokedi amangihe? (b) Gini apai ani ka wisigoho rogo gi kekeapai re?

³ Mbata fu aposo ue, ga Yesu abawiriki angere ku rogo Ziazia Kekeapai yo, ki kpari tipa ga Mbori rugapai, na ki sia Matia ko du kuba Yuda ni namba bawe na ue mokedi. (Amo. 1:15​-26) Tipagine gi siahe re adu ti ni na nyanyakipaha fuyo na fu Yekova? Matia ahiisi gu nyanyakipa ba si aaida boro aida rogoho.a Yesu aasianga gako amokedi i naasungo gbua patiko ti regbo gako sunge tungusapai te ono tipa i mangi nyanyakipa sunge dagba ga Mbori aboro. Gini sunge nangia ha, na wai du Yekova ambakadiyo tipaha vurube Yesu? Gini ambakadapai duho wa kina gure areme dagba ga Mbori aboro? Na wai rengbe ani ka ‘tíngida pa agu yo nangbembatayo furani,’ gbe aguyo du nga ‘ruru kangara moyambu’?​—Eb. 13:7; Mt. 24:45.

GU RIIGBU DU TII GU BAZOGO I ABINGO KO YA

4. Gini asunge agu amokedi gbiati kura abaakumba naadu Yerusarema yo rogo bambata kama agarã aamangaha?

⁴ Ti regbo Pendekote rogo gu garã nangia 33 Fuo Batikayo Kristo, amokedi atona ngbembatayo rogo gu dungurati nga ga aKristano. Ti gu regbo re, ‘Petero aru kuari na agu yo naanidu bawe na sa’ ki tona yugo gu rengo nga ga bata fu gu ndurumo aboro nangia aYudo gbiati agu aboro nasa tiyo ku rogo gu pambori nga ga aYudo. (Amo. 2:14, 15) Dunguyo ada ni aidipase. Fuo gure ngbutuko, gi vovo aKristano re “ki nye anye rogo ga amokedi yugopai yo na gayo ngbanya nyanyaki.” (Amo. 2:42) Amokedi naangera kuriipa agu amarã nangia ga dungurati. (Amo. 4:34, 35) I aangera fuo agu azingo nga ga toro nangia ga ga Mbori aboro, kini pe gupai nga: “Ani aka aka kuti kparakpe tigaani kindi na tungusapai.” (Amo. 6:4) Na i asia aKristano nga aguyo naadu na inohe tipa i mangi sunge tungusa wene pangbanga rogo vovo adagbarago. (Amo. 8:14, 15) Fuo bete regbo kusa, kura mbedimbedi abaakumba akoditiyo na amokedi kaa ngerakurii agu apai nga ga adungurati. Ni du yo ni riigbu bipasunge, i aafu arugapai fu adungurati dunduko.​—Amo. 15:2.

5, 6. (a) Wai du ziazia toro aafu ome fu riigbu bipasunge? (Oni bi gu sura duti tonatonaha.) (b) Wai du amaraika aundo riigbu bipasunge? (d) Wai du Fugo Mbori aangbembatayo fu riigbu bipasunge?

⁵ Agu aKristano naadu rogo bambata kama agarã aima ino gupai nga Yekova du naangbembatayo fu riigbu bipasunge vurube gayo Bangbembatayo nga Yesu. Wai du i arengbe ka ino gipai re ni ndikidi rengo? Bambatapai nga, ziazia toro aafu ome fu riigbu bipasunge. (Yo. 16:13) Mbedimbedi aKristano dunduko nagbia ziazia toro, ono gbe si aundo amokedi gbiati kura abaakumba Yerusarema yo i naamanga gayo sunge ababiapai. Ni kpiapai, rogo gu garã nangia 49 Fuo Batikayo Kristo, ziazia toro angbembatayo fu riigbu bipasunge tipa si mangi diaberã nibipa yeratise. Adungurati apekefuo gayo rugapai na ‘kini nyaki rogo idapase yo, ki nge ange na aʹuru.’ (Amo. 16:4, 5) Gu waraga du na pa gu diaberã re rogoho nayugo gupai a nga riigbu bipasunge aayugo zuzu ga Mbori toro, wa agu nga nyemuse gbiati idapase.​—Amo. 15:11, 25-​29; Gara. 5: 22, 23.

