Wai ka sa Gamo Wisigo Ziazia Kekeapai si du ni Wenehe Gbe na Mo Kini Gbia Ngbarago Ti Ni

YOSUA agbia nyanyaki sunge. Si adu nga ko nungusi aYisaraere ku Ringara Mokido yo rogo dungu akpakarapai. Yekova akido ko nga ko nika duadu na diabese, na ko ki ngarasi ko nga: ‘Mo dú nyanyaki ki du na bakere erã, ki ka kuti manga pa apai wa du pa rugute dunduko. Mo mákia pa ha uru na yuru ka ka kuti manga pa agu apai dunduko du ni keke he rogo ho. Si du mo ka u ti ni rogo gamo apai, mo ki du ni iratatamana.’​—Yos. 1:7, 8.

Ti gi “gbegberẽ [regbo]” ani araka ti ni re, ani nagbiatirani agbia a na akpakarapai. (2 Tim. 3:1) Ani rengbe kadu na diabese wa Yosua ka ani pekefuo gu rugute Yekova afuhe fuko. Si naida ani nigedi Ziazia Kekeapai na aʹuru dunduko, na kini mangipai kuti gu bangua arengo ani awirikaha tipa agu aʹasada rengbe ani ka gbiatirani na ni.

Ono tie, badungu rani rengbe ka ida kuti gupai nga wene abawisigipai nga ani te na wisigopai ima nyaka furani. Ono tie, wadu he nga pa wisigo Ziazia Kekeapai ima nyaka, wisigo mo gu sanduki nga, “Mo Asadingo Agi Aberãpai Re” nika undo ro mo gbia undo ti gamo wisigopai na ki gbia ngbarago ti ni.

Bake papara Atambuahe abibia ki ya, ‘Mo gási re ngba gene sangbaro; bambiko gi ngbarago du rogo ho.’ (Tam. 119:35) Mo ima rengba ka gbia bakere ngbarago ti makia mo Fugo Mbori. Wa mo nikaa wisigo Fugo Mbori dudunguro, mo nika gbia agu aũkumuko nga ga toro.

Wa vura duhe nga si aidanga aida mo nungusi rikaaboro wa gu Yosua amangihe te, akpakarapai kinaho mo andu rogoho. Sidu, wakina Yosua, mo wisigi Fugo Mbori na ki mangipai kuti gupai du ni kekehe rogoho. Ka mo mangihe wo, mo nika duadu a na diabese na ki mangipai ni tatamana.