⁶ Uepai nga, amaraika aundo riigbu bipasunge. Mbata fu Korunerio zi bapatiza ni gu bambata Kristano nga Gendiria na ni zanga yeratise, maraika ape gupai fuko nga ko kedi sunge fuo gu mokedi nangia Petero. Fuo Petero tungusipai fu Korunerio na agumeko, i agbia ziazia toro, wa si avura du nga i aayeranga yo te vurũ. Gipai re asa amokedi gbiati kura awirina i ra ni goyo fu gupai Mbori akpinyemuhe na ki di agu aGendiria kugume i aayeranga yo ya ku rogo gu dungurati nga ga aKristano. (Amo. 11:13-​18) Kurigure, amaraika aundo sunge tungusapai zaaza nga gu riigbu bipasunge aangera kuriihe na ki ipisihe. (Amo. 5:19, 20) Biatapai nga, Fugo Mbori aangbembatayo fu riigbu bipasunge. Si ngia i arugusa agu ayugopai nga ga pambori watadu i aafu arugapai nga ga riigbu, agu abaakumba naadu ni mbedimbedi yo na ziazia toro re aambu Ziazia Kekeapai si ningbe fuyo kumbatayo.​—Amo. 1:20-​22; 15:15-​20.

7. Tipagine rengbe ani ka ya ti ni wẽ Yesu aangbembatayo fu agu aKristano naadu mbata?

⁷ Wa si avura du nga riigbu bipasunge adu na pagbia rogo gu dungurati naadu ti tonatonaha, i aima ino gupai nga gayo Bangbembatayo angia Yesu. Gu mokedi nangia Pauro akepai ki ya, ‘Ko [Kristo] afu agu yo i du ni amokedi.’ ‘Ani naagumba rengo ni nyemuse, ki nisono na apai dũ ku rogo ko yo, nga riihe, nga kina Kristo.’ (Ef. 4:11, 15) Kuba gupai nga kaa yamba tiyo na rimo gu mokedi rimoni awo awo gbe, “abawiriki ayamba tiyo na gu rimo nga aKristano.” (Amo. 11:26) Rengo ngaha nga, Pauro aima inopa nyakapa ‘ka kuti asino nyanyaki,’ watadu agu ayugopai mburuhe adu rii Ziazia Kekeapai, nga gu amokedi gbiati gu kura akumba naangbembatayo aafuhe. Ono wa si avura duwo, ko ape gupai nga: “Ono mi nakpi nyemu oni ini he ya, ri akumba dunduko [kodihe na agu aboro dunduko du rogo riigbu bipasunge] nga Kristo; ri de ki ngia kumba; ri Kristo ki ngia Mbori.” (1 Kor. 11:2, 3) Nirengo, Kristo Yesu aangbembatayo rogo dungurati tii Riko, nga Yekova Mbori.

“GA BORO SUNGE NGA HA TE, ONO GA MBORI”

8, 9. Natona ti digido 19 kama agarã, gini nyanyakipa sunge Wiriba Russell amangihe?

⁸ Natona rogo 19 kama agarã, Charles Taze Russell gbiati kura abakureako amangi asadatise ka sigira ndikidi irisombori nga ga aKristano kubaha. Tipa ka gbandaka gu rengo nga ga Ziazia Kekeapai rogo dungu afugo, i asigira Zion’s Watch Tower Tract Society kuti gu ndiko nga ga irangbii rogo gu garã nangia 1884, na gu Wirina nangia Russell ki ngia bangerekuriisunge.b Ko angia wene bawisigi Ziazia Kekeapai, na ko ki kusi agu aziree yugopai zanga gunde ku yangura nga ga Tirinita gbiati gu nga mbisimo ni guhe akpingo ya. Ko aini gupai nga Kristo nika ye berewe rogo gu gene i nika bingo ko abi ya, na ki ini gupai a nga “rago aGendiria” nika nyasa rogo 1914. (Rk. 21:24) Wiriba Russell afu gako regbo, ome, gbiati marã dunduko tipa ka tungusa agi arengo re fu kura aboro. Si tie ziazia nga, ti gu regbo re, Yekova gbiati rii dungurati aamangasunge na Wiriba Russell.

⁹ Wiriba Russell aagbatanga taarimo be aboro te. Rogo 1896, ko akepai ki ya: “Ani aidanga i fu kparakpara irisa furani te, ani aidanga aboro fu bakere irisa furani tipa gaani kekeapai te; ani aidanga aboro naayamba rani nga Barani watadu Bayugupai te. Na ani aidanga aboro naayamba tiyo na rimorani a te.” Ko aya kusa berewe wẽ: “Ga boro sunge nga ha te, ono ga Mbori.”

10. (a) Ti gini regbo Yesu amoi ‘ruru kangara moyambu’? (b) Oni pekenga pa wai du Riigbu Bipasunge kia ti gu papara riigbu nga Watch Tower Society nabipa agu apai du kuti gu ndiko nga ga irangbii.

¹⁰ Rogo 1919, agarã biata fuo kpi Wiriba Russell, Yesu amoi ‘ruru kangara moyambu.’ Tipa ginipai? Tipa i naafu ‘riahe fu gako aborokporo ti ragoho.’ (Mt. 24:45) Zavura ti agu aregbo re, umba badona nga ga mbedimbedi awirina nga aguyo naamangasunge rogo gaani bakere basunge Brooklyn, New York yo, aambakada riahe nga ga toro kini gamuhe fu apefuo Yesu. Gu fugo nga “riigbu bipasunge” atona kura rogo gaani awaraga tingbafuo 1940, na ti gu regbo re, aboro aagia rogoyo nga si aandu sa na Watch Tower Bible and Tract Society. Ono tie, rogo 1971, si aye ka da ziazia nga Riigbu Bipasunge kia ti Watch Tower Society, nga gu papara riigbu tigaha naabipa agu apai du kuti gu ndiko nga ga irangbii na kidu na aboro rogoho ni abarugupasunge, angianga agu apai nga ga toro ya. Natona ti gu regbo re, Riigbu Bipasunge adu na mbedimbedi awirina rogoho nga aguyo naadunga ni abarugupasunge rogo Watch Tower Society ya. Vuru agu agarã susi bambeda kusayo, awirina dagba “kura akandoro” ni abangerekurii apai ima mangasunge ni abarugupasunge rogo gu papara riigbu nabipa agu apai du kuti gu ndiko nga ga irangbii, rogo gi gene re, si kini mbu regbo fu Riigbu Bipasunge si namaa berãse fuo kusa agu arugapai nga ga toro. (Yo. 10:16; Amo. 6:4) Gu Ngbaõbambu Sinziri nangia ga Bamburu 1, 2013, asakirogo gupai yo nga, ‘ruru kangara moyambu’ nga umba badona nga ga mbedimbedi awirina ni akumba, nga aguyo du rogo Riigbu Bipasunge.

11. Wai du Riigbu Bipasunge amangasunge?

¹¹ Riigbu Bipasunge namanga nyanyakipa adiaberã kina sa. Wai du duhe wo? Agu awirina du rogo Riigbu Bipasunge naadunguratiyo na aposo dunduko, na gere nasayo i du na dawedawe fugodagbase na kidu na kodatise. (Snz. 20:18) Rogo agarã dunduko ni basasa i aʹaria gu boro du nga basungu rii kiti ti regbo agu adunguratise re, bambiko boro ho rogo Riigbu Bipasunge nyakipa ni kisusi akura ni te. (1 Pet. 5:1) Kina gu bangisa pai re a du tipa agu arondo sita nga ga Riigbu Bipasunge. Boro ho dagba agu awirina du rogo Riigbu Bipasunge nabi tini ni bangerekurii kura awirinani te, ono ni nabi tini ni boro sa dagba “aboro kporo,” nga aguyo nagbia riahe nga ga toro be ruru kangara moyambu, na kini pekefuo gaha rugapai.

‘DA NGA GU RURU KANGARA MOYAMBU?’

12. Wadu he nga ziazia toro apekanga apai fu Riigbu Bipasunge te na si namanga aingahe amanga, gini asanahe nakura?

¹² Anga ziazia toro napeka apai fu Riigbu Bipasunge watadu ka si mangingo ingahe te te. Sidu, si ima rengba ka manga ingahe rogo sakarogo agu apai yo nga ga toro watadu agu arugapai nga ga riigbu. Ni kpiapai, Watch Tower Publications Index nga gu du rogo pa-Ingirisi na riipai rogoho nga “Beliefs Clarified,” nga gu natangara aʹariapai rogo gaani giarogopai yo nga ga Ziazia Kekeapai tona rogo 1870. Rengo ngaha nga, Yesu aayanga furani wẽ gako ruru kangara moyambu nikaa kusa rengberengbe riahe nga ga toro te. Sidu, wai du rengbe ani ka karagapai kuti gu ga Yesu sanahe nga: ‘Da nga gu ruru kangara moyambu?’ (Mt. 24:45) Gini gopai duho nayugo gupai nga Riigbu Bipasunge du nga ruru kangara moyambu? Ani wisigingo apai biata nga gu naundo riigbu bipasunge rogo bambata kama agarã.

13. Wai du ziazia toro naundo Riigbu Bipasunge?

¹³ Gopai nga ga ziazia toro. Ziazia toro ima undo Riigbu Bipasunge si girogo agu arengo yo nga ga Ziazia Kekeapai, nga gu si aagianga rogoyo mbata ya. Ni kpiapai, oni berẽnga kuriipa agu aʹariapai rogo gaani giarogopai yo i nigumba paha rogo gu genewaraga nidu mbata fu gere. Nirengo, wiri boro ho kaa rengbe ka giarogo gi ‘dudungura apai yo nga ga Mbori re’, ki sakirogoyo nitini te! (Oni gedi 1 AKorindo 2:10.) Riigbu Bipasunge nabi tihe wa kina gu mokedi nangia Pauro, nga guko nakepai ki ya: “Agu apai ani nagumba ha, ni agu apai ga boro tatamana nayugo ho te, ono gu toro nayugo.” (1 Kor.2:13) Naatona rogo 1919, ginihe du ninaasa gupai nga giarogopai yo nga ga Ziazia Kekeapai nisono kina kumbatayo samungu kuti ndikidi pambori gbiati gu bitimo nga ga toro ki vura du tipa dungu agarã vurũ? Nirengo, kurahe ho te, kina ziazia toro sa.

14. Ringbisihe kuti Yugoti 14:6, 7, wai du amaraika aundo ga Mbori aboro areme?

¹⁴ Gopai nga ga gu undo nga ga amaraika. Riigbu Bipasunge na gu bakere sunge behe nga ga ngerakurii sunge tungusapai rogo zegino dunduko, nga gu nakoda abatungusi wene pangbanga bangeyo naima susa amirioni muambe. Ginipai ninaasa gi sunge re si du na diabese? Ndupai sa nga amaraika naundo ho aundo. (Oni gedi Yugoti 14:6, 7.) Dungu aregbo kinaho abatungusipai aima ndu fuo agu aboro naamanga kparakpee tipa ga Mbori undo, i ki ta nyasaha anyasa abatungusipai ki da!c Gu sonakumbatayo nga ga sunge tungusipai na sunge sa aboro ni abawiriki namanga rogo zegino dunduko si ki vura du nga bakere sogote du rogo kura aringara, si namanga wo mbiko gu undo nga ga amaraika.

15. Gini kparakparapai du dangba Riigbu Bipasunge na agu abarumbatayo nga ga agu akanisa i aya tipaha wẽ si nga ga aKristano? Oni funga kpiapai.

¹⁵ Kido kuti Fugo Mbori. (Oni gedi Yoane 17:17.) Oni berẽnga kurii gupai naamangi rogo 1973. Gu Ngbaõbambu Sinziri nangia ga Bazinga 1 asanahe ki ya: “Agu . . . aboro ambunga vu gundö ya, ya mo i rẽ tipa ka zio bapatiza?” Karagapai angia: “Gopai rogo Ziazia Kekeapai nayugo gupai nga, i arẽnga te.” Gu Ngbaõbambu Sinziri re amangisunge na dungu averesi ka sakarogo gu ndupai yo si aida i kusi gu boro akusa ti ni rogo dungurati aidanga ka saberã ni ti vu gundö ya. (1 Kor. 5:7; 2 Kor. 7:1) Si agumba gupai nga: “Gipai re ayengo be boro te. Ono si naye be Mbori, nga guko nafura rogo Fugoko yo.” Ya mo kura ariigbu ho berewe nga ga pambori nakido kuti Fugo Mbori, zavura ho mangaha ni wo narengbe kadu ni kere mbumbupai fu avuruhe? Buku sa nga gu nafura tipa apambori Amerika yo ape gupai nga: “Abarumbatayo rogo agu apambori nga ga aKristano naʹaria gayo ayugopai dedede tipa si nindu sa na gu bipai du avuruyo na ni gbiati kura aboro dunduko.” Ka si du nga Riigbu Bipasunge nambu Fugo Mbori si naangbembatayo fuhe kuba agu abipai nga ga aboro ho si adiaberã ni, da du nzunzu nangbembatayo fu ga Mbori aboro areme?

“ONI TÍNGIDI PA AGU YO [NANGBEMBATAYO FURONI, NW].”

16. Gini gene sa rengbe ani ka tingidapa Riigbu Bipasunge ngbaha?

¹⁶ Oni gedi AEbere 13:7. Gu fugo nga “oni tíngidi,” i ima rengba ka saha a nga “oni pepa.” Sidu tie, gene sa rengbe oni ka ‘tingidapa aguyo nangbembatayo’ ngbaha nga ka pepa Riigbu Bipasunge rogo gaoni akparakpee yo. (Ef. 6:18) Oni naaberã kurii gu sunge i amangaha nga ga kusa gu riahe nga ga toro, ngera kurii sunge tungusapai rogo zegino dunduko, gbiati ngerafuo agu amarã aboro afuhe ni gamahe. Nirengo, si naida ani naamanga kparakpee tipa yo kakaka!

17, 18. (a) Wai du ani apekafuo gu rugapai nga ga Riigbu Bipasunge? (b) Wai du gaani sunge tungusapai aundo ruru kangara moyambu gbiati Yesu?

¹⁷ Tingidapa Riigbu Bipasunge nakoda pekafuo gayo arugapai a. Riigbu Bipasunge nafu arugapai rogo gaani awaraga, ti regbo gaani adunguratise, bakere adunguratise, gbiati kikindigi adunguratise. Kurigure, si namaa ababi adungurati, nga aguyo namaa abaakumba rogo dungurati. Ababi adungurati na abaakumba natingidapa Riigbu Bipasunge ni peka yo fuo agu arugute i afuhe fuyo. Ani dunduko nayugo irisa tipa gaani Bangbembatayo nga Yesu, ni gia ani sangbako na ni ra ani ni gorani fu agu akumba ko amangasunge na yo i naangbembatayo furani.​—Eb. 13:17.

¹⁸ Gu kura gene rengbe ani ka tingidapa Riigbu Bipasunge ngbaha nga kaa manga asadatise kafu tirani tipa sunge tungusapai. Gu kurapai berewe nga, Pauro angarasi aKristano i wiriki gu idapase nga ga aguyo nangbembatayo fuyo. Ruru kangara moyambu ima yugo bakere idapase ni du yo ni agu aboro natungusa wene pangbanga zaaza. Ya mo mo dagba gu kura akandoro naundo mbedimbedi aKristano ti gi nyanyakipa sunge re? Nairiwo gu bakere ngbarago mo nika du na ni ho ga Bangbembatayo nga Yesu nika ya ni wẽ: ‘Wa mo anamanga ha fu agi awirinami re ka ni vura du sa dagba gi payapaya yo re vurũ, mo amangi he fere.’​—Mt. 25:34-​40.

19. Tipagine di mo berã tini ka pekafuo gaani Bangbembatayo nga Yesu?

¹⁹ Ho Yesu aga ni ku ngbangbaturũ yo, ko aambunga apefuoko te. (Mt. 28:20) Ko aima ino wai ziazia toro, amaraika, gbiati Fugo Mbori aundo ko ko ngbembatayo ho ko adu ni auru kpotosende. Sidu, ko nafu kina gu bangisa undo re fu ruru kangara moyambu areme. Gu mbedimbedi aKristano nga kangara moyambu “naapeka Wiri Kandoro ku ho ko andu ku ho ni dunduko.” (Yugo. 14:4) Ho ani apekafuo gayo rugapai ni, gure nga ani napekafuo gaani Bangbembatayo nga Yesu. Barambeda, ko nika ngbembatayo furani ku rogo nyenye unga. (Yugo. 7:14-17) Na Bangbembatayo ho nga wiri boro rengbe ka manga gu kidohe re te!